Pas zbulimit të krimit makabër në Durrës ku një 19-vjeçare vrau me armë zjarri babanë e saj, ka reaguar edhe ministri i Brendshëm, Taulant Balla.
Në një prononcim për mediat nga Korça, Balla bëri thirrje që çdo vajzë dhe grua të denoncojë rastet e dhunës. Ndërsa bëri të ditur se rastet e dhunës brenda familjes janë rritur vitet e fundit, veçanërisht përgjatë vitit të kaluar.
Ai theksoi se pronat e sekuestruara nga krimi i organizuar do të vendosen në shërbim të vajzave dhe grave të dhunuara që do shërbejnë si strehë për to.
“Viti 2023 ka qenë një vit me ngjarje të rënda të krimit brenda familjes dhe po ashtu një numër i rritur i dhunës në familje kjo dhe për shkakun se policia është munduar të identifikoj të gjitha rastet që kemi pasur sinjalizime. Dua të komunikoj me ju faktin se tashmë kemi një protokoll tërësisht tjetër nga Policia e Shtetit lidhur me konstatimin më të parë të një shqetësimi apo të një ankese, për sa i përket dhunës në familje, kryesisht bëhet fjalë për dhunë me bazë gjinore, dhunë seksuale.
Unë nxis çdo vajzë, çdo grua, çdo nënë të këtij vendi që të denoncojë rastet e dhunës dhe dua ta garantoj që jo vetëm Policia e Shtetit për sa i përket pjesës që i takon, por edhe institucionet e tjera ju e keni parë dje ne kemi filluar dje një qasje të re sa i përket pronave të sekuestruara dhe konfiskuara nga krimi dhe korrupsioni do mundohemi që një pjesë të këtyre pronave t’i vendosim në shërbim të organizatave jo qeveritare, të cilat të kthehen në strehëza apo në shtëpi për vajzat, gratë e dhunuara”, u shpreh Balla.
Balla kërkoi edhe reagimin e shoqërisë në raste të tilla.
“Lufta kundër dhunës seksuale, dhunës me bazë gjinore nuk është diçka që zhvillohet dy javë kur mblidhen gjithë shoqatat e këtij vendi për të sensibilizuar. Unë mendoj që kjo duhet bërë çdo ditë dhe ju mediat keni një meritë të veçantë sikurse keni dhe një përgjegjësi të madhe për të sensibilizuar dhe për ta bërë shoqërinë sa më të bashkuar kundër këtij fenomeni të papranueshëm”, u shpreh ministri i Brendshëm i cili inspektoi nga afër paketën e sigurisë, teksa vizitoi shkollën e Korçës ‘Raqi Qirinxhi’.