Partia Demokratike dhe Lëvizja Socialiste për
Integrim kanë vendosur të ankimojnë në Kolegjin e Apelimit vendimin e
Komisionit Qendror të Zgjedhjeve për të mos regjistruar anëtarët e tyre në
KZAZ.
Pesë ditë më parë, KQZ me votat e anëtarëve të Partisë Socialiste vendosi të mos regjistronte komisionerët e propozuar nga dy partitë e mëdha të opozitës në Komisionet Zonale të Administrimit të Zgjedhjeve. Pavarësisht se PD dhe LSI nuk marrin pjesë në zgjedhjet, ato vendosën për të dërguar anëtarë vetëm në KZAZ.
Partia Demokratike dhe LSI mësohet se kanë
ankimuar sot vendimin e Komisionit Qendror të zgjedhjeve për komisionerët në
zgjedhje.
Ankimimi u paralajmëruar nga Ivi Kaso që në 23
maj, ditën kur KQZ rrëzoi kërkesën e dy partive opozitare.
I takon Kolegjit Zgjedhor që të marrë vendimin
nëse dy partitë opozitare do të mund të emërojnë anëtarë në KZAZ për zgjedhjet
e 30 qershorit
Ramazam Gjuzi është kandidat i rradhës i LSI-së që i është drejtuar Komisionit Qendror Zgjedhor për të marrë mandatin e deputetit.
Gjuzi, më herët ka mbajtur postin e drejtorit të Shtëpisë së të Moshuarve në Tiranë, inspektor arsimi në qarkun e Tiranës, drejtor arsimor, kryetarë komune në Bërzhitë, si dhe drejtor në disa shkollave 9-vjeçare në qarkun e Tiranës.
Me Ramazan Gjuzin plotësohen 17 vendet bosh që
LSI la në Kuvend, duke u plotësuar karriget e të gjithë deputeteve të LSI-së që
dogjën mandatet.
Ndërkohë nga PD-ja janë plotësuar 23 vende
duke mbetur bosh 18 karrige. Sakaq, deri më tani janë 39 deputetë të opozitës
që kanë zënë karriget, nga 58 që dogjën mandatet.
Kryetarja e LSI Monika Kryemadhi ka reaguar pasditen e sotme për protestën e zhvilluar dje nga opozita. Kryemadhi e cilëson marshimin e djeshëm si historik, ndërsa shton se vuajtjeve të tranzicionit të pafundëm dhe të lodhshëm po i vjen fundi. “Protesta e djeshme u shoqërua gjatë gjithë kohës nga dritat e shpresës të mijëra qytetarëve, që marshuan paqësisht në rrugët e kryeqytetit. Mbrëmë, Tirana dhe e gjithë Shqipëria përjetoi marshimin historik, që mbart në vetvete historinë e një kombi me shumë vuajtje dhe me një tranzicion të pafundëm dhe të lodhshëm, që duket se po i vjen fundi!”, shkruan Kryemadhi.
Më
tej, në deklaratën e saj publikuar në faqen zyrtare në Facebook, Monika
Kryemadhi shkruan se Shqipëria ka nevojë për një lider normal, që shqetësohet dhe
punon për qytetarët.
“Mbrëmë më shumë se kurrë, nën qiellin e mbuluar me balona të bardha dhe nën dritat e celularëve, shqiptarët përcollën mesazhin se kanë nevojë për një shtet dhe institucione që t’i shërbejnë atyre. Se nuk duan më kurrë të ndihen jetimë në shtëpinë e tyre”.
“Se kanë nevojë për një lider normal, një njeri të thjeshtë njësoj si ata, që shqetësohet dhe punon për një arsim me standarte, një shëndetësi të barabartë, një shtet të drejtë ku të gjithë përgjigjen njësoj para ligjit, për një ekonomi të fortë dhe të qëndrueshme që i jep mundësi punësimi të gjitha shtresave shoqërore, për taksa të ulta, por mbi të gjitha ku sistemi të ngrihet nga zgjedhjet e lira dhe të ndershme. Fëmijët tanë duhet të prekin një Shqipëri ndryshe nga ajo e jona, ku ata të ndihen europian, jo vetëm në shpirt por në standarte dhe në mundësi”.
Në
fund, Monika Kryemadhit shprehet se aksioni opozitar nuk është luftë për rotacion
politik, por për ndryshimin e sistemit. Ajo thotë se forca e opozitës qëndron te
drejtësia e kauzës, përtej karrigeve të liderëve.
“Kjo është beteja e Lëvizjes Socialiste për Integrim dhe gjithë opozitës së bashkuar. Edhe pse mes shumë sakrificave, pikëpyetjeve, shpesh herë edhe mosbesimit, ne po tregojmë çdo ditë se kjo nuk është më thjesht një luftë politike për rotacion, por është lufta e ndryshimit të një sistemi të marrë fund, që prodhon vetëm metastaza, duke shkurtuar jetën e një kombi”.
“Forca jonë qëndron te drejtësia e kauzës tonë, që shkon përtej karrigeve të liderëve, por u dedikohet fëmijëve e familjeve shqiptare, vendit tonë të bekuar që mbahet peng nga gabimet e politikës së vjetër. Dita e ndryshimit po afron, e bashkë me të dhe shpresa se Shqipëria do të bëhet me punën dhe forcën e vetë qytetarëve të saj”, përfundon shkrimi i Monika Kryemadhit.
Ish-kreu i Grupit Parlamentar të LSI-së,
Petrit Vasili ka zgjedhur një gjuhë letrare për të komentuar protestën e
djeshme dhe për të vijuar me akuzat ndaj mazhorancës aktuale.
Nëpërmjet një postimi në Facebook, ai e ka
cilësuar protestën e djeshme si fundi i një pushteti të lig dhe analfabetik, ku
shprehet se shqiptarët janë ngritur në shesh për të “ç’helmuar këtë vend nga
kjo ligësi qeveritare pa fund”. Sipas tij, Shqipëria ka një pushtet, që
rrënimin e vet e mban në këmbë me qeveritarë të rrënuar, që korrupsionin e lufton
me një korrupsion edhe më të madh që të harrohet i pari, që problemin do ta
zgjidhe me demagogji dhe jo me veprim të vërtetë e rrënjësor, që krimin nuk e
lufton, por e ul në sofrën e pushtetit e që votën nuk e fiton, por e vjedh me kriminelë.
Madje, ai pretendon se pushteti nuk po bën
asnjë hap pas për zgjidhjen e krizës. “Nuk ka një hap e veprim të këtij
pushteti të ligë të rilindjes, që të tregojë sinqeritet. Çdo veprim i këtij
pushteti të ligë është vetëm mashtrimi i radhës për të fituar minutat e ditët e
radhës e për të shtyrë ditët e tij të pushtetit”, shprehet Vasili.
Megjithatë, ai shton se “shqiptarët janë në
rrugë e sheshe për të ç’helmuar këtë vend nga kjo ligësi qeveritare pa fund”. “Ndarja
nga ky pushtet i ligë është njëherazi vendosja e standardeve të reja të mëdha, parimore
dhe të paprekshme nga askush. Është koha të rindërtojmë pushtetin e mirë që e
ngrenë qytetarët dhe e kontrollojnë e vlerësojnë vetëm ata. Koha e pushtetit që
i vë vetë notën vetes ka vdekur. Ka vdekur së bashku me analfabetin politik në
krye të tij”, deklaron Vasili në postimin e tij.
Kryetarja e LSI, Monika Kryemadhi ka hedhur akzua të forta drejt KQZ, pas vendimit të saj për të mos pranuar komisionerët e PD dhe LSI në KZAZ-të e zgjedhjeve vendore.
Gjatë takimit të zhilluar të enjten pasdite me strukturat e LSI në njësinë nr.8, Kryemadhi tha se ekziston një KQZ ilegjitime me 4 kukulla qesharake që veprojnë në shkelje të Kodit Zgjedhor.
“Kemi një KQZ ilegjitime me 4 kukulla qesharake. Do mbajnë përgjegjësi ligjore dhe penale për shkeljen e Kodit Zgjedhor. J’ua them këtë me bindjen më të plotë. Në Shqipëri portokallja është e vogël, ndaj duhet të kenë diçka parasysh, përgjejësia do jetë përsonale si për Ramën ashtu edhe për anëtarët e KQZ që cënojnë Kodin Zgjedhor.” – tha Kryemadhi
Në vijmim të vizitave jashtë vendit, Kryetarja e LSI-së, Monika Kryemadhi është ndalur në shtetin fqinj, Itali. Kryemadhi, sipas një njoftimi shpërndarë nga zyra e shtypit të Lëvizjes Socialiste për Integrim, ka zhvilluar një takim me komunitetin shqiptar që jeton në rajonin e Bolzanos. E shoqëruar nga ish-deputetët e LSI-së, Përparim Spahiu e Viktor Tusha si dhe nga Artan Mullaymeri, Anëtar i Këshillit Territorial për emigracionin të Alto Adige pranë prefektit, Kryemadhi ka thënë në takim me komunutetin shqiptar se shqiptarët po kërkojnë të largohen nga vendi. Ndaj, sipas Monika Kryemadhit, Shqipëria ka nevojë jo për një lider të fortë, por për një sistem që mbron qytetarin.
“Bashkë me Përparimin, Viktorin dhe me shumë ish-deputetë kemi lëvizur në të gjithë Shqipërinë. Po flas për zonën e Dibrës, ishim në zonën e Kalasë së Dodës, ishim në shumë fshatra të braktisura, kishin vetëm pleq dhe plaka dhe nuk gjeje dot një djalë apo një vajzë të re. Mos flasim më për shërbimet e tjera, mungesa e infermierëve dhe mjekeve që të gjithë po na ikin në Gjermani. 82% e gjimnazistëve të Shqipërisë duan të ikin nga Shqipëria. 70% e fëmijëve në shkollat fillore nuk duan të jetojnë në Shqipëri”.
“Që do të thotë që në Shqipëri nuk do të ketë më mësues, nuk do të ketë më mjek, inxhinier, hidraulik, elektriçist, nuk do të ketë më shofer taksish, nuk do të ketë më njerëz që do të punojnë në administratë. Flisni çdo ditë me familjarët tuaj në Shqipëri, por asnjëri nga ju nuk dëshiron të kthehet. Unë mendoj që Shqipëria nuk ka më nevojë për lider të fortë. Ne kemi nevojë për një sistem, i cili u del garant qytetarëve të tij. Përderisa ne të gjithë paguajmë taksa, si nga i pari deri tek i fundit, nuk ka përse sistemi të mos u përgjigjet qytetarëve të tij ”, tha Kryemadhi.
Kryetarja e LSI-së theksoi se ajo ka nisur një tur takimesh për të dëgjuar qytetarët, sepse për LSI-në ka një rëndësi shumë të madhe dëgjimi i zërit të tyre. “Prandaj ne kemi nisur një tur, jo për të dhënë mendimet tona, po më shumë për të dëgjuar. Sepse mendojmë se është shumë e rëndësishme për t’i dëgjuar njerëzit”, tha Kryemadhi.
Sekretari i Përgjithshëm i PD, Gazment Bardhi ka deklaruar se pavarësisht se nuk do hyjnë në zgjedhje, do të dërgojnë anëtarë në KZAZ me arsyetimin se po bëhen manipulime të rënda në procesin zgjedhor. Bardhi tha se do të faktojmë se Rama nuk garanton dot zgjedhje legjitime.
“Partia Demokratike dhe Lëvizja Socialiste për Integrim kanë informacion zyrtar se në KZAZ janë duke u kryer manipulime të rënda të procesit zgjedhor, që nis me regjistrim të paligjshëm të kandidatëve për kryetar bashkie. Për këtë arsye, për të dokumentuar dhe çmontuar këtë paligjshmëri, PD dhe LSI, mund të shfrytëzojnë ligjin, për të dërguar anëtarët që i takojnë në KZAZ për të provuar ligjërisht që Edi Rama nuk garanton zgjedhje legjitime, edhe kur nuk ka kundërshtarë përballë. Në ditët në vijim do të faktojmë të gjitha paligjshmëritë e kryera nga përfaqësuesit e Edi Ramës gjatë procesit.” – tha Bardhi
Lëvizja Socialiste për Integrim zhvilloi ditën e sotme Konventën Kombëtare, ku ishin të pranishëm delegatë, përfaqësues politikë dhe simpatizantë të saj. Gjatë fjalës në Konventë, kryetarja e LSI-së, Monika Kryemadhi tha se ka arritur të shoh të ardhmen e Shqipërisë, duke iu drejtuar me ironi fjalëve “doktoreshë” dhe “fallxhore” që përdor kryeministri Rama.
“Jemi mbledhur këtu për të ardhmen sa më të mirë të vendit tonë. Si një doktoreshë dhe fallxhore, e parashikoj të ardhmen e Shqipërisë të ndritur pa Edi Ramën kryeministër. Shqipëria është më e mirë pa Edi Ramën.” – tha Kryemadhi
Kryemadhi tha se mosbindja civile do të vazhdojë deri në rrëzimin e Ramës në mënyrë që të zhvillohen zgjedhje të lira dhe Shqipëria të integrohen në familjen europiane.
“Ne sot Shqipëria na ka caktuar një detyrë shkurt dhe shqip, të mbrojmë demokracinë. Ne nuk kthehemi më mbrapsht. Tashmë nuk është më sekret me sondazhe dhe pa sondazhe ne jemi shumicë, sepse në njërën anë është një njeri me grusht kriminelësh dhe oligarkësh dhe disa kërpudha që janë kthyer në fasada të tij, dhe anën tjetër janë shumica e shqiptarëve që duan integrimin e Shqipërisë. Në këtë vend fatmirësisht ata që nuk pranuan të bëhen fasadë e Edi Ramës janë sot shumica dhe sot shumica është opozita e bashkuar dhe jo vetëm po me të gjithë ata shqiptarë të cilët duhet të bashkohen dhe të rrëzojnë këtë regjim kriminal, protestat tona dhe mosbindja civile do të vazhdojnë derisa “Sulltani i krimit” të bindet me hir a me pahir do apo nuk do ai, në Shqipëri do të ketë zgjedhje të lira dhe të ndershme. Koha e tij dhe e etërve të tij ka mbaruar ne Shqipëri.” – u shpreh Kryemadhi
Konventa është mbyllur me votimin e një rezolute ku shënohet të gjitha pikat dhe ndryshimet që kjo forcë politike premton të ndryshojë në ekonomi, reforma, zgjedhje, punësim etj.
REZOLUTA E PLOTË Lëvizja Socialiste për Integrim, duke vlerësuar se situata politike, ekonomike e sociale në vend është nga më të vështirat e gjithë periudhës së tranzicionit; Se mazhoranca sot është tërësisht e paaftë për të qeverisur vendin dhe për të çuar përpara procesin e integrimit në Europë. Se ajo ka zgjedhur arrogancën dhe paligjshmërinë në gjithë veprimtarinë e saj, duke rrënuar tërësisht respektin e saj për Kushtetutën, ligjin dhe ligjshmërinë; Duke provuar se mazhoranca ka shkatërruar ne themel institucionin e zgjedhjeve, duke u lidhur me krimin dhe duke u rënë peng i tij; Në kushtet kur Ekonomia e Shqipërisë është e marrë peng nga pak oligarkë, të cilët janë përfituesit kryesorë të parave publike dhe pasurive kombëtare duke thelluar polarizimin ekonomik e social të shoqërisë; Dhe shoqëria shqiptare, kryesisht rinia, gjendet sot përpara një krize të thellë të besimit dhe po përjeton një emigrim masiv; Lëvizja Socialiste për Integrim, me përgjegjësi kombëtare e politike, shpall si objektiv madhor kthimin e besimit të qytetarëve te shteti, te Shqipëria, si shtëpia jonë e përbashkët! Për këtë LSI-ja synon të garantojë:
Vendosjen e shtetit në themelet ligjore dhe kushtetuese nëpërmjet:
Realizimit të zgjedhje të lira e të ndershme, duke eliminuar dhe ndëshkuar rëndë tjetërsimin e vullnetit të qytetarëve nëpërmjet parasë, intimidimit dhe forcës, procesit të manipuluar zgjedhor. Qytetari është sovran nëpërmjet votës së tij.
Ndalimit të trafikut parlamentar, me sanksionimin në Kodin Zgjedhor të rregullave të qarta të zgjedhjes dhe veprimtarisë së përfaqësuesve të zgjedhur.
Përfundimit të reformës në drejtësi, duke evituar kapjen e sistemit nga mazhoranca aktuale dhe duke vendosur ligjshmërinë, integritetin dhe paanshmërinë e tij.
Forcimit të sistemit të llogaridhënies përpara ligjit dhe qytetarëve të veprimtarisë së përfaqësuesve të zgjedhur si dhe funksionarëve publikë në qeverisje.
Plotësimit sipas ligjit të institucioneve kushtetuese dhe forcimit të sistemit të kontrollit dhe balancës mes pushteteve.
Forcimit të rendit publik dhe rritjes së sigurisë së jetës së qytetarëve.
Realizimin e reformave të integrimit me përqasje gjithëpërfshirëse. Mobilizimin e gjithë kapaciteteve kombëtare politike, të shoqërisë civile dhe akademisë, në procesin e negociatave për anëtarësim në BE.
Rritjen ekonomike dhe punësimin, nëpërmjet:
Çlirimit të ekonomisë nga oligarkët dhe monopolet dhe nxitjes së veprimtarisë ekonomike duke ulur taksat dhe duke respektuar rregullat e tregut të lirë.
Thjeshtimit të pagesës së detyrimeve fiskale duke evituar korrupsionin. Shpërndarje më të drejtë dhe të prekshme tek pagat dhe pensionet.
Forcimit të ndërmarrjeve të vogla e të mesme, me mbështetje për start-up-et, veçanërisht në fushën e IT dhe inovacionit.
Nxitjes së punësimit që në bankat e shkollave të mesme e profesionale. Lidhje të drejtpërdrejtë të veprimtarisë ekonomike me sistemin arsimor, veçanërisht me shkollat teknike, profesionale dhe shkollat e larta për shkencat e aplikuara.
Rritje te produktivitetit dhe eksporteve. Mbështetje për inovacionin.
Mbështetje parësore për bujqësinë si sektor kryesor ekonomik. Zhvillimi të industrisë së agropërpunimit.
Krijimi i një klime dhe hapësire miqësore për biznes, mbështetje për investimet e vendit dhe të huaja.
Kthimin e besimit te rinia dhe mbështetje për familjet e reja.
Kthimi i besimit nëpërmjet ofrimit të mundësive konkrete dhe të barabarta për arsimim dhe punësim.
Ndalje e tkurrjes së popullsisë.
Mbështetje për strehim për familjet e reja dhe rritje të lindshmërisë.
PËR REALIZIMIN E OBJEKTIVAVE TE SAJ, LSI-ja PROPOZON MASA DHE POLITIKA KONKRETE
Ulje e barrës fiskale mbi biznesin dhe individin:
Thjeshtëzim i sistemit fiskal dhe ulje e barrës fiskale, përmes një takse të sheshtë prej 10% për tatim fitimin dhe të ardhurat personale.
TVSH 0% për prodhimin bujqësor
TVSh 6 % për produktet e shportës;
Heqja e pagesës së TVSh-së në doganë.
Pagesë fikse tatimi prej 30 mijë lekësh në vit për gjithë bizneset me xhiro vjetore nga 2 deri 8 milionë lekë në vit.
Heqja e tatimit të transferimit të pronësisë së pasurive të paluajtshme.
Pagesa vetëm 1% takse mbi shumën e transaksionit. Për blerjen e shtëpisë së parë pagesa është 0.
Ulje e tavanit të taksave vendore për t’i dhënë fund abuzimit me to.
Mbështetje me grant 20000 euro për start-up-et.
Sektor kryesor ekonomik – Bujqësia
Subvencionim i prodhimit bujqësor për njësi të prodhimit, të sipërfaqes dhe për numër krerësh. (100 milionë Euro në vit);
Subvencionim i vlerës së interesit bankar për çdo kredi të dhënë për infrastrukturë, serra, stalla, për industrinë agropërpunuese. Ofrim i tokës shtetërore për aktivitetet agropërpunuese.
Ndërtimi i sistemit të Kartës së Fermerit me zbatimin e së cilës bëhet zbritja automatike e pagesës së TVSh-së për imputet bujqësore, plehra kimike, fidanë, fara, naftë.
Konsolidim i rajonalizimit të prodhimit bujqësor.
Dhënie e çertifikatave të pronësisë mbi tokën brenda dy viteve të para të qeverisjes.
Targetim i zëvendësimit me përparësi të importeve të produkteve të përpunuara me prodhime vendi.
Forcim i sigurisë ushqimore. Inpute të sigurta dhe proces prodhimi i sigurt. Ndërtimi i një laboratori të kontrollit ushqimor për çdo qark.
Mbështetje parësore për arsimin –
Dyfishim buxheti për përmirësimin e infrastrukturës arsimore dhe paga mësuesish. Rritje pagash për mësuesit 50 % në 4 vite;
Rritje e cilësisë së mësimdhënies.
Rritje e autonomisë universitare që u garanton studentëve dhe pedagogëve rritje të cilësisë së mësim-dhënies dhe lidhje me tregun e punës.
Orientim i 50% të temave studimore në Programet Master dhe PHD në çështje konkrete të zhvillimit të ekonomisë.
Realizimi i Programit “Mëso dhe fito” për shkollat profesionale (punësim me pagë dhe mësim) dhe për shkencat e aplikuara;
Mbështetje e Familjes së re
Krijimi i fondit të shtëpive për familjet e reja.
Punësim parësor për të paktën një nga prindërit e një familje me fëmijë.
Kryetarja e Lëvizjes Socialiste për Integrim,
Monika Kryemadhi e ka bërë të qartë qëndrimin e LSI-së në mbështetje të
revoltave për përmbysjen e qeverisë. Në fjalën e mbajtur sot në mbledhjen e
Kuvendit Kombëtar të LSI-së, Kryemadhi tha se iku koha kur LSI drejtohej nga
Ilir Meta që bënte thirrje për qetësi e dashuri, tani është koha për revolta.
Ajo theksoi se LSI kërkon, së bashku me partitë e tjera të Koalicionit Opozitar, një qeveri tranzicioni që të garantojë zgjedhje të lira dhe të ndershme.
“Marrëveshja jonë me opozitën dhe partitë e
tjera është shumë e qartë. Qeveri tranzitore që garanton zgjedhje të lira dhe
të ndershme, jo parti politike, që garanton qytetarët që të zgjedhin atë
politikan që duan. kjo marrëveshje, ku bëhen bashkë mbi 60% e votuesve
shqiptarë do të thotë që është shumica e shqiptarëve , pa llogaritur ata
socialist të zhgënjyer. Sa i përket faktorit ndërkombëtare, ia kemi bërë shumë
të qartë dhe jemi të palëkundur: Zgjedhje të lira dhe të ndershme. Çështja e
precedentit: jemi i vetmi vend në botë pa gjykatë të lartë dhe kushtetuese, ku
pronar i shtetit është kryeministrit, rast i paprecedentë. Do jemi në kontakt
të vazhdueshëm, do jetë e pandalshme, për t’u takuar me njerëzit dhe për t’u
sqaruar. Njerëzit e LSI duhet të zgjohen dhe të takojnë njerëzit që kanë qenë
viktima të propagandës së Ramës. Ne duhet t’iu bëjmë të qartë që roli i LSI me
PS ka qenë domethënës që Shqipëria të marrë statusin e vendit kandidat, ka qenë
vendimtar për frenimin e korrupsionit, për gjobat dhe tmerret që ka bërë për
gjobat e biznesit, për lirinë e mediave.
LSI nuk është më e kohës kur kishte Ilir Metën që donte stabilitetin e vendit, që kishte hallin e qeverisë dhe qetësisë. Dashuri dhe qetësi me kriminalin nuk ka. Ta ketë të qarta Rama, të mos guxojë të cenojë asnjë gjë të shqiptarëve se s’do jetë përballja ligjore, por do jetë personale se s’ka për ta falur asnjëri kudo që është. I bëj të qartë Ramës që të ketë kujdes, se 4 bandat e tij janë shumë të vogla. Rama ta dijë se çdo shtëpi e ka një luftëtar që të marrë shenjë at ku duhet, revolta e shqiptarëve akoma nuk ka filluar. Kandidatët do të dalin nga strukturat partiake, do të futen në një proces një anëtar një votë. Jo vetëm kandidatë për deputet, por edhe për kryetar bashkie dhe këshilltar bashkia”, tha Kryemadhi.
Pas një ore, ka përfunduar protesta e opozitës së bashkuar, që kishte bllokuara 5 akset rrugore kryesore në vend.
Protestat u zhvilluan në Tiranë tek rrethrrotullimi Shqiponja, Durrës në zonën Plepa-Autostradë, në Fier tek rrethrrotullimi Sheq, Elbasan tek rrethrrotullimi Bradashesh dhe në Milot tek karburanti në autostradë ku ishte i pranishëm edhe kryetari i PD-së, Lulzim Basha.
Protestuesit në Durrës në zonën e Plepave kanë ndezur tymuese dhe flakadanë dhe e njëjta situatë ka vijuara edhe tek rrethrrotullimi Shqiponja në Tiranë.
Ndërsa në Elbasan, protestuesit kanë preferuar, që në vend të tymueseve të djegin edhe goma, ku të pranishëm ishin edhe dy ish-deputetë të PD, Luçiano Boçi dhe Endri Hasa.
Në përgjithësi protesta ka vijuar e qetë pa incidente për një orë dhe është shoqëruar me thirrjet “Rama Ik”. Më pas kalimi i mjeteve është kryer normalisht në të gjitha akset e bllokuara.
