Kriza qeverisëse në Itali, vijojnë negociatat. Conte: Gati për një mandat të dytë, pa Salvinin

Vijojnë negociatat mes Partisë Demokratike dhe Lëvizjes 5 Yjet për të krijuar qeverinë e re dhe për të zgjedhur një kryeministër të ri pas dorëheqjes së Giusepe Conte.

Takime janë zhvilluar gjatë mbrëmjes së të shtunës ndërkohë që mediat italiane raportojnë se do të vijojnë edhe gjatë të dielës, ndërkohë që presidenti Mattarella ka lënë afat deri të martën për arritjen e një kompromisi, ndryshe do të caktojë datën e zgjedhjeve të parakohshme parlamentare në Itali.

Gjatë bisedimeve të së shtunës është cituar emri i Roberto Fico si i mundshëm për postin e kryeministrit. Roberto Fico aktualisht mban detyrën e Kryetarit të Dhomës së Deputetëve. Por TGcom.it raporton të dielën se Fico do të vazhdojë ta kryej me përgjegjësi këtë detyrë, duke tërhequr në këtë mënyrë mundësinë e paraqitur nga Partia Demokratike që ai të bëhet Kryeministër. Ndërsa koha për negociata është drejt fundit dhe kërkohet medoemos një marrëveshje mes PD dhe 5 Yjeve, ekziston mundësia e një qeverie të dytë me kryeministër Conte. Por ai ka vendosur kushte.

“Për sa më përket mua, sezoni me Ligën është mbyllur dhe nuk do të rihapet”, është shprehur Conte. Mesazhi është i qartë: Unë jam i disponueshëm për një “Conte bis”, por ne patjetër duhet t’i mbyllim derën e Salvini.

Duket se ky propozim i fundit vijon ende të negociohet në tryezë, ndërkohë që presidenti Sergio Mattarella ishte i qartë kur tha se zgjidhja duhet gjendur brenda një kohe të shkurtër dhe të martën ai kërkon përgjigje të qarta nga partitë politike.

ITALIA NË KRIZË PAS DORËHEQJES SË CONTES. PRESIDENTI, AFAT DERI TË MARTËN, OSE ZGJEDHJE TË REJA

Sherri me një femër, i zbulon të kaluarën shqiptares

Për shkak të një sherri, një shqiptare është zbuluar nga policia italiane për të kaluarën e saj. Ajo ishte shpallur në kërkim nga drejtësia italiane, pasi akuzohet për falsifikim dokumentesh dhe ishte dënuar nga vendi.

Për këto vepra shqiptarja 36-vjeçare, identiteti i të cilës nuk bëhet i ditur, ishte dënuar në 2015 me 3 vite burg. Ajo ja kishte dalë të fshihej për 4 vjet, por një sherr me një femër, me të cilën ndante shtëpinë ka çuar në arrestimin dhe zbulimin e të kaluarës së saj.

Sherri ka shqetësuar fqinjët, të cilët kanë lajmëruar policinë dhe pas kërkimeve të bëra rezultoi se shqiptarja ishte shpallur në kërkim. Policia bëri arrestimin saj, e cila do të vuaj dënimin me 3 vite burg dhe më pas do të sillet në Shqipëri.

U kap me kokainë dhe mijëra euro në makinë, arrestohet 28-vjeçari

Një shtetas shqiptar ka rënë në prangat e policisë italiane pasi u kap me mbi 3 kilogramë kokainë në makinën e tij.

Gjatë një operacioni blitz të policisë në Reggio Emilia, ku u kryen kontrolle në banesa dhe makina në lagjen Piacenza, në makinë e shqiptarit Elton Barameta, 28 vjeç, u gjet 3 kg e gjysmë kokainë që kapte në treg vlerën e 250 000 euro. Droga ishte e fshehur në një vend sekret të makinës si dhe u sekuestruan 30 mijë euro.

Sipas policisë, shqiptari nuk merrej me shitjen e drogës por bënte vetëm furnizimin e shpërndarësve.

Italia drejt zgjedhjeve të parakohshme, kryeministri Conte: Aksioni qeverisë mbaron këtu

“Aksioni i qeverisë përfundon këtu. Salvini ka ndjekur interesa personale partiake”, ka qenë kjo fjalia hapëse e fjalimit të kryeministrit Giuseppe Conte përpara Senatit. Në këtë mënyrë, kryeministri italian, pa përvojë të mëparshme në politikë, që mori drejtimin e qeverisë në qershor të vitit 2018, lajmëron dorëheqjen. Ai erdhi në politikë nga auditoret e universitetit si profesor i të drejtës, duke marrë drejtimin e qeverisë italiane pas marrëveshjes që Lega Nord arriti me Lëvizjen Pesë Yjet një vit më parë.

Dy partitë populiste, euroskeptike, siguruan më shumë vota në zgjedhjet e marsit 2018, por koalicioni është përçarë kohët e fundit për shkak të shumë mosmarrëveshjeve. Në këto kushte, Italia pritet të shkojë në zgjedhje të parakohshme, të cilat i ka kërkuar Salvini. Kreu i Lega Nord, mori një mbështetje të madhe elektorale gjatë zgjedhjeve të majit për Parlamentin Europian, duke u renditur forca e parë në Itali.

Rezultati i votimeve për eurodeputetët, duket se i ka krijuar bindjen Salvinit se ai mund të fitojë zgjedhjet në Itali, duke qeverisur i vetëm. Gjatë seancës së jashtëzakonshme që ka nisur pasditen e të martës në Senatin italian, kryeministri Giusepe Conte ka akuzuar ndihmësin e tij, Matteo Salvini, si njeriu që ka thelluar krizën, “duke ndjekur interesat personale”, ka thënë Conte, duke shtuar: “Ka ardhur dita e llogarisë. Në Senat, kriza de facto, dy javët e fundit është thelluar. Ne nuk kemi nevojë për njerëz me fuqi të plota, por për njerëz me kulturë institucionale dhe sens përgjegjësise”.

PSG i hap derën Barcelonës për Neymar, Real dhe Juventus futen në garë

L`Equipe ka publikuar një lajm ku shkruan se Paris Sanit Germain ka i ka ‘hapur derën Barcelonës për Neymar’. Sipas burimeve të gazetës franceze, mësohet se dy klubet janë gati të arrijnë marrëveshjen për transferimin e Neymar në formë huazimi me të drejtë blerje në fund të sezonit tjetër.

Dëshira e Neymar për t`u rikthyer në Barcelona është e dukshme, por klubi katalanas ka ngadalësuar përpjekjet për shkak të kostos së lartë të kartonit të brazilianit. Pas dështimit të negociatave në takimin e parë zytar mes Barcelonës dhe PSG, në garë për Neymar është futur dhe Juventus me Real Madrid.

Barcelon i ka ofruar PSG-së, veç një pjese të parave të transferimit, edhe dy lojtarë të tjerë PSG për t`i marrë Neymar. Por skuadra kampione e Francës nuk ka pranuar.

Megjithatë, tani që Phipilipe Coutinho u larguar te Bayern dhe Ousmane Dembele është dëmtuar dhe do të qëndrojë pesë javë jashtë fushe, Josep Maria Bartomeut nuk i mbetet opsion tjetër, veçse të paguajë klauzolën për Neymar.

Sidoqoftë, Barça përballet me konkurrencën e Real Madrid dhe Juventus për Neymar, të dy klubet janë duke kryer sondazhe për futbollistin.

Hipën në pemë për të kapur tullumbacen, bie nga 3 metra lartësi

Tullumbacja ka qenë arsyeja që ka vënë në rrezik jetën e një shtetasi shqiptar. 41-vjeçari shqiptar ka hipur në majë të një peme në të cilin kishte ngecur tullumbacja. Gjatë ngjitjes së tij dega e pemës është thyer duke rënë nga një lartësi rreth 3 metra.

Për pasojë shqiptari është dëmtuar rëndë në trup duke pësuar fraktura serioze dhe të shumta, fatmirësisht jo në rrezik për jetën. Ngjarja ka ndodhur në parkun Brenta Viva në provincën e Padovas.

Vodhën me armë bizhuteri në Itali, arrestohen tre dibranë

Policia e Shtetit ka arrestuar dy persona në Peshkopi, të cilët ishin shpallur në kërkim ndërkombëtar pasi dyshohet se janë autor se vjedhjesh me armë në Itali. Sipas njoftimit të policisë, mësohet se gjatë të hënës është zhvilluar operacioni “Korabi”, ku forcat e rendit shqiptare në bashkëpunim me zyrën e ndërlidhëse të oficerëve italian, kanë arrestuar shtetasit B.Gj., 38 vjeç dhe Q.A.,, 32 vjeç lindur e banues në Dibër. Paralelisht gjatë zhvillimit të operacionit në vendin tonë, policia italiane ka arrestuar në Fiano Romano në Itali, është arrestuar shtetasi H.R., 49 vjeç lindur e banues po në Dibër.

Shtetasit e mësipërm ishin shpallur në kërkim ndërkombëtar pasi Gjykata Rieto/Itali me vendimin e datës 25.06.2019, ka vendosur masën e sigurisë “Arrest në burg” për veprat penale “Organizatë kriminale”, “Vjedhja me armë, kryer në bashkëpunim”, “Mbajtja pa leje e armëve të zjarrit” dhe “Mbajtja e sendeve të vjedhura”, parashikuar nga Kodi Penal Italian.

Në datën 04.05.2019, në zonën Fiano Romano/Itali, shtetasit e mësipërm në bashkëpunim me njëri-tjetrin kanë vjedhur nëpërmjet përdorimit të armëve në banesën e shtetasit italian A.L., një sasi bizhuterish dhe shumën 60.000 euro, që ndodheshin në kasafortën e këtij shtetasi dhe më pas janë laguar nga vendi i ngjarjes me një automjet të vjedhur. Vijon puna për dokumentimin me prova ligjore edhe të vjedhjeve të tjera, që dyshohet se janë kryer në Itali nga ky grup. Interpol Tirana në bashkëpunim me Interpol Roma po vijojnë procedurat për ekstradimin drejt Italisë të dy shtetasve të kapur dhe arrestuar nga Policia e Dibrës.

Aksident i rëndë në Itali, humbin jetën dy shqiptarë

Një aksident tragjik ka ndodhur pak pas mesnate këtë të shtunë në një autostradë në Forli të Italisë. Një mjet tip Volsvagen Pasat, që udhëtonte nga Rimini në drejtim të Bolonjës, me tre persona në bord, është përplasur me një Renaul Clio, ku ndodheshin dy persona brenda tij. Si pasojë e përplasjes së fortë, kanë mbetur të plagosur rëndë tre persona, ndërsa dy persona të tjerë, kanë humbur jetën.

Pikërisht, personat që kanë vdekur në aksident, mësohet të jenë me kombësi shqiptare. Personat që kanë humbur jetën janë përkatësisht një djalë 28 vjeç dhe një grua 38 vjeç, ndërsa identiteti i tyre nuk bëhet me dije. Sipas mediave italiane, operacioni i policisë dhe zjarrfikësve për të nxjerr trupat nga makinat ka zgjatur mbi katër orë për shkak të dëmeve të mëdha që kishin pësuar mjetet nga aksidenti.

Mësohet se gjatë aksidentit, dy persona me shtetësi italo-zvicerane, përkatësisht një grua 49 vjeç dhe një burrë 54 vjeç, janë plagosur rëndë. Policia në Itali raporton se ka nisur hetimet për zbardhjen e shkaqeve të aksidentit, ndërkohë që pritet të mësohet identiteti i dy viktimave nga Shqipëria.

Më 8 shtator hyn në fuqi marrëveshja Itali-Shqipëri për patentat

Duke nisur prej këtij 15 gushti, kanë hyrë në fuqi rregullat e reja për pajisjen me leje drejtimi, e njohur ndryshe patenta. Një ndër këto rregulla është ajo që i mundëson qytetarëve shqiptarë, rezidentë në Itali, dhe atyre që udhëtojnë drejt Italisë me mjetet e tyre, që të mos kenë më nevojë të nxjerrin patentë ndërkombëtare. Ministri i Jashtëm në Detyrë, Gent Cakaj, me anë të një reagimi në rrjetet sociale, shprehet se duke nisur nga 8 shtatori, hyn në fuqi marrëveshja mes Shqipërisë dhe Italisë, për konvertimin e lejeve të drejtimit.

“Një lajm shumë i mirë për shqiptarët në Itali! Më në fund mbaroi edhe marrëveshja ndryshuese për konvertimin e lejeve të drejtimit që do të hyjë në fuqi më datën 8 shtator 2019 Hyrja në fuqi e kësaj marrëveshjeje ndryshuese i vjen në ndihmë shtetasve shqiptarë rezidentë në Itali, pasi bën njohjen e modeleve të reja të lejeve të drejtimit të lëshuara nga shteti shqiptar, duke lehtësuar shpenzimet dhe kohën për konvertimin/pajisjen me leje drejtimi italiane pa kaluar testet teorike e praktike të drejtimit të automjetit”, shkruan Cakaj.

Më tej, ai shpjegon se marrëveshja prek edhe qytetarët shqiptarë që do të udhëtojnë deri në 3 muaj drejt Italisë me mjetet e tyre. Sipas ministrit Cakaj, pas 8 shtatorit nuk do të nevojitet me leje drejtimi ndërkombëtare për të udhëtuar drejt Italisë. “Gjithashtu, shtetasit shqiptarë me lejet e reja të drejtimit që vizitojnë e qëndrojnë në Itali për deri 3 muaj, nuk kanë nevojë të pajisen me leje ndërkombëtare të drejtimit të automjetit. Shqipëria ka ndërmarrë të njëjtat përpjekje e hapa edhe me shtete të tjera evropiane. Përgjegjësitë e palës shqiptare janë kryer të gjitha me përpikëmëri! Për arsye e procedura të brendshme të këtyre shteteve ato nuk janë përfunduar ende. Ministria e Jashtme do të vijojë të nxisë realizimin e marrëveshjeve të tilla edhe me këto vende duke i ardhur sa më shumë në ndihmë bashkëkombasve tanë nëpër botë”, përfundon Gent Cakaj.

Bie qeveria italiane? Salvini: Vendi drejt zgjedhjeve të parakohshme

Zëvendëskryeministri dhe ministri i Brendshëm italian, Matteo Salvini ka lajmëruar se Italia po shkon drejt zgjedhjeve të parakohshme. Mosmarrëveshje mes koalicion it qeverisës duket se nuk kanë arritur të gjejnë zgjidhje. Salvini tha për mediat se “mazhoranca nuk ekziston më dhe zgjidhja e vetme mbeten zgjedhjet e parakohshme.”

“Italianëve u duhet një siguri dhe një qeveri që të marrë vendime të guximshme. Është e kotë që të vazhdojë të ecë së bashku me aleatët e koalicionit mes grindjeve, tashmë fjalën e kanë votuesit.” u shpreh Salvini.

Grindjet dhe mosmarrëveshjet në koalicionin qeverisë vijojnë prej kohësh në Itali, por mesa duket sipas njoftimit të Salvinit shumë shpejt vendi do të ketë zgjedhje të parakohshme.