Bashkia Lezhë ka qenë një ndër më të fryrat sa i përket numrit të punonjësve, krahasuar me buxhetin e kësaj bashkie, ku pothuajse gjysma e buxhetit harxhohej për paga dhe sigurime, kështu që kryetari i ri i saj ka vendosur të reduktojë me 30% kapacitetin e punonjësve. Duke nisur nga maji janar i vitit që vjen, struktura e re e përgatitur nga drejtuesit e Bashkisë dhe që u miratua nga Këshilli Bashkiak parashikon reduktim të ndjeshëm të numrit të punonjësve të kësaj njësie vendore.
Kryebashkiaku i Lezhës Pjerin Ndreu thotë se administrata aktuale është e tejfryrë në organike dhe sipas tij kjo është një kosto e lartë për taksapaguesit lezhjanë. “Struktura e bashkisë sot është jo eficiente dhe e tejfryrë në organikë. Sot që flasim kemi 609 funksione të miratuara në këshillin bashkiak, 285 funksione të deleguara, duke shtuar këtu edhe një numër pa fund njerëzish me kontrata provizore, të cilët kanë variuar në situata të pakëndshme duke paguar rroga për njerëz që në fakt na rezultojnë se nuk ekzistojnë fare në punë. Një handikap të cilin ne nuk mund ta lejojmë, por që është mbi të gjitha një kosto për të gjithë taksapaguesit lezhjanë. Ka një shkuarje të fondeve drejt rrogave dhe drejt shpenzimeve operative në dëm të investimeve. Në 2018 vetëm 4% e buxhetit të bashkisë është përdorur për investime dhe gjithë të tjera kanë shkuar për rroga e shpenzime të tjera. Do ta zhbëjmë bashkinë si vend punësimi, por si vend shërbimi, një strukturë eficiente, e kontrollueshme dhe me kontrollin periodik të sektorëve dhe specialistëve përkatës”, tha Ndreu.
Sipas kreut të ri të bashkisë, nga ulja e punonjësve të panevojshëm nga puna do të kursehen rreth 5 milionë euro të cilat do të përdoren për investime të domosdoshme. “Nga ulja e numrit të panevojshëm të punonjësve fitojnë minimalisht 100 mijë euro në muaj dhe për 4 vjet ne fitojmë 4 milionë e 800 mijë euro të shkuara kot deri më tani. Këto lekë do të shkojnë për investime dhe kjo është domosdoshmëri. Pas një studimi me drejtoritë konkludon që do qëndrojnë 430 punonjës duke lënë një hapësirë për 20 punonjës që mund t’i përdorim në disa pika ose në sezonin turistik”, u shpreh Ndreu.
Numri i lartë i punonjësve të Bashkisë Lezhë ka krijuar shpesh herë edhe vonesa në pagat e punonjësve, ku në tre vitet e fundit janë shënuar edhe vonesa deri në tre muaj. Madje, pagat dhe shpenzimet e tjera operative zinin rreth 49% të buxhetit të Bashkisë Lezhë, ndërkohë që zëri për investimet nuk shkonte më shumë se 17% e buxhetit në vit, veç vitit të fundit të mandatit të Fran Frrokajt, ku u vu re një rritje e lehtë e investimeve.