Meta heq dorë nga roli i negociatorit, i kërkon ndihmë OSBE. Kritika edhe opozitës për situatën

Presidenti Ilir Meta duket se është dorëzuar nga roli i negociatorit që i kishte vënë vetes për të zgjidhur krizën në vend. Ai i ka dërguar një letër Presidentit të Asamblesë së OSBE-së, Georgo Tsereteli si dhe ministrit të Jashtëm të Sllovakisë Miroslav Lajčák (që ka kryesimin e radhës), të cilëve u kërkon të nisin negociatat mes palëve politike në Shqipëri për t’i dhënë fund krizës politike në vend që pengon çeljen e negociatave me BE-në në tetor.

Në një prononcim për mediat nga Durrësi, mesditën e së premtes, Presidenti Meta përveç akuzave ndaj maxhorancës ka bërë përgjegjëse edhe opozitën, duke thënë se kishte mundësi për të mos e lejuar kapjen e institucioneve.

“Sot kemi një parlament që nuk jep llogari para askujt, një shumicë që kontrollon gjithçka, një situatë kaotike në të gjitha drejtimet, kjo është përgjegjësi e të gjitha palëve, asnjë nuk mund të shfajësohet, sepse opozita i ka pasur mundësi për të parandaluar me propozime me këmbë në tokë dhe të përgjegjshme shumë nga këto marrëzitë e skenarit të kapjes së institucioneve.

Shqipëria nuk mund të ecë në dy rrugë që nuk takohen me njëra tjetrën që janë; rruga e kapjes së institucioneve nga njëra anë dhe rruga tjetër e delegjitimimit të të gjitha institucioneve. Ne jemi një vend dhe kemi nevojë për një rrugë të përbashkët, anëtarësimi në BE dhe dy palët të tregojnë përgjegjësi për të mos e cenuar këtë vullnet”, tha Presidenti.

Meta kujtoi edhe njëherë datën 13 tetor duke i bërë apel Ramës, Bashës e Kryemadhit, të cilët i cilësoi si “artistë” që të bëhen gati për zgjedhje.

“Besoj që jam shprehur qartë dhe përmes padisë në Kushtetuese për ligjin për Teatrin. Na shqetëson shumë ky teatri i madh politik, absurd, që kërcënon që Shqipërinë të dërrmojë cdo mundësi për të çelur negociatat në Tetor. Prandaj edhe njëherë u bëj thirrje në mënyrë të veçantë të tre artistëve, t’i japin fund këtij absurdi, të marrin masat për zgjedhjet vendore në 13 Tetor, pasi qytetarët kanë nevojë të kenë qetësi, normalitet, një qeverisje vendore të ligjshme dhe legjitime dhe garanton llogaridhënie

Sot kam formalizuar një letër drejtuar sekretarit të përgjithshëm të OSBE-së që vizitoi dje Tiranën por edhe kryetarit të radhës, ministrit të Sllovakisë dhe Presidentit të Asamblesë së OSBE-së, meqë Shqipëria përgatitet për të marrë kryesimin e OSBE-së vitin e ardhshëm për të negociuar me të dyja palët për një arritje të një zgjidhje sa më të shpejtë në ditët që vijnë, pasi nuk kemi kohë, jo vetëm për të parandaluar përshkallëzimin por edhe të padenjë për një vend që duhet të jetë shembull në kryesimin e OSBE-së për funksionimin e institucioneve demokratike”, është shprehur Meta.

Meta vazhdon të këmbëngulë që në 13 tetor të zhvillohen sërish zgjedhje vendore, dhe pranon se këto zgjedhje nuk i japin zgjidhje situatës por është një formë presioni ndaj Ramës.

“Sigurisht që 13 tetori dhe zgjedhjet vendore nuk besoj se zgjidhin gjithcka, por është një detyrim ligjor dhe kushtetues i pashmangshëm, sidomos për kryeministrin që të heqë dorë nga presionet dhe shantazhet ndaj institucioneve për të penguar zbatimin e dekretit dhe përgjegjësi e të gjithë të tjerëve për të bëhen gati për të marrë pjesë në zgjedhje te 13 tetorit”, shprehet Meta.

Pas sulmeve e akuzave ndaj qeverisë e ndërkombëtareve duket se Meta është kthyer sërish tek thirrja e vjetër “me qetësi e dashuri” (pasi nuk ia doli dot me skenarin e destabilitetit), duke kujtuar se qytetarët kanë nevojë për normalitet dhe qetësi dhe për hir të negociatave palët të bien dakord. Por presidenti vazhdon të këmbëngulë në zgjidhje që bien në kundërshtim me Kushtetutën. Dekreti i 13 tetorit është antikushtetues pasi Meta e ka firmosur jashtë çdo afati kushtetues. Ndërsa zgjedhjet vendore u realizuan dhe pritet shumë shpejt që KQZ të certifikojë rezultatin përfundimtar.

Për sa i përket negociatave nga përfaqësuesit e OSBE-së, gjatë të enjtes në vizitën që zhvilloi në Tiranë sekretari i përgjithshëm i OSBE-së, Thomas Greminger bëri të qartë se zgjidhja duhet të vijë nga shqiptarët dhe jo nga ndërkombëtar. Pra, pavarësisht kërkesë së Metës, përfaqësuesi i OSBE tha shkurt dhe prerë se ata nuk do të ndërhyjnë ndërsa bëri apel për dialog në respekt të Kushtetutës (dokument që është shkelur nga presidenti përmes dekreteve dhe çdekreteve të tij dhe për të cilën kuvendi ka nisur procedurat për shkarkimin e tij). /realstory.al

LIVE – Prononcim për mediat nga Durrësi
Gepostet von Ilir Meta am Freitag, 26. Juli 2019

Ruçi falënderon Sorosin, mesazh Metës: Asnjë negociatë për Reformën në Drejtësi

Kuvendi ka përkujtuar të hënën 3-vjetorin e miratimit të Reformës në Drejtësi ndërsa ka promovuar botimin parlamentar “Reforma në sistemin e drejtësisë”. Gjatë fjalës së tij në këtë aktivitet, kreu i Kuvendit, Gramoz Ruçi ka falënderuar përfaqësuesit e Fondacionit SOROS për ndihmën e tyre në këtë drejtim, ndërsa i ka dhënë një mesazh të qartë presidentit, Ilir Meta, se Reforma në Drejtësi nuk do të negociohet.

“Dëshiroj të rikonfirmoj qëndrimin tim personal dhe të Kuvendit të Shqipërisë se reforma në drejtësi është e pakthyeshme dhe e panegociueshme. Për arsyen e thjeshtë se ajo është e dëshiruar për të gjithë qytetarët dhe se destinacioni europian, fati dhe e ardhmja e Shqipërisë nuk mund të negociohen.

Por ritheksoj se as reforma në drejtësi, as vettingu, as ngritja e institucioneve të reja të sistemit nuk janë qëllim në vetvete. Sfida e vërtetë e reformës është dhënia e drejtësisë dhe barazia reale e shtetasve para ligjit”, tha Ruçi.

Përmes një analize, kreu i Kuvendit sqaroi se Kushtetuta dhe Ligjet janë themeli i demokracisë që pravalojnë mbi çdo dialog dhe kompromis politik.

“Duket sikur demokracia liberale dhe kushtetueshmëria kufizojnë njera-tjetrën. Nuk kanë munguar as në realitetin shqiptar këto kohë interpretime mbi të ashtuquajturin kufizim të demokracisë për shkak të këmbënguljes për kushtetutshmëri e ligjshmëri.

Kushtetueshmëria dhe ligjshmëria nuk janë vargonj për demokracinë, por kolonat ku mbështetet ajo, janë kufizime që demokracia vendos ndaj vetes, me qëllim që të shpëtojë prej anarkisë, destabilitetit dhe pasigurisë.

Demokracia është, padyshim, edhe arti i kompromisit. Por ndërsa kushtetueshmëria është themeli, kompromiset përbëjnë kthinat e demokracisë. Kushtetuta dhe ligjet janë rrënjët, ndërsa kompromiset politike degët e një sistemi demokratik. Dhe të gjithë jemi të një mendimi që rrënjët dhe themelet prevalojnë mbi kthinat dhe degët.

Përvoja jonë në realizimin e reformës në drejtësi na ndihmon të reflektojmë dhe të pajtohemi me modelin demokratik, sipas të cilit udhëharta e veprimeve tona politike duhet të jenë Kushtetuta dhe ligjet”, tha kreu i Kuvendit, i cili edhe njëherë theksoi se reforma në drejtësi është realizuar dhe është bërë realitet falë mbështetjes së Shteteve të Bashkuara dhe të Bashkimit Europian, si edhe ambasadat, misionet dhe ekspertët nga të gjitha vendet partnere.

Kujtojmë se më herët, presidenti Ilir Meta e ka sulmuar ashpër reformën në drejtësi të cilën e ka cilësuar si “Ramaforma” për të akuzuar kapjen e saj nga kryeministri Rama i mbështetur nga ndërkombëtarët veçanërisht nga ambasada amerikane. Presidenti Meta gjithashtu ka akuzuar Sorosin se përmes ndikimit të tij në Shqipëri dhe në reformën në drejtësi po krijon një “deep state” ose një shtet paralel në Shqipëri, akuza këto të rrëzuara përmes një deklarate nga fondacioni Soros. Përmes qëndrimit të së hënës të kreut të Kuvendit, presidenti Meta merr një tjetër mesazh nga maxhoranca se reforma në drejtësi nuk ka kthim pas dhe as nuk është objekt për negociata për kompromis politik.

HEAVY META(L) OSE META RËNDË: SHPALL “ZGJEDHJE” PRESIDENCIALE

REAGON “SOROS”: QËNDRIMI I METËS, I ÇUDITSHËM, PRESIM TA TAKOJMË

SPAK drejt ngritjes, Meta i “dekreteve”: Të rikthejmë vendin në shinat e ligjit

Presidenti i Ilir Meta ka zhvilluar të premten një takim lamtumire me ambasadoren e Sllovenisë në Shqipëri, Lea Stançiç ku ka shfrytëzuar rastin të japë një mesazh për politikanët shqiptarë dhe veçanërisht kryeministrit Rama.

Meta bën thirrje që vendi të rikthehet urgjentisht në shinat e demokracisë dhe shtetit ligjor. Sipas tij ky është kusht për kapërcimin e krizës në vend dhe i shërben çeljes së negociatave me BE-në.

“Kjo mbështetje (e Sllovenisë) na inkurajon për të shtuar përpjekjet tona për kapërcimin e krizës së rëndë ku ndodhet vendi dhe rikthimin urgjent në shinat e demokracisë dhe shtetit ligjor, për t’i shërbyer objektivit strategjik të çeljes së negociatave të anëtarësimit me Bashkimin Europian gjatë mbledhjes së Këshillit të 17-18 tetorit”, thekson Meta.

Apeli i tij për të kthyer vendin në shinat e shtetit ligjor vjen në një moment kur Reforma në Drejtësi po ecën me ritme të shpejta. Komisioni i Vettingut çdo ditë po kryen seanca dëgjimore dhe po jep vendime për largimin nga drejtësia të prokurorëve dhe gjyqtarëve të korruptuar, ndërsa SPAK është drejt ngritjes dhe funksionit të tij të plotë. Edhe ndërkombëtarët në të gjitha deklaratat e tyre e kanë vlerësuar ecurinë e Reformës në Drejtësi duke e parë atë si një moment thelbësore të funksionimit të shtetit ligjore dhe demokracisë në Shqipëri. Por presidenti nuk ndan të njëjtin qëndrim me ndërkombëtarët në lidhje me ecurinë e Reformës në Drejtësi dhe këtë e ka thënë hapur publikisht disa herë. Ndaj dhe ky apel i tij i sotëm duket si një mesazh drejtuar Ramës për negociata.

Bozdo sqaron 13 tetorin e Metës që u mbështet nga Basha: Zgjedhje, vetëm pa Ramën

Kreu i Partisë Demokratike Lulzim Basha deklaroi për herë të parë të martën pas një takimi me presidentin Meta se e sheh dekretin e tij për zgjedhje në 13 tetor një mundësi e mirë për të zgjidhur krizën në vend.

Por të enjten Enno Bozdo, anëtari i kryesisë së PD-së, sqaroi se Basha nuk e kishte fjalën se mbështet datën 13 tetor, por përpjekjen e presidentin për të arritur standardet. Ndryshe nga Basha i cili nuk e përmendi fare sloganin “zgjedhje pa Ramën kryeministër”, Bozdo e theksoi se PD nuk bën zgjedhje pa u larguar Rama.

“13 tetori, është datë po jo standard, jemi dakord me çdo datë që plotëson standardin. Këtë kërkesë e kemi shpallur që në protestën e 16 shkurtit. Pas 30 qershorit, justifikimi pse demokratët kërkojnë si kusht largimin e Ramës është më i fortë se kurrë. Ne do të shkojmë në zgjedhje nëse plotësohen kushtet. Pra për ne nuk ka rëndësi data por plotësimi i kushteve”, tha Bozdo ndërsa theksoi dhe njëherë se kushtet e PD-së, janë largimi i Ramës nga një qeveri tranzitore për të siguruar zgjedhje të lira dhe të ndershme.

Bozdo gjithashtu tha se PD do të vazhdojë të bëjë çdo gjë për të rrëzuar Ramën por pa zbardhur se cili do të jetë plani i ri i PD-së.

Deklarata e Bashës tre ditë më parë kur doli në mbështetje të propozimit të Metës për zgjedhje në 13 tetor, u pa si një tërheqje e tij nga kushti për largimin e Ramës.

PD e Lezhës përdor dekretin e Metës, padit KQZ në prokurori

Dega e Partisë Demokratike në Lezhë e cila vazhdon të respektojë dekretin e Metës për anulimin e zgjedhjeve të 30 qershorit, ka depozituar një padi në prokurori, përmes të cilës ka paditur KQZ, komisionerët dhe numëruesit e PS, të cilët organizuan zgjedhje në kundërshtim me dekretin e presidentit.

Me një dokument që mban datën 12 korrik, PD i ka kallëzuar penalisht ata në Prokurorinë e Lezhës për shpërdorim detyre, falsifikim të dokumenteve dhe rezultatit në zgjedhje, dëmtim të materialit zgjedhor, shkelje të fshehtësisë së votimit, kanosjes së zgjedhësit, dhe votim më shumë se një herë ose pa u identifikuar.

Baza ligjore e këtij kallëzimi, siç dega e PD-së në Lezhë shprehet, është dekreti i Presidentit i 10 qershorit, për shfuqizimin e zgjedhjeve të 30 qershorit.

Në padi shkruhet se dekreti i presidentit Meta për anulimin e zgjedhjeve të 30 qershorit është në fuqi pasi është botuar në Fletoren Zyrtare dhe si rrjedhojë çdo organizim i mëtejshëm i procesit zgjedhor duhej të ndërpritej, dhe çdo strukturë e ngritur mbi bazën e një dekreti të shfuqizuar ka funksionuar totalisht në shkelje me ligjin.

PD e Lezhës i kërkon prokurorisë hetimin e mëtejshme rreth organizimit të paligjshëm të zgjedhjeve dhe manipulimeve të kryera siç pretendon ajo.

Kujtojmë se KQZ vendosi ta cilësojë nul dekretin e presidentit Meta për anulimin e zgjedhjeve të datës 30 qershor për shkak se është një vendim i marrë në shkelje të kompetencave që i njeh Kushtetuta. Edhe Kolegji Zgjedhor që është “gjykata e apelit” përsa i përket çështjeve zgjedhore e cilësoi nul dekretin e Metës, kështu që padia e PD-së është thjeshtë një përpjekje e fundit për të kundërshtuar zgjedhjet e 30 qershorit por që nuk ka bazë ligjore.

Rama nxjerr jashtë loje Metën, i shtrin dorën Bashës për dialog

Pas një mbledhje kryesie që ka zgjatur plot 5 orë, kryeministri Rama e bëri të qartë dhe njëherë si për presidentin Meta, ashtu edhe për kreun e PD-së, Basha, se nuk e njeh dekretin e 13 tetorit dhe se nuk do të ketë zgjedhje të tjera përveç atyre të vitit 2021.

Rama gjithashtu u shpreh i gatshëm të ulet dhe të dialogojë me opozitën por jo për çështje që lidhen me ndryshime kushtetuese apo për kufizim të mandatit qeverisës. Ai tha se maxhoranca e tij e ka detyrim të forcojë kulturën e ligjit në vend. Ndryshe nga sa propozon Meta e që mbështetet nga Basha e Kryemadhi që në 13 tetor të zhvillohen 3 procese zgjedhor në kundërshtim me Kushtetutën.

“13 tetori për mua është njëlloj si 12 tetori, 6 nëntor, 22 dhjetori…. S’njoh ndonjë 13 tetor. Është një e diel si të gjithë të tjerat që kemi përpara.

Ne jemi absolutisht të disponueshëm për t’u ulur në tryezë me të gjithë pa asnjë përjashtim dhe pa asnjë paragjykim për të diskutuar për sfidat e vendit dhe për ç’ka është e rëndësishme në funksion të rregullave të lokës, pra në funksion të reformës zgjedhore. Për sa i përket kushtetutës dhe mandatit tonë qeverisës këto nuk janë çështje që i kemi për diskutim me askënd tjetër, sepse lidhen me detyrimet tona. Ne kemi detyrimin të forcojmë kulturën e ligjit dhe nga ana tjetër kemi detyrimin të mbajmë me nder dhe dinjitet një mandat që na është dhënë për të qeverisur deri në vitin 2021”, është shprehur Rama.

I pyetur disa herë për dekretin e Metës, Rama tha se “zgjedhjet janë bërë në 30 qershor. Ne e kemi sfidën me problemet e njerëzve dhe jo me problemet e brendshme të opozitës jashtëparlamentare apo të presidencës”.

Me këtë deklaratë Rama i jep përgjigjen përfundimtare insistimit të vazhdueshëm të presidentit Meta që palët të shohin si zgjidhje të krizës datën 13 tetor. Për Ramën kjo datë nuk ekziston, zgjedhjet janë bërë, ndërsa opozitës i shtrin dorën për dialog për reformën zgjedhore dhe çdo çështje tjetër që nuk lidhet me ndryshimin e Kushtetutës apo zgjedhje të parakohshme, duke e nxjerrë jasht loje Metën dhe tentativen e tij për negociata./realstory.al

Meta si “Shaban Qosja”, Basha si “Haxhi Pishmani”: vazhdojnë me “13 tetorin”

Presidenti Ilir Meta vazhdon të këmbëngulë në zbatimin e dekretit të tij për zhvillimin e 3 proceseve zgjedhore në 13 tetor, megjithëse e di mirë që kjo datë ka rënë.

Tani që mori mbështetjen e Bashës, presidenti shkruan se tani është koha që palët të takohen me njëra-tjetrën për të rënë dakord për zhvillimin e zgjedhjeve, madje dhe ato presidenciale (por këtu nuk e përmend ndryshimin e Kushtetutës!).

“30 qershori iku si një datë e përbashkët vetëm kalendarike. Përpara kemi një datë tepër të rëndësishme, për ne dhe të ardhmen e vendit tonë, 17-18 tetor 2019, kur Këshilli i Bashkimit Europian do të marrë një vendim për çeljen ose jo të negociatave me Shqipërinë.

Ndaj nuk mund të vazhdohet më të ecet në dy rrugë të kundërta, që nuk takohen me njëra-tjetrën: në një anë atë të kapjes së çdo institucioni, çdo zyre dhe çdo vendi pune, dhe atë të delegjitimimit të çdo institucioni nga ana tjetër.

Të dy palët duhet t’u krijojnë mundësinë të gjithë qytetarëve shqiptarë, që në mënyrë të qetë, civile dhe demokratike të shprehin sovranitetin e tyre për të gjitha institucionet, vendore dhe qendrore, përfshi dhe Presidentin nga populli, në 13 tetor. KOHA ËSHTË TANI! Në 19 tetor do të jetë shumë vonë!”, shkruan Meta në Facebook.

Dekreti i Metës për anulimin e zgjedheve të 30 qershorit u cilësua nul nga KQZ dhe nga Kolegji Zgjedhor, i cili në argumentet që dha e tha qartë se edhe dekreti i ri për zgjedhjet në 13 tetor ëshët nul. Kjo për faktin se në bazë të Kushtetutës presidenti dekreton datën e zgjedhjeve 9 muaj para afatit kushtetues. Që të dy dekretet e Metës i kanë tejkaluar afatet kushtetuese dhe si të tilla janë nul, të pavlefshme dhe këtë presidenti Meta e di shumë mirë.

Ndërsa kërkesa tjetër për zgjedhje presidenciale është kryekëput jashtë çdo kornize kushtetuese dhe realiteti në të cilin ndodhemi. Presidenti në Shqipëri zgjidhet nga parlamenti, që të zgjidhet nga populli kërkohen ndryshime kushtetuese. Por këto ndryshime i ka në dorë maxhoranca e cila është kategorikisht kundër këtij propozimi. Kështu që Basha nuk i duhet fare Metës në këtë pikë, pasi ai nuk ka asnjë votë në parlament që t’i japë atij.

I mbetur i zhvlerësuar si nga institucionet shtetërore ashtu edhe nga ndërkombëtarët, Meta kujtohet të bëjë negociatorin mes palëve duke përmendur datën e çeljes së negociatave, datë e cila u shty edhe për shkak të situatës së ndezur politike në vend, ku opozita e nxitur nga presidenti sulmoi me molotov KZAZ-të, duke shkaktuar një dëm të madh të imazhit të Shqipërisë në Europë. Kjo thirrje e fundit e Metës duket qartë se nuk ka asnjë vlerë dhe është nul, njëlloj si dekretet e tij./Realstory.al

Negociata ndoshta, por PS paralajmëron Bashën dhe Kryemadhin: Zgjedhjet më 2021

Teksa Basha doli të martën në mbështetje të dekretit të Metës që në 13 tetor të zhvillohen 3 palë zgjedhje, pra zgjedhje lokale, të përgjithshme dhe presidenciale, ka reaguar menjëherë zëdhënësja e qeverisë.

Elisa Spiropali ia bëri të qartë si Bashës ashtu edhe Metës se zgjedhjet e ardhshme do të jenë më 2021 dhe as që mendohet të ketë të tjera. Spiropali i kërkon Bashës që të mos merret më me 30 qershorin, se këto zgjedhje tashmë janë kryer, por të hedhë sytë te zgjedhjet e 2021.

“Lulzim aman ndërro pllakën e gramafonit se s’dëgjohet më as ajo kënga monotone, po veç gërvishtjet e pllakës! Ndërroje atë dreq pllake dhe harroje 30 qershorin bashkë me Baba Xhiken se po të ikën edhe qershori 2021”, shkruan Spiroali në Twitter.

Edhe kryeministri Rama e tha qartë në një dalje për mediat të hënën, se nuk do të ketë zgjedhje të parakohshme, ndërsa qëndrimet e opozitës, i cilësoi si akte që çojnë në vetë eliminimin e saj.

Maxhoranca nuk e njeh dekretin e Metës për 13 tetorin. Zgjedhjet lokale u zhvilluan dhe u njohën nga ndërkombëtarët. Zgjedhjet e parakohshme nuk ka asnjë arsye që të zhvillohen duke u nisur nga parashikimet e Kushtetutës, ndërsa ato presidencialet bien kryekëput në kundërshtim me Kushtetutën, dhe duken si një dëshirë e Metës për të mbajtur karrigen, në prag të shkarkimit.

Të mbetur pa asnjë pushtet, Basha, 40 minuta konsultë me Metën

Kreu i PD-së, Lulzim Basha e ka nisur mëngjesin e së martës me një takim kokë më kokë me presidentin Ilir Meta në presidencë.

Takimi raportohet të ketë zgjatur rreth 40 minuta, ndërkohë që nuk ka asnjë njoftim zyrtar si nga PD ashtu edhe nga presidenca.

Mendohet se Basha dhe Meta kanë diskutuar për situatën politike në vend, ku që të dy duken se kanë dalë jashtë sistemit, ose siç tha kryeministri Rama të hënën “opozita është drejt vet eliminimit”.

“Për fat të keq të atyre që ende e besojnë këtë opozitë nuk ka nevojë për plane për të eliminuar opozitën, pasi opozita është në kapacitete të plotë për t’u vetëeliminuar dhe procesi i degradimit vijon në një rrugë që e kanë zgjedhur vetë dhe qorrazi dhe çdo ditë hedhin nga një hap”. Kështu u shpreh të hënën kryeministri Edi Rama kur u pyet për planet e tij për opozitën.

Nga njëra anë, presidenti është në prag të shkarkimit dhe e vetmja gjë që i ka mbetur të bëjë është kthimi mbrapsht i ligjeve në Kuvend, akte që s’kanë asnjë vlerë, pasi PS ka maxhorancën dhe voton lehtësisht kundër dekreteve të Metës. Pra çdo akt i presidentit për maxhorancën nuk ka asnjë rëndësi përsa kohë ka shumicën e numrave në Kuvend.

Nga ana tjetër, Basha është pa asnjë pushtet, për shkak të vendimeve të gabuara që nisën që me djegien e mandateve të deputetëve dhe braktisjen e parlamentit, dhe vazhdan me refuzimin për t’u futur në garën e 30 qershorit. Por kreu i demokratëve ndodhet në një situatë akoma më të vështirë pasi tani gjendet në qendër të kritikave brenda partisë së tij. Fakti që ai e la PD-në pa pushtet duke e nxjerrë përfundimisht në rrugë, jashtë çdo sistemi, ka vënë në pikëpyetje qëndrimin e tij në krye të partisë. Për këtë arsye ai ka nisur një tur takimesh në strukturat e PD-së në rrethe, për të konfirmuar veten duke iu gjendur pranë kryebashkiakëve të djathtë të cilët i nxit të qëndrojnë në zyrë në kundërshtim të hapur me ligjin, dhe me thirrjen e ndërkombëtarëve dhe veçanërisht të ambasadës së SHBA e cila e tha qartë se të zgjedhurit e rinj vendorë duhet të nisin punën, ndërsa ata që kundërshtojnë zgjedhjet t’i drejtohen Gjykatës Kushtetuese.

Siç duket, si Basha ashtu edhe Meta, të gjendur në këto kushte, pa pasur asgjë në dorë për të ndryshuar fatet e tyre politike, janë takuar dhe kanë biseduar mëngjesin e së martës për hapat e mëtejshëm që pritet të marrin. Meta vazhdon të kujtojë herë pas herë dekretin për 3 palë zgjedhje në 13 tetor, por kjo datë nuk është marrë në konsideratë as nga Basha. Ky i fundit zyrtarisht thotë se ka nisur të përgatitet për zgjedhjet të parakohshme, opsion ky që nuk pranohet kurrsesi nga maxhoranca./Realstory.al

Lufta Meta -Rama, Presidenti kthen në Kuvend ligjin për arin

Lufta institucionale mes Kryeministrit Rama dhe presidentit Meta vazhdon të jetë e fortë. Presidenti Meta me një vendim të ditës së ka kthyer një tjetër ligj për rishqyrtim në Kuvend atë për “rezervat materiale të shtetit” duke e cilësuar atë të pajustifikuar. Presidenti i Republikës vlerëson se nisur nga natyra dhe lloji i mallrave të Grupit A, të rezervave të shtetit, është e domosdoshme të ruhet standardi ligjor i vendosur prej 11-vjetësh, ku vendimmarrja mbi mënyrën e administrimit të mallrave të Grupit A, t`i lihet vendimmarrjes së Këshillit të Ministrave dhe jo një marrëdhënie midis dy autoriteteve politik, Ministër – Kryeministër. “Ky ndryshim përbën rrezik të shtuar për cenimin e interesit publik, që mund të vijë nga keqadministrimi dhe shpërdorimi i pushtetit vendimmarrës për lëvrimin e mallrave të rezervave të shtetit, pjesë e grupit A.” –shkruhet në arsyetimin e presidentit Meta.

Më herët edhe opozita akuzoi kryeministrin Rama se me ndryshimin në ligj ai merr të drejtën e blerjes së arit në Shqipëri.

Qeveria kërkoi ndryshimin në këtë nen të ligjit duke argumentuar se kjo bëhej për të thjeshtuar procedurat. “Kjo mënyrë e re e vendimmarrjes bëhet për shkak se miratimi i lëvrimit të mallrave të grupit A bëhet nëpërmjet një akti kolegjial, si ai i vendimit të Këshillit të Ministrave, gjë e cila sjell vonesa në momentin e daljes së aktit deri në lëvrimin e mallrave” – thuhet në relacionin e Këshillit të Ministrave.

Arsyet e kthimit të ligjit nr. 36/2019:

“Për një ndryshim në ligjin nr. 9900, datë 10.4.2008, “Për rezervat materiale të shtetit”

Të nderuar deputetë,

Kuvendi i Shqipërisë në seancën plenare të datës 20 qershor 2019 ka miratuar ligjin nr. 36/2019 “Për një ndryshim në ligjin nr. 9900, datë 10.4.2008, “Për rezervat materiale të shtetit”. Me shkresën e Kuvendit nr. 2596 prot, datë 26.06.2019, administruar në Institucionin e Presidentit të Republikës me nr.2003 prot, datë 26.06.2019, ligji nr. 36/2019, i është përcjellë Presidentit të Republikës, për dekretim dhe shpallje.

Nga vlerësimi i praktikës parlamentare rezulton se ky projektligj është propozim i Këshillit të Ministrave, nisëm e Ministrisë së Mbrojtjes. Kjo nisëm ligjore është shqyrtuar nga Komisioni për Sigurinë Kombëtare në Kuvendin e Shqipërisë në cilësinë e komisionit përgjegjës.

Referuar relacionit shpjegues të Këshillit të Ministrave që ka shoqëruar propozimin e projektligjit, si dhe raportit të datës 17.06.2019 të Komisionit për Sigurinë Kombëtare, rezulton se ndryshimi ligjor i miratuar synon të thjeshtojë procesin e lëvrimit të mallrave rezervë të shtetit që bëjnë pjesë në grupin A, duke e zëvendësuar miratimin e lëvrimit të tyre nga me vendim të Këshillit të Ministrave siç parashikon aktualisht ligji në fuqi, me një akt individual, “Urdhër të Kryeministrit”.

Sipas relacionit të Këshillit të Ministrave dhe Raportit të Komisionit për Sigurinë Kombëtare, kjo mënyrë e re e vendimarrjes bëhet për shkak se miratimi i lëvrimit të mallrave të grupit A bëhet nëpërmjet një akti kolegjial, si ai i vendimit të Këshillit të Ministrave, gjë e cila sjell vonesa në momentin e daljes së aktit deri në lëvrimin e mallrave.

Presidenti i Republikës për shqyrtimin e ligjit nr. 36/2019, ju referua përmbajtjes së vet aktit të dërguar për dekretim dhe shpallje, si dhe praktikës parlamentare të ndjekur për këtë qëllim. Presidenti vlerësoi përputhshmërinë e këtij ligji, duke bërë një analizë të përmbajtjes së qëllimit për të cilën ky akt është propozuar në raport me interesin publik.

Nga shqyrtimi i ligjit nr. 36/2019, konstatohet se ndërmarrja e kësaj iniciative ligjore është e pajustifikuar ligjërisht dhe për më tepër kjo mënyrë e re e lëvrimit të mallrave pjesë e rezervës shtetërore nëpërmjet Urdhërit të Kryeministrit, nuk garanton plotësisht mbrojtjen e interesit publik në procedurat e administrimit dhe lëvrimit të mallrave me vlerë që përbëjnë grupin kryesor të mallrave të rezervave të shtetit.

Bazuar mbi këtë arsyetim, të shpjeguar si më poshtë vijon, në bindje të Kushtetutës dhe në ushtrim të së drejtës të parashikuar në pikën 1 të nenit 85 të saj, Presidenti i Republikës, vlerëson se ligj nr.36/2019, duhet kthyer në Kuvend, me qëllim rishikimin e tij për të vlerësuar objektivisht nëse miratimi i këtij ndryshimi në ligjin nr. 9900, datë 10.4.2008, “Për rezervat materiale të shtetit” është vërtet i nevojshëm apo jo.

Konkretisht;

Kuvendi i Shqipërisë nëpërmjet ligjit nr. 9900, datë 10.4.2008, “Për rezervat materiale të shtetit” ka krijuar bazën ligjore të nevojshme për rregullimin e të gjitha marrëdhënieve që lindin, ekzistojnë dhe shuhen gjatë administrimit, mirëmbajtjes dhe kontrollit të pronësisë në rezervat materiale të shtetit.

Ky ligj i miratuar nga Kuvendi i Shqipërisë, që prej datës 10.04.2008, nuk është ndryshuar për një periudhë 11 vjeçare dhe implementimi i tij në praktikë, nuk rezulton të ketë sjell ndonjë problematikë të theksuar, e cila të jetë bërë pengesë në veprimtarinë administrative të strukturave shtetërore të ngarkuara për zbatimin e tij.

Sipas nenit 2 të ligjit ekzistues nr. 9900, datë 10.4.2008, “Për rezervat materiale të shtetit”, rezervat materiale të shtetit janë lëndët e para, materialet, produktet e gatshme, prodhimet dhe mjetet e tjera të domosdoshme për depozitimin, mirëmbajtjen dhe ruajtjen e tyre, ndërkohë që administrimi i tyre është lëvrimi, këmbimi, freskimi, plotësimi, ruajtja ose mirëmbajtja, heqja apo seleksionimi, huadhënia, blerja, shitja dhe çdo veprim tjetër, që mund të kryhet me rezervat materiale të shtetit.

Në po këtë nen në pikën 4 të tij, jepet përkufizimi i termit “lëvrim” ku sipas ligjit lëvrimi është dhënia, falas ose me pagesë, e rezervave materiale të shtetit.

Ndërkohë në nenin 3, të ligjit nr. 9900, datë 10.4.2008, përcaktohet se:

“Rezervat materiale të shtetit krijohen për të ndërhyrë, në mënyrë operative, për mbrojtjen e popullsisë, të ekonomisë dhe mbrojtjen e vendit, në situata të gjendjes së jashtëzakonshme, gjendjes së emergjencës civile, veprimeve terroriste, veprimeve ushtarake (në gjendje lufte), të cilat sjellin dëme të menjëhershme e të rënda për jetën, për shëndetin e popullatës dhe të gjësë së gjallë, për pasurinë, për trashëgiminë kulturore dhe për mjedisin. Rezervat materiale të shtetit përdoren edhe për dhënien e ndihmave humanitare, në përputhje me normat e së drejtës ndërkombëtare”.

Referuar dispozitës së mësipërme, është e qartë se Kuvendi i Shqipërisë ka vlerësuar të përcaktojë me ligj rëndësinë madhore që ka krijimi, administrimi dhe përdorimi i rezervave materiale të shtetit, të cilat përveç krijimit dhe rifreskimit permanent të tyre, përdoren kryesisht në ato raste kur vihet në rrezik jeta dhe shendeti i popullatës, apo prona publike dhe private që në thelb të tyre bëjnë pjesë në ato marrëdhënie juridiko shoqërore mbrojtja e të cilave përbën interes të lartë publik.

Pikërisht për nga shumëllojshmëria dhe rëndësia e materialeve që përbëjnë rezervat shtetërore, ligjvënësi në nenin 5, pika 3 të ligjit nr. 9900, datë 10.4.2008, ka përcaktuar se:

“Lista përbërëse e mallrave rezervë, në lloje e sasi, e ndarë sipas grupeve, miratohet me vendim të Këshillit të Ministrave” .

Këshilli i Ministrave me vendimin nr.1128, datë 05.08.2008 ka miratuar listën përbërëse të mallrave rezervë shtetërore, në lloje dhe sasi, e ndarë sipas grupeve, si dhe limiti minimal për secilin artikull, ku në lidhjen nr.1, që i bashkëlidhet këtij vendimi parashikohet dhe Grupi A, i mallrave rezervë material shtetërore si më poshtë:

Kuvendi i Shqipërisë, për lëvrimin e mallrave të Grupit A, që kanë një rëndësi të lartë dhe një vlerë të konsiderueshme për rezervat shtetërore, ka përcaktuar në nenin 10 pika 1, të ligjit nr.9900, datë 10.4.2008, se:

“Lëvrimi dhe shitja e mallrave rezervë të grupit A bëhet me vendim të Këshillit të Ministrave, me propozimin e ministrit”.

Ndërkohë që me ndryshimet që propozohen të realizohen me ligjin nr. 36/2019 “Për një ndryshim në ligjin nr. 9900, datë 10.4.2008, “Për rezervat materiale të shtetit”, Kuvendi ka miratuar ndryshimin pikërisht të pikës 1, të nenit 10 të ligjit bazë. Sipas nenit 1 të ligjit nr. 36/2019, parashikohet se:

Pika 1, e nenit 10, të ligjit nr. 9900, datë 10.4.2008, “Për rezervat materiale të shtetit”, ndryshohet si më poshtë:

“1. Lëvrimi dhe shitja e mallrave rezervë të grupit A bëhet me urdhër të Kryeministrit, me propozimin e ministrit.”.

Pra sipas këtij ndryshimi në ligj, të gjitha mallrat e Grupit A, të cilat deri më tani, kanë qenë në kompetencë të Këshillit të Ministrave për të vendosur lëvrimin e tyre, nëpërmjet këtij ndryshimi ligjor propozohen që ato të lëvrohen me akt individual të Kryeministrit me propozimin e ministrit.

Siç u përmend edhe më sipër, ky ndryshim justifikohet nga qeveria dhe Kuvendi me të vetmin argument se thjeshtohet procesi i lëvrimit të mallrave rezervë shteti të grupit A, për shkak se miratimi i lëvrimit të mallrave të grupit A bëhet nëpërmjet një akti kolegjial, si ai i vendimit të Këshillit të Ministrave, dhe kjo sjell vonesa në daljen e aktit të miratimit dhe deri në lëvrimin e tyre.

Presidenti i Republikës vlerëson se ky argument i Këshillit të Ministrave dhe i Kuvendit të Shqipërisë, nuk qëndron dhe nuk justifikon aspak ndërmarrjen e kësaj nisme ligjore për miratimin e ndryshimeve në nenin 10 pika 1 të ligjit ekzitues.

Kushtetuta e Republikës së Shqipërisë, në nenin 100 përcakton ndër të tjera se Këshilli i Ministrave merr vendime me propozim të Kryeministrit ose të ministrit përkatës.

Kuvendi i Shqipërisë ka miratuar ligjin nr. 9000, date 30.1.2003 “Për organizimin dhe funksionimin e Këshillit të Ministrave”, ligj ky në të cilin është përcaktuar faqe qartë, mënyra se si mblidhet, kush e thërret dhe si i merr vendimet qeveria e Republikës së Shqipërisë.

Në nenin 13 të këtij ligji përcaktohet se mbledhja e Këshillit te Ministrave thirret nga Kryeministri ose, ne mungesë dhe me porosi të tij, nga Zëvendëskryeministri.

Pra, autoriteti që ka për detyrë dhe përgjegjësi që të thërrase mbledhjen e Këshillit të Ministrave, është vet Kryeministri. Në këtë mënyrë rezulton se, ndryshimet e propozuara në ligjin nr.9900/2008, për t’i kaluar Kryeministrit një kompetencë të Këshillit të Ministrave, nën argumentin se Kryeministri mund të vonojë mbledhjen dhe vendimarrjen e këtij organi kolegjial është absolutisht i pambështetur në ligj dhe krejtësisht i pajustifikuar.

Për më tepër, ligji nr.9000/2003 “Për organizimin dhe funksionimin e Këshillit të Ministrave”, ka parashikuar edhe ato raste kur mbledhja e Këshillit të Ministrave është e domodoshme të realizohet në mënyrë urgjente dhe në raste të jashtëzakonshme.

Konkretisht në nenin 14 të ligjit, parashikohet se: “ Në raste të veçanta, Këshilli i Ministrave thirret në mbledhje të jashtëzakonshme nga Kryeministri ose, në mungesë dhe me porosi të tij, edhe nga zëvendëskryeministri. Në rastet e thirrjes së mbledhjes të jashtëzakonshme nuk zbatohen rregullat e parashikuara në nenin 15 të këtij ligji”.

Pra edhe sipas kësaj dispozite është parashikuar edhe zgjidhja e atyre situatave të jashtëzakonshme që bëjnë të pamundur zbatimin e rregullit se rendi i ditës dhe projektaktet që do të shqyrtohen në mbledhjen e Këshillit të Ministrave dërgohet 2 (ditë) përpara datës së zhvillimit të mbledhjes.

Pra është vet ligji organik i Këshillit të Ministrave që e ka zgjidhur qartësisht se si veprohet në situata emergjece me rëndësi të jashtëzakonshme.

Në këtë mënyrë, referuar parashikimeve të ligjit nr.9000/2003 “Për organizimin dhe funksionimin e Këshillit të Ministrave”, rezulton se argumenti i përdorur për ndryshimin e nenit 10 pika 1 të ligjit nr. 9900/2008 “Për rezervat material të shtetit”, nuk qëndron dhe është ligjërisht i pajustifikuar, pasi Këshilli i Ministrave i Republikës së Shqipërisë, është i detyruar të mblidhet në çdo kohë dhe nuk ka asnjë pengesë ligjore që të vështirësojë procesin vendimarrës të tij, përfshi këtu edhe vendimarrjen për lëvrimin e mallrave pjesë e rezervës shtetërore.

Republika e Shqipërisë, ka në fuqi një bazë ligjore të shëndoshë që parashikon mbledhjen në urgjencë të Këshillit të Ministrave, për të ushtruar në çdo kohë përgjegjësitë dhe funksionet e tij.

Prandaj çdo aludim se lëvrimi i mallrave të rezervave të shtetit, mund të pengohet nga vonesa e vendimarrjes së Këshillit të Ministrave, nuk qëndron dhe është një argument fiktiv për të legjitimuar ndërhyrjen që po tentohet të realizohet në ligjin ekzistues nr.9900/2008.

Për më tepër, nisur nga rëndësia dhe vlera që kanë mallrat e Grupit A të rezervave të shtetit është në interes të publikut të gjerë që kontrolli ndaj çdo veprimi administrativ mbi këto mallra të jetë maksimal dhe jo një marrëdhënie midis dy autoriteteve politik Ministër – Kryeministër, ku padyshim kjo marrëdhënie varësie midis tyre (Kryeministër-Ministër) mund të ndikojë drejtëpëdrejtë në objektivitetin e vendimarrjes.

Presidenti i Republikës vlerëson se nisur nga natyra dhe lloji i mallrave të Grupit A, të rezervave të shtetit, është e domodoshme të ruhet standarti ligjor i vendosur prej 11-vjetësh, ku vendimarrja mbi mënyrën e administrimit të mallrave të Grupit A, t`i lihet vendimarrjes së Këshillit të Ministrave.

Presidenti i Republikës, vlerëson se në zbatim të nenit 100 pika 1 të Kushtetutës, ku përcaktohet se Këshilli i Ministrave përcakton drejtimet kryesore të politikës së përgjithshme shtetërore është e detyrueshme që të gjithë anëtarët e Këshillit të Ministrave duhet të jetë në dijeni dhe të japin mendimin e tyre për çdo lëvizje apo lëvrim të mallrave të rezervave shtetërore pjesë e kategorisë A, pasi ruajtja e këtij standardi kontrollues mbi këtë verimtari garanton një mënyrë më objektive për të ruajtur të pacenuar interesin publik.

Ndryshimet ligjore të mriatuar me ligjin nr. 36/2019, dobësojnë mekanizmat e kontrollit mbi këtë proces, si dhe ulin nivelin vendimarrës mbi mënyrën se si këto mallra do të administrohen dhe qarkullojnë në vijim, duke krijuar kështu një rrezik të shtuar që interesi publik të cenohet.

Të nderuar deputetë të Kuvendit të Shqipërisë

Siç u relatua më sipër, në përfundim të këtij shqyrtimi Presidenti i Republikës, konstaton se;

Nisma ligjore për ndryshimin e nenit 10, pika 1 të ligjit nr. 9900, datë 10.4.2008, “Për rezervat materiale të shtetit”, është e pajustifikuar;

Dispozitat e ligjit të miratuar nr. 36/2019 “Për një ndryshim në ligjin nr. 9900, datë 10.4.2008, “Për rezervat materiale të shtetit”, përbëjnë rrezik të shtuar për cenimin e interesit publik, që mund të vijë nga keqadministrimi dhe shpërdorimi i pushtetit vendimarrës për lëvrimin e mallrave të rezervave të shtetit, pjesë e grupit A.

Për këto arsye, në bindje të Kushtetutës dhe në ushtrim të së drejtës të parashikuar në pikën 1 të nenit 85 të saj, kam vendosur kthimin e ligjit nr. 36/2019 “Për një ndryshim në ligjin nr. 9900, datë 10.4.2008, “Për rezervat materiale të shtetit” për rishqyrtim në Kuvendin e Shqipërisë.

Sinqerisht,Ilir META”