Një funksionar i lartë i BDI-së është arrestuar në Maqedoninë e Veriut pas akuzave për shpërdorim detyre. Jahi Jahiu, i cili mban postin e sekretarit shtetëror në Ministrinë për Shoqëri Informatike, akuzohet për marrjen e një tenderi duke keqpërdorur detyrën zyrtare duke i shkaktuar dëm shtetit prej 10 mijë eurove, që i ka përfituar në mënyrë të paligjshme gjatë 2014-2015.
Urdhri për arrestimin e tij është dhënë nga prokurorja për krimin e organizuar Vilma Ruskovska.
Raporti pozitiv nga Komisioni i BE e ka rritur besimin e institucioneve të Maqedonisë së Veriut se pas shumë pritjeve vendi do të shënojë edhe një hap në drejtim të integrimit evropian.
A do të marrë Maqedonia e Veriut datë për negociata me BE-në për anëtarësim në Bashkim Europian? Kjo çështje është tema kryesore në Maqedoninë e Veriut (RMV). Kryeministri i RMV Zoran Zaev pas vizitës në Bruksel deklaroi, se Maqedonia e Veriut ka marrë vendime shumë të rënda dhe me të drejtë pret që kjo të shpërblehet, por nëse ndodh e kundërta, që vendi të mos i nisë bisedimet për anëtarësim, atëherë me gjasë qeveria e tij do ta humbasë mbështetjen.
“Nëse vendosin që të mos e caktojnë datën, kjo do të ishte mundësi për rrëzimin e qeverisë. Kjo qeveri stabile me të gjitha këto vendime pozitive, me siguri se menjëherë do ta humbë shumicën në kuvend, pasi deputetëve u kemi premtuar që me siguri se do të marrim mendim pozitiv nga Bashkimi Evropian nëse ecim përpara”, ka deklaruar Zaev.
Edhe zëvendëskryeministri për çështje të eurointegrimit, Bujar Osmani është shprehur plot optimizëm se Maqedonia e Veriut do t’i çelë bisedimet e anëtarësimit kësaj vere. “Unë jam optimist nga ajo që dëgjoj, nga valorizimet, nga vlerësimet që marrim nga vendet anëtare përfshi këtu edhe Parisin se kjo storie nuk mund të injorohet dhe Maqedonia e Veriut t’i fillon bisedimet për anëtarësimin në Bashkimin Evropian”, ka deklaruar Osmani.
Opozita maqedonase thotë se nuk meritojmë caktimin e datës
Opozita maqedonase konsideron se qeveria është e paaftë për të çuar para procesin eurointegrues, andaj edhe nuk pret marrjen e datës për fillimin e bisedimeve për anëtarësim me Bashkimin Evropian. “Gjasat janë të vogla. Ka mundësi, por ato janë shumë të vogla, kjo para së gjithash për shkak se ende nuk i kemi bërë detyrat si duhet. Sikur të kishim një dosje të shkëlqyer sa i përket përmbushjes së detyrimeve, do të ishte shumë e vështirë që të refuzoheshim. Paramendoni një shtet si Gjermania që ka qenë mbështetësja më e fuqishme, tani ka dilema dhe kërkon që çështja e datës të mbetet për në vjeshtë”, ka deklaruar Ilija Dimovski nga VMRO DPMNE-ja.
BE-ja duhet t’i japë dorën Maqedonisë së Veriut
Njohësit e çështjeve politike gjithashtu flasin për pasoja, nëse Maqedonia e Veriut nuk nis së shpejti negociatat për anëtarësim pas raportit pozitiv të Komisionit Evropian dhe rekomandimit për hapjen e bisedimeve. “Mosdhënia e datës për nisjen e bisedimeve do të nënkuptonte dëshpërim dhe ulje të shpresës për përparim dhe mirëqenie në vend. Një dëshpërim i tillë mund të sjellë edhe pasoja tjera sa i përket rritjes së migrimit pasi shumë të rinj do të vazhdojnë të ikin nga vendi në kërkim të një jete më të mirë”, thotë analisti Sasho Klekovski.
Deri ditën kur do të mbahet samiti i Këshillit Evropian zhvillohen bisedime politike, mund të bëhen lëshime, por mundet që vendet anëtare të mbeten në qëndrimet e tyre të forta, se ende nuk është koha që në samitin e qershorit të jepet data, thotë analisti Muhamed Halili.
“Nëse presidenti Macron mbetet në këtë qëndrim, kjo nuk është mirë pasi do të jetë një rrugë e gjatë pasi reformat e brendshme evropiane nuk mund të bëhet për një apo pesë muaj, por kërkojnë një procedurë të gjatë”, thotë ish-diplomati Muhamed Halili.
Malinka Ristevska Jordanova nga Instituti për Politikë Evropiane vlerëson, se mos çelja e negociatave mund të jetë dekurajuese për vendin në veçanti pas zgjidhjes së kontestit me Greqinë. “Kemi raport shumë të pastër dhe shtyrja e eventuale e vendimit për në vjeshtë besoj se më tepër do të kishte të bënte me çështjet brenda unionit se sa me kushtet e vendit”, thotë Jordanova
Analisti Sasho Ordanovski ka paralajmëruar se në shtator nuk përjashtohen zgjedhje të jashtëzakonshme parlamentare, nëse vendi nuk do të marrë datën për fillimin e negociatave me BE-në. “Nëse nuk marrim datë për negociata me BE-në, shpërndarje të kësaj qeverie dhe zgjedhje të jashtëzakonshme, janë strategjia e vetme logjike për konsolidimin e mëtejmë të suksesit të arritur të kësaj qeverie. Në ato zgjedhje votuesit do të duhet të zgjedhin: duan vazhdimin ose rënien e variantit maqedonas të Republikës së Vajmarit, pasi historikisht këtu “djegia e Rahstagut” nuk pati sukses me forcat jodemokratike në prill 2017”, vlerëson Ordanovski.
Presidenti i Komisionit Evropian Jean Claude Juncker ka bërë të ditur se ende nuk ka pajtim të plotë ndërmjet vendeve anëtare të BE-së për të autorizuar hapjen e negociatave të pranimit për Maqedoninë e Veriut. Jozyrtarisht vendet që hezitojnë hapjen e negociatave janë Gjermania, Franca e Holanda./DW
Ekipi U-19 përfaqësues i drejtuar nga Nevil Dede ka mundur Kosovën, në ndeshjen e dytë miqësore, që është luajtur në stadiumin “Fadil Vokrri” në Prishtinë. 19-vjeçarët kuqezinj kanë triumfuar me rezultatin 4-1 ndaj vëllezërve kosovarë.
Sulmuesi i Tiranës, Ernest Muçi ka zhbllokuar ndeshjen në minutën e 23-të falë një penalltie. Loja sulmuese ka dhënë rezultat, dhe në minutën e 40-të, sulmuesi i Chelsea, Armando Broja, ka dyfishuar rezultatin dhe ka dërguar skuadrën në dhomat e zhveshjes me rezultatin 2-0. Pjesa e dytë ka konfirmuar dominimin e Shqipërisë, që ashtu si edhe në pjesën e parë ishin superior ndaj bashkombasve të Kosovës duke shënuar edhe 2 gola të tjerë.
Në minutën e 48-të, Kosova ngushton diferencat me Bytyqin, por kuqezinjtë përgjigjen menjëherë me Muçin në minutën e 56-të dhe Brojan në minutën e 65-të, gol që vulos dhe rezultatin i cili nuk do të ndryshoj deri në fund. Më datë 3 Qershor, vetëm dy ditë më parë, në Drenas u luajtur miqësorja e parë që u fitua nga kuqezinjtë me rezultatin 3-1, falë një dopiete të Muçit dhe golit të Brojas.
U-17 mundet nga Maqedonia e Veriut
Kombëtarja U-17 është mundur nga bashkëmoshatarët e saj të Maqedonisë së Veriut me rezultatin minimal 1-0, në ndeshjen e parë miqësore, që kuqezinjtë e drejtuar nga Elvin Beqiri kanë zhvilluar ndaj fqinjëve tanë.
Ndeshja e luajtur në Ohër përfundoi me vetëm një gol, shënuar nga një 17-vjeçar shqiptar, që aktivizohet në ekipet zinxhir të shtetit fqinj. Maqedonia e Veriut kaluan në avantazh në minutën e 2-të falë një penalltie të shënuar nga Behar Feta. Kombëtarja jonë ka krijuar disa raste por pa mundur të ndryshojë rrjedhën e miqësores.
Kryeministri i Maqedonisë së Veriut, Zoran Zaev, gjatë një takimi me gazetarët në Bruksel, ka bërë një deklaratë të fortë në lidhej me të ardhmen e qeverisë dhe stabilitetit në vend. “Nëse vendi nuk merr një datë për fillim të negociatave, ekziston rreziku të bie Qeveria” ka thënë Zaev ndërsa mendon se shtyrja e datës për hapjen e negociatave mund të rris rrezikun e forcimit të forcave nacionaliste dhe humbjen e shumicës në Kuvend.
“Nëse vendosin të mos na japin datë, do të ketë mundësi të bie Qeveria. Kjo qeveri stabile me të gjitha këto vendime pozitive, ka gjasa menjëherë ta humbë shumicën në Kuvend. Kjo për shkak se deputetëve u premtuam se sigurisht do të marrin vendim pozitiv nga BE-ja nëse ecim përpara. Ajo do të thotë se qytetarët do të inkurajohen të mbështesin nacionalizimin, radikalizmin dhe ajo nuk është në të mirë as të vendit tonë e as rajonit. Ato janë opsionet dhe ne frikësohemi nga ai variant.”- tha Zaev
Ashtu si për Shqipërinë edhe për Maqedoninë e Veriut, Komisioni Europian rekomandoi hapjen e negociatave për anëtarësim, ndërsa pritet që vendimi përfundimtar të merret nga Këshilli i Europës.
Sekretari i përgjithshëm i NATO-s, Jens Stoltenberg në një konferencë për shtyp me kryeministrin maqedonas, Zoran Zaev ka folur edhe për lirinë e medias dhe rolin e saj në identifikimin e Fake News. Stoltenberg tha se gazetarët duhet të luftojnë kundër lajmeve të rreme duke u siguruar t’u përmbahen vlerave demokratike, sundimit të së drejtës dhe lirive të individit dhe medias pa u bërë pjesë e propagandës. Përgjigja më e mirë kundër Fake Neës është përhapja e fakteve dhe e të vërtetës tha Stoltenberg.
“Na nevojiten gazetarë të cilët do të besojnë në burimet e tyre, media të cilët do të kenë qëndrime të ndryshme për një temë të njëjtë dhe të cilat do të shkaktojnë debat të hapur. Duhet të përgjigjemi përmes mbrojtjes së rrjeteve tona, por një pjesë e reagimit është edhe përgjigjja ndaj informacioneve të rreme kur i shohim. Jam i bindur se përgjigjja më e mirë e lajmeve të rreme dhe propagandës është përhapja e fakteve dhe të vërtetës dhe në fund ato do të sundojnë.” – tha Stoltenberg
Stoltenberg theksoi edhe përparimin e Maqedonisë së Veriut në drejt të forcimit të demokracisë dhe debateve të hapur që qeveria po mundohet të krijojë më gazetarët.
”Maqedonia e Veriut tregoi se është e gatshme të tejkalojë vështirësitë serioze dhe tani ka një demokraci më të fuqishme. Keni zbatuar zgjedhje të lira dhe korrekte, keni debat të hapur me gazetarët të cilët parashtrojnë pyetje më të vështira ashtu edhe siç duhet të bëjnë gazetarët në një shoqëri të hapur.”
Ndërsa kryeministri Zaev tha se Maqedonia e Veriut si një vend anëtar i ardhshëm i NATO-s duhet të luftojë për sundimin e të drejtës dhe proceseve demokratike, pjesë e të cilave është edhe liria e medias.
Dy të rinj shqiptarë kanë humbur jetën pasi i ka zënë dheu poshtë. Ngjarja e rëndë ka ndodhur në Çair të Maqedonisë së Veriut, ku po punohej për hapjen e një kanali.
Tre persona mbetën të bllokuar nga dheu, dy vëllezërit shqiptar Mensur Mustafa dhe Abdulkerim Mustafa, respektivisht 26 dhe 28 vjeç, humbën jetën. Ndërsa mbeti i plagosur një 54-vjeçar, i cili ndodhet në gjendje të rëndë. Trupat e dy të vëllezërve shqiptarë janë nxjerrë pas disa orë gërmimesh.
Ish kryeministri i Maqedonisë së Veriut, Nikolla Gruevski ka dhënë dorëheqje nga mandati i deputetit përmes një statusi në profilin e tij në Facebook, duke theksuar se për këtë gjë do ta njoftojë dhe zyrtarisht institucionet. Ai falenderoi edhe deputetët e VMRO-DPMNE-së që i qëndruan besnik dhe nuk “iu nënshtruan presioneve”.
“Vendosa të tërhiqem nga funksioni parlamentar dhe për të njëjtin vendim formalisht do të informojë Parlamentin në ditët në vijim. Falenderoj deputetët e VMRO-DPMNE-së, të cilët mbetën besnik ndaj pozitave parimore që janë në përputhje me Kushtetutën dhe ligjin ndërkombëtar dhe nuk iu nënshtruan presioneve. Një mirënjohje të veçantë kam për mijëra qytetarë të cilët në mënyra të ndryshme, nëpërmjet kontakteve personale ose përmes rrjeteve sociale në ditët e kaluara, më dhanë mbështetje të madhe, të cilët pavarësisht nga presionet dhe padrejtësitë, përveç gjithë propagandës së rreme dhe rreziqeve personale, kanë treguar se ndjenja e drejtësisë, dhe rebelimi kundër padrejtësisë, mbetet forca udhëheqëse për popullin dhe qytetarët maqedonas.”- ka shkruar Gruevski.
Ish kryeministri i Maqedonisë së Veriut, prej më shumë se gjashtë muajsh ndodhet në Hungari ku ka siguruar azil politik. Ai u largua nga Maqedonia e Veriut në kohën që duhej të vuante dënimin prej dy vitesh burg, për akuzat e korrupsionit.
Maqedonia e Veriut është radhitur në krahë të atyre shteteve që janë kundër idesë së shkëmbimit të territoreve mes Serbisë dhe Kosovës. Presidenti i Maqedonisë së Veriut, Stevo Pendarovski tha se një mendësi e tillë nuk duhet të ekzistojë më në shekullin e 21 dhe se për herë të fundit ka ndodhur nga fuqitë e mëdha në 1923.
‘Në lidhje me idenë e korrigjimit të territoreve, mendoj se bëhet fjalë për ide anarkike që nuk i takon shekullit 21. Mendoj se ajo është ide e shekullit 19 ose ndoshta edhe më herët. Është e patolerueshme që të flitet për një ide të tmerrshme për shkëmbim të territoreve në shekullin 21. Herën e fundit një gjë e tillë ka ndodhur me mbështetjen e fuqive të mëdha para rreth një shekulli, në vitin 1923. Pyetni grekët dhe turqit se si edhe ditëve të sotme kanë pasoja nga shkëmbimi i territoreve. Nuk mund as të mendoj se mund të ndodh diçka më e keqe, se sa dikush të mendojë seriozisht t’i qaset ekzekutimit të një projekti të tillë.” – tha presidenti Pendarovski
Pendarovski tha se zgjidhja e vetme mes Kosovës dhe Serbisë duhet të vijë me dialog dhe kompromis mes tyre.
Kuvendi i Maqedonisë së Veriut do të shkruaj edhe në gjuhën shqipe mbishkrimet zyrtare të saj. Lajmin e ka bërë të ditur vete kryetar i Kuvendit, Talat Xhaferri me një postim në mediat sociale.
“Kuvendi i Republikës së Maqedonisë së Veriut me mbishkrim në tri gjuhë” ka shkruar Xhaferi mbi fotot e tabelave ku përveçse shfaqet emri i ri i shtetit, jepet edhe në gjuhën shqipe së bashku me atë maqedonase dhe angleze.
Kryeministri i Kosovës Ramush Haradinaj së bashku me bashkëshorten e tij, Anita, ka bujtur mbrëmjen e sotme në shtëpinë e homologut të tij të Maqedonisë së Veriut, Zoran Zaev.
Haradinaj ka publikuar një foto në rrjetin social Facebook, ku shfaqet së bashku me homologun Zaev dhe bashkëshortet reskeptive, duke shkruar edhe një koment për darkën miqësore në shtëpinë e Kryeministrit të Maqedonisë Veriore.
“Bashkë me Anitën, të pritur në shtëpinë e Kryeministrit të Maqedonisë Veriore, Zoran Zaev dhe zonjës Zorica. Bashkëbisedim miqësor, për fqinjësi të mirë, bashkëpunim korrekt dhe të ardhmen e përbashkët euro-atlantike të të dyja vendeve!”, ka shkruar Haradinaj.
