Kur vetëm 4 ditë na
ndajnë nga mbajtja e zgjedhjeve lokale, në zyrën e LSI-së, është shfaqur ambasadori britanik,
Duncan Norman, i cili ka zhvilluar një takim me kryetaren e kësaj force
politike, Monika Kryemadhi. Takimi vjen në një kohë kur opozita ka bërë thirrje
për bojkotim të zgjedhjeve nga qytetarët, por edhe është distancuar nga dhuna dhe
përplasjet fizike. Ambasadori i Britanisë së Madhe është shprehur qartësisht pro
zgjedhjeve më 30 qershor dhe distancim nga çdo akt i dhunës dhe pengim i
procesit zgjedhor. Ky mesazh mendohet se është përcjellë edhe në takimit që u zhvillua
mes Kryemadhit dhe ambasadorit Norman.
Më herët edhe shefja
e misionit të vëzhgimit të OSBE, Glover ka zhvilluar një takim me kreun e PD-së,
Lulzim Basha, pavarësisht faktit se ai nuk do të marrë pjesë në zgjedhjen e 30
qershorit.
Mazhoranca është e vendosur
për mbajtjen e zgjedhjeve më 30 qershor, opozita e bashkuar thotë se ato janë të
paligjshme dhe nuk do t’i njoh. Ndërsa për ndërkombëtarët zgjedhjet e 30
qershorit janë plotësisht të ligjshme dhe madje bëjnë thirrje për një proces zgjedhor
pa incidente dhe pa pengim të zgjedhësve për të ushtruar të drejtën e tyre për
të votuar. Madje SHBA ka shkuar edhe më tej ku i ka kërkuar Lulzim Bashës dhe Monika
Kryemadhit se do të mbanin përgjegjësi direkt nëse do të kishte dhunë, duke i kërcënuar
për t’i futur edhe në listën e zezë.
Duket se faktori ndërkombëtar
ka pasur ndikim tek liderët e opozitës jashtë parlamentare, pasi nga thirrjet për
dhunë dhe pengim të procesit zgjedhor, në daljet e tyre të fundit publike kanë
folur me një gjuhë shumë herë më të butë dhe paqësore duke u distancuar nga përplasjet
fizike dhe vëllavrasja.
Pyetjes “Zgjedhësit që mendojnë se Ilir Meta ka të drejtë për anulimin e zgjedhjeve vendore të 30 qershorit?” në sondazhin e kryer nga Instituti Italian GPF Inspiring Research vetëm 47.4 % e votuesve që thonë se do të votonin për LSI, e kanë vlerësuar si të drejtë vendimin e presidentit Ilir Meta për të shtyrë zgjedhjet lokale të 30 qershorit.
Ndërkohë, në radhët e demokratëve vetëm 40.6% shprehen “pro” vendimit të Metës për shtyrjen e zgjedhjeve dhe nga socialistët vetëm 0.9%.
“S`më rruhet fare” apo “ik pirdhu”, janë këto fjalët e përdorura nga ish-ministri i LSI Ylli Manjani, në drejtim të deputetit Ralf Gjoni, që mori mandatin nga radhët e LSI, pasi kjo e fundit u largua nga parlamenti duke djegur mandatet. Debati ka nisur dhe është zhvilluar në rrjetet sociale, në profilin në Facebook të Ylli Manjanit, i zili ka shkruar një status ku përmendte Ralf Gjonin, duke e cilësuar atë si një nga deputetët që do të përdor votën e tij në parlament për të shkarkuar Ilir Metën, pas nismës së PS për largimin nga posti të kreut të shtetit, pasi ky i fundit vendosi anulimin e dekretit për zgjedhjet lokale të 30 qershorit. “Asnjë surprizë nuk arrin të bëjë i gjori Ralf. Që në fillim e parashikuam se do marrë mandatin të shkarkojë Metën”, ka shkruar Manjani në Facebook.
Ralf Gjoni i është kthyer ish-ministrit të LSI-së, duke u shprehur se “ti duhet të kalosh përmes një procesi tërësor dezinfektimi përpara e të lakosh emrin tim në publik. Unë s`kam qenë ndonjëherë ministër e as nuk kam firmosur ndonjëherë për tendera”, i shkruan ndër të tjera Gjoni, Manjanit. Më tej, deputeti Gjoni vijon duke u shprehur se veprimtaria e tij në Parlament po bëhet që “njerëz si tij (Ylli Manjani) të mos mbeten më në mëshirën e Monikës, nëse të bën apo jo deputet, por të mbeten në në dëshirën e njerëzve që meritojnë të votojnë të lirë, me lista të hapura”, shkruan Ralf Gjoni. Duke treguar aryset pse u bashkua me LSI dhe Metën, Ralf Gjoni i shkruan në fund Ylli Manjanit, se Monikës dhe atij vetë, nuk ia mban të ndryshojë sistemin.
Më pas, Ylli Manjani ka replikuar duke përdorur
një gjuhë përtej normales, të paktën për një ish-ministër dhe personalitet të
drejtësisë, duke u shprehur me fjalë të tilla si “nuk më rruhet”, apo “pirdhu”.
“Si fillim ti dhe lakejt ku po shërben i kërkuat me qiri ato tenderat po su doli asnjëri i imi. Ndaj mundohu të mos hash vetem gazeta se nuk të bëjnë mire. Se dyti, hallet e tua me LSI mund tja thuash atyre dhe jo mua, se nuk më rruhet! Së treti nuk kisha ndërmend të lakoja emrin tënd, por tani që ma shtive ndërmend po e lakoj dhe e di si më del? Lake… Lake që po na bëke çmos të rregullosh sistemin zgjedhor! O pika sistemit e zgjedhjeve që do u rregullokan nga ty. Po ku ke haber nga sistemi ti mor aman?! Së katërti, ndryshimin e mendimit përpiqu ta shohqësh tek vetja. Vetëm me pak ditë ndryshove nga nuk marr mandat tek e mora mandatin… Së fundi, pirdhu megjithë atë terrenin tat, se hyre e dole kastravec. Nuk kuptove asgje. Sa për kryetarë, do të të duhet pak kohë të vish në nivelin tim të kritikës. T`ja kalosh mirë aty ku ha pilaf”, shkruan Manjani.
Kryetarja e LSI i është bashkuar protestës së
opozitës dhe ka pretenduar se ajo nuk ka ndikuar në vendimin e Presidentit,
duke deklaruar se ka dy javë pa e takuar bashkëshortin.
“Nuk kam ndikuar fare në vendimin e tij, qëkur
kam ikur për tu operuar kam dy javë pa e takuar. Nuk kemi biseduar fare. Për
mua nuk ka rëndësi bëhen apo jo zgjedhjet, ndryshon apo nuk ndryshon data. Ky
njeri duhet të ikë se ku njeri ka ardhur nga votat e krimit”, ka deklaruar
Kryemadhi, duke shtuar se protestat do të vijojnë dhe nuk ka dialog me Ramën
kryeministër. “Nuk kam kohën që të harxhoj çfarë thotë Rama. Ne jemi këtu për t’ju
thënë që shumica e shqiptarëve pa dallim bindjesh politike janë kundër
politikave të tij diskriminuese. Ta harrojë politikën, politika ka marrë fund
në Shqipëri”, tha Kryemadhi nga protesta e opozitës.
Sa i përket deklaratave të Palmer, kryetarja e LSI tha se ai nuk ndërhyn në punët e brendshme të Shqipërisë. “Jam dakord me deklaratat e Palmer. Protestat kanë qenë paqësore, dhuna ka qenë e provokuar nga policia. Palmer nuk ndërhyn në punët e brendshme të Shqipërisë, sepse krizën në fund të fundit ne do e zgjidhim”, deklaroi ajo.
Paralajmërimi i SHBA duket se nuk ka rënë në vesh të shurdhët, pasi LSI ka reaguar pas deklaratave të Palmer, duke u distancuar nga dhuna në protesta. Sekretari i përgjithshëm i LSI, Endrit Brahimllari, pak orë para protestës ka bërë thirrje për vetëpërmbajtje dhe distancim nga dhuna. “LSI dënon çdo formë dhunë nga kushdo që e bën atë” tha Brahimllari ndërsa shtoi shqiptarët do të tregojnë se janë kundër rrugës që na kthen në diktaturë. Ashtu si kryetarja e LSI, Kryemadhi ditën e premte, edhe Brahimllari theksoi se beteja nuk është kundër policisë por pushtetit kriminal të Ramës.
“Protesta do jetë demonstrim i qytetarisë dhe
vlerave perëndimore. Në asnjë rrethanë nuk e duam dhunën e distancohemi. Jemi
bashkë me zërin e qytetarëve. LSI dënon çdo formë dhunë nga kushdo që e bën
atë. Njeriu i cili kërkon të ushtrojë dhunë përmes pushtetit kriminal është Edi
Rama. Dita e sotme do i tregojë qartë se shqiptarët janë më të bashkuar se
kurrë kundër rrugës që na kthen në diktaturë. Beteja jonë nuk është kundër
policëve po kundër sistemit kriminal të Ramës. Protesta është protestë kundër
varfërisë, arrogancës, grabitjes së taksave. Sot është ditë vendimtare të
bashkojmë zemrat në protestë jemi bashkë për Shqipërinë tonë.”- tha
Brahimllari
Në emër të Lëvizjes Socialiste për Integrim, Luan Rama reagoi për përgjimet e publikuara të mërkurën në gazeten gjermane “Bild”.
Ai tha se përgjimet janë vetëm maja e ajsbergut dhe se dosja 339 vërteton se krimi elektoral është kthyer në krim shtetëror dhe kjo është arsyeja pse opozita është ngritur në protesta dhe kërkon largimin e kësaj qeverie të ardhur në pushtet me votat e krimit.
“Përgjimet janë maja e ajsbergut të krimit shtetëror.
E vërteta nuk mund të mbulohet më dhe as nuk mund të vritet. Dosja 339 nga ku janë
marrë përgjimet, që tregojnë rolin prej shërbëtori të qeverisë ndaj krimit, nuk
është e vetmja. Sepse veprimtaria kriminale si produkt i krimit të organizuar
dhe krimit elektoral nuk është i lokalizuar vetëm në atë zonë siç flitet në përgjime.
Pra krimi elektoral është i shtrirë në një
hark më të gjerë dhe mbulon qarqe të shumta të Shqipërisë. Por dosja 339 është
e mjaftueshme për të kuptuar se krimi i organizuar përmes krimit elektoral është
shndërruar në krim shtetëror.
Krimi legjitimin faktin pse opozita është në
protestë për të rrëzuar qeverinë që është edhe kupola e krimit shtetëror. Tashmë
të gjithë e kanë të qartë se si janë vjedhur votat, si janë blerë votat dhe si është
krijuar maxhoranca e krimit”, tha Luan Rama të enjten për mediat.
Kryetarja e Lëvizjes Socialiste për Integrim, Monika Kryemadhi ka
reaguar një ditë pas mungesës së saj në protestën e shtatë kombëtare të opozitës.
Nëpërmjet një statusi shterues në rrejtet sociale, Kryemadhi tregon se para
disa ditësh i është nënshtruar një operacioni të vështirë në Itali, por që ka
kaluar me sukes. Ajo tregon se nuk donte që këtë problem të sajin ta ndante me
të tjerët, duke dashur që ta përballonte vetë. Në komentin e saj, Kryemadhi i bën
thirrje Kryeministrit Rama që të mos e kthejë në personale këtë çështje. Në fund
të statusit, pasi rendit disa nga problemet që po kalon vendi, Kryemadhi jep
mesazhin se nuk do ë ketë asnjë tërheqje nga rruga e nisur.
Përshëndetje të gjithëve!
Nëpërmjet këtij mesazhi do të doja fillimisht të falenderoja të gjithë ata mijëra qytetarë, që më kanë shkruar dhe janë interesuar për shëndetin tim. Në pamundësi fizike dhe kohore për t’ju kthyer përgjigje një e nga një, dua t’ju uroj shëndet dhe gëzime paçi gjithmonë.
Zoti ju bekoftë dhe mbroftë familjet dhe të dashurit tuaj!
Sot është dita e shtatë, pas një operacioni të vështirë që kam kryer. Ishte një ndërhyrje urgjente që duhej ta kryeja pas insistimit të mjekëve. Sot mora edhe konfirmimin e tyre që rreziku që kisha është tejkaluar, operacioni ka mbaruar me sukses.
Këtë problem mjekësor doja ta përballoja vetë, pa shqetësuar askënd tjetër. Doja, që kjo betejë e imja të mos interferonte aspak, në luftën që shqiptarët po zhvillojnë këto muaj për zgjedhje të lira dhe të ndershme. Për një Shqipëri të drejtë, që në themelin e saj ka votën e lirë dhe jo votimin monist. Për një Shqipëri me taksa të ulta. Për një Shqipëri ku gjithkush të ketë mundësi për punë dhe të jenë të mirëpaguar. Për një Shqipëri ku të gjithë të jemi të barabartë para ligjit. Për një Shqipëri ku të gjithë meritojnë një shërbim shëndetësor dinjitoz. Për një Shqipëri, ku çdo i ri të ketë mundësi të shkollohet, pa tarifa diskriminuese dhe të mos detyrohet të braktisë mësimet për pa mundësi financiare.
Për një Shqipëri, ku çdo qytetar i saj ta ndjejë veten në shtëpinë e tij.
Mes këtyre rreshtave desha të falenderoj një shoqen time mjeke, e cila bëri të mundur kryerjen e këtij operacioni. Ajo ka shumë vite që jeton, punon dhe shërben si mjeke dhe profesoreshë në Itali. Shumë nga miqtë edhe “armiqtë” e mi e njohin shumë mirë.
Me këtë rast doja t’i thoja edhe dy fjalë Edi Ramës. Mos e kthe në çështje personale këtë gjë. Përmbaji ”taborrët” e tu të portaleve dhe komentuesve anonimë, që paguhen nga taksat e shqiptarëve.
Në vend, që këto para të shkojnë në shërbim ndaj tyre, Ti i shpenzon për këtë lukuni anonimësh, që sulmojnë me shpifje, sharje dhe ofendime. Kjo për arsyen e vetme, se nuk ke guxim t’i thuash vetë. Si i paburrë që je urdhëron me sms portalet e hijes tënde, të shpërndajnë shpifje nga më monstruozet, edhe jo vetëm në këtë rast. Për “Ata”, siç ke filluar t’i etiketosh Ti në logoretë e tua të fundit. Për “Ata” që Ti i quan armiqtë e tu dhe të kastës tënde.
Edi, kjo betejë nuk është personale me ty, por me sistemin monist, që kërkon të instalosh Ti në Shqipëri. Kjo betejë është për Shqipërinë e së ardhmes. Kjo betejë është për të rinjtë edhe fëmijët e Shqipërisë. Është për demokracinë, për të cilën kam luftuar edhe në vitet ’90, megjithëse isha një vajzë e re. Pa përkrahje. Me prindër, që nuk vinin nga kasta e diktaturës. Nuk luftoja për privilegjet “e humbura”, por për një Shqipëri më të mirë. Për një Shqipëri demokratike dhe sociale. Kam luftuar në ato vite të mbrapshta, në Tiranë edhe në gjithë Shqipërinë, kur Ti fshiheshe poshtë urave në Paris.
Edi, betejën personale me ty e kam fituar, si para Zotit, ashtu edhe para familjes sime, para fëmijëve të mij.
Ti e di sa i dua, unë, fëmijët e mi. Aq sa nga kjo dashuri të kam dhënë edhe Ty, të paktën për fasadë dhe mediatikisht e përdor me raste, të duash edhe Ti fëmijët e tu. Nuk besoj se e ke harruar. Realisht jam në dilemë për këtë, sa ke mësuar t’i duash.
Se një prind, që do fëmijët e tij, nuk mund të urdhërojë helmimin e dhjetra fëmijëve, që ishin në protestë me prindërit e tyre dhe të mos artikulojë asnjë ndjesë.
Se një prind, që do fëmijët e tij, nuk mund të urdhërojë policinë të nxjerrë jashtë banesave të tyre me qindra fëmijë në mes qiellit të hapur, si në rastin e Unazës së Re dhe Bregut të Lumit, pa i dëmshpërblyer prindërit e tyre për mundin, sakrificën dhe kursimet e një jete. T’i helmojë ata me gaz në pesë të mëngjesit, për t’i flakur nga krevatet e tyre nën qiellin me shi.
Se një prind, që do fëmijët e tij, nuk mund të gënjejë fëmijët e shkollave 9 vjeçare për t’i dhënë librat falas. Të mos i krijosh kushte mësimore të denja dhe ngrohje në dimër, për të mësuar si gjithë bashkëmoshatarët e tyre në Evropë…se i ke këto angazhime politike dhe qeverisëse. Të shkruara dhe të miratuara në Parlament.
Si ka mundësi, që si një prind, që i do fëmijët e tij, të mos u japësh dot, fëmijëve të tjerë me sëmundje gjaku, ilaçet e nevojshme për të përballuar sfidën e tyre për të mposhtur sëmundjen dhe për të fituar jetën.
Si ka mundësi, që si një prind, që do fëmijët e tij, të mos bësh, thuajse asgjë, në luftën kundër shitësave të drogës, që janë më të shumtë pranë shkollave, se ata të farave të lulediellit.
Nuk e di si një prind, që do fëmijët e tij, të mos gjejë mundësinë, që si Kryeministër, të thotë një fjalë të vetme për ata fëmijë të fshatrave Floq, Qafzezë dhe Vidohovë, që po kalojnë netët në çadra ushtrie mes këtij rrebeshi shiu. I paske premtuar, që do t’i dëshpërblesh deri më një. Uroj që të mos jetë si gjithë mashtrimet e tjera që i ke bërë shqiptarëve, që nga fermerët e përmbytur të Fierit dhe deri tek minatorët dhe naftëtarët. Ashtu siç gënjeve për rrogat e naftëtarëve të Ballshit. Sot e kësaj dite ende nuk ke dëmshpërblyer qytetarët e Marinzës.
Rradha e mashtrimeve të tua është shumë e gjatë, më e gjatë se Rruga e Qumështit.
Si ka mundësi, që një prind që do fëmijët e tij, në vend që të shpallë Gjendjen e Jashtëzakoshme, mban fjalime shterpë nga dy orë në ditë për “Ata”, armiqtë e tij.
Unë e dua shumë bashkëshortin tim. Kam mbi çerek shekulli me të. Jo për fasadë, as për foto ceremoniali dhe lajme rozë. Ne e duam njëri-tjetrin pavarësisht se politikisht nuk ndajmë të njëjtat ide. Kemi kundërshtitë tona, herë herë edhe të mëdha, por e duam shumë njëri-tjetrin dhe të dy së bashku fëmijët tanë.
Të duash fëmijët është detyrë parësore e çdo prindi, ashtu si dhe ne na kanë dhënë dashuri prindërit tanë. Dhe kështu brez pas brezi. Dhe kjo dashuri sjell edhe dashurinë për Kombin. Me dashurinë për Familjen, për Kombin dhe Besimin në Zot çdo sfidë është e mundur të përballohet. Çdo sakrificë ia vlen, qoftë edhe karrigia e thyer e pushtetit. Në këtë botë jemi të përkohshëm. Vetëm kombi shqiptar dhe e ardhmja e tij duhet të jenë të përjetshme.
Kështu, Edi, kështu…
Të kam thënë, mos merr drogë, por bëj palestër. E ke lënë veten të të ndryshojë realitetin dhe nuk po kupton më asgjë. Të duket gjithshka me ngjyra ngjyra, si fluturat që vizaton dhe ke mbushur zyrën e Kryeministrit të Shqipërisë.
Edi të falenderoj, më solle humorin me datë 1 qershor ditën e fëmijëve, me shprehjen tënde: “Jam arrogant, por nuk i kam futur dorën në xhep askujt.”
Eh, more Edi, si mund të futen në një xhep njeriu koncensionet e rrugëve si ajo e Balldren-Milot apo Orikum-Dukat ku vlerat e tyre kalojnë qindra milionë euro.
Si mund të zerë një xhep, diferencën nga 102 milionë euro, që ishte projekti i qeverisë tënde, në 260 milionë, që e dhe me koncension.
Si mund të zërë një xhep, 70 milionë euro, një zgjerim rruge me 3 metra gjerësi dhe gjatësi 14 kilometra.
Si mund të zerë një xhep, tenderat korruptivë me letra fallco të Unazës së Re. Plot 40 milionë euro. Si mund të zërë një xhep tenderin e 13 milionë eurove tek OST me firmën fantazmë me letra fallco.
Si mund të zërë një xhep 300 milion eurot e koncensioneve në shëndetësi. Ku vetëm në njërin prej tyre, paguhet për punë të pa kryer, aq sa i jep në një vit subvencion fermerëve.
Si mund të zërë një xhep 218 tendera “sekretë” të qeverisë tënde.
Si mund të zërë një xhep të ardhurat nga laboratorët e drogës apo ato nga kanabizimi i vendit.
Eh, Edi, nuk ka xhep palltoje sa do e madhe të jetë apo pantallonash sa do të gjëra të jenë, si ato të tuat, t’i zërë.
Pas kësaj bëj gati sms me sharje, shpifje dhe ofendime. Lëshoji pa fre “jeniçerët” e taborrit tënd.
Protesta madhështore e mbrëmjes së djeshme, vendosmëria e qindra mijëra shqiptarëve të mbledhur në Bulevardin “Dëshmorët e Kombit”, që ndriçoi natën e errët, më dha forcë dhe shpresë.
Të gjithë bashkë, të rinj dhe të reja, burra dhe gra, intelektualë dhe punëtorë, fermerë dhe minatorë, studentë dhe nxënës. Me mijëra së bashku për t’i dhënë edhe më shumë bukuri dhe shumëllojshmëri tablosë madhështore të protestës.
Kjo nuk është protesta e Lulit dhe Monës, siç mundohet ta quajë Edi, por e shqiptarëve që e duan Shqipërinë dhe duan ta ndërtojnë të ardhmen e familjeve, e fëmijëve, të tyren, këtu në Shqipëri. Dhe e them me bindjen time të plotë, që nuk do të ketë forcë që mund t’i ndalë.
Ata nuk po kërkojnë asgjë më shumë se atë që çdo evropian e gëzon prej dhjetra vitesh. Të drejtën e tyre, që të vendosin me votë të lirë nga kush duan të qeverisen. Pa presione bandash. Pa dhunë shtetërore. Të shkojnë të votojnë pa frikën e bukës së gojës dhe të vendit të punës. Të zgjedhin dhe të zgjidhen edhe pa dëshirën e kryetarëve, por me votën e shqiptarëve. Kjo protestë nuk është për të zëvendësuar dikë me dikë tjetër, por për të ndryshuar sistemin. Për t’i dhënë fund tranzicionit 30 vjeçar. Prandaj shqiptarët janë kaq të vendosur në protestën e tyre, që dita ditës bëhet edhe më e madhe, se ajo që ishte një ditë më parë. Besoj, se edhe miqtë e Shqipërisë, po e kuptojnë këtë. Kjo është një betejë e shqiptarëve për liri dhe demokraci. Për një Shqipëri si gjithë Evropa.
Nga protesta e djeshme doja të ndaja me ju dhe dy aspekte të veçanta, që më impresionuan shumë.
E para, pjesmarrja e Klajda Gjoshës në protestë, megjithëse në muajin e tetë të shtatzanisë dhe mesazhi i saj: “Nuk trembemi nga asgjë dhe askush! Njësoj si unë janë me dhjetra nëna të tjera shtatëzëna dhe me fëmijë për dore. Në fund të fundit kjo është kauzë për fëmijët tanë dhe jemi të vendosur t’i shkojmë deri në fund.” Një grua, një nënë, që mund ta siguronte të ardhmen e familjes dhe fëmijëve së saj, në çdo vend të botës me arsimimin dhe përgatitjen intelektuale që ka, por Klajda ka zgjedhur të luftojë për Shqipërinë.
Momenti i dytë që më emocionoi shumë ishte fotoja e një grupi studentësh që kishin shkruar në duart e tyre fjalët: Our future, in our hands.
Po, e ardhmja juaj, është në duart tuaja. Askush nuk mund t’ua tjetërsojë ëndrrat, shpresat ashtu si e dëshironi ju, si qytetarë të denjë të Evropës. Askush nuk mund t’ua mposhtë vullnetin, bindjen dhe përkushtimin tuaj për ta ndërtuar jetën tuaj, këtu në Shqipëri.
Ndaj në 8 qershor të gjithë së bashku në vazhdimin e betejës sonë për të ardhmen e Shqipërisë, për të ardhmen tuaj.
Asnjë hap pas!
Përshëndetje të gjithëve!Nëpërmjet këtij mesazhi do të doja fillimisht të falenderoja të gjithë ata mijëra qytetarë,…
Lëvizja Socialiste për Integrim ka mbajtur një takim me strukturat e saj në Tiranë, ku nënkryetari Luan Rama përsëriti se protestat nuk do të ndalen deri në mbajtjen e zgjedhjeve të lira dhe të ndershme. Sipas Luan Ramës sot zgjedhjet mbahen njësoj si në kohën e Enver Hoxhës, me një kandidat.
“Koncesionet bëhen në mënyrë skandaloze dhe të paligjshme. Protestat janë një shenjë revolte ndaj korrupsionit të madh qeveritar. Me protestat, tregojmë forcën tonë në rritje. Qytetarët e meritojnë hapjen e negociatave, por korrupsioni dhe krimi i organizuar nuk e lënë Shqipërinë të integrohet drejt BE-së. Raporti flet qartë dhe aty vihet në dukje krimi i organizuar që ka zaptuar vendin dhe mban nën kontroll qeverinë. Ne nuk do të ndalemi deri në mbajtjen e zgjedhjeve të lira e të ndershme. Tani zgjedhjet mbahen me një kandidat. Njësoj si në kohën e Enver Hoxhës, na paraqitet një kandidat, ky është fronti, klani i Rilindjes. Kur themi Rilindja, nënkuptojmë krimin në qeveri.” – tha Luan Rama
Kryetarja e LSI-së Monika Kryemadhi ka reaguar përmes një postimi në facebook lidhur me progres raportin e KE për Shqipërinë, duke deklaruar se është një arsye më shumë për të mos u tërhequr nga kauza e tyre.
“Progres Raporti i Shqipërisë është një arsye
më shumë për opozitën dhe gjithë qytetarët shqiptarë të mos tërhiqen në kauzën
e tyre, të drejtën legjitime ku vlerat europiane fillojnë me votën e lirë dhe
mundësinë për të zgjedhur! Rekomandimi pozitiv është pjesë e statusit të
Shqipërisë që prej vitit 2016 dhe askush nuk e mendonte 3 vite më parë, se ne
do të endeshim kaq gjatë, në pritjen e pafundme të çeljes së negociatave dhe
zvarritjes në keqqeverisje të një qeverie që është dehur nga pushteti!” shkruan
Kryemadhi ndërsa thekson se e vlerëson këtë raport më shumë se çdo raport
tjetër.
“E vlerësoj këtë raport më shumë se çdo raport tjetër, pasi më në fund risjell në vëmendje shtyllën kryesore të ekzistencës së një shteti, ekonominë. Në fund të fundit integrim do të thotë një ekonomi më e fortë dhe më konkurrente, do të thotë më shumë investime dhe vende pune. Por vizioni i cunguar i një artisti nuk mundet kurrë të kuptojë nevojën ulëritëse që ka çdo familje shqiptare për të ndjerë siguri, për të ushqyer fëmijët e për t’i dhënë frymëmarrje biznesit. Për të dhe qeverinë e tij, koncesionet dhe PPP janë e vetmja alternativë, për të falimentuar shqiptarët dhe për të pastruar paratë e pista. Unë jam e bindur se të gjithë bashkë do ta fitojmë integrimin, kur të largojmë një herë e mirë, atë që sot mban peng këtë aspiratë të madhe, atë që mban peng të ardhmen e të rinjve tanë.LSI ka qenë dhe mbetet partia e integrimit europian. Historia e ka bërë tashmë atë pjesë të pandarë të këtij procesi që në arsyen pse u krijua, në liberalizimin e vizave dhe në statusin e vendit kandidat. Ne mbetemi të vendosur t’i japim vendit mundësinë e çeljes së negociatave, por jo në partneritet me krimin, por vetëm me shqiptarët! Era e ndryshimit është shumë pranë dhe bashkë me të, edhe Shqipëria Europiane!”, deklaron Kryemadhi.
Progres Raporti i Shqipërisë është një arsye më shumë për opozitën dhe gjithë qytetarët shqiptarë të mos tërhiqen në…
Kryetari Grupit Parlamentar të Partisë Socialiste, Taulant Balla ka reaguar pas rekomandimit pozitiv të Komisionit Europian për hapjen e negociatave të anëtarësimit të Shqipërisë në BE. “Ky rekomandim bazohet tërësisht në progresin e arritur, plotësimin e detyrave të vendosura në kalendarin e përcaktuar nga Këshilli Europian në Qershor 2018 dhe në ecurinë impresionuese të procesit “screening”, pararendës i negocijatave për anëtarësim”, shkruan Balla në rrjetet sociale. Më tej, Taulant Balla shprehet se tashmë vendi ynë pret miratimin e rekomandimit nga Këshilli Europian, ndërsa thekson se rekomandimi pozitiv erdhi si rrjedhojë e zbatimit të Reformës në Drejtësi.
“Edhe në këtë Progres Raport shprehet qartë se rruga për hapjen e negociatave kaloi detyrimisht nëpërmjet Reformës në Drejtësi, e cila për hir të së vërtetës ka qenë krye-detyra e shumicës sonë parlamentare. Reforma në Drejtësi është pa dyshim një prioritet kombëtar për shkak të rëndësisë që ka për të ardhmen tonë evropiane”, shkruan Balla. Ndërsa më tej, Balla shton se pikërisht ndaj kësaj reforme, opozita ka hedhur baltë sistematikisht çdo ditë. “Megjithatë reforma të tilla të thella kanë nevojë për unitet kombëtar dhe politik. Për fat të keq këtë Reformë, të cilën e mbështesin 94% e qytetarëve, opozita e ka sulmuar sistematikisht duke hedhur baltë 135do ditë ndaj implementimit të saj”, shkruan Balla.
Komisioni Europian rikonfirmon rekomandimin pa kushte për fillimin e bisedimeve për anëtarësim mes Shqipërinë dhe…
Pas këtij komenti në Facebook të Taulant Ballës, ka pasur dhe një reagim nga LSI. Në konferencë për shtyp ka dalë Luan Rama, i cili është shprehur se qeveria po gënjen, duke bërë të njëjtën gjë si një vit më parë, kur rekomandimin e KE, e shiti si hapje të negociatave. “Jam këtu per te thënë se përveç vullnetit të komisonit rekomandimi i sotëm nxjerr zbuluar atë që ne e kemi denoncuar. Gënjeshtrën e para një viti, ku qeveria i gënjeu shqiptarët ku u paraqit vendimi i 2018 si hapje negociatash. U bë edhe festë me hapje shampanje. Km bëri edhe dekorata. Mirëpo ja ku jemi sot në rekomandimin e radhës që gjithashtu ka bashkëlidhur shumë por’ dhe ‘duhet’.”, u shpreh Luan Rama.
Më tej, ai shton se: “Më lejoni tju bëj të qartë se një vit më parë. Opozita i ndërpreu protesta për të krijuar kushtet që rekomandimi të gjente rrugën. Por kjo nuk ndodhi. Opozita u rikthye në kuvend dhe për ti ofruar shansin mazhorancës për një klimë kompromisi, për integrimin e një vendi. Mbi të gjitha kjo është detyrë kombëtare e përbashkët. Mirëpo qeveria duke mos patur parasysh asnjë prej rekomandimve të KE e refuzoi bashkëpunimin. Dhe ktheu këtë prioritet sfidë të egos politike. Duke e sabotuar të gjithë progresin. Dy rekomandimet e sotme për korrupsionin dhe krimin e organizuar janë detyrat e para të qeverisë. Por mesa duket kjo dëshmon se nuk ka prioritet BE. Prandaj theksohet në rekomandim qe Shqipëria duhet të vazhdojë rrugën kundër këto dy rekomandimeve. Edhe një herë gënjështra i ka këmbët e shkurtra. Qeveria i ka jo vetëm këmbët por edhe duart e gjata“.
