Gjithë verës në rrugë. Zbardhet skenari i PD për kryebashkiakët e djathtë

Nuk do të ketë asnjë ditë pushim për demokratët gjatë kësaj vere. Vendimi i tyre është që të vazhdojnë në rrugën e protestave. Këtë e tha vetë Basha në fjalën e mbajtur në protestën e së hënës që “beteja do të vazhdojë”, por e ka konfirmuar edhe ish deputetja Oriola Pampuri.

Në një intervistë televizive Pampuri ka deklaruar se opozita do të vijojë gjatë gjithë verës aksionin kundër qeverisë së Edi Ramës. Sipas saj, do të ketë protesta lokale dhe kombëtare, si dhe takime me qytetarët.

“Do të ketë zhvillime të tjera, PD do jetë gjithë verës në aksion, do ketë dhe protesta, takime me qytetarët, protesta lokale. Besimi i ndërkombëtarëve te Rama ka rënë.

Asnjë nuk mund ta pranojë një kryeministër që po ecën në kahun e kundër të standardeve evropiane. Ne duam që Shqipëria të ketë demokracinë që ka fituar 30 vite më parë, ne nuk mund të bëjmë hapa prapa, siç kemi bërë këto 6 vitet e fundit”, është shprehur Pampuri.

Ajo gjithashtu ka bërë të ditur se kryebashkiakët e PD nuk do t’i lirojnë zyrat, pavarësisht thirrjes së ndërkombëtarëve.

“Kryebashkiakët e majtë janë qesharakë, se nuk mund të jenë të tillë pa garë. Të djathtët kanë vendosur të mos lirojnë vendet e tyre në bashki me mbështetjen e qytetarëve”, ka theksuar Pampuri.

Ky qëndrim i PD-së bie në kundërshtim të hapur me thirrjen e ndërkombëtarëve të cilët i kanë njohur zgjedhjet e 30 qershorit dhe kanë bërë thirrje që të zgjedhurit e rinj të marrin zyrat dhe të nisin menjëherë nga puna.

Zaloshnja: PD rritet me 100 mijë vota, përgjysmohet LSI

Nga Eduard Zaloshnja

Nga një projeksion që i bëra votave, bazuar në një sondazh që zhvillova ditët e para të korrikut, rezultonte që, nëse zhvillohen zgjedhje parlamentare sot, PD-ja dhe satelitet e saj tradicionalë (PR+PDIU+LZHK+PDK+PBDNJ+etj) marrin rreth 635 mijë vota. Ndërkohë, LSI-ja merr rreth 85 mijë vota.

Me pak fjalë, shohim se me rritjen e PD-së dhe satelitëve të saj, kemi një tkurrje të LSI-së. Në fakt një korelacion i tillë vihet re në të gjithë dekadën e fundit.

Para dy vjetësh situata ishte ndryshe. Në zgjedhjet e 2017-ës, PD-ja dhe satelitët e saj tradicionalë (PR+PDIU+LZHK+PDK+PBDNJ+etj) morën gjithsej 535 mijë vota, që përbën minimumin e tyre historik. Ndërkohë, LSI-ja mori plot 225 mijë vota, që përbën kuotën maksimum të saj në zgjedhjet parlamentare.

Kështu, në vitin 2009, PD-ja dhe satelitët e saj tradicionalë (PR+PDIU+LZHK+PDK+PBDNJ+etj.) morën gjithsej 760 mijë vota, ndërsa LSI-ja vetëm 75 mijë vota.

Në vitin 2013, PD-ja dhe satelitët e saj tradicionalë (PR+PDIU+LZHK+PDK+PBDNJ+etj.) u tkurrën me 80 mijë vota, ndërsa LSI-ja u rrit me 105 mijë vota.

Në vitin 2017, PD-ja dhe satelitët e saj tradicionalë (PR+PDIU+LZHK+PDK+PBDNJ+etj.) zbritën në pikën më të ulët (535 mijë vota), ndërsa LSI-ja kapi pikën e saj më të lartë (225 mijë vota).

Grafiku shoqërues e ilustron qartë këtë korelacion elektoral: Kur bie PD etj., rritet LSI, dhe anasjelltas.

Ç’do të bëjë PD-ja pas shkarkimit të Metës?

Nga Eduard Zaloshnja

PS-ja duket e vendosur t’i shkojë deri në fund shkarkimit të Metës nga posti i Presidentit të Republikës. Hapin e parë po e hedh sot me krijimine komisionit hetimor për 9 shkeljet e kushtetutës, që, sipas saj, ka kryer Meta. Hapi i dytë do të jetë votimi në senacë plenare për shkarkimin e tij (rezoluta kundër Metës mori 100 vota nga 93 që duhen për shkakrkimin e presidentit). Ndërsa hapi përfundimtar do të jetë ai i përzgjedhjes së disa anëtarëve të gjykatës kushtetuese, për të krijuar kuormin e mjaftueshëm për certifikimin e shkakrimit.

Gjasat janë që të gjithë këta hapa të përmbyllen para 13 tetorit (datës që ka ridekretuar Meta për zgjedhje lokale), në mënyrë që PS-ja t’i përgjigjet kërkesës së Departamentit të Shtetit dhe Bashkimit Europian për konfirmim të ligjishmërisë së votimit të 30 qershorit në gjykatën kushtetuese, para asaj date. Argumenti që do të përdorë PS-ja do të jetë se presidenti u shkakrkua pikërisht se deshte të anullonte zhvillimin e votimit në 30 qershor, datë që e kishte dekretuar vetë më parë, bazuar në kushtetutë e kod elektoral.

Në qoftë se ngjarjet ndjekin këtë kurs, hapi tjetër i PS-së do të jetë ai i zgjedhjes së presidentit të ri. Dhe kë do të propozojë PS-ja?

Dy ditë para 30 qershorit, Rama ishte i ftuar në emisionin RealStory të Sokol Ballës. Një nga panelistët i tha Ramës se me shkakrimin e Metës, do të instalohej një socialist edhe në presidencë. “Kush tha që presidenti i ri do të jetë socialist?” ishte përgjijgia e menjëhershme e Ramës. “Ky përbën një lajm të madh,” tha panelisti, dhe vazhdoi të ngulmonte për të mësuar diçka më tepër për presidentin e ri “josocialist”. Por Rama kaloi në një temë tjetër…

Ato fjalë të Ramës të japin një ide fillestare mbi konturin e dialogut të tij me PD-në, aq shumë të kërkuar nga Departamenti i Shtetit dhe Bashkimi Europian. Duke i ofruar PD-së që të propozojë një kandidat për president, praktikisht Rama e bën atë pjesëmarrse në krijimin e gjykatave më të larta të vendit. Kjo, sepse presidenti ka të drejtën e emërimit të disa anëtarëve të tyre të përhershëm (aktualisht këto gjykata po të plotësohen me anëtarë të përkohshëm).

Në qoftë se dialogu fillon, kuptohet që emri i presidentit të ri nuk do të jetë çështja e vetme që do të diskutohet. Një sërë reformash, duke filluar nga ajo elektorale, do të diskutohen gjithashtu. Dhe ç’është më e rëndësishmja, do të diskutohet se kur do të zhvillohen zgjedhjet parlamentare e me ç’qeveri do të shkohet në to.

Por a do ta pranojë PD-ja dialogun me Edi Ramën pas shkarkimit të Metës?

Në qoftë se e pranon, praktikisht mbyllet bashkëpunimi i saj me LSI-në dhe do t’i duhet të garojë kundër koalicionit të PS-së vetëm me koalicionin e saj tradicional. Partitë e këtij koalicioni (PD, PR, PDIU, LZHK, PAA, PDK, PBDNJ, etj.) e kanë patur kuotën e vet më të lartë elektorale në vitin 2009, kur morën në total 760 mijë vota. Ndërsa partitë e koalicionit socialist (PS, PSD, PDS, etj.) e patën kuotën e tyre më të lartë në vitin 2017, kur morën 785 mijë vota. Këto kanë qenë dy vite kur PD-ja dhe PS-ja, përkatësisht, futeshin në zgjedhje pas një mandati qeverisës. Pas mandatit të dytë, PD-ja dhe satelitet e saj pësuan tkurrje, ndërsa PS-ja dhe satelitet e saj mbetet të shihen nëse do të pësojnë tkurrje, kur të zhvillohen zgjedhjet parlamentare të rradhës…

Në qoftë se PD-ja nuk e pranon dialogun me Ramën pas shkarkimit të Metës, praktikisht futet në kurs përfundimtar përplasje me Departamentin e Shtetit dhe Bashkimin Europian, duke e lënë veten jashtë çdo institucioni (nga presidenca deri tek bashkia më e vogël). Në këto kushte, trysnia perëndimore do të jetë jashtëzakonisht e lartë, që opozita të mos shkojë drejt dhunës (e pamë sa e fortë ishte kjo trysni para 30 qershorit).

Përvoja e sjelljes së 6000 trupave ushtarake në vitin 1997 (për të shmangur luftën civile) i ka bërë kanceleritë perëndimore shumë alergjike ndaj akteve të dhunës në Shqipëri (pavarsisht kush ka qenë në pushtet atje dhe këtu, të majtë apo të djathtë). Në shtator 1998, ato i dhanë ultimatum Berishës të tërhiqte të vetët nga institucionet që kishin pushtuar me antitanke e kallashnikovë. Ndërsa në janar 2011, i dhanë ultimatum Ramës që të mos vazhdonte me protesta të dhunshme. Pas atij ultimatum, ai marshoi me lule në dorë, vetëm disa ditë pasi garda e Berishës i kishte vrarë katër protestues me duar në xhepa në bulevard…

Në qoftë se Meta shkakrohet, PD-ja vërtet do të jetë para një udhëkryqi të vështirë…

Balliu tregon “forcën” e PD: Kemi mbështetje të madhe

Ish-deputeti i PD-së, Klevis Balliu ka folur në një studio televizive, duke deklaruar se nuk do të ketë marrëveshje me Edi Ramën. Balliu shton se Partia Demokratike ka mbështetje të madhe nga qytetarët, që sipas tij, do të duket në protestën e 8 korrikut përpara kryeminisrtisë.

“Ne nuk do bëjmë asnjë hap pas, kemi më shumë mbështetje që na jep forcë dhe energji të përballemi me strukturën kriminale të qeverisë”,- tha Balliu.

Balliu tregon se Rama, sipas tij, po kërkon marrëveshje për të shpëtuar kokën e tij, por marrëveshje me Ramën, thotë Klevis Balliu, nuk do ketë sa kohë ai do të jetë kryeministër.

“Ai do marrëveshje për të shpëtuar kokën e tij. Por, nuk ka dhe nuk do të ketë marrëveshje me të sa kohë që ai do të jetë kryeministër. Tek protesta e Unazës bëhet fjalë për një aferë për të cilën askush nuk mbajti përgjegjësi, nëse ndërhyn Rama mund të këtë përplasje të jashtëzakonshme. Ka një mënyrë që kjo të mos ndodhë, që ai të dëgjojë zërin qytetar. Këtë duhet të bëjë edhe për raste të tjera, të dëgjojë vullnetin e popullit sa nuk është vonë”,- u shpreh Balliu.

Rrëfimi i Sokol Olldashit: Si i vodhën zgjedhjet Berisha dhe Basha në PD

Në një situatë ku tensionet politike dhe akuzat për vjedhjen e votave janë në maksimum, gazeta tema ka risjell një deklaratë të të ndjerit Sokol Olldashi. Deklarata vjen pas momentit kur ai humbi zgjedhjet për kreun e Partisë Demokratike, që u fituan nga Lulzim Basha. Në atë kohë Olladashi u shpreh se përzgjedhja e kryetarit të ri të PD-së u bë përmes një procesi tërësisht të deformuar dhe se në asnjë çast nuk u qartësua procedura e përgatitjes së listave.

Ky prononcim merr vlerë në këtë situatë kur PD me në krye Lulzim Bashën akuzon qeverinë Rama për vjedhje të votave pas publikimit të përgjimeve të BILD. Përgjime që në fakt Basha i ka pasur që para marrëveshjes së 17 majit 2017 të bërë me kryeministrin Rama.

Pas humbjes së zgjedhjeve të 2013, Berisha dha formalisht dorëheqjen nga kreu i PD, për t’ia dorëzuar partinë Lulzim Bashës si një person i besuar nga familja. Basha ishte i vetmi nga figurat e PD, i cili gjatë përgjimeve, nuk kishte folur keq për Shkëlzenin dhe Argitën.

Por, për të emëruar Bashën në krye të PD, Berisha duhet të kalonte një pengesë të fortë. Ai ishte Sokol Olldashi, personi që përbënte rrezikun kryesor për Bashën e brishtë, i cili nuk kishte asnjë lidhje me bazën, por kishte hyrë në PD dhe kishte bërë karrierë si shok i Argitës.

Berisha dhe Basha u angazhuan në manipulimin e zgjedhjeve në PD, duke shpallur Bashën fitues përballë Olldashit. Manipulimi solli reagimin e fortë të Olldashit, në atë kohë i cili tha:

“Përzgjedhja e kryetarit të ri të PD-së u bë përmes një procesi tërësisht të deformuar. Në asnjë çast nuk u qartësua procedura e përgatitjes së listave dhe, për më tepër, në asnjë moment listat nuk u vunë në dispozicionin tim.

Do të thotë që në mënyrë anormale unë garova pa ditur se cili ishte korpusi i votuesve. Dita e votimit provoi se mijëra demokratë nuk gjetën emrat në listë, ndërsa mijëra të tjerë u anëtarësuan në listën e votuesve në dy javët e fundit. Shpresoj që pas votimit këta të anëtarësohen edhe në PD”.

Olldashi deklaroi se këshilltarët e Sali Berishës dhe shumë drejtues degësh bënë fushatë për Lulzim Bashën. “Procesi, për të cilin m’u dhanë të gjitha garancitë se do të ishte jashtë ndikimeve, në fakt nuk mbeti asnjë ditë i tillë. Në një mënyrë që dukej e sinkronizuar, këshilltarë, drejtues korporatash, kryetarë degësh u përfshinë në të, në mënyrë tërësisht të njëanshme, ndërkohë që, cilido që shfaqi parapëlqime të padëshiruara në favor tim, u pezullua, – gjë që ndodhi edhe me ndonjë kryetar lokal PD-je -, u përjashtua – siç ndodhi me anëtarë të PD-së në Shkodër e Korçë – apo u pushua nga puna, – siç ndodhi me drejtues rajonalë të korporatave në Sarandë apo Vlorë. Intimidimi u kurorëzua me fletën e numerizuar të votimit që e bënte lehtësisht të mundur identifikimin e votuesit. Nga ana tjetër, tensionimi i strukturave ishte tërësisht i panevojshëm”.

Në fund, Olldashi u dha një mesazh Berishës dhe Bashës. Ai tha se nuk do të largohej nga PD-ja. Kjo do të thoshte se Olldashi do të ishte përballë Bashës sa herë që Basha të humbte zgjedhjet.

Që nga ajo kohe, Basha ka humbur të gjitha zgjedhjet përballë Edi Ramës.

Në atë kohë Olldashi u shpreh:

“Unë i ftoj të gjithë demokratët që nuk janë ndjerë mirë me këtë proces, të kuptojnë se Partia Demokratike është një shtëpi e madhe, e ndërtuar me kontributin vullnetar të secilit prej nesh dhe, në një shtëpi të madhe, qëllon që edhe prishen rregullat apo humori.

Por, pavarësisht momenteve të tilla, ne mbetemi anëtarë të së njëjtës familje, edhe pas ndonjë nervozizmi apo pezmi. Unë mbetem i vendosur të përfaqësoj me gjithë energjitë e mia njerëzore dhe politike militantët e Partisë Demokratike në misionin për ta bërë Partinë Demokratike më të mirë. Unë mbetem i vendosur të përfaqësoj me gjithë energjitë e mia njerëzore dhe politike militantët e Partisë Demokratike, në misionin e tyre opozitar për t’u dhënë qytetarëve shqiptarë një kartë morale opozitare”.

Disa javë më vonë, Olldashi ndërroi jetë.

Shehaj tregon vijën e re: S’ka zgjedhje me… Arben Ahmetajn

Partia Demokratike është në çaste konfuzioni të plotë. Bojkoti i zgjedhjeve e nxori PD-në pa asnjë pushtet dhe tashmë është në kushtet kur brenda së djathtës kërkohet një proces ristrukturimi, duke përfshirë zgjedhjet për kryetar të PD-së. Megjithatë, të hënën më 8 korrik opozita do të mbajë protestën e dhjetë kombëtare, që zhvillohet në të njëjtën ditë kur vendoset dhe fati i Ilir Metës në Kuvend (ngrihet komisioni hetimor për shkarkimin e Presidentit).

Ish-deputeti i Partisë Demokratike Agron Shehaj ka shkruar në rrjetet sociale një koment, ku shprehet se i bindur se s`do të ketë kurrë marrëveshje me Edi Ramën. Sipas Shehajt, opozita nuk doli nga parlamenti për të rritur pazarin, apo për të marrë pushtet në tavolinë, por doli për zgjedhje të lira.

“S’do të ketë kurrë marrëveshje me Edi Ramën. Nuk dolëm nga parlamenti për të rritur pazarin, as për të marrë pushtetin në tavolinë, por sepse duam zgjedhje të lira dhe të ndershme. Me Edi Ramën në qeveri dhe po nuk u ndëshkuan ministrat e korruptuar si Ahmetaj, nuk mund të ketë zgjedhje të lira. Kthesa e vërtetë në Shqipëri mund të ndodhë vetëm nëse hetohet kryeministri, dhe nëse Rama dënohet, do jetë një leksion për të gjithë politikanët e ardhshëm”, shprehet Shehaj.

Në fakt, deri më sot, Shehaj është i pari zyrtar i lartë i PD-së që nuk flet për akuzat për përgjimet, por drejton gishtin nga ish-ministri Financave, Arben Ahmetaj, duke kërkuar hetim të tij. Duket si kundër rrymës por dhe konfuz, pasi flet për zgjedhje të lira dhe kërkon hetim për një ish-ministër, që nuk ka lidhje me përgjimet.

Hajdari: Bashës i ka dalë situata nga kontrolli, do ketë përplasje

Opozita do të protestojë në 8 korrik përpara godinës së Kryeministrisë, duke mbajtur kështu protestën e 10 kombëtare, që nisi prej 16 shkurtit të këtij viti. Ky ishte një nga vendimet që PD mori në Kolegjin e Kryetarëve të mërkurën më 3 korrik pasdite, ndërsa më herët është bërë i ditur vendimi se kryetarët e PD në bashkitë e vendit, nuk do të lirojnë karriget për të zgjedhurit e rinj të PS në 30 qershor. Kjo situatë, sipas Rudina Hajdarit, do të krijojë përplasje. Në një studio televizive, ajo u shpreh se Lulzim Bashës i ka dalë situata jashtë kontrollit, ndërsa theksoi se ai nuk është i aftë të gjejë një zgjidhje për këta kryetar bashkie që refuzojnë të largohen nga postet që kanë.

“Është një situatë që i ka dalë jashtë kontrollit. Kryetari i PD nuk është në gjendje të shikojë dhe të gjejë një zgjidhje për këta kryetar bashkie që refuzojnë të largohen nga zyrat e tyre. Mendoj se kjo do të sillte përplasje. E shikoj që kjo do ndodhë, sepse shumë njerëz të thjeshtë do të humbin vendet e punës, dhe këtë gjë nuk mund ta ndalojë dot asnjë njeri. Zgjedhjet dolën, u çertifikuan deri diku dhe do të ketë një zëvendësim të kryetarëve të bashkive, dhe detyrimisht këta që kanë qenë do zëvendësohen me të rinjtë që fituan në zgjedhjet e 30 qershorit. Unë e shikoj të pashmangshme. Është e kotë të themi që nuk i njohim këto zgjedhje. Nuk është në tagrin e këtyre kryebashkiakëve, nuk mund të bëjnë rolin e gangsterëve. Mendoj se zoti Basha ndodhet në situatë të vështirë”.

Opozita proteston më 8 korrik (ditën kur Parlamenti shkarkon Metën)

Opozita vendos të protestojë më 8 korrik në orën 20:00, në të njëjtën ditë kur parlamenti do të diskutojë ngritjen e një komisioni hetimor për shkarkimin e presidentit Meta.

Lajmin e ka dhënë Lulzim Basha, i cili pas mbledhjes së Kryesisë së PD-së, ka folur për mediat ku u bëri ftesë qytetarëve që të bashkohen në protestën e 8 korrikut përpara Kryeministrisë.

“Dua ti ftoj të gjithë këta qytetarë dinjitozë të Shqipërisë europiane, nëna e baballarë, të rinj e të reja, prindër e bijë nënash shqiptarë, të na bashkohen ditën e hënë në orën 20.00 në një protestë të madhe kombëtare për të qëndruar të bashkuar me mirënjohje të thellë, me besim tek vetvetja dhe tek njëri-tjetri dhe për të vazhduar të vendosur, pa asnjë hap pas betejën tonë për çmontimin e diktaturës, për demokracinë, për Kushtetutën, për lirinë, fëmijët, familjet tuaja dhe të ardhmen e Shqipërisë Europiane.
Të gjithë bashkë ditën e hënë në orën 20.00 në Tiranë”, tha Basha.

Më herët Basha u takua me kryebashkiakët në ikje të PD, të cilët deklaruan për mediat se nuk do i lirojnë zyrat e tyre. Pas takimit, kreu në ikje i Bashkisë së Mallakastrës, Agron Kapllanaj tha se gjatë takimit është diskutuar për një datë të re të protestave dhe shumë shpejt do të merret vesh. Ai shtoi se nuk i njeh votimet e 30 qershorit dhe se nuk do ta lirojë karrigen e tij për dikë që përfaqëson vetëm militantë të PS dhe jo popullin.

“Do ta lirojmë zyrën kur të vijë pasardhësi jonë i zgjedhur sipas ligjit. Kur të ketë zgjedhje jo votime, këto votime nuk i njohim. Ky është vendim i marrë, i bërë i ditur edhe nga opozita nga kryetari, ky është një vendim që e kemi shprehur disa herë këto janë zgjedhje farsë, nul nuk do të njihen. Do vazhdojmë të qëndrojmë në detyrën tonë. Nëse do të vijë të fitojë në zgjedhjet e tjera, ne do ta mirëpresim do t’i dorëzojmë shiritin sipas rregullave. Nuk mbaj me dhunë asnjë zyrë, por do t’i shërbejmë qytetarëve. Nuk është problemi nëse e kërkon Basha apo dikush tjetër, zgjedhjet janë nul, janë votime për partinë socialiste. Kandidati ka marrë 13 % të votave, aq janë vetë anëtarë të PS-së. ai është kryetari i militantëve të PS-së në atë zonë, nuk është i qytetarëve”, tha Kapllanaj

Kapllanaj tha gjithashtu se në takim u fol edhe për një aksion opozitar duke thënë se “është diskutuar data dhe shumë shpejt do të merret vesh.”

Në të njëjtën linjë ishte edhe kreu i Bashkisë Kamzës, Xhakal Miu në lidhje me lirimin e zyrës për të zgjedhurit e ri. Ai tha se për këtë nuk ka lidhje të vendos Lulzim Basha, pasi ai do të respektojë ligjin.

“Nuk ka lidhje Basha me lirimin e zyrës, ne do të respektojmë ligjin dhe kemi lexuar votat popullore. Nuk ka shanse të lirojmë zyrat, këto nuk janë zgjedhje. Zyrat i lirojmë nëse vjen një kryetar legjitim.” – tha Mziu.

Ndërsa kreu i Bashkisë Lezhës, Fran Frrokaj tha se do pritet një vendim unifikuar i opozitës për faktin se nëse do të lënë apo jo të hyjnë në bashki të zgjedhurit e 30 qershorit.

I bllokuan rrugën Ramës, lirohen kryetarët e degëve të PD

Gjykata e Apelit në Durrës ka ndryshuar masën e sigurisë për dy kryetarët e degëve të PD-së në Librazhd dhe Përrenjas dhe dy militantët nga “arrest me burg” në “detyrim paraqitje”. 4 protestuesit u arrestuan pasi goditën eskortën e kryeministrit Rama në tentativë për t’i bllokuar rrugën për mitingun që kishte programuar në Librazhd.

Më herët gjykata e Durrësit kishte vendosur burg për protestuesit, ndërsa gjykata e Apelit ndryshoi masën e sigurisë me detyrim paraqitje.

Apeli ka lënë të lirë kreun e degës së PD Librazhd, Bujar Vreto, kryetarin e degës së PD Përrenjas, Arjan Karriqi si dhe dy protestuesit Bujar Kojku dhe Dash Boja.

Rudina si Jozefina: Basha IK!

Zërit të ish-deputetes së PD-së, Jozefina Topalli, e cila kritikoi ashpër Bashën duke e cilësuar si një “eksperiment të pamerituar të PD-së” dhe kërkoi largimin e tij, i është bashkuar edhe Rudina Hajdari. Deputetja demokrate në parlament, Hajdari tha se shkatërrimi i partisë së djathtë, që nisi me djegien e mandateve dhe më pas me dhunën në rrugë dhe refuzimin për të marrë pjesë në zgjedhje, ishte trishtuese për vendin duke e lënë atë pa të drejtë zgjedhje. Por Hajdari shtoi se ndonjëherë gjërat duhet të dështojnë tërësisht në mënyrë që më pas të merret vendimi i duhur, me drejtuesit e duhur. Kjo në të lë të nënkuptosh se në fakt koha e Bashës ka mbaruar në drejtimin e PD, që sipas Hajdarit është shkaktari kryesor për dështimin e partisë së djathtë. Rudina Hajdari tha se është e nevojshme ringritja e Partisë Demokratike, larg dhunës dhe akteve që nuk i kanë hije një partie të tillë.

“Ndonjëherë duhet të dështosh tërësisht në diçka në mënyrë që të marrësh drejtimin e duhur. Mungesa e demokracisë brenda partive ka shkatërruar vijat ideologjike, duke e lënë vendin pa një të djathtë dhe me një autokrat. Çfarë do ndodhë nga sot e në vazhdim do jetë vendimtare për të djathtën. Ringritja e së djathtës klasike është e domosdoshme dhe teoria e ardhjes në pushtet me forcë duhet të marrë fund.” – shkruan Hajdari

Ndonjëherë duhet të dështosh tërësisht në diçka në mënyrë që të marrësh drejtimin e duhur. Mungesa e demokracisë brenda…
Gepostet von Rudina Hajdari am Montag, 1. Juli 2019