Deputeti demokrat Myslym Murrizi në një vizitë në Vjenë së bashku me bashkëkryetarin e Komisionit të Refomrës Zgjedhore Damian Gjiknuri, janë bindur se modeli i “listave të hapura”, janë zgjidhja për zgjedhjet në Shqipëri. Me një postim në rrjetet sociale, duke “thumbuar” opozitën dhe kreun e PD Lulzim Basha, Murrizi shkruan se së bashku me 38 deputetët e opozitës “kemi 8 muaj që kemi firmosur për ndryshimin e sistemit tonë bastard zgjedhor”.
“Meqënëse Basha u pajtua me PS sepse Rama iku (në Amerikë) dhe solli Ivin në Komisionin e Reformës Zgjedhore, edhe unë thashë që nuk ka kuptim të rri “zemëruar” as me Damianin e as me “ambasadorin” e Bashës në komision. Ky është modeli i fletës së votimit që rreth 6 milion qytetarë austriakë do të votojnë në zgjedhjet parlamentare. Unë dhe 38 deputetët të opozitës kemi 5 muaj që kemi firmosur për ndryshimin e sistemit tonë bastard zgjedhor, ku deputetët i emëron kryetari e nuk i zgjedh qytetari. Por pas dy ditësh takime këtu në Vjenë, edhe Damiani e kuptoi që “listat e hapura” me votë preferenciale janë shumë e shumë herë më të mira se listat me “pagesë” të kryetarëve”, shkruan Murrizi.
Më tej, ai shkruan se “nuk beson se austriakët janë vend më pak demokratik se Shqipëria”, ndaj sipas tij, me ndryshimin e sistemit zgjedhor, “do biem rehat të gjithë”. “Unë, Damiani, por dhe ky përfaqësuesi i PD nuk besojmë që austriakët janë më pak vend demokratik se ne. Pas kësaj besoj që do biem rehat të gjithë se në parlament do shkojnë vetëm ata që votohen nga qytetarët shqiptarë, e jo vemje të kryetarëve të partive. Pas ndryshimit të sistemit zgjedhor nuk ka më “faktorë” politik me “silikon”, shkruan ndër të tjera Murrizi.
