PD firo në vota, Basha mbledh ish-deputetët (në ditë pushimi)

E diela nuk është ditë pushimi në PD. Një ditë pasi mblodhi kryetarët e degëve të partisë në rrethe, Lulzim Basha mblodhi të dielën afër mesditës, ish-deputetët e grupit parlamentar të partisë së tij. Situata politike në vend është arsyeja e mbledhjes, por më shumë se sa kjo, duket se situata në PD shqetëson Lulzim Bashën. Të shtunën pasdite, Basha mblodhi drejtuesit lokal të PD-së. Fokus i takimit, sipas një komunikate të shpërndarë nga Selia Blu, ishte situata politike në vend dhe “mobilizimi i strukturave të partisë”.

Megjithatë, në takimin e zhvilluar me krerët e PD-së, Basha dha urdhër që të “hapej partia” për njerëz profesionist dhe me integritet. Ky qëndrim i Bashës vjen në një kohë kur Jozefina Topalli dha sinjale për nisjen e një “lëvizje” të re politike. Por, veç Topallit, duket se një tjetër faktor është shqetësues për kryedemokratin.

Sipas një sondazhi që publikoi Realstory.al paraditen e të dielës, kryer nga analisti Eduard Zaloshnja, Partia Demokratike ka një tkurrje në elektorat me 70 mijë vota më pak në vetëm një muaj. Faktorët e kësaj rënie mund të lidhen me shumë arsye, por mesa duket kritikat e shtuara ndaj lidershipit të PD-së, gjejnë mbështetje në elektoratin e djathtë.

Në fakt, në deklartën e të shtunës pasdite, mund të kuptohej qartë se Selia Blu është në dijeni të sondazheve. Fakti që kryedemokrati u kërkoi drejtuesve lokal që të “mobilizohen për aksionin politik”, me “përgjegjësi” dhe “afate të qarta”, të bën të kuptosh se frika për largimin e njerëzve është vidente.

Jozefina Topalli duket është marrë seriozisht nga kryedemorati. Nëse një lëvizje e re do të iniciohej nga ish-numri dy i PD-së, duke e nisur nga Shkodra ku Topalli gëzon mbështetje të madhe elektorale, mund të shërbente si fushë magnetike për të tërhequr shumë demokratë të pakënaqur edhe në qytete të tjera.

Një ditë pas deklaratës së Topallit, në Shkodër shkoi Rudina Hajdari, e cila u sulmua nga një militant i Partisë Demokratike. Mund të jetë rastësi, por Topalli u shpreh se lëvizja e re politike duhet të vijë nga “të rinjtë”. Rudina është e re, aq më tepër që ajo është shprehur më herët në Real Story se nuk e përjashton mundësinë e krijimit të një force politike.

Gjithashtu, Rudina Hajdari mbështet edhe nga SHBA në Shqipëri, si një zë i arsyes në Parlament. Fakti që Hajdari këron me ngulm ndryshimin e sistemit elektoral në vend, duke propozuar sistemin “mazhoritar me lista të hapura”, të bën të besosh se nuk do të jetë e largët dita që një forcë e re politike do të krijohet në Shqipëri. /Realstory.al/

ZHYTET PD, 70 MIJË VOTA FIRO NË 1 MUAJ

Basha: PD hapu! (Se po vjen Topalli)

Lulzim Basha mblodhi të shtunën pasdite krerët e degëve lokale të Partisë Demokratike. Për herë të parë, si duket për të shmangur spekulimet, PD shpërndau një deklaratë për mediat. Por, komunikata, më shumë se sa për dhënë informacion “zyrtar” dhe jo nga burime gazetarësh, rreth mbledhjes, duket se ka një tjetër qëllim. PD, pasi bën një përmbledhje të asaj që ndodhi në takim, në rreshtat e fundit të komunikatës, njofton një lajm. Basha ka vendosur të dëgjojë kritikët, ka vendosur hapjen e PD.

“Pranë Partisë Demokratike do të ngrihet shtabi qendror elektoral dhe politik, shtabe që do të shtrihen në mënyrë piramidale në të gjithë vendin. Puna do të përqëndrohet në planin e ofrimit të zgjidhjes për qytetarët, denoncimeve për aferat korruptive dhe kriminale të Qeverisë, bashkimin i faktorëve dhe aktorëve me potencial njerëzor dhe elektoral pranë PD, si hapja e partisë për njerëz me integritet profesional dhe moral”, shkruhet në deklaratën e PD.

Ky është paragrafi më i rëndësishëm i deklaratës, ndonëse i fshehur afër fundit të saj. Basha dëgjon kritikët e tij, të lëvizjes “Basha ik”, që i kanë kërkuar prej kohësh hapjen e partisë. Ky është një qëndrim i ri i kryedemokratit, që vjen jo vetëm prej presionit të ish-drejtuesve të PD, por edhe pas presionit të aleatëve, të cilët, në një listë me 7 kërkesa, një ndër kryesoret, kishin hapjen e opozitës dhe vetë PD për kapacitete njerëzore “që nesër do të jenë pjesë e qeverisë”.

Prej kohësh, nga Jozefina Topalli, Arben Imami, Edvin Kulluri, Ibsen Elezi, Arben Ristani, e shumë ish-drejtues të lartë të PD, i kanë kërkuar kryedemokratit të hapë partinë. Megjithatë, ndonëse kërkesa e tyre filloi shumë herët, Basha pranon “hapjen e PD-së”, vetëm pak ditë pasi Jozefina Topalli, nga Shkodra, hodhi idenë e krijimit të një lëvizje të re politike, ndërsa deputetja e djathtë në Kuvend, Rudina Hajdari paralajmëroi “veton” për Reformën Zgjedhore. Padyshim, nëse kjo lëvzije do të krijohet, elektorati do të jetë i djathtë, madje konservator, duke nisur nga ish-të përndjekurit, pronarët dhe shumë të pakënaqur nga drejtimi i PD-së nga Lulzim Basha.

Kryedemokrati duhet të jetë trembur nga kjo lëvizje. Fakti që ai pranon “një kërkesë të kritikëve të tij”, fill pas deklaratës së Jozefina Topallit, lë të kuptohet se Basha nuk do të pranonte kurrësesi një lëvizje tjetër të djathtë që do të copëtonte më tepër PD. Ndaj, pritet lëvizja e radhës e Bashës, nëse pas dhënies së mesazhit publik për “hapjen e partisë”, siç Berisha bëri në 2005, do t`u shtrijë dorën kritikëve të tij, apo jo!

Argumenti i mësipërm, forcohet dhe më tej, me pjesë të deklaratës, ku Basha, u kërkon drejtuesve të PD në rrethe të “mobilizohen për zgjedhje dhe aksion politik”. “Pas raportimeve për përmbushjen e detyrave për organizimin e partisë, që janë realizuar në periudhën korrik-shtator, Basha ka theksuar se tashmë partia duhet të fillojë menjëherë përgatitjet elektorale dhe për aksion politik”, shkruhet në hyrje të komunikatës së PD.

Më tej, evidentohet kriza politike, ndërsa sipas njoftimit të Partisë Demokratike, “detyra e saj dhe opozitës është të angazhohet seriozisht për të qenë pranë njerëzve dhe për t`i hapur rrugë perspektivës europiane të Shqipërisë”, shkruhet në deklaratë. Më tej, përsëritet kushti i opozitës për daljen nga kriza, që sipas Bashës janë “zgjedhje të njëkohshme parlamentare dhe lokale të parakohshme, me qeveri tranzitore që garanton standarde për zgjedhjet e lira e të ndershme”. Këtu bie në sy fakti që Basha nuk përmend “Rama ik”, kushtin e panegociueshëm deri pak kohë më parë.

Në fund të deklaratës, mësohet se Basha “u ka paraqitur kryetarëve të degëve një kalendar të qartë dhe konkret pune me përgjegjësi dhe afate të qarta”. Ndërsa, protestat, PD i ka shtyrë për një afat të dytë, që siç shkruhet në deklaratë, kjo bëhet për të “shmangur shfokusin nga çështjet kryesore që janë aktualisht në vëmendje: fazën finale të zgjidhjes së krizës politike dhe procesi i integrimit europian”, përfundon deklarata. /Realstroy.al/

TOPALLI NGA SHKODRA NJOFTON “LËVIZJEN PËR NDRYSHIM”

Hajdari: Rama sillet si i djathtë, Basha si i majtë

Rudina Hajdari sqaroi në emisionin “Real Story” të gazetarit Sokol Balla, atë që ndodhi në tryezën e organizuar nga OSBE për Reformën Zgjedhore. Sipas Rudina Hajdarit, toleranca e saj për të pranuar opozitën jashtëparlamentare të ishte pjesë e tryezës, u keqpërdor nga Ivi Kaso. “Mendoj se takimi në tërësi ishte i frytshëm. Të paktën dëgjuam disa nga ekspertët, dhe u takuam bashkarisht me personat që po e organizonin këtë takim. Pritshmëritë janë shumë të mëdha, ky ishte një hap i vogël. Unë them se toleranca ime aty u keqtrajtua. Ne u darkordësuam që Ivi Kaso të ishte prezent, ti jepnim dhe fjalën. Kjo tolerancë u keqpërdor. Ai erdhi me një synim për të minuar gjithë procesin e komisionit të reformës zgjedhore. Ky komision është i njohur nga ndërkombëtarët”, tha Hajdari.

Më tej, Rudina Hajdari shtoi se sfida e opozitës parlamentare është ndryshimi i sistemit. Sipas saj, opozita jashtë parlamentit është e përçarë, ndërsa shtoi se partitë aleate të PD-së, janë për ndryshimin e sistemit. “Ne si opozitë në parlament kemi dhe një sfidë shumë të madhe për ndryshimin e sistemit. Zoti Kaso e keqpërdori këtë moment. Ai erdhi si përfaqësues i opozitës së bashkuar, por opozita është e përçarë. Unë e di që partitë e vogla janë për ndryshim sistemi. Basha nuk do ndryshim sistemi, Kryemadhi nuk do largimin e Ramës. Zoti Kaso u ul pranë zotit Gjiknuri. Ai e ka më mirë që të ulet pranë Gjiknurit se sa pranë zonjës Hajdari”, tha deputetja e opozitës.

Më tej, Rudina Hajdari u shpreh se ajo që ndodhi në tryezën e OSBE, tregon një hile të mazhorancës. “Nuk është e drejtë të citoni Ivi Kason, pa cituar deklaratën time. Ishte një detaj teknik që tregonte shumë për mënyrën se si ai ishte i prirur të pranonte… Fjalimi im thoshte këtë: duhet të ketë ndëshkim të personave që kanë abuzuar me votën e shqiptarëve. Kaso ka më shumë të drejtë morale për ta thënë këtë gjë. Marifetet, hilet, janë të mazhorancës. Kemi një Ramë që sillet si i djathtë, dhe një Bashë që sillet si i majtë”, tha Hajdari./Realstory.al/

Rama si Basha? “S’pranoj përkthim për të folur shqip”

Kryeminsitri Edi Rama është i prerë në qëndrimin e tij në lidhje me hartimin e Reformës Zgjedhore. Nga SHBA, shefi i qeverisë, tregon se nuk do të pranojë një “strukturë ndërkombëtare”, për Reformën Zgjedhore. “Për ne është prioritet i prioriteteve, kalimi i të gjitha ndryshimeve në ligjin zgjedhor që kanë brenda të gjitha rekomandimet e OSBE/ODIHR. Këtë do të duhet harmonizim dhe me partnerët. Ndërkohë që strukturë ndërkombëtare, ndërmjetës ndërkombëtar, dhe përkthyes në gjuhë të huaj për tu marrë vesh mes shqiptarëve, unë për veten time nuk kam për të pranuar asnjëherë”, shprehet Kryeministri.

Rama, thekson se kjo reformë do të ndërtohet mbi bazën e rekomandimeve të bëra nga OSBE/ODIHR. “Nuk dua tu marrë kohë shqiptarëve, me avazin se kush e ka fajin. Unë dua thjesht të them, se tanimë, ëshë e qartë se ne duhet të përshpejtojmë procesin e reformës bazuar në rekomandimet e OSBe/ODIHR. Por rekomandimet e OSBE/ODIHR janë të qartë, të shkruara, e zezë në të bardhë, dhe ne de to të ecim në to”, tha Rama.

Kreyministri pohoi se kalimi i ligjit të ri zgjedhor, do të përmbushte një kusht shumë të rëndësishëm, me qëllim që Shqipëria të ketë një datë për konferencën e parë të negociatave mes Shqipërisë dhe vendeve anëtare të BE. “Unë dua që një orë e më parë ne të përmbushim këtë kusht, për Shqipërinë Europiane, për të pasur datën datën e konferencës së parë me qeverinë e Shqipërisë, me të gjitha vendet anëtare ku janë liderët e këtyre vendeve. Ky është dhe hapi i parë i formalizimit për çështjen e negociatave”, shtoi Rama.

Më herët, kryedemokrati Lulzim Basha ka bërë thirrje për zgjidhje të krizës në vend, duke u shprehur se “duhet vullnet politik”, ndërsa shtoi se “nuk do të ketë zgjidhje nga ndërkombëtarët, zgjidhja e krizës do të vijë nga brenda”. Megjithatë, PD, në tryezën e OSBE për Reformën Zgjedhore, propozoi ngritjen e një “strukture” me përfaqësues ndërkombëtar dhe të partive politike në vend, për hartimin e ndryshimeve në Kodin Zgjedhor. Përgjigja e kreut të qeverisë, lë të kuptohet, se Reforma Zgjedhore do të bëhet nga partitë politike në Shqipëri, përfshi dhe opozitën në parlament, votat e të cilës do të duhen për të votuar në Kuvend Reformën e re Zgjedhore. /Realstory.al/

Prela ndikoi në mbylljen e dosjes “Toyota Yaris”?

Prokuroria e Krimeve të Rënda ka mbyllur hetimet për dosjen “130”, apo e njohur ndryshe dosja “Toyota Yaris”. Lajmin e ka dhënë drejtuesja e Prokurorisë së Krimeve të Rënda, Donika Prela në një reagim për mediat. Prela ka sqaruar publikimin nga News 24 të një shkrese të firmosur prej saj, ku udhëzonte dy prokurorët e çështjes, Doloresa Musabelliu dhe Ened Nakuçi të dërgonin dosjen “Toyota Yaris” në gjykatë, duke mbyllur hetimin e kësaj dosje. Në fakt, pas ndryshimeve ligjore me Reformën në Drejtësi, drejtuesit të Prokurorisë nuk i lejohet të nxjerrë udhëzime detyruese për prokurorët që hetojnë çështje të caktuara, pasi cënon pavarësinë e prokurorëve të dosjes. Megjithatë, në reagimin e saj, Donik Prela pretendon se “nuk ka detyruar” prokurorët të mbyllin hetimet për dosjen “Toyota Yaris”, por i ka udhëzuar ata që të dërgojnë dosjen për gjykim në Gjykatën e Krimeve të Rënda. Sipas saj, këtë gjë ia lejon ligji. “Drejtuesja e Prokurorisë ka udhëzuar me Udhëzim të karakterit Jo të Detyrueshëm, dy prokurorët për përfundimin e shpejtë të procedimit penal më datë 11.09.2019 për të cilin dy prokurorët kishin disponuar me zgjidhjen ligjore të tij një javë më parë, më datë 05.09.2019”, thuhet në reagimin e Donika Prelës.

Po përse Donika Prela ka nxjerrë këtë udhëzim?

Sipas reagimit të saj, udhëzim Jo Detyrues për të mbyllur hetimet e dosjes “Toyota Yaris” dhe dërgimin e saj në gjykatë, është bërë pasi në datën 24 shtator 2019, përfundonte masa e sigurisë “Arrest në burg” për katër personat e arrestuar. Sipas Drejtueses së Prokurorisë së Krimeve të Rënda, është konstatuar se katër të arrestuarit, Klevi Cani, Edi Lika, Agim Ceka dhe Alban Mollaymeri, janë nën hetim mbi një vit në gjendje arresti në burg. Sipas Prelës, në muajin qershor të vitit 2019, dy Prokurorët e çështjes kanë marrë zgjatje të afatit të paraburgimit 3 mujor në gjykatë, afat i cili përfundonte në 24 shtator 2019. Për të shmangur limitin e afateve ligjore të paraburgimit për personat nën hetim, dhe kur “nga ana e dy prokurorëve ishte konkluduar me zgjidhjen ligjore, ngritjen e akuzave, më datë 05.09.2017, nga Drejtuesi i Prokurorisë është bërë udhëzimi i dy prokurorëve më datë 11.09.2019 (një javë pas zgjidhjes ligjore të dhënë nga prokurorët) për të bërë përfundimin e shpejtë dhe në kohë të procedimit penal dhe dërgimin në gjykim”, thuhet në reagimin e drejtueses së Prokurorisë së Krimeve të Rënda, Donika Prela.

Por çfarë ka ndodhur me hetimet?

Dy prokurorët që hetuan dosjen “Toyota Yaris” te Prokuroria e Krimeve të Rënda, në datën 5 shtator të këtij viti, ngritën akuzat ndaj 6 personave për këtë dosje. Konkretisht, Gjykata e Krimeve të Rënda do të duhet të marrë një vendim për katër të pandehurit e arrestuar, Klevi Cani, Edi Lika (Eduart Cani), Agim Ceka, Alban Mollaymeri, si dhe dy të tjerë të shpallur në kërkim, Alfred Vladi dhe Elvis Vladi. Akuzat që rëndojnë ndaj të pandehurve janë: “Pastrimi i produkteve të veprës penale ose veprimtarisë kriminale” të kryer në formën e grupit të strukturuar kriminal, “Pjesëmarrja në grupin e strukturuar kriminal” dhe “Grup i strukturuar kriminal”. Hetimet për katër të arrestuarit dhe dy personat e shpallur në kërkim nisën në 4 korrik të vitit 2018. Në datën 24 qershor të vitit të kaluar, në Portin e Durrësi, gjatë kontrollit të dy mjeteve tip “Toyota Yaris”, u gjetën një sasi e konsiderueshme valute, 3.366.700 euro dhe 80.000 mijë franga zvicerane. Në kuadër të hetimeve, në datën 24 qershor të vitit 2018 u arrestuan në flagrancë shtetasi Klevi Cami, Edi Lika, Agim Ceka, Alban Mollaymeri, të cilët ndodhen në masën e sigurisë “Arrest në burg”, ndërsa janë në hetim në masën e sigurisë “Arrest në burg në mungesë” dhe shtetasit Alfred Vladi dhe Elvis Valdi.

Hetimet në Belgjikë dhe Lulzim Basha!

Dosja “Toyota Yaris” nuk po hetohet vetëm nga drejtësia shqiptare. Për të është duke hetuar dhe drejtësia belge, dy prokurorë të së cilës, pak muaj më parë, erdhën në Tiranë dhe morën në pyetjet kreun e PD-së, Lulzim Basha. Ai ishte personi i parë, që nga foltorja e Parlamentit (një vit më parë) dha lajmin se në Durrës ishin sekuestruar mbi 4 milion euro. Basha ngriti akuza politike, duke akuzuar deputetin Taulant Balla si person që kishte lidhje me paratë e sekuestruara. Megjithatë, deri më sot, Prokuroria ka gjetur fajtor vetëm katër personat e arrestuar dhe dy të tjerë të shpallur në kërkim, të cilët në fakt për të njëjtën akuzë kërkohen dhe nga drejtësia belge. Në 30 gusht të këtij viti, gazeta Tema raportonte se Lulzim Basha ishte tërhequr nga akuzat e drejtpërdrejta për Taulant Ballën, Ulsi Manjën dhe Jurgis Çyrben, por kishte deklaruar para prokurorëve belg, se deputetët kishin shkuar në Gjermani disa ditë përpara se të sekuestroheshin paratë.

Aleatët, Bashës: Rregullo raportet me të huajt

Presioni i vazhdueshëm i aleatëve ndaj Bashës, ka dhënë rezultatet e para. Partitë e vogla të opozitës kanë paraqitur plaformën e tyre, me 7 kërkesa ndaj kreut të PD Lulzim Basha. Thelbi i kërkesave është institucionalizimi i raportit mes partive opozitare dhe pasja e një qëndrimi të përbashkët politik. Dy, nga 7 kërkesat, duken më të rëndësishme. Aleatët i kërkojnë Lulzim Bashës ngritjen e “grupit të punës për marrëdhëniet ndërkombëtare” dhe “krijimin e Senatit të Opozitës”.

Po cili është thelbi i këtyre kërkesave? Duke pasur parasysh faktin që PD dhe opozita është bojkotuar nga partnerët ndërkombëtar në aksionin e saj, aleatët i bëjnë “presion” Lulzim Bashës për të ridimensionuar marrëdhëniet me ndërkombëtarët. Ashtu si ish-drejtues të PD, të përjashtuar nga Basha, të cilët kanë kërkuar një afrim me ndërkombëtar, edhe aleatët e kryedemokratit, në kërkesën e tyre nxjerrin në pah këtë problem madhor për opozitën.

Në kërkesën 3, (grupi i punës për marrëdhëniet ndërkombëtare), aleatët i kërkojnë Bashës “përgatitjen e takimeve në Tiranë, Bruksel, Vjenë, Berlin, Washington, Londër e tj”. Ata kërkojnë gjithashtu, “dialog për zgjidhjen e krizës së rëndë politike me prezencën e ndërkombëtarëve, me prioritet zgjedhjet e lira”. Një tjetër kërkesë, është “rritja e bashkëpunimit me trupin diplomatik në Tiranë”, “krijimin e kontakteve me partitë apo grupimet politike aleate në BE dhe USA”. Një tjetër pikë intersante, po në kërkesat për “marrëdhëniet me ndërkombëtarët” është ajo e “Identifikimi i të gjitha marrëdhënieve politike dhe personale ndërkombëtare dhe përcaktimi i koordinatorëve në çdo shtet”.

Aleatët kërkojnë nga Basha që të krijohen mundësi për takime me në “BE, Bundestag, Kongresin Amerikan, Parlamentin Britanik dhe organizata të tjera ndërkombëtare në SHBA”, ndërsa në fund, aleatët kanë parashtruar dhe një tjetër kërkesë, që duket gjithashtu ineresante: “Qendrim i qartë për influencat Ruse dhe Kineze në ekonominë shqiptare, si kërcënim për sigurinë dhe pozicionin tonë si vend anëtar i NATO-s”, thuhet në kërkesat e aleatëve ndaj Bashës, në lidhje me ridimensionimin e marrëdhënieve me ndërkombëtarët.

Një tjetër kërkesë e rëndësishme, përsëri duket e huazuar nga “kritikët e Lulzim Bashës”, është ajo për krijimin e Senatit të Opozitës. Në thelb, kjo kërkesë synon hapjen e PD dhe vetë opozitës për tu afruar “Figura politike dhe qeverisëse të opozitës, si dhe figura intelektuale të artit, mjekësisë, Universiteteve, kulturës, me figuara të shquara, që janë jashtë vendit. Ofrimi i Intektualëve me emër, në emër të bashkëqeverisjes”. Po në këtë kuadër, shkon dhe kërkesa e 7-të, që kërkon krijimin e “Këshillit të ish deputetëve, Ish ministrave, në të gjitha legjislaturat dhe kryetarëve të bashkive”.

Kërkesat e tjera të aleatëve ndaj Lulzim Bashës, janë: “Institucionalizimi i vendimarrjes së kryetarëve të koalicionit opozitar; Tryeza ekzekutive në nivel Sekretari të Përgjithshëm ose n/kryetarësh, drejtuar nga PD; Grupi i Rinisë; Grupi i Medias dhe Këshilli i ish deputetëve, Ish ministrave, në të gjitha legjislaturat dhe kryetarëve të bashkive”. Aleatët kërkojnë gjithashtu një qëndrim të unifikuar për Reformën në Drejtësi dhe Reformën Zgjedhore, dy pika në fakt, ku brenda grupit opozitar ka pasur përherë përçarje. /Realstory.al/

Vendimi për Tahirin, Basha: Drejtësia, peng i Ramës

Vetëm pak minuta pasi ka dalë vendimi për Saimir Tahirin, që u dënua me tre vite shrëbim prove për akuzën e “Shpërdorimit të detyrës”, ka ardhur regimi i Partisë Demokratike. Lulzim Basha, me anë të një statusi në rrjetet sociale, është shprehur se mosdënimi i Tahirit, tregon që drejtësia në Shqipëri është peng i Edi Ramës. “Vendimi i turpshëm për të mos bërë drejtësi për krahun e djathtë të Edi Ramës, që e mbushi Shqipërinë me drogë dhe e shndërroi atë në njollën e zezë të krimit në Europë, provon se drejtësia në Shqipëri është peng i Edi Ramës, dhe Edi Rama është peng i krimit”, thotë Basha.

Ndërkohë, më tej, Basha shkruan se Saimir Tahiri mbane peng Ramën me dosjet e korrupsionit. “Vendimi i sotëm konfirmon se Edi Rama bëri gjithçka për ta mbrojtur Saimir Tahirin, sepse Saimir Tahiri e mban peng Ramën me dosjet e korrupsionit dhe të lidhjeve të tij me krimin, duke nisur me dosjen e kokainës së Xibrakës, ku është i përfshirë vëllai i Edi Ramës. Përsa kohë Edi Rama është në krye të qeverisë, në Shqipëri nuk ka për të patur drejtësi, krimi dhe të pushtetshmit do të jenë të paprekshëm, Shqipëria do të mbetet peng i krimit dhe shqiptarët më të varfër e më të papunë. Vetëm çlirimi i qeverisjes nga krimi do ti hapë rrugë drejtësisë së vërtetë dhe mirëqenies për të gjithë shqiptarët”, shkruan Basha.

Basha sulmon OSBE. Pranon dialog me Ramën (por problemi është Gjiknuri)

Lulzim Basha ka folur pasditen e të mërkurës për mediat, pak orë pas letrës publike që Kryeministri Edi Rama i bëri liderëve të opozitës, ku i ftonte për dialog. Kreu i PD-së nuk dha një përgjigje të prerë nëse do e pranonte apo jo ftesën e Ramës për dialog. Megjithatë, ndër fjalë, ai la të kuptohet se është gati për bisedime, por duke vendosur një kusht, largimin e Damian Gjiknurit si Kryetar i Komisionit për Reformën Zgjedhore. “Sot prioritet është zgjidhja e krizës, politike. Zgjidhja e krizës është prioritet absolut i Shqipërisë, i PD-së dhe opozitës së bashkuar. Këtë krizë nuk e ka shkaktuar kodi zgjedhor, kushtetuta dhe ligjet e Shqipërisë. Kushtetuta dhe ligjet nuk janë përgjegjëse as për Valdrin Pjetrin, Mark Babanin dhe Agim Kajmakun. Nuk mund të fshihemi pas letrave dhe kërkesave të pa sinqerta dhe provokimeve të rënda, ftesës nga një individ, i dyshuar kryesor për dosjen 184. Nëse ideja për Kodin Zgjedhor përfshin Gjiknurin, të ftojnë Avdylajt, Shullazin, Ymer Lalën dhe të tjerë se kjo është një tallje”, tha Basha.

Më tej, gjatë deklartës së tij, kryedemokrati la të kuptohet se Reforma Zgjedhore do të jetë pikëtakimi i dialogut me mazhorancën. Megjithatë, për këtë ai u shpreh se së pari duhet ndarja e krimit nga politika, dhe më pas, së bashku me reformën zgjedhore, duhet dhe një reformë politike. “Opozita po përgatit platformën e saj, do të bëjë publike dhe do ta diskutojë. Po jemi të vendosur, reforma zgjedhore ka rëndësinë e saj, por zgjidhja e krizës politike kërkon vullnet politik. Letra të hapura dhe përfshirja e individë të përfshirë në dosjen 184. Hapi i parë duhet të jetë pranimi i situatës në vend, i paligjshmërisë ku e ka futur vendin kryeministri. Kjo mund të shtrojë bazën për daljen nga kriza, ndarjen e krimit nga politika. Një reformë e plotë zgjedhore bashkë me një reformë politike” deklaroi ai.

Gjatë fjalës së tij, Basha sulmoi dhe prezencën e OSBE-së në Tiranë. Sipas tij, pas raportit të OSBE/ODIHR, prezenca e OSBE në Tiranë nuk ka thënë asnjë fjalë për zgjedhjet dhe kryebashkikët, që sipas Bashës, kanë rekorde kriminale. “Ne u kemi dhënë një përgjigje ndërkombëtarëve. Nuk jemi ne pengesa për një proces transparent, parimor dhe gjithëpërfshirës për zgjidhjen e krizës, po Edi Rama që nuk mund të fshihet pas letrave publike, që çon pas Damian Gjiknurit. Sa i përket OSBE-së në Tiranë, pres që të shprehet për raportin e OSBE-së, tre kryebashkiakët me rekorde kriminale dhe shkeljet e rënda të Kushtetutës. Nuk kemi dëgjuar asgjë nga OSBE-ja, por kjo është dicka përtej mandatit dhe gjykimit tim” tha Basha.

Megjithatë, Basha nuk e përmendi largimin e Ramës, tonet e tij ishin më pak të ashpra nga e kaluara. Së paku, ai la të kuptohet se është gati për dialog, duke vendosur dhe kushtetet për t`u ulur në tryezë. Në fakt, aleatët e Lulzim Bashës, fill pas përfundimit të zgjedhjeve t ë30 qershorit kanë kërkuar dialog me Kryeministrin, ku hapin e parë e bëri Monika Kryemadhi, e cila u shpreh e para se “ishte gati të shkonte në zgjedhje me Ramën”. /Realstory.al/

Presion i pandershëm mbi Lulzim Bashën për një marrëveshje të re!

Nga Mero Baze

Tani që gjithë aleatët formalë të Lulzim Bashës, kanë hequr dorë nga kushti i uljes në tryezë pa Edi Ramën, si pengesë për dialogun. Pas LSI, edhe Agron Dukës, sot dhe Fatmir Mediu këmbëngul që duhet të ulen në tryezë me Edi Ramën për zgjidhjen e krizës. E parë nga jashtë duket sikur tani gjithçka ka mbetur në dorë të Lulzim Bashës dhe tek një “Po” e tij. Madje ata duket sikur po i përkëdhelin sedrën, sikur ai e ka në dorë uljen në tryezë, për një Marrëveshje të re.

Por e vërteta është se ky është një presion i pashpirt mbi Lulzim Bashën dhe jo një përpjekje për ta mbivlerësuar vendimin e tj. Kjo këmbëngulje tregon më shumë zhgënjimin nga ajo që Basha ka bërë para 30 Qershorit, se sa rrugëzgjidhjen që duhet të gjejnë tani. Dhe sa më shumë të këmbëngulin për këtë gjë, aq më të vështirë do t’ia bëjnë Lulzim Bashës ta pranojë këtë gjë.

Nëse aleatët e Bashës e kuptojnë se nuk ka asnjë zgjidhje pa u ulur në tryezë me Edi Ramën, Lulzim Basha e kupton se ky nuk është fillimi i zgjidhjes së krizës, por fillimi i dhënies së llogarisë së tij për atë që ka bërë. Në Shqipëri nuk ka ndryshuar asgjë, që Lulzim Basha të heqë dorë nga ky kusht. Në emër të këtij kushti, ai nxori PD-në nga Kuvendi dhe nga zgjedhjet, duke i kthyer në gjendjen e parapluralizmit në Shqipëri.

Natyrisht që ai ishte një kusht fallco, dhe i gjithë revolucioni siç e pranon dhe Ilir Meta, ishte një situatë artificiale. Por ndërsa të gjithë janë të lirë ta pranojnë këtë, Lulzim Basha nuk është i gatshëm të paguajë për këtë gjë. Ndaj përpara se të nxisin Lulzim Bashën që të ulet me Edi Ramën, aleatët e tij duhet t’i heqin atij frikën se nuk do marrë përgjegjësi për këtë gjë para partisë së tij.

LSI mund t’ia falë këtë gjëmë që i bëri, se shpreson se i rikuperon deputetët e humbur. Aleatët e PD, nuk kanë çfarë humbasin, veç 30 për qind të rrogës që u ulet si ish deputetë. Por Lulzim Basha ka çfarë humbet. Ulja në tryezë me Edi Ramën tani mund ta shkarkojë atë nga detyra e kryetarit të partisë, pasi është një kapitullim pa kushte i rrugës thellësisht të gabuar që ai ndoqi për nxjerrjen e PD nga sistemi.

Dhe përderisa ky vendim nuk ishte i tij, por i Sali Berishës, ai nuk mund të ulet në tryezë, pa e marrë këtë vendim Sali Berisha. Ky i fundit nuk ka ndërmend ta hedhë atë hap, pasi ka parimin që Basha e di vetë se çfarë duhet të bëjë. Ndaj gjithë ky presion ndaj Bashës është ose përpjekje për ta ndarë atë nga Berisha, si e vetmja mënyrë që të shmangë shkarkimin, ose presion mbi Berishën që ta tolerojë këtë dështim.

Nëse Basha hyn në konflikt me Berishën, duke marrë shkas këtë krizë dhe duke i lënë atij përgjegjësinë për “revolucionin”, do të jetë një akt i madh reformues, por duke mos qenë i sinqertë mund ta shkatërrojë dhe më shumë Bashën. Për ta bërë këtë, ai duhet së pari të pajtohet me opozitën parlamentare, të ribashkojë PD-në dhe ti thotë Berishës “ose me ne ose vazhdo rrugën”. Por po bëri këtë, nuk i duhen më aleatët që po e ftojnë në tryezë me Ramën.

Nga ana tjetër Berisha nuk është i gatshëm ta dorëzojë Bashën në tryezën e Ramës, për të dalë nga kjo situatë. Në këto kushte nuk ka për të ndodhur asnjëra dhe statukuo-ja e pas 30 Qershorit do jetë i vetmi sukses i gjithë palëve.

Problemi është se ulja në tryezë kërkon kokën e Lulzim Bashës dhe ai nuk është i gatshëm ta dorëzojë atë “në sini”, si trofe për të filluar zhbllokimin e krizës në vend. Ai nuk e ka aq të lehtë sa Monika, Mediu, Duka apo Shehi, uljen me Ramën. Ai ka më shumë problem uljen me Berishën, për të folur hapur se çfarë duhet të bëjnë, për të dalë nga spiralja ku kanë hyrë. Dhe kjo është një bisedë që do shtyhet gjatë.

Aq gjatë sa njëri prej të dyve, të marrë i pari guximin që të pranojë se dështuan, ose guximin për t’ia lënë përgjegjësinë atij që e mori këtë vendim. Deri atëhere, të gjithë do bëjnë, sikur me dialogun po merret dikush tjetër dhe nuk është problem. Madje kam frikë se dhe më 2021 do të jemi vonë dhe do të themi se nuk jemi gati për zgjedhje, se nuk jemi ulur akoma për Kodin apo reformën elektorale, me pretendimin se “Ai” dikushi që duhet t’i ulte në tryezë nuk është shfaqur akoma.

Në fakt ai nuk do shfaqet kurrë, derisa dikush nuk është i gatshëm të paguajë për atë që ka bërë.30 Qershori nuk mund të ketë dy fitues, edhe Edi Ramën edhe Lulzim Bashën. Dhe ne e dimë kush ka humbur. Nëse do vazhdojmë ta trajtojmë humbësin si fitues, nuk duhet të presim zgjidhje prej tij.

Basha ‘lobon’ për negociatat me BE (pas takimit me zyrtarin e DASH)

Zyra e shtypit në Partinë Demokratike ka shpërndarë një lajm të hënën, ku njofton se Lulzim Basha po ‘lobon për hapjen e negociatave të antarësimit të Shqipërisë me BE’. Sipas njoftimit të PD, mësohet se kreu i kësaj partie është duke marrë pjesë në punimet e Asamblesë Politike të Partisë Popullore Europiane, që po zhvillon punimet në Bruksel. Gjatë takimit me drejtues dhe përfaqësues të partive anëtare të PPE-së, sipas PD-së, Basha u ka kërkuar mbështetjen e vendeve të tyre për hapjen e negociatave të Shqipërisë, si garanci për të ndërtuar një shtet demokratik.

“Lideri i opozitës ka kërkuar mbështetjen e tyre për hapjen e negociatave për Shqipërinë si një aspiratë e shqiptarëve, por edhe si garanci për të ndërtuar në Shqipëri një shtet demokratik, me pushtete të ndara, ku të garantohet vota e lirë. Siç u dëshmua nga raporti i OSBE/ODHIR për votimet moniste dhe antikishtetuese të 30 Qershorit, zgjedhjet nuk janë as të lira, as demokratike”, thuhet ndër të tjera në njoftimin e PD.

Më tej, citohet dhe fjala e Bashës, ku mësohet se sipas kreut të PD, hapja e negociatave do të sjellë mbikëqyrjen e BE për ndarjen e politikës nga krimi. “Hapja e negociatave është e rëndësishme, pasi do të sjellë një mbikqyrje të shtuar nga BE për të ndihmuar në ndarjen e politikës nga krimi, i cili sot ka kapur shtetin dhe për të penguar kandidimin e personave me rekorde kriminale, siç demonstrojnë rasti i Shkodrës dhe Vorës, ku është provuar tashmë se dy të inkriminuar u caktuan të kandidonin për bashkitë”, thuhet në njoftim.

Në fund, Basha, sipas njoftimit të PD, mësohet të jetë shprehur se vendi po kalon një krizë të thellë politike, ndërsa zgjidhja sipas tij, janë zgjedhjet e mbikëqyrura nga një qeveri tranzitore. “Shqipëria sot ka një krizë të thellë politike, institucionale dhe ekonomike. Zgjidhja janë zgjedhjet e lira dhe të ndershme, të mbikqyrura nga një qeveri tranzitore”, mësohet të ketë thënë Basha.

Ky është qëndrimi i parë pozitiv, për hapjen e negociatave të Shqipërisë me BE, mbajtur nga Basha në muajt e fundit. Më konkretisht, ky qëndrim vjen fill pas takimit që Basha pati me zyrtarin e lartë të Deprtamentit Amerikan të Shtetit David Kostelancik, që zhvilloi një vizitë zyrtare në Shqipëri pak ditë më parë, me fokus të veçantë ‘influencën ruse’.