Polici kosovar vret një person në Gjilan

Një ngjarje e rëndë ndodhi në Kosovë mëngjesin e të dielës. Një punonjës i policisë së Kosovës, me inicialet V.H., qëlloi për vdekje një person në Gjilan.

“Mund të ju konfirmojë se rreth orës 04:50 në rrugën ‘Nato 99”, ka ndodhur një vrasje. Motivet ende nuk dihen. Policia dhe ekipet e tjera kanë ndalë në vendin e ngjarjes si dhe po i vazhdojnë hetimet. Vdekjen e viktimës e ka konstatuar ekipi mjekësor”, thuhet nga komunikata e Policisë.

Dyshimet e para janë se autori dhe viktima kishin pasur më herët një aksident mes tyre. Megjithatë, grupi hetimor po punon për zbardhjen e ngjarjes. Punonjësi i policisë është arrestuar në vendin e ngjarjes, ndërsa është pushuar dhe nga puna.

Zëri Amerikës: Thellohen paqartësitë rreth formimit të qeverisë së re të Kosovës

Mbledhja e parlamentit të Kosovës që u mbajt të enjten më shumë thelloi sesa qartësoi rrugën e ngritjes së institucioneve të reja. Sipas Kushtetutës, presidenti i Kosovës, i propozon parlamentit kandidatin për kryeministër, në këshillim me partinë politike ose koalicionin që ka fituar shumicën e nevojshme.

Të premten, presidenti Hashim Thaçi, ftoi kryetarin e lëvizjes Vetëvendosje Albin Kurti, për një takim pasmesditës për caktimin e mandatit për formimin e qeverisë.

Por në lëvizjen Vetëvendosje thanë se “zoti Kurti e ka të pamundur ta takoj sot presidentin, meqë ndodhet jashtë Prishtinës. Ai do ta njoftojë së shpejti presidentin për ditët e orët e mundshme të takimit”, thanë në këtë lëvizje.

Vendimi për mandatarin varet nga negociatat e partive fituese, vazhdimi i të cilave mbetet i paqartë, pas mbledhjes së një dite më parë të parlamentit i cili zgjodhi Glauk Konjufcën nga lëvizja Vetëvendosje në postin e kryetarit.

Që nga përfundimi i zgjedhjeve të parakohshme parlamentare të 6 tetorit kur kishin filluar edhe negociatat për bashkëqeverisje ndërmjet lëvizjes Vetëvendosje dhe Lidhjes Demokratike të Kosovës që dolën të parat, është thënë se posti i kryetarit të parlamentit do t’i takojë Lidhjes Demokratike të Kosovës.

Deri pak orë para mbledhjes të dyja partitë kishin shkëmbyer oferta dhe kundër oferta për themelimin e institucioneve ku “mollë sherri” ishte shfaqur posti i presidentit të cilin Lidhja Demokratike e Kosovës kërkon t’i takojë asaj në vitin 2021.

Të enjten Lidhja Demokratike tha se është e gatshme të votojë ngritjen e qeverisë nga lëvizja Vetëvendosje pa u bërë pjesë e saj dhe deputetët e kësaj partie votuan për kryetarin e parlamentit nga radhët e lëvizës Vetëvendosje. Për vëzhguesit kjo është një shenjë se Lidhja Demokratike pret ri negocim të plotë për ndarjen e pushtetit.

Kosova ka përvojë të proceseve të gjata të negocimit të koalicioneve qeverisëse. Pas zgjedhjeve të vitit 2014 ishin dashur gjashtë muaj për të gjetur një zgjidhje. Vëzhguesit ndërkaq thonë se vendi aktualisht ndodhet në një periudhë kur duhet përshpejtuar proceset për të shmangur zgjatjen e një boshllëku institucional, apo edhe për të shmangur mundësitë që vendi të shkojë në zgjedhje, në vend që të gjejë një zgjidhje.

Kosova mbajti zgjedhjet e katërta me radhë që nga shpallja e pavarësisë së saj në vitin 2008. Zgjedhjet pasuan dorëheqjen e kryeministrit Ramush Haradinaj, i cili u thirr në Hagë në muajin korrik, për t’u marrë në pyetje nga prokuroria e Posaçme që trajton pretendimet për krime lufte dhe të pasluftës në Kosovë./VOA/

Mini-Shengeni, Albin Kurti: Rruga nga Beogradi në Tiranë, kalon nëpër Prishtinë

Albin Kurti reagoi të hënën në lidhje me punimet e Samitit të Tiranës, ku liderët e vendeve të Ballkanit Perëndimor u takuan për të tretën herë për të diskutuar për “Mini-Shengenin Ballkanik”. Kurti lë të kuptohet se mbetet i hapur për bashkëpunimin rajonal, por duke zbatuar parimet e “reciprocitetit”, që sipas tij, “duhet të udhëheqin iniciativat rajonale”. Ai i dërgon një mesazh edhe qeverisë shqiptare, duke u shprehur se “rruga nga Beogradi për në Tiranë kalon nëpër Prishtinë”.

“Parimet e gjithëpërfshirjes dhe reciprocitetit duhet të udhëheqin iniciativat rajonale. Rruga nga Beogradi për në Tiranë kalon nëpër Prishtinë. Ne jemi dhe gjithmonë do të jemi një popull dhe askush nuk mund të qëndrojë mes nesh. Ne kemi nevojë për më shumë bashkëpunim jo konfrontim!”, shkruan Albin Kurti.

Reagimi i kreut të Vetëvendosjes vjen pak ditë pas mbajtjes së Samitit të Tiranës, ku Kryeministri Edi Rama, ai i Maqedonisë së Veriut Zoran Zaev, Presidenti Serbisë Aleksandër Vuçiç dhe ai malazez, Milo Gjukanoviç diskutuan për krijimin e një zone të përbashkët ekonomike, që mundëson lëvizjen e lirë të njerëzve, mallrave dhe kapitaleve.

Kryeministri Edi Rama gjatë deklaratës drejtuar liderëve kosovarë, duke u bërë thirrje të heqin dorë nga rruga ku janë futur dhe të pranojnë të bëhen pjesë e kësaj nisme. “Uroj që Kosova të dalë nga një rreth vicioz që nuk i bën mirë. Kosova nuk ka nevojë për një garë të brendshme se kush refuzon më shumë dialogun. Kosova duhet të qëndrojë fort afër Shqipërisë dhe miqve të vet SHBA dhe BE dhe të mos kthejë vizionin e të ardhmes në një luftë politike të ditës”, tha Rama të shtunën për gazetarët”, shprehej Kryeministri Edi Rama, pasi Presidenti i Kosovës Hashim Thaçi refuzoi të merrte pjesë në këtë samit.

Viktimat e tërmetit në Shqipëri, Kosova shpall të mërkurën ditë zie kombëtare

Presidenti i Kosovës, Hashim Thaçi shpall ditën e mërkurë ditë zie në Kosovë në nderim të viktimave që humbën jetën nga tërmeti i fuqishëm që goditi Shqipërinë

“Në shenjë respekti shtetëror dhe qytetar, dita e mërkurë, 27 nëntor 2019, shpallet ditë zie shtetërore në Republikën e Kosovës, pas tërmetit në Shqipëri, i cili la dhjetëra persona të vdekur dhe shumë të lënduar”, thuhet ndër të tjera në vendimin e presidentit Thaçi.

Flamujt shtetëror ngrihen në gjysmështizë në të gjitha objektet shtetërore të Republikës së Kosovës, brenda dhe jashtë vendit.

Mëngjesin e të martës Tirana dhe Durrësi u zgjuan nga një tërmet i fuqishëm me magnitudë 6.3 duke lënë të vdekur të paktën 18 persona, mes tyre dhe shtetas nga Kosova dhe mbi 600 të plagosur.

Tërheqja e njohjeve të Kosovës, Engel: Po punojmë kundër përpjekjeve të Serbisë

Kongresmeni amerikan Eliot Engel shprehet se ndryshimi i kufijëve midis Serbisë dhe Kosovës është një ide e gabuar. Kreu i Komisionit të Dhomës së Përfaqësueseve për Marrëthëniet me Jashtë, dha një intervistë për Zërin e Amerikës, tha se ndryshimi i kufijëve do të shkaktonte një reagim zinxhir.

“Kjo do të shkaktonte një reagim zinxhir që unë mendoj se nuk do të ishte pozitiv. Ne i dimë parametrat për Kosovën. Unë mendoj se ndryshimi i kufijve do të ishte një ide e gabuar. Mendoj se kjo nuk do të ishte një gjë e mençur”, i tha ai Zërit të Amerikës.

Eliot Engel u shpreh se Serbia po bën përpjekje për të deligjitimuar Kosovën, duke bindur vendet që e kanë njohur pavarësinë e saj, të tërheqin njohjet. Engel thotë se SHBA po punon kundër këtyre përpjekjeve të Serbisë.

“Serbia po bën përpjekje të forta për të deligjitimuar Kosovën. Ajo po përpiqet të bindë vendet që e kanë njohur pavarësinë e Kosovës që të tërheqin njohjet. Ne po luftojmë kundër këtyre përpjekjeve. Kështu që sa më i bashkuar të jetë vendi aq më mirë do të jetë për vendin”, tha ai.

Më tej, Engel shtoi se ai do të vazhdojë të ketë marrëdhënie të ngushta me kombin shqiptar, ndërsa u shpreh se do të bashkëpunoj me këdo lider të Kosovës.

“Por më lejoni të them se kam besim se Shtetet e Bashkuara, me nxitjen time si kryetar i Komisionit për Marrëdhëniet me Jashtë, do të vazhdojnë të kenë marrëdhënie të ngushta me kombin shqiptar, me popullin shqiptar dhe me njerëzit në Kosovë. Dhe sigurisht që unë jam i gatshëm të ndihmoj në çfarëdo mënyre që mundem, kështu që kushdo që zgjidhet, zoti Kurti apo dikush tjetër, unë do të ofroj ndihmën time”, tha ai.

Kosova përballë Çekisë, për një biletë në Euro 2020

Kosova përballet mbrëmjen e të enjtes në sfidën e parafundit eleminatore të Euro 2020, ndaj Çekisë në transfertë. Dardanët janë ende në garë për kualifik, ndaj do të kërkojnë tre pikët në transfertën çeke, pasi kundërshtarët e të enjtes janë dhe rivalët kryesor për kualifikim.

Në seancën e fundit janë stërvitur të gjithë futbollistët që trajneri Challandes i ka grumbulluar për dy ndeshjet e fundit kualifikuese për Euro 2020, me përjashtim të Vedat Muriqit, i cili tashmë është kthyer në Turqi, për shkak të lëndimit. Atmosfera në radhët e Dardanëve është mjaft optimiste dhe të gjithë janë të vetëdijshëm për rëndësinë e ndeshjes.

Trajneri Challandes u shpreh të mërkurën se skuadra e tij është gati, ndërsa Muriqi do të jetë një mungesë e rëndësishme. “A jemi gati? Sigurisht që po, pasi nëse nuk do të ishim do të qëndronim në Prishtinë e nuk do të vinim këtu. Muriqi është një mungesë e rëndësishme, pasi nuk kemi një lojtar të dytë si ai, që mund ta zëvendësoj kokë më kokë, por ka shumë rëndësi që të reagojmë si grup dhe të luajmë në këtë mënyrë në fushën e lojës”, ka thënë Challandes.

Nëse Kosova fiton ndaj Republikës Çeke, ekipi Dardan shkon në vendin e dytë në renditje me 14 pikë në Grupin A, ndërsa Çekia mbetet me 12 pikë. Ndërkohë, në takimin e fundit eleminator, Kosova pret Anglinë në stadiumin “Fadil Vokrri”. Nëse fiton të enjten ndaj Çekisë, dhe barazon ndaj Anglisë, Kosova rrit shanset për kualifikim, duke mbajtur gjithashtu shpresën se Bullgaria do të ndalë Çekinë në takimin e fundit në grup.

Shkëmbimi i territoreve, Gjermania kundër

Ministri i Jashtëm i Gjermanisë foli gjatë intervistës për Deutsche Welle, edhe për çështje të tjera në rajon, si krijimi i mini-Shengenit ballkanik apo dialogu Kosovë-Serbi. Së pari, Heiko Maas, shprehet se për vendet e Ballkanit integrimi në BE-së është i vetmi proces, ndërsa sipas tij, bashkëpunimi rajonal mes 6 vendeve të Ballkanit Perëndimor, i shërben këtij procesi.

“Ne nuk shohim të ketë alternativa të tjera përveç procesit të pranimit në BE, nëse duam që të ruajmë interesin për reforma serioze dhe të qëndrueshme, si për shembull në fushën e shtetit ligjor. A mund të përmirësohet procesi ekzistues? Kjo është një çështje tjetër. Përmirësimi i bashkëpunimit rajonal plotëson procesin e pranimit në BE. Forcimi i marrëdhënieve të fqinjësisë dhe bashkëpunimi ekonomik janë në favor të secilit prej gjashtë vendeve të Ballkanit Perëndimor. Ato e bëjnë Ballkanin Perëndimor në përgjithësi më interesant. Me procesin e Berlinit ne mbështesim prej vitesh këto përpjekje dhe kemi arritur shumë, si për shembull kemi krijuar organizatën rajonale të të rinjve RYCO, dhe praktikisht, kemi ulur tarifat për roaming”, u shpreh ai.

Ndërkohë, lidhur me dialogun Serbi-Kosovë, ministri gjerman është shprehur se shkëmbimi i territoreve nuk i shërben stabilitetit të Ballkanit. “Sa i përket idesë së këmbimit të territoreve ose ndryshimit të kufijve midis Kosovës dhe Serbisë, ne nuk mendojmë se kjo kontribuon për stabilitetin në rajon. Ajo që mbështesim ne është rifiilimi i shpejtë i dialogut të ndërmjetësuar nga BE, duke pasur si synim një marrëveshje të gjithanshme që t’i mundësojë të dy vendeve afrimin me BE. Ne dëshirojmë një bashkëpunim konstruktiv me Rusinë, edhe nëse kemi ndryshime pikëpamjesh. Ne e kuptojmë po ashtu se është e rëndësishme që të ruhen marrëdhëniet e mira dhe lidhjet kulturore. Kjo nuk është në kundërshtim me antarësimin në BE”, tha ministri gjerman.

Samiti i Ohrit, Rama kritika Thaçit: U vetëpërjashtuat, S`ndryshoj qëndrim për Serbinë

Pas diskutimeve me dyer të mbyllura, kryeministrat e Shqipërisë, Serbisë dhe Maqedonisë së Veriut dolën në konferencë për shtyp. Kryeministri Edi Rama, u shpreh nga Ohri se tre kryeministrat kishin rënë dakord që samiti i radhës të zhvillohet në Durrës, ku i pranishëm do te jëtë dhe përfaqsuesi i lartë i politikës së jashtëme të BE-së. “Dua të them se ne u dakordësuam se në 21 dhjetor të zhvillojmë mbledhjen e radhës në Durrës. Morëm edhe konfirmimin se në atë mbledhje do të jetë i pranishëm, përfaqësuesi i ri i lartë i BE-së. Në Durrës janë të gjithë të ftuar, dëshiroj që dhe Mali i Zi dhe Bosnja Hercegovina, të jenë të pranishëm. Është rënë dakord dhe më parë, të përfshihet dhe Kosova, me të drejta të plota dhe e barabartë në BE. Por mos t’i shmangen elefantit që është këtu”, tha Rama.

Më tej, ai iu drejtuar drejpërdrejt Presidentit të Kosovës Hashim Thaçi, i cili e kishte justifikuar mungesën e Kosovës në samitin e Ohrit me argumentin se “s`mund të ulej me vende që nuk e njohin Kosovën”. Këtij argumenti të Hashim Thaçit, Kryeministri Edi Rama i solli përballë disa nga takimet që janë zhvilluar në vende të ndryshme të Europës, ku Kosova ka qenë e pranishme në të njëjtën tavolinë me Serbinë, ndonëse Serbia nuk e ka njohur pavarësinë e Kosovës. Gjithashtu, Rama shtoi se i qëndron mendimit që Serbia duhet ta njoh Kosovën.

“Duhet të jenë sa më të drejtpërdrejtë, me të gjithë ata që bëjnë sikur nuk kuptojnë apo s’duhan të kuptojnë. Është momenti për të thënë se së pari në kujtesën time, jemi takuar, jemi ulur dhe kemi dakordësuar për gjithçka që shkruhet, e zeza mbi të bardhë. Tani më jo si dokument, por si plan veprimi. Kjo nuk e ka penguar kryeministrin apo presidentin e Kosovës që të marrë pjesë në këtë samit. Në kujtesën time, pas luftës dhe pavarësisë së Kosovës, u desh një kohë e jo e shkurtër që përfaqësues të Kosovës të pranoheshin në tavolinë. Qoftë nga përfaqësues të Serbisë apo të Bosnjë Hercegovinës, tani prej të paktën 5 vjetësh, pjesëmarrja e Kosovës nuk është vënë në diskutim. Se gjej dot interesin dhe as përfitimin nga ky vet përjashtim(Kosova). Në vizitën time e kam thënë; Serbia duhet të njohë Kosovën. Por Kosova nuk duhet të vetëpërjashtohet”, -tha Rama.

Më tej, Rama foli për benefitet që do të sjell ky bashkëpunim rajonal. Sipas tij, njerëzit dhe mallrat do të kenë mundësi të lëvizin lirshëm në këtë hapësirë, pa hequr të “zitë e ullirit” në kufti. “Një pyetje e thjeshtë do të ndihmonte qytetarët e Kosovës dhe Shqipërisë që kanë kaq vite që heqin të zitë e ullirit në kufi, do të donin të vazhdonin? Apo do të donin që njësoj si në gjithë Ballkanin Perëndimor edhe mes Shqipërisë dhe Kosovës të çelej kufirit për katër liritë e BE-së. Kjo nuk është një “mini-Shengen”. Mua nuk më konvenvon. Është Ëester Balkan Schengen. Së pesti, po produktet bujqësore të Shqipërisë pse duhet të kalben në kufirin me Maqedoninë, apo Serbinë dhe Bosnjë Hercegovinën apo siç kalben edhe në kufi me Kosovën”, tha Rama.

Rama, shtoi gjithashtu, se do të unifikohen diplomat për studentët e Preshevës, ndërsa shtoi se pavarësisht se sa e vështirë është të ulesh me “armiqtë” e dikurshëm, duhet bashkëpunuar. “Janë përfitim ekonomik. Pse për njohjen e diplomave duhet të presin edhe 5-10 vite të tjera. U kam premtuar shqiptarëve të Preshevës që të përgatiten se diplomat e tyre do të njihen, po për ata kush mendon? Duke u përjashtuar? Unë besoj se paqja është e ndërlikuar, por ia vlen. Bashkëpunimi me “armiqtë”, i vështirë, por i rëndësishëm që ato që vijnë pas të mos trashëgojnë armiqësi. E di shumë mirë që çfarë do të vazhdojë, por asgjë nga këto nuk është as e papritur dhe as e pathënë më parë. E kam predikuar bashkëpunimin rajonal, që ditën e parë kur kam ardhur në pushtet. Sa më shumë mundësi të kenë njerëzit, aq më shumë potencial do të ketë për zgjidhjen e konflikteve. E konsideroj domosdoshmëri praninë e Kosovës në Durrës, kush mendon se pëlqyeshmëria që mund të marrë dot me patriotizmin e FB, gabon. Është mirë që të jemi së bashku, t’i ndajmë në tyre opinionet tona, se në fund cilësia e jetës varet nga mënyra se si nuk bie dakord, mënyra më e mirë është ajo që nuk cenon bashkëpunimin e përbashkët. S’mund të ketë një proces ku njëra palë fiton, tjetra humbet”, tha Kryeministri Edi Rama.

Për Aleksandër Vuçiç, heqja e kufijve mes Serbisë, Shqipërisë dhe Maqedonisë së Veriut, do të kursejë të paktën 260 milion euro. Ai tha se njerëzit dhe mallrat do të lëvizin lirshëm. “Mini-Shengeni ballkanik është një nismë shumë e mirë për vendin tonë. Është e rëndësishme se si u morëm vesh në një kohë të shkurtër për të arritur një marrëveshje që është në të mirë të qytetarëve tanë. Mund t’ju them se 260 milion euro do të jetë kursimi nga kjo marrëveshje. Shpresojmë që në të ardhmen të behën pjesë edhe disa vende të tjera. Do shikohet sa e rëndësishme do të jetë për një prodhues nga Jugu apo Veriu që t’i eksportojë ato. Për më pak se një vit e gjysme do të mundës të shihni rritjen e investimeve në përqindje për të tre vendet. Do të kemi mundësi që të hyjmë në Shqipëri dhe shqiptarët do të hyjnë në Serbi vetëm me letërnjoftime. Në Beograd keni leje gjithashtu nëse fluturoni në Tiranë, nuk do ju pyes njeri se ku do të shkoni. Nuk i maltratojmë qytetaret që vijnë, sepse duam të rrisim numrin e të huajave që do vijnë në vendet tona”, tha Vuçiç.

Kurti në “Real Story”: Do rishikojmë marrëveshjen e kufirit me Malin e Zi

Albin Kurti deklaroi në “Real Story” të gazetarit Sokol Balla, se ai do të përpiqet të korrigjojë marrëveshjen e Demarkacionit me Malin e Zi. Sipas tij, pala kosovare gaboi në hartimin e marrëveshjes me Malin e Zi, duke i falur 8200 hektarë tokë shtetit fqinj. “Sa i përket marrëveshjes së demarkacionit duhet të fillojmë bisedimet direkte me Podgoricën Zyrtare. Unë jam i interesuar që të marr vesh gjithë proçesin, sepse ka ndodh një lajthitje e madhe e komisionit tonë. Nuk ka faj Mali i Zi, ka faj komisioni ynë i cili ka pranuar që të bëjë delimitim në vend të demarkimit, pra përcaktim kufiri në vend të shënjim kufiri”.

“Dhe ekziston edhe marrëveshja midis presidentit të Kosovës dhe homologut të tij malazez, e 16 shkurtit 2018, për korrigjimin e demarkimit. Me ç`rast duhet të bëhet korrigjimi në sektoret në drejtim të Qakorit dhe Lebit, pra Qafës së Qakorit dhe Kullës së Lebit. Ne nuk do të lejojmeë jo gurë, por edhe guralecë pa lëvizur në mënyrë që ta bëjmë këtë korrigjim sepse komisioni i gabuar i lajthitur i Kosovës na i ka humbur 8200 hektarë e fatkeqësisht kryeminstri e pranoi më në fund këtë gjë”, tha Kurti.

Albin Kurti tha se kjo marrëveshje do të rishikohet, ndërsa shtoi se marrëveshja u bë me premtimin se BE do të liberalizonte vizat për qytetarët e Kosovës. Por kjo gjë nuk ndodhi.

“U tha që është një ndër kriteret për liberalizimin e vizave. E humbëm tokën, si morëm vizat, shumë mirë, pra unë nuk mendoj që do të japim tokë për viza, por votimi në parlamentin e Kosovës më 21 mars të vitit të kaluar kurrë nuk do tëb bëhej i mundur po të mos ekzistonte bindja e fuqishme që shumë shpejt pas ratfikimit, do të kemi liberalizim edhe humbëm çka ishte e jona e nuk e fituam çfarë na u premtua”.

“Ama unë dua të theksoj që trupi i përbashkët punues për korrigjimin e demarkimit do të fitojë dinamikë të re, me qeverisjen tonë, me mua si kryeministër, me komisionin shtetëror dhe të gjeturit e tij. Do të jetë shumë aktiv e nuk do të jetë i pasivizuar sikurse mandatin e kaluar në mënyrë që ta vendosim drejtësinë në vend”, tha Kurti. /Realstory.al/.

Shkarkimi i Thaçit, Kurti në “Real Story”: Nuk është i lehtë

“Shkarkimi i Hashtim Thaçit nuk është i lehtë”, u shpreh Albin Kurti në “Real Story” të gazetarit Sokol Balla. Ndonëse më herët e cilësoi “tradhëtar” dhe kërkoi shkarkimin e Presidentit, Albin Kurti duket më i moderuar tashmë që erdhi në pushtet. “Presidenti i Kosovës ka një shans që të bëjë një punë të mirë e kjo është të na e japë mandatin neve, mua që të formojmë qeverinë e re. Unë shpresoj që ai ka reflektuar dhe mbi zgjedhjen e rezultateve të 6 tetorit, por ashtu siç hoqi dorë të bëhej kryeministër në vitin 2014, besoj që meqë e provoi pozitën, e sprovoi veten edhe si president, është koha që mbase të tërhiqet dhe prej aty”.

“Shkarkimi i tij nuk është i lehtë, por votimi i 6 tetorit është një fakt, një lloj konfirmimi i protestës së 29 shtatorit me parrullën: “Një popull si nënshtrohet një njeriu”, e që është protesta më e madhe në Kosovën e pas luftës drejtuar kundërshtimit të aventurave akrobacioneve personale të rrezikshme të presidentit të Kosovës”, tha Kurti.

Megjithatë, Albin Kurti është i bindur se pavarësisht përplasjeve me Thaçin, Presidenti e ka detyrim kushtetues dhënien e mandatit për krijimin e qeverisë së re. “Unë nuk i druhem fare për shkak se e di që ai dhënien e mandatit mua për formimin e qeverisë nuk e ka me qejf por e ka obligim kushtetues. Pra, nëse do të vendoste Thaçi, ai nuk do të ma jepte mua mandatin por vendos presidenti dhe e ka për detyrë të ma japë mandatin”, u shpreh Kurti.