Jonida shkon në finale dhe ka një mesazh për shqiptarët

Megjithëse e shanë për anglishten, Jonida ia doli ta çojë Shqipërinë në finalen e madhe të Eurovizionit dhe pas kësaj ka bërë një status në Instagram, duke dhënë dhe një mesazh për të gjithë shqiptarët, ata që shkruan mirë, ata që e votuan por edhe për ata që ç’nuk thanë.

“Shqiponja prek qiellin, sytë dhe këmbët rikthen gjithmonë në tokë!! Nuk kam heshtur asnjë moment në këtë rrugëtim, edhe kur dëgjoja në korr fansat europiane që këndonin shqip #Kthejutokës, edhe kur më nisnin nga Tirana lajme nga më të çuditshmet! Unë bëra dje atë për të cilën marrë frymë, për të cilën edhe erdha në këtë skenë: Këndova!! Jam emocionuar si kurrë më parë me 3 minutat e mia dhe të Shqipërisë, akoma më shumë kur dëgjova: Albania! Po jetoj ëndrrën time, mbështetja dhe votat tuaja nuk ndalen fluturimin e shqiponjës!! Jemi në finale, por tashmë unë mendoj se kemi fituar, jo vetëm me kualifikimin por edhe me njëri-tjetrin! U bëmë bashkë si kurrë më parë dhe unë për këtë ju jam pafund mirënjohëse!!! Ju dua shumë, shihemi në finale”, shkruan Jonida e cila do të performojë sërish nesër mbrëma në finalen e madhe të Eurovizionit.

Kur shahen presidentët në Tiranë

Ish presidenti Bamir Topi ka botuar së fundi librin me kujtime “Nocturn”, kur përshkruan ngjarje nga jeta politike. Gazetat sot kanë shkëptur një pjesë ku ish presidenti Topi ka përshkruar momentin e futjes në politikë të Bujar Nishanit. Topi shkruan se Bujar Nishani ishte thjeshtë një punonjës karburanti tek Plepat në Durrës kur ai e futi në politikë dhe e takoi për herë të parë me Sali Berishën.

“–Mendoj që pas rezultateve zhgënjyese, Shaban Memia duhet të lirohet nga detyra e sekretarit, -tha ai (Berisha). Vendosa të mos shprehesha dhe të dëgjoja se ku do të dilte. -Unë nuk kam një emër për ta zëvendësuar dhe po e pate ndonjë, na thuaj ta propozojmë në mbledhjen e radhës në Kryesisë, – tha Berisha. Pas një pauze të shkurtër i them se nuk kam përse mendohem, sepse e kam një emër. -Cili është? -Është personi që ka qenë kryetar komisioni në zonën tim elektorale, Bujar Nishani quhet, – i thash duke menduar se do e njihte ndopak. -Nuk e njoh, çfarë profesioni ka ky? -Ka qenë oficer dhe tani punon në një biznes privat, i punësuar. E lash shpjegimin me kaq, për të mos e ndërlikuar situatën, duke mos i thënë që punonte në një pikë karburanti. Në fakt unë doja shumë që aty të ishte Bujari, pasi krijova konsideratë për të dhe doja t’ia ‘shpërbleja’ angazhimin që pati në punën e komisionit të zonës sime, ku beteja zgjedhore ishte një nga më të fortat në Tiranë. Berisha, pasi u mendua pak, me sa duket duke mos pasur ndonjë emër tjetër në mendje vazhdoi: Hajde nesër së bashku me të, ta takoj njëherë!”, shkruan Topi I cili më pas shton se Nishani I ka dalë kundër në 2007 kur ai do të kandidonte si president. Madje Topi shkon më tej duke e cilësuar Nishanin “intelektual mediokër dhe servil i Sali Berishës”.

I menjëherëm ka qenë reagimi i ish presidentit Bujar Nishanit. Ai shkruan sot se nuk i është dashur kurrë të punojë se pompist por nëse do kishte nevojë do e kishte bërë edhe atë punë. Ai gjitashtu tregon se kur hyri në presidencë pas Bamir Topit e gjeti atë të kthyer në një mensë.

“Nuk kam preferuar kurrë ti kundërpërgjigjem provokimeve dhe sulmeve të ndërsyera të Bamir Topit vetëm për një arsye.

Duke e njohur mirë atë njeri, që për shkak të kompleksit të thellë të inferioritetit që e karakterizon, është përpjekur gjithë jetën e tij vegjetative të ndërtojë kontraste haluçinante me të tjerët që e mundonin me qënien e tyre.

Nuk kam reaguar as kur mora detyrën e Presidentit të Republikës dhe u skandalizova kur e gjeta institucionin më të lartë të Shtetit Shqiptar të kthyer në një vend ku kalbeshin mbeturina të hedhura prej vitesh, e ku vendi më i investuar ishte kuzhina e gatimit dhe menca e ngrënies.

Në fakt nuk mund ta mendoja më parë se si zyra e Kryetarit të Shtetit të kthehej në kuzhinë gatimi e ngrënie.

Natyrisht që e ktheva urgjentisht atë ambient në një bibliotekë e dhomë për median dhe të gjithë ambientin e Presidencës në një vend dinjitoz për shtetin e qytetarët.

Tashmë Bamiri më paska bërë edhe pompist karburanti !!!

Të punosh pompist nuk është ndonjë gjë e keqe aspak.

Kam respektin dhe nderimin tim më të madh për të gjithë ata shqiptarë të ndershëm që bëjnë atë punë.

Ajo është shumë më e ndershme se sa p.sh. ti ushqesh fëmijët me paratë që ju merr si gjoba gjyqtarëve e prokurorëve.

Por mua nuk më është dashur të punojë kurrë si pompist.

Nëse do ta kisha të nevojshme atë punë do ta bejë pa asnjë problem”, shkruan Nishani.

SHBA jep 5 milionë $ kundër ekstremizmit të dhunshëm në Shqipëri

“Shqipëria është një udhëheqëse e cila vendosi një standard për pjesën tjetër të rajonit”. Kështu është shprehur sot e ngarkuara me punë e SHBA-së në Tiranë, Leyla Moses-Ones në aktivitetin “Përtej kufijve të shkollës: Të menduarit e shkollës si qendër komunitare”. Ajo tha se Shqipëria ka punuar fort për sa i përket ekstremizmit, ndërsa shtoi se SHBA-në kanë dhënë 5 milion dollarë për këtë fushë.

“Qeveria e Shteteve të Bashkuara të Amerikës mbështet më shumë se 5 milionë dollarë programe të financuara nga ndihma kundër ekstremizmit të dhunshëm në Shqipëri. Ne po ju ndihmojmë jo vetëm të ndërtoni aftësinë përtëritëse të komuniteteve, por edhe po fuqizojmë gratë dhe të rinjtë, po forcojmë qeverisjen vendore dhe po nxisim zëra të matur brenda bashkësive fetare. Ne, mbetemi të përkushtuar ndaj partneritetit tonë”, u shpreh Leyla Moses-Ones.

“Ende ka hije të së kaluarës në Shqipëri, refuzohet dialogu me kundërshtarin”

Ambasadori i OSBE-së në Shqipëri, Bernd Borchardt ka dhënë mesazhe të qarta për politikën shqiptare, ndërsa ka reaguar për herë të parë pas sulmit në rezidencën e tij me shënimin në mur “turp të kesh”.

Ambasadori Borchardt ka qenë sot i pranishëm në konferencën ndërkombëtare shkencore “Fytyra e armikut të popullit gjatë diktaturës së proletariatit në Shqipëri, 1944-1990”, ku ka bërë krahasime të regjimit komunist me zgjatime dhe sjellje të ngjashme të politikës së sotme.

Borchardt tha se zgjatime të së kaluarës totalitare ka ende dhe në Shqipëri dhe se sulmohet kush vendos fakte kundër mitit.

“Po në Shqipëri – sa të gjata janë hijet e së kaluarës totalitare këtu? Sa më shumë nxehet debati, aq më shumë dëgjojmë anatemime në grup të atyre që mendojnë ndryshe. Nuk dëgjojmë argumente kundër pikëpamjeve të tyre. Flitet dhe shkruhet për të zhbërë karaktere – dhe jo për fakte apo argumente logjike kundër qëndrimit që ata përfaqësojnë. Refuzohet dialogu me kundërshtarin politik. Sulmohen ata që përpiqen të vendosin faktet kundër mitit.

Pra, hijet janë të gjata. Tepër aktorë politikë kryesorë, herët a vonë, përfundojnë duke akuzuar njëri-tjetrin me metaforat dhe retorikën karakteristike për mënyrën sesi metoda e “armikut të popullit” e kupton politikën dhe jetën publike. Kjo vazhdon ta dëmtojë shoqërinë edhe sot, shumë kohë pasi regjimi politik diktatorial vrastar ka dhënë shpirt, përmes mbajtjes gjallë të perceptimit se një person i vetëm mishëron kombin dhe ka pushtetin të përcaktojë dhe ndëshkojë armiqtë në emër të një nocioni të fabrikuar të moralit, që gjoja rrjedh nga masat”, u shpreh ai.

Kohët e fundit ambasadori i OSBE-së është sulmuar nga përfaqësues të opozitës.

Besar Musolli: Të ardhmes nuk i dihet, dua të fitoj kupën me Kukësin!

Besar Musolli ka shoqëruar trajnerin Ernest Gjoka në konferencën për shtyp gjatë ditës së sotme. Kapiteni i skuadrës verilindore ka folur për disa tema, duke treguar se synon të fitojë përsëri Kupën e Shqipërisë me Kukësin. Musolli ka shprehur dëshirën për të qëndruar, por gjithësesi, ai ka lënë të kuptohet se gjatë verës gjërat mund të ndryshojnë.

Distanca e madhe nga Partizani – “Sa kam unë të Kukësi, nuk kemi qenë kurrë më kaq probleme në një sezon. Kaq shumë dëmtime e probleme, kjo është një arsye e madhe për distancën nga kreu. Në fillim të vitit ishim ner rregull, por më pas ishin të papritura shumë dëmtime”.

Kupa – “E kam fituar edhe më parë, shpresoj ta fitojmë sërish, sepse jemi në një moment të mirë”.

E ardhmja – “Për momentin mendojmë ta mbyllim sezonin me sukses. Unë dua të qëndroj, është shtëpia ime, por nuk i dihet të ardhmes”.

Skënderbeu – “Është e rëndësishme, Skënderbeu është rival historik prej vitesh dhe ndeshjet me ta kanë qenë shumë të luftuara”.

Fokusi – “Mendojmë vetëm për ndeshjen e radhës, ka kohë për finalen. Duam 3 pikë qetësie”.

Stadiumi – “Kam qenë i mendimit që të luajmë gjithnjë në Elbasan. Për mua në Kamzë nuk janë të gjitha kushtet, por për shkak të tifozerisë luajmë aty”.

Ernest Gjoka: Për mua vendos Gjici, disa lojtarë do qëndrojnë dhe për sezonin tjetër!

Ernest Gjoka ka folur në konferencë për shtyp një ditë para ndeshjes së radhës në kampionat. Trajneri i Kukësit ka folur për disa tema, përfshi dhe të ardhmen e tij dhe të disa lojtarëve, që janë ende në dyshim për sezonin tjetër. Ai tha se klubi ka rënë dakord që disa lojtarë të qëndrojnë edhe për sezonin tjetër. Ndërsa ka konfirmuar se Reginaldo do të jetë në planet e klubit për të ardhmen, Gjoka u shpreh se për të ardhmen personale do të ulet të bisedojë me Safet Gjicin.

Dyshimet dhe akuzat – “Nuk kam koment dhe nuk më pëlqen të futem në jetë vorbull fjalësh. Jemi mësuar që problemet janë aty, edhe kur fitojmë, edhe kur humbasim”

Të huajt, kontratat dhe finalja në qershor – “Nuk e kemi bërë ne kërkesën për afrim të finales, ishte propozim i FSHF-së. Ne dhamë OK, që finalja të luhej në 31 maj. Më vonë doli që disa klube refuzuan dhe nuk u ndryshua asgjë. Për lojtarët dhe kontratat, në duam që të vijojmë me këtë grup lojtarësh. Presidenti është OK me këtë ide, sepse grupi aktual ka cilësi dhe vitin tjetër do jetë edhe më cilësor. Ky vit shërbeu për konsolidim dhe asimilim mentaliteti, vitin e ardhshëm do të synojmë titullin”

Reginaldo? – “Është pjesë e planeve të klubit edhe për sezonin e ardhshëm. Sigurisht, flas për pjesën e klubit, pastaj çdo lojtar vendos në varësi të interesit dhe ofertave. Për ne është shumë i rëndësishëm. Në datën 2 për finalen ai do jetë në dispozicion, absolutisht”.

Fokusi te finalja – “Jo, duhet të bëjmë mirë këto 3 javë për të ruajtur vendin e dytë dhe për të mbajtur ekipin në formë perfekte. Skënderbeu ka synimet e veta, por edhe ne kemi synime dhe kjo e bën ndeshjen shumë interesante”.

Skuadra – Deri tani jam shumë i kënaqur, ekipi ka reaguar mirë, edhe pse kemi pasur shumë dëmtime. Kemi luajtur shumë ndeshje në pak kohë, me shumë mungesa, ndaj po bëjmë mirë mendoj”.

Shkurtaj e Shameti – “Shkurtaj u dëmtua në Gjirokastër dhe nuk do jetë nesër. Është në terapi të vazhdueshme, do jetë gati pas një jave. Shameti ka ndjerë sërish dhimbje dhe nuk do jetë i gatshëm”.

Merkato – “Së pari, nuk shohim dot aq larg, sepse kemi objektiva shumë madhore përpara. Së dyti, ky grup ka cilësi, ka pasur nevojë për pak koordinim dhe shumë qetësi”.

E ardhmja – “Në futboll nuk ka asgjë të sigurt. Unë varem nga rezultatet, natyrisht. E kam gjetur ekipin në një moment jo të mirë psikologjik, kemi punuar shumë dhe duam të arrijmë synimet që kemi, para se të flasim për vazhdimësinë me presidentin”.

Skënder Gega analizon Partizanin pas fitores së titullit!

Partizani është zyrtarisht Kampion i Shqipërisë për këtë sezon, me titullin që u sigurua matematikisht në ndeshjen derbi ndaj Tiranës. Trajneri Skënder Gega ka folur në konferencë për shtyp në prag të ndeshjes së radhës në kampionat, duke komentuar fillimisht çështjen e festës së titullit kampion.

“Çdo ditë po bëhet edhe më e vërtetë ajo që kemi arritur. Kishim emocione pas ndeshjes. Ndoshta dukej e pabesueshme. Sot jemi më të qetë dhe kemi punuar gjatë javës. Nuk ka mbaruar asgjë. Të shohim përpara. Kemi plane, kemi një ide që këtë javë të luajnë ata që nuk kanë pasur hapësira të luajnë. Kanë dhënë kontributin e tyre edhe ata. Impenjimi ka qenë maksimal, veç Alban Hoxhës që e kemi lënë pushim për shkak të probleme shëndetësore”.

Pavarësisht se titulli tashmë është çështje e kryer, Gega tregon se Partizani do të vijojë të luajë futboll njësoj edhe në ndeshjet e mbetura. Ndërsa gjatë fjalës së tij ka komentuar edhe të ardhmen personale te Partizani.

“Shkojmë në Durrës për të luajtur futboll, nuk kemi presionin e dështimit. Përfaqësojmë Partizanin dhe do luajmë me dinjitet. Fusha do tregojë kush e meriton fitoren”.

“Do ulem me presidentin dhe drejtorin dhe do flasim. Pa zbehur vlerat e askujt, do shikojmë të jemi të kujdesshëm që ata që nuk kanë pasur hapësira të luajnë. Nuk varet e ardhmja e tyre, duam t’u japim kënaqësinë e asaj qe kemi arritur. Nëse nuk kanë luajtur, do të thotë që ka pasur diferenca. Kualiteti është i pari. Ata që kanë luajtur më shumë kanë treguar se kanë qenë më të denjë”.

Gega mundohet të jetë i përmbajtur kur flet lër merkaton, duke shtuar se grupi aktual duhet të respektohet.

“Kur e kam nisur, baza ka qenë. Nuk ishte brilante, pasi kemi pasur probleme. Edhe Ibrahimi që u tha se ishte ne limite, u rrit dhe korrigjoi veten. Ndërhyrjet nuk do jenë drastike. Nuk është vetëm Championsi sezoni ynë, punojmë për të ardhmen. Nuk do tentojmë të bëjmë spektakël. Kemi nevojë për afrime, sikurse Reali dhe Barcelona”.

“Kam dëshirë që ky grup të respektohet. Po të ishte për mua, do i mbajmë të gjithë. Sezoni i ardhshëm do jetë ndryshe, do na presin si kampionë. Kam lexuar emra, por asnjë nuk është në lupën time apo të kemi bërë biseda. Nëse bashkohet dëshira dhe mundësitë, pse jo. Shitjet? Nëse një lojtar fiton titullin pas 26 vitesh dhe merr një ofertë shumë të mirë, do e mbështesja. Gjithsesi ka marrëveshje mes tij dhe klubit, janë të tjerë që drejtojnë”.

Në fund trajneri i Partizanit ka folur edhe për heroin e derbit dhe të titullit, Erald Çinari: “Nuk ka pasur asnjë problem. Është një garë që luajnë 11 deri në 14 lojtarë. Lojtarët kanë marrë pjesët e veta. Nëse te Vllaznia ka pasur hapësirë, është ndryshe këtu. Partizani nuk është Shkodra, që është në Kategorinë e Parë. Ka qenë 19 vjeç kur ka luajtur atje. Ka ardhur i mirëpritur”.

“Jemi të kënaqur për atë që ka bërë. I duruari i fituari. Gjërat nuk merren të shkëputura. Nuk ka as marrëveshje për minuta. Nëse bën më mirë se shoku, do luash nga fillimi. Për fat të mirë kushdo që ka luajtur ka bërë mirë”.

Ekskluzive: Alban Bushi e injoronte, Edy Reja i dërgon ftesë talentit që aktivizohet me ekipin e La Ligas!

Të dielën kombëtarja shqiptare e futbollit do të nis grumbullimin në Durrës, ku nën drejtimin e trajnerit Edy Reja do të jenë vetëm lojtarët të cilët kanë mbyllur kampionatet me klubet e tyre.

RealStory.al ka mësuar ekskluzivisht se një nga lojtarët e grumbulluar do të jetë dhe talenti, Kleandro Lleshi, që është pjesë e skuadrës së Leganeses në La Liga, por që nē përgjithësi është aktivizuar me ekipin e dytë të Leganeses në ligat inferiore në Spanjë.

Megjithatë, futbollisti i talentuar është stërvitur gjatë gjithë kohës me ekipin e parë, duke u projektuar për sezonin e ardhshëm që të jetë pjesë e skuadrës së parë të Legannes.

Klenadro Lleshi luan në rolin e mesfushorit, por mund të aktivizohet dhe në pozicione të tjera. Pak kohë më parë, gjatë grumbullimit të muajit mars, mungesa e Kelandro Lleshit ngjalli jo pak habi në listën e Kombëtares U-21.

Alban Bushi e justifikoi këtë me faktin se lojtari luante në ligat inferiore, por nuk mori kurrë parasysh faktin se mesfushori stërvitej me ekipin e parë të Leganes. Megjkthatë, Edy Reja ka vendosur të grumbullojë talentin shqiptar, për ta pasur nën urdhëra për gati 3 javë, ku pritet të krijojë dhe një ide më të qartë rreth cilësive të tij teknike dhe fizike.

Taulant Balla paralajmëron opozitën: Askush të mos guxojë të pengojë zgjedhjet!

Drejtuesi Politik i Partisë Socialiste për Qarkun e Elbasanit, ka bërë një paralajmërin të fortë për opozitën, e cila ka deklaruar se nuk do të lejojë zhvillimin e zgjedhjeve më 30 qershor. Gjatë prezantimit të 51 kandidatëve për anëtar të Këshillit Bashkiak të bashkisë Elbasan, Balla ka paralajmëruar opozitën të mos guxojë të pengojë qoftë dhe një zgjedhës të vetëm të votojë.

“Zgjedhjet do të zhvillohen. Kush guxon të pengojë, qoftë edhe një zgjedhës të vetëm të shkojë për të ushtruar të drejtën e vet, Kodi Penal është i qartë. Të gjithë e dinë se çfarë i pret nëse guxojnë të pengojnë një zgjedhës të shkojë të votojë, nëse guxojnë të dëmtojnë një qendër votimi, apo një material votimi”.

“Çdo përpjekje, qofshin me bomba molotov, apo me dhunë kundër institucioneve për të penguar fillimin e bisedimeve, për të penguar rrugën europiane të Shqipërisë, për të penguar vijimin e mëtejshëm të Reformës në Drejtësi nuk ka për t’ja dalë dot. Kjo është një gjë e sigurt. Të gjithë shqiptarët janë të bindur se ne duhet të ecim në rrugën e nisur.”

Duke shprehur urimin për kandidatët për kryetar bashkie në Qarkun Elbasan, Balla vuri në dukje rëndësinë e zgjedhjeve të 30 Qershorit dhe momentin e rëndësishëm në të cilin ndodhet vendi.

“Kodi Zgjedhor parashikon që 30 qershori është afati i fundit për zgjedhjet vendore. Është shumë e rëndësishme që ne t’i përmbahemi respektimit të parashikimeve të Kodit Zgjedhor përsa i përket zhvillimit të fushatës”.

“Fushat do të zhvillohet vetëm në 30 ditët e parashikuara nga kodi dhe për ne si Parti Socialiste, zhvillimi i një fushte në respektim të të gjitha kushtëzimeve që vendos Kodi Zgjedhor është mjaft e rëndësishme”.

“Derisa të fillojë fushata, ne jemi shumë të vetëdijshëm se Shqipëria pret një vendim shumë të rëndësishëm siç është fillimi i bisedimeve për anëtarësim, rekomandimi i Komisionit Europian, i cili me të gjitha gjasat dhe konfirmimet do të jetë një rekomandim pozitiv”.

“Homoseksualët i pret ferri”, postimi në instagram i kushton karrierën lojtarit të Rugby-s!

Rugby Australia ka marrë vendimin drastik për lojtarin e Wallabies, Israel Folau, duke kërkuar ndërprerjen e menjëhershme të kontratës së 30-vjeçarit, pasi ky i fundit ka bërë një postim në Instagram, ku shfaq ndienja anti-LGBT.

Gjatë muajit prill të këtij vitit, Israel Folau, një lojtar profesionist i Rugby-s, ka shkruar në profilin e tij në instagram: “Pijanecët, homoseksualët, shkelësit e kurorës, gënjeshtarët, kurvarët, vjedhësit, ateistët dhe idhujtarët, i pret ferri”.

Ky postim ka ngjallur reagime të menjëhershme në Australi, duke u cilësuar si “shkelje e Kodit të Sjelljes”, për lojtarët e Ragby-s. Ndaj, Rugby Australia ka reaguar, pasi ka mbajtur një seancë dëgjimore me lojtarin, duke marrë vendimin për ndërprerjen e kontratës së tij.

https://www.instagram.com/p/BwEWt2uHcLI/?igshid=1pwcrk2u7c9kf

Shefi ekzekutiv i Rugby Australia, Raelene Castle, tha në një konferencë shtypi këtë të premten: “Ne jemi këtu për të njoftuar se lojtari i Wallabies, Israel Folau, sot i është lëshuar një sanksion për ndërprerjen e kontratës së tij të lojës për shkeljen e nivelit të lartë “Kodit të Sjelljes” nga lojtarët profesionistë”.

Pas këtij vendimi, lojtari i Rugby, Israel Folau ka bërë një deklaratë ku shprehej i indinjuar për vendimin e dhënë nga shoqata e Rugby Australia.

“Unë jam thellësisht i pikëlluar nga vendimi i sotëm për të ndërprerë punësimin tim dhe unë po i shqyrtoj mundësitë e mia. Si Australianë, ne lindim me disa të drejta, duke përfshirë të drejtën për lirinë e fesë dhe të drejtën për lirinë e shprehjes”, ka thënë ndër të tjera Folau.