Bullgaria po përballet me një tjetër krizë politike. Partia “Ka një popull të tillë” ka tërhequr të gjithë ministrat e saj nga qeveria, duke i dhënë fund koalicionit.
Ishte vet kryetari i partisë, Sllavi Trifonov ai që përmes një videopostimi në rrjetet sociale njoftoi se po largohen nga qeveria për dy arsye kryesore. E para është politika toleruese ndaj Maqedonisë së Veriut.
SLLAVI TRIFONOV
KRYETAR I “KA NJE POPULL TE TILLE”, BULLGARI“Kryeministri u ka premtuar liderëve në Evropë dhe në botë se do të heqë veton ndaj Maqedonisë së Veriut dhe po bën gjithçka që është e mundur për ta bërë këtë, megjithëse shumica e bullgarëve duan që negociatat të hapen vetëm pasi te përmbushet Marrëveshja e Fqinjësisë mes dy vendeve. Kështu, ai shkel në mënyrë të rëndë dhe të pamëshirshme marrëveshjen e nënshkruar të koalicionit.”
Arsyeja e dytë, sipas Trifonov, është keqmenaxhimi i fondeve buxhetore.
SLLAVI TRIFONOV
KRYETARI I “KA NJE POPULL TE TILLE”, BULLGARI“Kiril Petkov në mënyrë të vrazhdë, të pamëshirshme dhe të njëanshme nuk e respektoi marrëveshjen e nënshkruar të koalicionit. Miliarda kanë fluturuar. Askush nuk ka të drejtë të eksperimentojë me paratë tona.”
I menjëhershëm ishte reagimi i kryeministrit Petkov, i cili nënvizoi se kjo krizë do të shmanget përmes një qeverisjeje të pakicës.
KIRIL PETKOV
KRYEMINISTER, BULLGARI“Ajo që ne kemi vendosur është një qeveri e pakicës . Nuk do të diskutojmë më shumë, nuk do ta vonojmë ligjin. Një qeveri e pakicës është shumë më e mirë se një qeveri që përpiqet të marrë para shtesë. Nuk është morale të fshihesh nën ndonjë titull të përgjithshëm, por është morale kur i thua “jo” dërgimit të parave mafiozëve që i eksportonin paratë në thasë.”
Rrëzimi i koalicionit në Bullgari vjen vetëm pak ditë para se liderët e Bashkimit Evropian të mblidhen për të diskutuar hapjen ose jo të negociatave me Shqipërinë dhe Maqedoninë e Veriut.