Këshilltari i Bashës: PD duhet të ndahet nga e shkuara. Basha të vendosë për Berishën

Anëtari i Këshilli Kombëtar të PD, ish koordinator i PD-së për ekonominë, Dritan Shano ka deklaruar në një intervistë për A2 CNN, se “Partia Demokratike duhet të ndahet nga e shkuara e saj sado e lavdishme”.

“Programi i Partisë Demokratike duhet të jetë i vërtetë dhe i besueshëm dhe shtoi se PD-ja duhet të ndahet nga e shkuara e saj sado e lavdishme”, tha Shano.

Kur u pyet nëse ndarja nga e shkuara do të thotë që Sali Berisha të mos jetë më në listën e deputetëve, Shano u përgjigj kështu: “Kryetari i partisë është mandatuar që t’i japë zgjidhje kësaj gjëje. Nëse është e nevojshme dhe nëse njerëzit e përcjellin qartë këtë mesazh, atëherë ai duhet t’u bindet njerëzve”.

Më tej, analisti theksoi se “nuk është e thënë që po iku Rama do të vijë Luli dhe Monika”.

“Po iku Rama, do të ketë zgjedhje. Shqiptari duhet të mundohet të thotë me votën e tij se nuk dua që të vijë Luli. Ka ardhur koha që shqiptarët të mendojnë për alternativa të tjera. Është e qartë që klasa politike shqiptare duhet të rinovohet”, u shpreh Shano.

Dialogu për Ballkanin Perëndimor, zbardhet axhenda e Bashës në Berlin

Angazhimi i Gjermanisë ndaj perspektivës Europiane për vendet e Ballkanit Perëndimor, zgjerimi i BE dhe strategjia politike dhe ekonomike për Ballkanin Perëndimor janë temat në qendër të Dialogut të Nivelit të Lartë që organizon Fondacioni Konrad Adenauer në bashkëpunim me Këshillin Ekonomik Gjerman në Berlin, ku po merr pjesë kryetari i Partisë Demokratike Lulzim Basha.

Të ftuar të veçantë të këtij takimi do të jenë Presidenti i Bundestagut gjerman, Dr Wolfgang SCHÄUBLE, Kryetarja e CDU, Annegret KRAMP-KARRENBAUER dhe Komisioneri i BE për Buxhetin dhe Burimet Njerëzore, Günther OETTINGER.

Në punimet e dialogut 2 ditorë me temën “Procesi i Berlinit dhe përtej: Angazhimi i Gjermanisë për perspektivën europiane të Ballkanit Perëndimor” do të marrin pjesë personalitete të larta të politikës, ekonomisë dhe diplomacisë gjermane.

Kryetari i Partisë Demokratike, Lulzim Basha, është një ndër kontribuesit kryesorë në panelin e veçantë për të diskutuar së bashku me anëtarë të grupit parlamentar CDU/CSU sfidat dhe mundësitë lidhur me procesin e integrimit te Shqipërisë ne BE si interesi më madhor i çdo qytetari shqiptar. Në qendër të diskutimeve me personalitetet e larta nga politika dhe industria gjermane është edhe intensifikimi i bashkëpunimit politik dhe ekonomik me Gjermaninë dhe parashtrimi i planit të Partisë Demokratike për zhvillimin ekonomik të vendit e në veçanti thithja e investimeve gjermane, bazuar në programin ekonomik të hartuar me mbështetjen e Fondacionit Konrad Adenauer dhe ekspertëve ekonomikë të Unionit Kristian-Demokrat Gjerman CDU.

Basha heq dorë nga kërcënimi? Tani flet për zgjidhje “politike”

Kryetari i PD-së, Lulzim Basha ka postuar mëngjesin e së hënës foto nga protesta e 2 qershorit, ndërsa nuk përsërit kërcënimin e një nate më parë kur tha se kjo ishte hera e fundit që ai fliste, më 8 qershor do të flasë sovrani.

Duket se Basha ka hequr dorë nga kërcënimi, por është mundur të japë zgjidhje për krizën në vend.

“Bashkimi popullor i 2 Qershorit është asambleja më madhështore e shqiptarëve europianë, të vjedhur, të dhunuar e të tradhtuar, që kërkojnë zgjidhjen e krizës me largimin e shkaktarit të saj, qeveri tranzitore dhe zgjedhje të lira.

Unë e di që çdo shqiptar lufton të ketë të njëjtat të drejta si çdo qytetar europian. Ne nuk kërkojmë asgjë më shumë, por nuk do të pranojmë asgjë më pak për veten se vlerat që na bashkojnë: demokraci, shtet ligjor dhe drejtësi të barabartë për të gjithë.

Ne nuk hedhim asnjë hap pas!”, shkruan Basha një ditë pas protestës së dhunshme, ndërkohë që i gjithë faktori ndërkombëtar bën thirrje për përmbajtje dhe dialog politik.

Bashkimi popullor i 2 Qershorit është asambleja më madhështore e shqiptarëve europianë, të vjedhur, të dhunuar e të…
Gepostet von Lulzim Basha am Montag, 3. Juni 2019

Deputetja e PS: Basha të zgjohet nga ëndrra për karrigen e Kryeministrit

“Ai zgjidhjen e sheh veç te karrigia e kryeministrit. Mbase dikush duhet ta zgjojë Z. Basha.” Kështu ka deklaruara deputetja socialiste Edlira Bode gjatë një intervistë për gazetën “Tema”. Bode ka folur për situatën politike duke e cilësuar si një gjendje të krijuar artificialisht nga PD për të justifikuar humbjen e tyre në zgjedhje. Opozita terrorizon shqiptarët me protestat e saj dhe minon ëndrrat për t’u anëtarësuar në BE ka thënë Bode, e cila shton se në asnjë vend, opozita nuk ka protestuar për të mos u zhvilluar zgjedhjet.

Pjesë nga intervista

Gazetari: Znj. Bode, gjendemi në prag të zgjedhjeve vendore dhe situata politike në vend vijon të jetë e tensionuar. Ju si e shihni zgjidhjen për të dalë nga kjo gjendje?

Të jem e sinqertë me ju, ndjej shqetësim kur ma adresojnë këtë pyetje. Edhe pse është një situatë e tensionuar artificialisht, jo veç që ka terrorizuar shqiptarët, por po minon edhe ëndrrën tonë për ta ngritur flamurin kuq e zi në oborrin e Bashkimit Evropian. Me aq sa e kam ndjekur politikën, nuk di ndonjë rast tjetër në botë ku opozita proteston apo ka protestuar për të mos u zhvilluar zgjedhjet.

Gjykoj, se pseudo-kauza e liderit të opozitës jashtë parlamentit po pompohet pasi ai nuk ka më çfarë justifikimi të japë për humbjen e radhës e cila sinjalizohet nga çdo sondazh. Por ky është problemi i tyre dhe jo i yni. Shqetësimi im janë protestuesit që ndjekin urdhrat qorre të liderëve të opozitës, pasi edhe ata që i janë bashkuar aksionit guerrilas janë shqiptarë dhe natyrisht nuk mund të ndjehemi mirë kur i shohim të përleshen rrugëve të kryeqytetit.

-Po zgjidhja?

Nuk ka asnjë dyshim që zgjedhje do të ketë dhe ato do të mbahen në datën 30 Qershor. Jo sepse kështu do Partia Socialiste, por sepse kështu thotë Kushtetuta e vendit dhe minimumi kemi detyrim për ta respektuar. Përvoja tregon, që sa herë është eksperimentuar me shkeljen e saj, ka pasur kosto të madhe për shëndetin e demokracisë së vendit. Çdo parti është e lirë të zgjedhë nëse do të marrë ose jo pjesë në zgjedhje, por askush, individ apo parti qoftë, nuk ka të drejtën të pengojë zhvillimin e tyre.

Kërcënimet e aktorëve kryesorë të opozitës për ta penguar garën elektorale me metoda luftarake, duken të pakuptimta në sipërfaqe, por në thelb shërbejnë si mburoja për t’i shpëtuar drejtësisë së re. Kodi Zgjedhor, për të cilin edhe vetë PD është investuar për ta hartuar e miratuar, parashikon si vepër penale pengimin e zhvillimit të zgjedhjeve. Ata i dinë, nëse do jetë nevoja për t’i rikujtuar, data më e afërt do të jetë 30 Qershori ku institucionet do të bëjnë detyrën.

-Zonja Bode, natyrisht që secila palë ka pretendimet e saj, por pyetja ime është se si dilet nga kjo gjendje?

Në mjekësi, çdo lloj kure e vendosur nga mjeku për të sëmurin, nuk funksionon nëse edhe vetë pacienti nuk ka vullnetin për t’u shëruar. Ai zgjidhjen e sheh veç te karrigia e kryeministrit? Është e vërtetuar shkencërisht që një person nuk mund të shohë kurrë ëndrrën që sheh një tjetër. Dua të them me këtë, që për ëndrra jemi duke folur, ndaj dikush mbase duhet ta zgjojë Z. Basha.

Basha fton shqiptarët në protestë, asnjë përgjigje për letrën e Ramës

Ndërsa Partia Socialiste nis të shtunën pasdite zyrtarisht fushatën zgjedhore për zgjedhjet e 30 qershorit, PD bëhet gati për protestën e së djelës.

Kryetari i PD-së, Lulzim Basha postoi në facebook një video përmes të cilës fton shqiptarët t’i bashkohen protestës së opozitës.

“Asnjë hap pas për çlirimin e vendit nga e keqja! Nesër në ora 19:00 të gjithë në shesh! #2qershor #ShqipëriaSiEuropa”, shkruan Basha, mbi videon ku me shifra tregon arsyet pse duhet protestuar.

Më herët, kryeministri Rama postoi një letër të shtatë publike, por këtë herë drejtuar demokratëve dhe jo Bashës.

Në këtë letër kryeministri bënte të ditur se rruga e ndjekur nga lidershipi i PD-së është e gabuar dhe e gjitha vjen vetëm sepse Basha ka frikë nga humbja në zgjedhje dhe nga drejtësia.

Asnjë hap pas për çlirimin e vendit nga e keqja! Nesër në ora 19:00 të gjithë në shesh! #2qershor #ShqipëriaSiEuropa
Gepostet von Lulzim Basha am Samstag, 1. Juni 2019

Basha: Të dielën grusht tiranisë së krimit, do rrëzojmë Ramën

Kreu i Partisë Demokratike, Lulzim Basha ka zhvilluar një takim me qytetarët në zonën e ish-Kinostudios në Tiranës, duke u bërë thirrje të bashkohen në protestën e 2 qershorit, për të rrëzuar Ramën dhe vendosur një qeveri tranzitore. Gjatë fjalës së tij Basha hodhi një lumë akuzash ndaj qeverisë duke i cilësuar si krimet e fundit, pasi populli do të rrezojë oligarkët dhe kriminelët nga karriget e tyre.

“Pas mbylljes së negociatave për Shqipërinë, sot KE mori zyrtarisht kërkesën e Holandës për kufizimin e vizave për shqiptarët” tha Basha, i cili shtoi se Rama është i vetmi njeri në botë që mbron kriminelët dhe dënon me burg njerëzit e pafajshëm.

“Kjo është një betejë shprese për çdo shqiptarë. Protesta e bashkimit popullor janë rruga e vetme e largimit të së keqe dhe e grupeve kriminale që janë në pushtet. Orët e fitores po afrojnë, orët e tiranisë kanë filluar numërim mbrapsht. Kur më parë nuk ka qenë në dorën tuaj që të vendosni për veten. Rama është njeriu që kërcënon më së shumti me burg. Burg për mjekët, profesorët, personat që shesin majdanoz në rrugë, por nuk ka burg për kriminelët. Kur do rrëzohet Edi Rama? Rrëzimi I të keqes detyrë kombëtare, ejani të gjithë me 2 qershor në protestë. Ejani të dielën në orën 19 në protestën tonë, bashkohuni me lëvizjen tonë, bëhuni pjesë e çlirimit të Tiranës, e çlirimit të Shqipërisë, nga kjo bandë hajdutësh dhe kriminelësh. ” – ka thënë Basha

Kriza politike, aleatët e Bashës kërkojnë zgjedhje të parakohshme në vjeshtë

Krerët e partive aleate të Koalicionit Opozitar kanë zhvilluar një takim në qytetin e Shkodrës nga ku kanë deklaruar se zgjidhja e krizës vjen vetëm nëse zgjedhjet lokale shtyhen për në vjeshtë dhe zhvillohen bashkë me zgjedhjet e parakohshme parlamentare.

Aleatët e Bashës kërkojnë me ngulm krijimin e një qeverie tranzitore e cila do të përgatisë terrenin për zgjedhje të lira dhe të ndershme.

“Kryeministri, ata që janë në Parlament sot, i anatemon, i quan zëvendësues të Partisë Demokratike. Ata, të paktën në këto momente, përderisa mendojnë se zgjedhje me një parti nuk mund të ketë, duhet të bojkotojnë Parlamentin. Ne marrim përsipër, që sëbashku, e gjithë politika të dakordësohet, të ketë vullnet pozitiv, të shkëputet nga krimi përfundimisht, dhe kjo bëhet vetëm nëpërmjet një qeverie kalimtare e cila kërkon një kohë të caktuar, nuk mund të bëhet as për një javë, as për dy javë, as për një muaj dhe as për dy muaj por ndoshta do të kërkojë një periudhë 5-6 mujore”, u shpreh kreu i PAA, Agron Duka

“Ju si shkodranë keni qenë përherë në krye të betejave demokratike. Më 30 qershor zgjedhje nuk duhet, nuk mund dhe nuk do të ketë, por kjo nuk mjafton. Duhet të jemi të gjithë, si sot, më shumë nesër, me qëllim jo vetëm të mos realizohen zgjedhje në 30 qershor, por kur të realizohen ato në vjeshtë, zgjedhje parlamentare dhe zgjedhje për pushtetin vendor, pasi të jetë ngritur një qeveri tranzitore, duhet të jenë zgjedhje me një mesazh të fuqishëm, se Shqipëria nuk do t’i kthehet më asnjëherë praktikave totalitare, të një qeverisje që pretendon se është zgjedhur në mënyrë demokratike”, tha kreu i PBDNJ, Vangjel Dule.

“Ne po rezistojmë për gjënë që është më esenciale që kemi fituar këto 27-28 vjet, lirinë për të zgjedhur. Po e humbëm edhe këtë, këtu demokracia mbetet një fjalë boshe pastaj, dhe kthehemi atje ku kemi qenë. Kështuqë, edhe njëherë, do t’ju ftoja të vimë ditën e dielë, do të na duhet edhe një e dielë tjetër ndoshta, do të na duhet këtu në Shkodër të organizohemi më shumë, sepse rrugë tjetër nuk na ka mbetur. Ai zotëria po tenton me një parti, ne do t’i themi ‘nuk do të lejojmë’, kjo është e drejta jonë. Kemi mundësi të kemi pluralizëm, po qemë të zotët ia arrijmë, po na thyen, bravo ju qoftë, do t’i durojmë pastaj, do të ulim kokën e të rrimë. Unë ju falenderoj se jam i sigurt që Shkodra s’ka ndërmend ta ulë kokën.” u shpreh kreu i LZHK, Dashamir Shehi.

Krerët e partive opozitare e mbyllën takimin duke u bërë thirrje qytetarëve t’i bashkohen protestës së opozitës në datën 2 Qershor.

Basha: Rama përgjegjësi i vetëm, prej 3 vjetësh bllokon hapjen e negociatave

Kreu i Partisë Demokratike, Lulzim Basha ka zhvilluar një takim me banorët e Kurbinit, për t’i ftuar ato në protestën kombëtare të 2 qershorit. Në nisje të fjalës së tij, lideri i opozitës ka falënderuar qytetarët kurbinas për pritjen madhështore duke u shprehur se, “Keni qenë dhe jeni tmerri i tiranisë”. Gjithashtu Basha tha se nuk do të lejojë të realizohet kontrata koncesionare për rrugën Milot-Balldren.

“Vetëm pak kilometra prej këtej po planifikohet një hajdutëri që ia tejkalon në përmasa e pacipësi edhe hajnisë kriminale tek Unaza e Re. Milot –Balldren, 260 mln euro për 17 km. Hajdutëri të tillë nuk ka njohur e dëgjuar Europa. Hajdutëri të tillë shohin vetëm vendet ku populli ka mbaruar, e ka ulur kokën dhe e ka pranuar të keqen. Por ne nuk jemi ai lloj vendi. Kjo kontratë do varroset. E dinë fare mirë kundërshtarët, e di edhe Rama që mundohet ta kthejë tmerrin dhe panikun që e ka zënë në një shpoti që nuk e ha më asnjë. Nga Kurbini do i vijë fundi pushtetit kriminal dhe regjimit më të korruptuar që ka njohur Shqipëria”. – tha Basha

“Ka vetëm një përgjegjës për bllokimin e negociatave, Edi Rama, I cili po bllokon Evropën, sepse mbron interesat e oligarkisë” ka thënë Basha në Kurbin, duke theksuar edhe një herë se negociatat nuk do të hapen në qershor.

“Ja ku jemi sot, me një njeri që duhet të ishte larguar me qindra herë për të zezat e tij dhe nuk largohet. Vetëm për karrigen e tij, për pushtetin e tij, refuzon t’i hapë Shqipërisë rrugën e zgjidhjes politike, refuzon ti hapë Shqipërisë rrugën e integrimit evropian. Kush ka sy në ballë e ka parë, kush ka veshë e mend e ka dëgjuar, ka një njeri që e mban peng hapjen e negociatave, ka vetëm një përgjegjës, që e shtyn tash 3 vjet hapjen e rrugës tonë. Për Shqipërinë si e gjithë Evropa. Dhe ky është njeriu që sa herë ka pasur mundësi të vërë interesat e shqiptarëve mbi pasurinë dhe pushtetin e tij, sa herë ka pasur mundësi të zgjedhë shqiptarët dhe jo oligarkët ka vendosur kundër shqiptarëve. Ndaj asgjë nuk na e heq fokusin e kësaj beteje. Asnjë ndryshim nuk do të ketë për krizën ekonomike dhe gjendjen e shqiptarëve pa zgjidhur problemin e problemeve, pa e zgjidhur varkën e qeverisë nga huri I oligarkisë, pa e lidhur fatin e parlamentit dhe kryeministrit të ardhshëm drejtpërdrejt me qytetarët shqiptarë. Kjo është beteja, zgjedhje të lira e të ndershme largimi një orë e më parë I Edi Ramës, garantimi I standardeve zgjedhore, në mënyrë që shqiptarët të jenë ata që do të vendosin. ” shprehet Basha

Gjermanët “tradhtojnë” Bashën, CDU/CSU: S’mund të kërkojmë shtyrje zgjedhjesh

Mark Hauptmann, deputet i parlamentit gjerman, ka folur në lidhje me deklaratën e disa ditëve më parë që dy kolegët e tij Johann David Wadephul, nënkryetari i grupit parlamentar të CDU/CSU në Parlamentin Gjerman dhe Christian Schmidt, nga CSU, dhënë për “Deutsche Welle”, ku shprehën mundësinë e shtyrjes së datës së zgjedhjeve vendore, për të zgjidhur krizën në vend.

Hauptmann tha se asnjë grup parlamentar nuk ka të drejtë të kërkojë shtyrjen e zgjedhjeve, pasi De facto kjo do të thotë të kërkosh të ndryshosh Kushtetutën e Shqipërisë. Ne bëjmë thirrje që të zgjidhet kriza e brendshme në Shqipëri dhe se pozita dhe opozita të ulen në dialog për të gjetur një marrëveshje të përbashkët.

“Është e vërtetë se po ndjekim me shumë shqetësim krizën e brendshme në Shqipëri. Për hir të së ardhmes Europiane të Shqipërisë, duhet të zhvillohet dialog midis qeverisë dhe opozitës, si dhe të dyja palët duhet t’i qasen njëra-tjetrës duke qenë të gatshme për kompromis për të mirën e stabilitetit demokratik. Nuk është e zakonshme për ne të ndërhyjmë në çështjet e brendshme të Shqipërisë. Si grup parlamentar, ne nuk kemi të drejtë të kërkojmë shtyrjen e zgjedhjeve në një shtet të pavarur. De facto, kjo do të mund të konsiderohej si një kërkesë për të ndryshuar Kushtetutën e Shqipërisë dhe ligjin zgjedhor të vendit. Si pasojë do të lindnin pyetje mbi sovranitetin e një shteti të huaj. Stabiliteti demokratik po ashtu përfshin detyrimin për të respektuar rregullat e legjislacionit ndërkombëtar.” – tha Hauptmann për mediat.

Basha refuzon nga Elbasani Ramën: Kurrë qeveri të përbashkët, Rama duhet të ikë!

Kreu i opozitës, Lulzim Basha, ka refuzuar nga Elbasani sërish ftesën e kryeministrit Edi Rama për dialog. Lideri demokrat vijon që të mos tërhiqet nga pozicioni dhe kushti i panegociueshëm për largimin e Edi Ramës nga posti i kryeministrit. Basha shprehet se u ka komunikuar ndërkombëtarëve gatishmërinë për të qenë pjesë e zgjidhjes politike për vendin, por me kusht largimin e Ramës.

“Mirënjohje për këtë mesazh të vendosur që ushton nga zemra gjeografike e Shqipërisë, nga Elbasani, që ushton nga qytetarët, nga të rinjtë dhe të rejat. Nuk kam mesazh më të qartë se ky, betejës së shqiptarëve për liri, sa vijnë edhe u shtohen radhët, çdo ditë e bën më të madh bashkimin tonë, se nuk ka zgjidhje politike pa largimin e Edi Ramës dhe bandës që ka marrë peng vendin. Dhe se në funksion të kësaj shqiptarët e bashkuar kanë vendosur gjithçka, shpirtin dhe vullnetin, nuk mund të ketë as liri, as zgjedhje të lira, as shporrje të bandës kriminale, pa larguar shkaktarin numër një të kësaj krize, njeriun që bëri projektin e Shqipërisë hambar droge. Tani bëhet gati që ta kthejë Shqipërinë në monizëm për të çimentuar pushtetin, por ne nuk do ta pranojmë këtë”, deklaroi Basha nga Elbasani.

Sipas tij, korrupsioni i takon vetëm një partie, por aferat nuk kanë marrë kurrë më parë këto përmasa shtazarake. “216 kontrata sekrete, qindra milionë euro që ua marrin ju, ua heqin nga goja. Kjo bandë ka vjedhur 4.6 mld euro, sa gjithë buxheti dhe shpenzimet”, u shpreh kreu i PD.

Kryedemokarti u shpreh gjithashtu se nuk do të ketë kurrë qeveri të përbashkët me Edi Ramën. Ai u bëri thirrje demokratëve që të mos dëgjojnë ato që ai i cilësoi si thashetheme për qeveri të përbashkët Rama-Basha. “Njëlloj si minjtë e zënë në çark, Rama kanë nisur.. Keni dëgjuar thashethemet që po përhap tani…nuk ka më asnjë barrierë, minjtë e ndiejnë ankthin dhe frikën dhe kanë filluar të përhapin versionet e daljes nga kriza, qeveri e përbashkët Basha-Rama dhe të tjera broçkulla si këto. Këtë betejë nuk e nisëm për betejë nuk e nisëm për pushtetin dhe karriget tona, pasi i dorëzuam. Qartë dhe prerë, kurrë, kurrë, kurrë dhe asnjëherë pazar në kurriz të shqiptarëve. Por që kjo krizë të zgjidhet vetëm në interes të shqiptarëve dhe do të thotë jo vetëm dhënia fund një parlamenti ilegjitim, largimit të Ramës dhe zgjedhjeve të lira”, deklaroi Basha.

Gjithashtu, kryedemokrati tha se nuk do të njohë asnjë akt të parlamentit aktual dhe se kur PD-ja të vijë në pushtet do i zhbëjë vendimet që ka marrë. “Rama erdhi në pushtet me krimin. Këtu në Elbasan krimi diktoi mandatet e krimit, nuk janë deputetë të Elbasanit por të bandave të drogës. Nuk e njohim cdo akt të atij parlamenti dhe do ta zhbëjmë. Nuk i njohim aktet e një parlamenti kukull të krimit. Edhe kjo që po bëjnë për ligjin për Akademinë e Shkencave është diktaturë, duan t’u mbyllin gojën intelektualëve. Zotimi im është që nuk do të ketë pazar me të keqen se beteja do të shkojë deri në fund, deri në fitore”, u shpreh kreu i opozitës.

Në fund të fjalës së tij, Basha ftoi demokratët që të marrin pjesë ne protestën e 2 qershorit, e shtata kombëtare e opozitës së bashkuar kundër qeverisë para Kryeministrisë. “Ju ftoj në protestën madhështore të 2 qershorit. Kurrë më parë nuk ka qenë kaq i qartë kontrasti mes shumicës së shqiptarëve dhe një pakice horrash dhe kriminelësh të frikësuar. Ju ftoj të gjithë bashkë të frymëzuar nga ky bashkim” përfundoi ai.