Dëshira e Lëvizjes Vetëvendosje për të krijuar bashkimin kombëtar Shqipëri-Kosovë, ka ndryshuar duke synuar fillimisht një bashkim kombëtarë ekonomik dhe institucional dhe më pas kur të krijohen mundësitë e një ndryshimi të Kushtetutës së Kosovës në mënyrë paqësore, mund të realizohet bashkimi me Shqipërinë. Kurti tha në emisionin “Real Story” se nuk dëshiron të nxisë një Luftë të tretë Ballkanike, por krijimin e një bashkimi në mënyrë paqësore dhe kushtetuese.
“Nuk kam ndryshuar mendim për bashkimin me Shqipërinë, por Kushtetuta e Kosovës na e ndalon, nuk jam dakord por do e respektojë atë. Ne vazhdojmë ta kundërshtojmë Kushtetutën që ndalon bashkimin e Kosovës me një vend tjetër. Synojmë që një ditë ta ndryshojmë në mënyrë demokratike, paqësore dhe kushtetuese. Nuk do fillojmë Luftën e Tretë Ballkanike për tu bashkuar me Shqipërinë, por në mënyrë paqësore. Me luftra na kanë ndarë, me paqe dhe demokraci një ditë do të vij koha që ta bëjmë këtë hap të rëndësishëm për vendet tona.”
Për Kurtin rruga e integrimit nuk pengon bashkimin e dy vende, përkundrazi ajo i bën mirë edhe BE.
“Kosova dhe Shqipëria të bashkuara, i bëjnë mirë edhe BE. Unë jam që BE të qëndrojë dhe shqiptarët të jenë të bashkuar.” tha Kurti / Real Story
