Presidenti Donald Trump në vizitën e tij zyrtare në Britaninë e Madhe ka vlerësuar “miqësinë e përjetshme” mes dy shteteve, në fjalimin e mbajtur në banketin shtetëror të shtruar në Buckingham Palace në nder të tij, ndërsa mbretëreshën Elisabeth e cilësoi një grua të madhe.
Presidenti Trump ndodhet në Britaninë e Madhe me rastin e 75 vjetorit të “D-Day”, (6 qershor 1944) që përkujton uljen e forcave aleate në plazhin Normandisë për të ndihmuar në fitoren kundër nazistëve në Luftën e Dytë Botërore.
Në fjalimin e tij në banket, Trump vlerësoi guximin e popullit britanik gjatë Luftës së Dytë Botërore dhe e quajti Mbretëreshën një “grua të madhe”.
“Në atë orë të errët, populli i këtij kombi i tregoi botës se çfarë do të thotë të jesh britanik”, tha ai, duke shtuar se guximi i tyre siguroi se fati i vendit “mbeti në duart tuaja”.
Trump përfundoi fjalimin e tij me një dolli për “miqësinë e përjetshme të popujve tanë, vitalitetin e kombeve tona dhe mbretërimit të gjatë dhe të vërtetë të mrekullueshëm të Madhërisë së Saj Mbretëreshës”.
