Kryeprokurori, Marku drejt ankimimit të renditjes. Kërkon informacion nga KLP


Prokurorja e Përgjithshme e Përkohshme Arta Markua i është drejtuar me një kërkesë zyrtare Këshillit të Lartë të Prokurorisë, që t`i vihet në dispozicion pikëzimi i detajuar i secilit anëtar të KLP. Në shkresën drejtuar KLP, Marku kërkon të “njihet me analizën dhe meteodologjinë përkatëse të vlerësimit të ndjekur nga secili anëtar, sipas formatit të detyruar ligjor”. Kjo kërkesë, sipas Kryeprokurores aktuale, bëhet me qëllim “që të vlerësoj të drejtën për të ushtruar ankim të vendimit të Këshillit të Lartë të Prokurorisë”.

Arta Marku është njoftuar në datë 18 nëntor në lidhje me vendimin e KLP-s për renditjen e kandidatëve që synojnë postin 7-vjeçar të Prokurorit të Përgjithshëm. Marku u rendit e dyta nga KLP me 406 pikë, ndërsa në vendin e parë u rendit kandidati Olsian Çela me 459 pikë. Ndërkohë në vendin e tretë u rendit Fatjona Memçaj me 362 pikë.


Kujtojmë se sipas ligjit, kandidatët për Prokurorin e Përgjithshëm kanë tre ditë afat për të bërë ankim në Gjykatën Administrative të Apelit vendimin e Këshillit të Lartë të Prokurorisë. Sipas Nenit 34 të ligjit “Për funksionimin e Prokurorisë”, “Kandidatët kanë të drejtë të ankimojnë vendimin e Këshillit të Lartë të Prokurorisë për propozimin e renditjes së tyre në listë, brenda tri ditëve nga data e njoftimit të tij. Ankimi mund të bazohet vetëm në arsyetimin që kanë ndodhur gabime faktike ose procedurale, të cilat mund të kenë ndikuar në rezultatin e renditjes së kandidatëve”.

Ndërkohë, po sipas këtij ligji, Gjykata Administrative e Apelit duhet të vendos brenda shtatë ditëve nga data e paraqitjes së ankimit. “Gjykata Administrative e Apelit vendos brenda shtatë ditëve nga data e paraqitjes së ankimit. Gjykata Administrative e Apelit shqyrton vetëm gabimet faktike ose procedurale, të cilat mund të kenë ndikuar në rezultatin e renditjes dhe nuk zëvendëson vlerësimin e kritereve me vlerësimin e saj. Vendimi i Gjykatës Administrative të Apelit është i formës së prerë dhe kundër tij nuk lejohet rekurs”, thuhet në Nenin 34 të ligjit për Prokurorinë./Realstory.al/


Prokurori i ri, Çela i pari, Marku e dyta


Këshilli i Lartë i Prokurorisë bëri renditjen e kandidatëve për postin e Prokurorit të Përgjithshëm, një ditë pasi dëgjoi tre aspirantët e këtij posti. Në përfundim të këtij procesi, prokurori Olsian Çela është renditur i pari me 459 pikë, ndërsa e dyta në listë është Prokuroria e Përgjithshme e Përkohshme Arta Marku me 406 pikë.

E treta në listë është kandidatja Fatjona Memçaj me 362 pikë. Kjo renditje është votuar unanimisht nga anëtarët e Këshillit të Lartë të Prokurorisë në mbledhjen e zhvilluar të enjten. Ndërsa kryetari i KLP-së, Gent Ibrahimi u shpreh se kandidatët janë vlerësuar për tre kritere.


“Ne i çojmë Kuvendit një listë me tre kandidtë, që i vlerësojmë nga profesionalizmi, integriteti dhe pozicioni i tyre karshi kolegëve. Ka qenë një process i gjatë për shumë arsye, duke përfshirë dhe Vettingun. Sot jemi në gjendje të ndajmë me ju rezutlatet e punës tonë përzgjedhësve. Jemi përpjekur të jemi transparent me publikun”.

“Ky proces solli në këtë finale, ne sot jemi në gjendje të bëjmë pikëzimin sipas rregullores së miratuar në mars: vlerësimi bëhet për aftësitë profesionale, integritetin dhe aftësitë drejtuese”, tha ndër të tjera Gent Ibrahimi gjatë mbledhjes së KLP. Të tre kandidatët për Prokuror të Përgjithshëm, dolën përpara KLP-së të mërkurën duke shpalosur platformat e tyre për drejtimin e Prokurorisë së Përgjithshëm.


Lleshaj-Marku: Progres në adresimin e rekomandimeve të KE për sigurinë


Ministri i Brendshëm Sandër Lleshaj dhe Prokurorja e Përgjithshme Arta Marku thanë se po punohet që të ketë një adresim dhe zbatueshmëri sa më të madh të legjislacionit dhe rekomandimeve të BE në luftën kundër krimit të organizuar në vend. Këto deklarata Lleshaj  dhe Marku i bënë gjatë aktivitetit të organizuar nga Këshilli Kombëtar i Integrimit për luftën kundër krimit të organizuar. Kryetarja e këtij Këshilli Rudina Hajdari, i drejtoi ministrit Lleshaj dhe kryeprokurores Marku disa pyetje lidhur me rendin dhe sigurinë në vend.

Lleshaj tha se organet e zbatimit të ligjit kanë shkatërruar 22 grupe kriminale në Shqipëri, një shifër 2-fish më e lartë krahasuar me 2018. Lleshaj tha se Ministria e Brendshme është duke punuar që të adresojë në mënyrën e duhur zbatimin e ligjit dhe legjislacionit të BE në luftën kundër krimit dhe korrupsionit.


Ministria e Brendshme ka një peshë të konsiderueshme në procesin e integrimit. Është kapitulli që merret me sigurinë dhe drejtësinë. Është ai proces që synon të lexojmë dhe kuptojmë legjislacioni e BE.  Ka pasur një goditje të madhe ndaj krimit të organizuar përgjatë këtij viti. Gjatë 2019 janë goditur 22 grupe kriminale, janë arrestuar 125 persona të përfshirë në këto grupe. Ne jemi në proces konsolidimi si shoqëri.  Ne kemi goditur shumë organizata kriminale. Ne 2019 krahasuar me një vit më parë kemi rritja jo me përqindje por me herë numrin e grupeve ë goditura nga policia e shtetit.

Nëse në janar – shtator 2018 janë zhvilluar 17 operacione të mëdha, në të njëjtën periudhë të këtij viti janë zhvilluar 31 operacione të mëdha kundër grupeve kriminale. Ose nëse në janar shtator 2018 janë shkatërruar 10 grupe të krimit të organizuar në vitin 2019 janë shkatërruar 22 të tilla.”- tha Lleshaj

Në konferencë mori fjalën edhe kryeprokurorja Arta Marku, e cila theksoi se prokuroria ka bërë progres në zbatimin e rekomandimeve të KE dhe zbatimin e ligjit antimafia. Marku tha gjithashtu se do të ketë një trajnim më të madh të prokurorëve në rrethe, që të adresojnë sa më mirë hetimet dhe goditjen e grupe kriminale.

Prokuroria ka arritur progres në zbatimin e rekomandimeve të KE. Është rritur ndjeshëm goditja ndaj grupeve kriminale. Në zbatim të rekomandimit tjetër, Prokuroria synon që hetimi pasuror të unifikojë zbatimin e ligjit antimafia. Prokurorët nëpër rrethe do trajnohen për hetimin e krimit të organizuar. Ka rritje të nisjes hetimeve me vitin e kaluar. Ka një reflektim të prokurorëve për këtë tregues. Pas kryerjes së një analize është nxjerrë një qarkore për të orientuar prokurorët e rretheve.”– tha Marku


“Magjistratura” Marku: Mos notoni në vetëkënaqësi, keni sfida para


Kryeprokurorja Arta Marku vlerëson brezin e ri si faktorin e ndryshimit të imazhit të drejtësisë dhe përmirësimit të saj, por i paralajmëroi se kjo nuk duhet t’i  çonte në vetëkënaqësi, pasi shumë sfida i presin para. Marku tha se drejtësia është në reformim të thellë falë reformës në drejtësi, dhe se energjitë e reja do e ndihmojnë më tej atë duke përmirësuar imazhin e vendit.

 “Ju jeni gati për të qenë gjyqtarë dhe prokurorë. Por më duhet t`ju them se nuk duhet të notoni në vetëkënaqësi, pasi ky nuk është fundi i rrugës. Është fundi i një rrugice dhe fillimi i një rruge tjetër, shumë të gjatë, me shumë sfida e me shumë përgjegjësi.  Sistemi, pjesë e të cilit tashmë jeni bërë është në reformë të thellë, dhe për këtë arsye, vështirësitë në punë janë më të mëdha. Por, unë jam e bindur se do ia dilni. Besoj në energjitë e reja që do i sillni sistemit dhe jam e bindur se do të ndikoni në përmirësimin e tij, në përmirësimin e imazhit të Shqipërisë, gjë që ne e duam të gjithë.” tha Marku gjatë ceremonisë së diplomimit të magjistratëve të rinj në shkollën e Magjistraturës.


Pjesë e ceremonisë ishte edhe ministrja e Drejtësisë, Etilda Gjonaj, e cila beson se magjistratët e rinj kanë në dorë për të vendosur drejtësinë e pakorruptuar dhe të pandikuar nga pushteti. Vetëm në këtë mënyrë, tha Gjonaj, do të mund të shohim drejt të ardhmes europiane. Për Gjonaj, magjistratë e rinj kanë fatin të jenë pjesë e drejtësisë së re dhe kanë përgjegjësinë për rikthim e besimit të qytetarëve tek drejtësia.

Ju keni një mision shumë të vështirë, por jo të pamundur, rikthimin e besimit të publikut te drejtësia. Ju keni në dorë shpatën, për të ndarë drejtësinë nga padrejtësia, dhe çekiçin për t’i dhënë të drejtën atij që i takon. Jam besimplotë se ju do dini të tregoni vlerat tuaja të vërteta, duke i dhënë një perspektivë evropiane drejtësisë sonë. Po futeni në një sistem drejtësie, që jep më shumë pavarësi dhe një status dinjitoz. Reforma e bën rrugëtimin tuaj profesional, që do varet nga kompetenca dhe cilësia e dhënies së vendimit dhe jo më nga lidhjet me pushtetin.

Sistemi i ri i drejtësisë i jep vend të veçantë integritetit dhe etikës së magjistratit, që për herë të parë është një etikë kushtetuese. Integriteti i magjistratit është ai që do bëjë ndryshimin rrënjësor, në pasjen e një sistemi të pakorruptuar, të paanshëm. Duhet të punojmë të gjithë që ky element të jetë i ngulitur në mendjen e çdo magjistrati. Ju keni fatin historik që të bëni që drejtësia në Shqipëri të përjetojë një kthesë të madhe” tha Gjonaj


Në 4 tetor, zgjidhet anëtari i KLP. Dy prokurorë në garë


Prokurorja e Përgjithshme Arta Marku njoftoi të enjten, se në datën 4 tetor, do të zhvillohet mbledhja e Përgjithshme e Prokurorëve, ku do të zgjidhet anëtari i ri i Këshillit të Lartë të Prokurorisë, pas shkarkimit të ish-prokurorit Gentian Osmani që u shkarkua nga Vettingu. Vendimi i Prokurores së Përgjithshme të Përkohshme, vjen pas përfundimit të përzgjedhjes së kandidaturave nga radhët e prokurorëve, që do të synojnë të bëhen pjesë e “qeverisë së prokurorisë”.

Në mbledhje janë thirrur të marrin pjesë të gjithë prokurorët, duke përjashtuar vetëm prokurorët që për arsye objektive nuk mund të jenë të pranishëm. Dy kandidatët që do të synojnë të zënë vendin e Gentian Osmanit në KLP, janë prokurorët Vladimir Mara dhe Esmeralda Keshi (Cami).


Për prokurorin e Krimeve të Rënda Vladimir Mara, Prokuroria e Përgjithshme shprehet se është vlerësuar “shumë mirë” në dy vlerësimet e fundit të etikës dhe veprimtarisë profesionale. Nuk ka qenë i dënuar, nuk ka qenë ish-bashkëpunëtor i Sigurimit të Shtetit. Për këto dhe të tjera arsye, Prokuroria e Përgjithshme shprehet se “Vladimir Mara, prokuror në Prokurorinë pranë Gjykatës së Shkallës së parë për Krimet e Rënda, polotëson kushtet ligjore për të kandiduar si anëtar i Këshillit të Lartë të Prokurorisë”.

Edhe kandidatja Esmeralda Keshi (Cami) ka kaluar të gjithë kriteret e vendosura nga KLP për t`u zgjedhur si anëtare e këtij institucioni. Sipas Prokurorisë së Përgjithshme, institucioni që ka bërë vlerësimin e kandidatëve nga radhët e prokurorisë, prokurorja Esmeralda Cani, që aktualisht ushtron detyrën në Prokurorinë e Dibrës, ka vlerësim “shumë të mirë” të etikës profesionale, dhe plotësn të gjitha kriteret e kërkaura. Për këtë arsye, ajo së bashku me Vladimir Marën, propozohet për të zënë vendin vakant në KLP, të cilin më herët e mbante ish-kolegu i tyre Gentian Osmani. /Realstory.al/


Pjetri-Kajmaku, fati te Italia e Greqia


Me anë të dy komunikatave të ndryshme për mediat, por për të njëjtin qëllim, Prokuroria e Përgjithshme ka dhënë informacion, në lidhje me ecurinë e verifikimit të figurës për Valdrin Pjetrin, ish-kryebashkiakun e dorëhequr të Shkodrës, dhe Agim Kajmakun, aktualisht në detyrë si kryetar bashkie ne Vorë. Për të dy personat nën hetim, Prokuroria njofton se ka kërkuar informacion nga disa institucione në vend, por dhe autoriteteve ligjzbatuese në vendet ku mendohet se Pjetri dhe Kajmaku, sipas PD, kanë qenë të dënuar. Në rastin e Valdrin Pjetrit, Prokuroria e Përgjithshme njofton se ka administruar informacion nga Zyra e Gjendjes Gjyqësore, është marrë përgjigja nga Ministria e Drejtësisë, e cila i ka përcjell autoriteteve italiane të drejtësisë Kërkesën për Ndihmë Juridike për Valdrin Pjetrin. Gjithashtu, është administruar përgjigja e Gjendjes Civile për gjeneraitetet e Pjetrit, përgjigja e Drejtorisë së Policisë së Shtetit, në lidhje me kërkesën nëse Valdrin Pjetri ka qenë i arrestuar apo ndaluar për veprimtari kriminale. Gjithashtu, është siguruar përgjigja e 23 prokurorive po për Valdrin Pjetrin, nëse ka qenë apo jo i dënuar apo kallëzuar. Ndërkohë, në fund të njoftimit, Prokuroria e Përgjithshme ka njoftuar se është në “pritje të përgjigjes nga autoritetet italiane të drejtësisë si dhe përgjigjen e autoriteteve policore italiane, të cilat janë vendimtare për marrjen e një vendimi”, shkruan Prokuroria e Përgjithshme për rastin e Valdrin Pjetrit.

Më tej, në deklaratën e dytë, në lidhje me verifikimin e Agim Kajmakut, Prokuroria e Përgjithshme, ashtu si në rastin Pjetri, njofton se ka kërkuar informacion nga disa institucione brenda dhe jashtë vendit, ku kryesore është përgjigja e autoriteteve greke. Në lidhje me Agim Kajmakun, deri më tani, Prokuroria e Përgjithshme njofton se ka administruar të dhënat në lidhje me gjeneralitetet e Kajmakut nga Gjendja Civile, informacionin nga Policia e Shtetit, që informon nëse ky shtetas ka qenë i ndaluar apo arrestuar në Shqipëri, departamentit të kufirit, që informon në lidhje me të dhënat e sistemit TIMS për shtetasin Agim Kajmaku dhe Jorgo Toto. Të dhëna janë administruar dhe 23 prokurori të rretheve, ndërsa i është kërkuar INTERPOL informacion nëse Agim Kajmaku rezulton i ndaluar dhe arrestuar për veprimtari kriminale. Ndërkohë, Prokuroria e Përgjithshme raporton se ende nuk është siguruar përgjigja në lidhje gjurmët daktiloskopike të Agim Kajmakut, duke arsyetuar se  “Sipas verifikimeve në sekretarinë e Prokurorisë së Përgjithshme rezulton se shërbimi postar (Drejtoria e Përgjithshme e Postave) ka ngatërruar adresën e subjektit Agim Kajmaku dhe ende nuk e ka dorëzuar shkresën”.


Megjithatë, më poshtë, Prokuroria e Përgjithshme sqaron se janë përcjellë gjurmët daktiloskopike (shenjat e gishtërinjve) për krahasim INTERPOL pranë Drejtorisë së Përgjithshme të Policisë së Shtetit. Ndërkohë, me anë të një shkrese zyrtare, nëpërmjet Ministrisë së Drejtësisë, i është kërkuar autoriteve greke informacion i detajuar dhe administrimi i çdo vendimi të prokurorisë së Janinës për masë sigurie apo dënim në ngarkim të Agim Kajmakut. Sipas prokurorisë, ky rast është parë me përparësi dhe të gjitha procedurat janë kryere në një kohë prej 7-të ditësh. Ndërkohë që sqaron në fund, se mbeet ende në pritje të përgjigjes së autoriteve greke, që sipas organit të akuzës ‘do të jenë vendimtare’ për marrjen e vendimit për Agim Kajmakun. /Realstory.al/


Vakanca në KLP, gara hapet në shtator për zëvendësimin e Osmanit


Shkarimi i Gentian Osmanit nga Kolegji i Posaçëm i Apelimit, bëri që Këshilli i Lartë i Prokurorisë të mbetet me 10 anëtar. Ky vakum i anëtarëve të KLP-së, pas largimit të ish-prokurorit të Krimeve të Rënda, duhet të plotësohet me një tjetër anëtar që vjen nga radhët e prokurorisë.

Sipas ligjit, është Prokuroria e Përgjithëshme, Arta Marku, ajo që shpall garën për anëtarin që do të plotësojë 11-shen e Këshillit të Prokurorisë. Po sipas ligjit, pas largimit nga Vettinug të Gentian Osmanit, Marku duhet të kishte hapur garën në datën 2 gusht, por kjo gjë nuk ka ndodhur.


Shkak ka qenë muaji i pushimeve, ndaj, sipas ABC Neës, gara do të hapet në datën 2 shtator, fill pas përfundimit të pushimeve. Ndërkohë, mungesa e anëtarit të 11 sjellë probleme edhe për funksionimin e këtij institucioni, i cili në muajin shtator do të miratojë emrat e katër kandidatëve për Prokuror të Përgjithshëm.

Në kushtet aktuale, nuk dihet ende nëse KLP do të pres emërimin e anëtarit të 11 për të marrë vendimin për t`i dërguar parlamentit emrat e katër prokurorëve që do të synojnë postin që aktualisht mbahet nga Arta Marku, apo do të veprojë në mënyrë tjetër.

Sipas ligjit, në rastin kur ka vakancë në Këshillin e Lartë të Prokurorisë, vota e kryetarit të këtij këshilli ka fuqinë e dy votave. Pra, Gent Ibrahimi parimisht mund të zgjidh ngërçin duke përdorur këtë parashikim ligjor, në mënyrë që brenda shtatorit të paraqiten në kuvend emrat që do të votohen për Prokuror të Përgjithshëm.


Dosja 184 fut në sherr prokuroritë. Zgjidhja në dorën e KLP


Dosja e 184 e përgjimeve të famshme të gazetës gjermane BILD për shit-blerjen e votave në Dibër, ka krijuar përplasje mes prokurorisë së krimeve të Rënda dhe prokurorisë së Dibrës mbi vijimin e hetimeve. Të mërkurën prokuroria e krimeve të rënda shpalli moskompetencë për vijimin e hetimeve për këtë dosje, duke ia deleguar prokurorisë së Dibrës. Gjatë të enjtes Prokuroria e Përgjithshme ka shpërndarë një deklaratë për mediat ku sqaron gjërë e gjatë se pse kjo çështje duhet të ndiqet nga prokuroria e Dibrës, ndërkohë që kjo prokurori nga ana e saj e ka refuzuar duke përdorur si argument konfliktin e interesit. Por siç njofton edhe prokurorja e përgjithshme duket se fati i kësaj dosje do të përcaktohet nga Këshilli i Lartë i Prokurorisë, i cili duhet të caktojë një prokuror që nuk ka konflikt interesi për të vijuar hetimet për këtë dosje.

Në njoftimin e prokurorisë së përgjithshme bëhet e ditur se prokurori i çështjes, Klodian Braho, ka ndyshuar cilësimin juridik të veprës penale nga forma e veçantë e bashkëpunimit “grup i strukturuar kriminal” në “bashkëpunim të thjeshtë”. Ky ndryshim ka bërë që dosja 184 të mos shqyrtohet më nga Krimet e Rënda por nga prokuroria e Dibrës.


Por Prokuroria pranë Gjykatës së Rrethit Gjyqësor Dibër e ka refuzuar një kërkesë të tillë ndërsa ka dhënë disa arsye:  “Së pari, veprat penale janë kryer nga grupi i strukturuar kriminal dhe për këtë vepër është kompetente Prokuroria për Krime të Rënda. Së dyti, prokurori duhet t’i ishte drejtuar gjykatës për pushimin e akuzave dhe jo të procedonte me ndryshim të cilësimit juridik. Së treti, prokurorët e Prokurorisë Dibër janë në kushtet e konfliktit të interesit dhe nuk mund ta hetojnë çështjen në fjalë.

Së katërti, Prokuroria Dibër nuk ka staf të mjaftueshëm për të përballuar këtë çështje”, njofton prokuroria e Dibrës.

Mosmarrëveshja në fjalë është shqyrtuar nga Prokurorja e  Përgjithshme, Arta Marku e cila në përfundim të vlerësimit vendos se “të gjitha veprat penale në dosjen 184 janë në kompetencë lëndore dhe tokësore të Prokurorisë pranë Gjykatës së Rrethit Gjyqësor Dibër”. Pra, sipas Arta Markut i takon Prokurorisë së Dibrës që të merret me këtë dosje.

Më tej kryeprokurorja vëren se “nëse të gjithë prokurorët që ushtrojnë funksionin në Prokurorinë pranë Gjykatës së Rrethit Gjyqësor Dibër do e gjejnë veten në kushtet e konfliktit të interesit dhe të papajtueshmërisë në ushtrimin e detyrës dhe këtë do e shprehin me dorëheqje, kjo është një situatë që i duhet njoftuar menjëherë Këshillit të Lartë të Prokurorisë, i cili mund të caktojë përkohësisht një prokuror tjetër për hetimin e çështjes në fjalë”.

“Edhe argumenti tjetër se Prokuroria pranë Gjykatës së Rrethit Gjyqësor Dibër nuk ka kapacitetet njerëzore, prokurorë dhe oficerë të policisë gjyqësore pranë prokurorisë, për hetimin e mëtejshëm të këtij procedimi penal, kjo e konfirmuar edhe me kërkesat e vazhdueshme që i janë bërë KLP-së për prokurorë, nuk është i tillë që të ndikojë në përcaktimin e kompetencës lëndore. Ky është një problem i burimeve njerëzore dhe mënyra se si ato menaxhohen dhe shpërndahen ka karakter administrativ dhe nuk mund të jetë argument në favor të mosushtrimit të ndjekjes penale apo të mungesës së kompetencës lëndore”, deklaron Marku.

Si përfundim, Arta Marku thekson se prokuroria e Dibrës duhet të pranojë aktet dhe të regjistrojë procedimin penal për dosjen 184.

Në rast se kjo prokurori nuk zbaton urdhrin e kryeprokurores Marku, atëherë dosja 184 do të mbetet për t’u zgjidhur nga KLP./Realstory.al


PD, ultimatum Arta Markut: Verifiko Pjetrin, ndryshe i shërben krimit


Partia Demokratike ka publikuar pasditen e të mërkurës letrën ku i dërgonte Prokurorisë së Përgjithshme dokumentat që dispononte, për arrestimin dhe dënimin e Valdrin Pjetrit në Itali disa vite më parë. Në letrën, që mban datën 13 gusht, ditë kur u publikuan dokumentet, që sipas PD vërtetohet se kryebashkiaku i sapozgjedhur i Shkodrës ka qenë më parë i dënuar, PD kërkon nga Arta Marku që të publikojë sa më shpejt informacionin zyrtar në lidhje me vërtetimin e akuzës së ngritur nga PD.

“Nisur nga intersi i lartë publik që paraqet kjo çështje, Partia Demmokratike e Shqipërisë ka pritur një verifikim dhe reagim institucional të shpejtë nga ana e Prokurorisë së Përgjithshme. Për fat të keq, ku reagim nuk ka ardhur ende, duke zhbërë besimin e publikut në funksionimin e organeve të zgjedhura shtetërore, nëpërmjet pengimit të zgjedhjes ose emërimit në to të personave, të cilët janë dënuar për kryerjen e krimeve”, shkruhet ndër të tjera në letrën e PD, e cila është në formë ultimatumi për Prokurorinë e Përgjithshme drejtuar nga Arta Marku.


“Për shkak të vonesës gati dyjavore të prokurorisë, PD i kërkon organit të akuzës që ta informojë atë dhe opinionin publik mbi procedurat e verifikimit që ka nisur dhe rezultatet e deritanishme të këtij verifikimi. “Çdo vonesë e pajustifikuar për rezultatin e këtij verifikimi është rreshtim në anën e krimit të organizuar dhe promovimit të tij në funksione të larta publike.”-thuhet në letrën e Sekretarit të Përgjithshëm të PD, Gazment Bardhi.

Të martën, Partia Demokratike publikoi disa dokumente të cilat sipas Selisë Blu vërtetojnë se Valdrin Pjetri ka qenë i dënuar më parë në Itali. I menjëhershëm ka qenë reagimi i Kryeministrit Edi Rama, i cili u shpreh se “derisa të e vërteta të dalë zyrtarisht, Valdrin Pjetri dhe PS i kanë rrugët e ndara”.


Vettingu shkarkon Gentian Osmanin, KLP i kërkon Arta Markut zëvendësimin e tij


Kreu i Këshillit të Lartë të Prokurorisë, Gent Ibrahimi ka kërkuar me urgjencë zëvendësimin e vakancës së lënë nga prokurori Gentian Osmani, pas shkarkimit të tij nga vettingu. Ditën e premte, Këshilli i Lartë Prokurorisë zhvilloi mbledhjen ku shpalli zyrtarisht vendin vakant të lënë nga Osmani, duke i kërkuar Prokurores së Përgjithshme të përkohshme, Arta Marku të hap garën për regjistrimin e kandidaturave për të plotësuar vakancën e anëtarit-prokuror në KLP. Vendi vakant u shpall dy ditë pas vendimit të vettingut për të shkarkuar Gentian Osmanin duke shmangur kështu një ngërç të mundshëm në KLP.

Pasi paraqiten kandidaturat,  Prokurorja e Përgjithshme e përkohshme Arta Marku zhvillon mbledhjen e Asamblesë së Përgjithshme të Prokurorëve, të cilët përzgjedhin kandidatin e duhur për t’u bërë anëtari i 6 prokuror në KLP, i cili duhet të ketë kaluar vettingun.


KLP përbëhet nga 11 anëtarë, 6 prokurorë të zgjedhur nga Asambleja e Përgjithshme e Prokurorëve dhe 5 jo-prokurorë të zgjedhur nga Kuvendi.

Gentian Osmani u shkarkuar të mërkurën nga Kolegji i Posaçëm i Apelimit,  për “mosjustifikim të pasurisë.’ Osmani ishte anëtar i Këshillit të Lartë të Prokurorisë dhe prokuror pranë Krimeve të Rënda.

KLP ka një rëndësi të madhe në sistemin e drejtësisë, sidomos gjatë muajt shtator ku pritet të caktojë prokurorët për ngritjen e SPAK, emëron prokurorët e rinj, propozon kandidatët për Prokuror të Përgjithshëm, përcakton kriteret për përzgjedhjen e prokurorëve etj.