Ndërpriten fluturimet e “Fly Ernest”, AAC: Kërkoni rimbursim

Duke filluar nga dita e nesërme kompania “Fly Ernest” nuk do të zhvillojë më fluturime nga Italia drejt Shqipërisë dhe Ukrainës, apo anasjelltas. Shkak është bërë pezullimi i licensës nga Autoriteti i Aviacionit Civil Italian, pasi kompania “Ernest” kishte probleme financiare dhe moskorrektësi me shërbimin ndaj pasagjerëve. Për këto arsye, në fund të vitit të kaluar, kompanisë iu pezullua licnesa duke nisur nga data 13 janar.

Të prekur nga ky anulim i licensës së kompanisë “Fly Ernest” janë padyshim shumë qytetarë shqiptarë, që më herët kishin rezervuar bileta me këtë kompani. Në datën 10 janar, Autoriteti i Aviacionit Civil Shqiptar njoftoi se kishte konfirmuar se “Fly Ernest vijon të jetë e pezulluar për fluturimet pas datës 13 janar”. Për këtë arsye, “u kërkohej udhëtarëve që posedojnë biletën e lëshuar nga “Ernest” të datës 13 janar 2020 e më tej, të mos shkojnë në aeroport dhe të kontaktojnë kompaninë ajrore për çdo informacion”.

Ndërkohë, “Fly Ernest” kishte parashikuar të kryente 4 fluturime gjatë ditës së shtunë dhe 8 fluturime gjatë ditës së diel, me avion me qera. Mirëpo, të premten, në datën 10 janar, kompania kishte njoftuar se anulonte të gjitha fluturimet duke nisur nga e shtuna e datës 11 janar. Për këtë arsye, edhe në Shqipëri kjo kompani nuk ka operuar gjatë ditës së shtunë dhe nuk do të operojë me planifikimin e udhëtimeve për ditën e diel, një ditë përpara se të hyjë në fuqi vendimi për pezullimin e licensës.

Për këtë arsye, Autoriteti i Aviacionit Civil “rekomandon të gjithë pasagjerëve me bileta të prera me Ernest, të konfirmojnë dhe kontaktojnë kompaninë, aeroportin, agjencinë për statusin e fluturimit të tyre para se të nisen për në aeroport. Gjithashtu, të gjithë pasagjerët duhet të bëjnë aplikimin për rimbursim të çmimit të biletës tek faqja zyrtare e kompanisë”, thuhet ndër të tjera në njoftim.

Pezullimi i “Fly Ernest”, Aviacioni Civil: Qytetarët të kërkojnë rimbursim

Autoriteti i Aviacionit Civil në Itali pezulloi disa ditë më parë licensën e kompanisë “Fly Ernest”. Kjo kompani, operon gjerësisht edhe në tregun shqiptar për fluturimet nga Italia në Shqipëri dhe anasjelltas. Por, duke nisur nga data 13 janar, “Fly Ernest” nuk do të mund të kryejë fluturime nga Rinasi në drejtim të aeroporteve italiane dhe anasjelltas. Për këtë arsye, Autoriteti i Aviacionit Civil shqiptar u tërheq vëmendjen qytetarëve shqiptarë që kanë rezervuar bileta me këtë kompani, të informohen rreth ndryshimit të orareve të fluturimeve me “Fly Ernest” deri në 13 janar si dhe të kërkojnë rimbursim për biletat e rezervuara pas kësaj date.

Në një njoftim zyrtar, AAC shprehet se “që nga momenti i njoftimit për pezullim, kompania është duke operuar me kapacitet të kufizuar në avionë dhe staf operues. Kjo situatë ka sjellë edhe anulime dhe ri-skedulime të fluturimeve, por jo deri në pikën e ndalimit total të fluturimeve. Duke qenë se kompania ende ka një licensë aktive nga autoriteti italian deri më dt. 13/01, pasagjerët duhet të marrin masat që deri në këtë datë të lidhen në telefon me shërbimin e klientit të kompanisë dhe/ose agjencinë ku kanë prerë biletën dhe të përpiqen të sigurojnë një vend në fluturimet që kompania po kryen.

Nëse pasagjerët nuk e kryejnë dot fluturimin me Ernest dhe zgjedhin të presin një biletë me një kompani tjetër, atyre u rekomandohet të bëjnë kërkesën për rimbursim dhe kompensim nëpërmjet sistemit të kompanisë në faqen e tyre në internet në adresën: form.jotformeu.com/82412077858362…

Kërkesën për rimbursim duhet t’a bëjnë edhe pasagjerët që kanë prerë bileta përtej datës 13 Janar 2020. Është shumë e rëndësishme që pasagjerët të bëjnë kërkesat për rimbursim dhe kompensim si i vetmi mekanizëm mbrojtës në dispozicionin e tyre sipas ligjit të BE-së”, thotë ndër të tjera Autoriteti i Aviacionit Civil shqiptar. Ndërkohë, autoritetet e aviacionit civil në Itali pezulluan licensën e kompanisë “Fly Ernest” për shkak të vështirësive financiare të kësaj kompanie, por edhe probleme të tjera që lidhen me shërbimin ndaj pasagjerëve.

Vonesa me pasagjerët, i hiqet licensa kompanisë Fly Ernest

Autoriteti Kombëtar i Aviacionit Civil në Itali informoi se ka urdhëruar pezullimin e licensës së operimit për transportin e udhëtarëve dhe mallrave për kompaninë ajrore “Fly Ernest”. Kjo kompani operon edhe në tregun shqiptar, për udhëtimet midis Shqipërisë dhe Italisë.

Pezullimi hyn në fuqi në datën 13 janar 2020, me qëllimin e vetëm që kompania të rregullojë transportin e udhëtarëve që tashmë kanë blerë bileta si dhe të sigurojë udhëtarët për fluturimet e anuluara.

Aviacioni Civil italian nuk jep arsye pse ka pezulluar licencën e “Fly Ernest”, por nisur nga deklarata duket se ajo lidhet me vonesat që kjo kompani ka krijuar me transportin e udhëtarëve.

Ndërkohë, sipas komunikatës së Autoritetit të Aviacionit Civil në vendin fqinj, nëse transportuesi siguron elementet e garancisë të kërkuara nga rregulloret dhe nëse këto elemente vlerësohen në mënyrë të favorshme nga ky autoritet, masa e pezullimit mund të revokohet.

“ENAC do të vazhdojë të monitorojë kompaninë ajrore në mënyrë që të verifikojë miratimin e të gjitha nismave të mundshme për të mbrojtur respektimin e të drejtave të pasagjerëve”, thuhet ndër të tjera në komunikatë.