Marash Arra do të qëndrojë dhe 40 ditë në burg. Ky është vendimi i Gjykatës së Shkodrës ndaj 25-vjeçarit që dyshohet se është autor i vrasjes së kushëririt të tij, shtetasit Lazër Arra. Prokuroria e qytetit Veri-Perëndimor kërkoi të enjten burg me afat 40 ditë për shtetasin Marash Arra, deri në përfundimin e ekspertimit të rrobave dhe provave të tjera plotësuese.
Gjyqtarja Ermira Dedja pranoi kërkesën e prokurorisë duke lënë në qeli të riun. Marash Arra dyshohet se është autori i vrasjes së shtetasit Lazër Arra, me të cilin kishte lidhje familjare. Ngjarja e rëndë ndodhi të hënën në fshatin Shosh të Dukagjinit në Shkodër.
Lazër Arra, 55 vjeç kishte shkuar në fshat për të mbledhur prodhimet bujqësore, por gjeti vdekjen. Ai u gjet nga dy të afërm të tij në mesin e rrugës i vrarë me dy plumba, u raportua fillimisht. Megjithatë, pas hetimeve paraprake, policia arrestoi personin i cili kishte telefonuar policinë për ngjarjen, shetasin Marash Arra, i cili ishte kushëri i Lazër Arra.
