Nga Rama te Basha, si nisi shkolla për politikanët

Politikanët kanë nisur ditën e hënë me urimin për nisjen e vitit të ri shkollor. I pari që ka shpërndarë në facebook urimin e tij ka qenë presidenti Ilir Meta. Ai ka zgjedhur disa foto të vjetra me nxënësit, ndërsa bën të ditur se “dija është e domosdoshme për të përballuar dallgët e jetës”.

Meta: Dija është e domosdoshme për të përballuar dallgët e jetës

Ndër të tjera Presidenti Meta ka uruar edhe mësuesit duke u përcjellë mirënjohjet e tij për punën e palodhur. Po ashtu Meta u ka bërë thirrje të gjithë prindërve të fëmijëve që kanë braktisur shkollën që të rikthehen në institucionin e dijes. Sipas Metës investimi në dije është investimi më i sigurt për të ardhmen europiane.

“Sot ju hidhni hapin më të madh e më të rëndësishëm, suksesi i të cilit, do ju ndihmojë të fitoni garat e tjera të jetës. Me mësuesit, si udhërrëfyes e bashkëudhëtarë, jam i bindur se do të jeni një brez i ditur që do t’ja ndriçojë edhe më shumë emrin Shqipërisë. Uroj gjithashtu shumë suksese edhe për të gjithë nxënësit në këtë vit të ri shkollor, në përpjekjet e tyre për nxënien e dijeve të reja, aq të domosdoshme në përballimin e dallgëve të jetës. Mirënjohjen më të thellë për të gjithë mësuesit, që me punë të palodhur, përkushtim e sakrifica arsimojnë denjësisht brezat e rinj. Përmbushje me sukses të misionit tuaj fisnik të edukimit! Gjithashtu sot është dita për t’ju bërë një thirrje edhe të gjithë familjarëve dhe fëmijëve, të cilët me apo pa arsye kanë braktisur shkollën, t’i rikthehen asaj sa më parë.

Prioriteti kryesor i një shoqërie, që ka besim tek e ardhmja plot sfida, është vetëm duke investuar në dije dhe arsim tek gjenerata më e re. Ky është investimi më i sigurtë për të ardhmen tonë europiane.

Vetëm kështu ne mund të rrisim shpresën dhe besimin se do t’i kapërcejmë me sukses sfidat e së ardhmes, në radhë të parë në interesin e fëmijëve tanë, të cilët janë drita e syve, shpirti dhe zemra e çdo familjeje shqiptare, dhe e shoqërisë sonë”, shkruan Meta.

Rama: Do të ndërtojmë shkolla të reja

Ndërsa kryeministri Rama e nisi ditën e parë të shkollës në shkollën e re të “Servete Maçi” në Tiranë ku përveç urimit bëri të ditur se deri më tani janë 200 shkolla të rikonstruktuara nga qeveria ndërkohë që premtoi ndërtimin e disa shkollave të reja.

Ndër të tjera Rama është ndalur tek librat falas për fëmijët nga klasa e parë në të pestën. Ai ka thënë se vitin tjetër do të punohet që të ofrohen libra falas edhe për klasën e 6 dhe të 7.

“E rëndësishme të thuhet se përtej infrastrukturës që po transformohet numërojmë afro 200 shkolla të rindërtuara. Do të shtohen të tjera në vijim. Do t’i çojmë përpara me një ambicie te re të rindërtimit dhe ndërtimit të shkollave. Të jenë një model i ri të shkollës të kësaj kohe që jetojmë. Kur infrastruktura është aty dhe logjistika është aty ajo që ka rëndësi është përmbajta e procesit. Kemi një sistem jashtë kthetrave të politikes, apo imponimeve të rryshfetit. Jo gjithçka është ‘flori’, kemi probleme.

Vitin e ardhshëm do përfshijmë klasën 6-7 tek lista e nxënësve që i përfitojnë librat falas. Më pas nga klasa e parë në të 9, librat do të jenë falas për të gjithë”, është shprehur Rama.

Veliaj: Mësimi me dy turne do të marrë fund

Kryebashkiaku Veliaj ka thënë se në vitin e ardhshëm ashtu siç janë ndërtuar në vitet e mëparshme që ai drejton bashkinë e Tiranës, do të ndërtohen edhe së paku 17 shkolla të tjera të cilat do t’i japin fund mësimit me dy turne në shkollat e Tiranës.

“Çdo shtator hapet një shkollë e re. Do të hapen 17 shkolla të tjera. Do t’i japim fund dy turneve. Ka qenë ideja e Edit që thoshte dil nga korniza. Dhe ne e bëmë këtë. Është dizenjuar nga studentë të sapodiplomuar. Mirënjohje të veçantë , por jo vetëm me ata që kanë bërë punën fizike, por edhe të tjerët që kanë kontribuar”, është shprehur Veliaj.

Basha uron nga facebook: Një e ardhme më e mirë do vijë për Shqipërinë

Kryetari i Partisë Demokratike Lulzim Basha zgjodhi facebook-un për të uruar nxënësit për vitin e ri shkollor. Ndër rreshta nuk ka lënë pas edhe politikën, kur thotë se një e ardhme më e mirë do të vijë për Shqipërinë, dhe do të jetë e afërt.

“Të dashur nxënës, prindër dhe mësues, ju uroj nga zemra vit shkollor të mbarë dhe të ndriçuar nga drita e dijes! Lulet që mbajnë sot vogëlushët në duar janë simboli i shpresës dhe besimit tek një e ardhme më e mirë për të gjithë fëmijët e Shqipërisë, që nuk do të vonojë!”, shkruan Basha në facebook.

Ruçi në Fier: Arsimi profesional nxit punësimin e të rinjve

Kryetari i Kuvendit, Gramoz Ruçi i uroi nxënësit nga shkolla “Petro Sota” në Fier ku vuri theksin tek arsimi profesional.

Ruçi tha se duket t’i kushtohet më shumë rëndësi arsimit profesional, pasi ai nxit punësimit më shpejt të të rinjve.

“Numri i nxënësve që ndjekin arsimin profesional është disa -fishuar gjatë viteve të fundit. Gjithashtu, të diplomuarit e arsimit profesional janë gati dyfishuar krahasuar me vitin 2013.

Arritjet në sistemin arsimor duhet t’i krahasojmë me ndikimin në shoqëri, në tregun e punës, në të ardhurat dhe në nivelin e jetesës së qytetarëve. Në këtë kontekst, duhet të reflektojmë, të nxjerrim përfundime, të gjejmë rrugëzgjidhje për dy çështje themelore të tregut të punës dhe sistemit të mirëqenies: Nivelin e papunësisë rinore dhe hendekun gjinor në paga, pra pagat më të ulëta të grave e vajzave.

Megjithë përmirësimet në shkollimin profesional dhe arritjet në tregun e punës, papunësia rinore është ende rreth dy herë më e lartë se papunësia e popullsisë së rritur. Kjo ndodh për shumë arsye. Por unë shfrytëzoj këtë ditë për të bërë apel për më shumë burime dhe investime për formimin dhe arsimin profesional, të cilin duhet ta shndërrojmë në një destinacion të pëlqyeshëm dhe të preferuar të rinisë”, është shprehur Ruçi

“Merkel kërkon “peshqit” e mëdhenj për negociatat”

Në ditët e fundit të qershorit, kryeministri Rama në të paktën dy fjalime të tij deklaroi se: dhënia e provës nga Shqipëria se sistemi i drejtësisë funksionon në vend, do të jetë edhe baza e hapjes së negociatave për vendin në BE.

Duket se po ndodh pikërisht ky paralajmërim i tij, që ndryshe do të thotë se Merkel dhe BE kërkojnë të shohin politikanë me pranga në duar.

Realstory.al njoftoi në qershor, referuar burimeve diplomatike se Shqipëria ka një kusht për hapjen e negociatave në muajin tetor. Dhe kjo është ngritja e prokurorisë speciale të hetimit të krimeve të korrupsionit SPAK, si dhe rezultatet e para konkrete të saj. Megjithëse burimet frenohen ta pohojnë, plotësisht, ata kanë lënë të kuptohet qartë për realstory.al se kjo përkthehet me arrestime konkrete kokash të mëdha. Vetë Rama në parlament iu referua modelit Sanader, ose ajo qe i ndodhi Kroacisë në vitin 2010, kur arrestoi për korrupsion kryeministrin që firmosi për Zagrebin, anëtarësimin në Bashkimin Europian. Anëtarësim që ndodhi vetëm pas dënimit të tij, në vitin 2013.

Pikërisht kështu shkruan edhe avokati Spartak Ngjela, pas takimit të Ramës me Merkel.

“Shqipëria sot është në të njëjtën situatë me Kroacinë e disa viteve më parë, kur Berlini dhe Brukseli i vendosën si kusht anëtarësimi, arrestimin e kryeministrit kroat Ivo Sanader”, shkruan Ngjela ndërsa i thekson gjithnjë e më shumë kushtit që Shqipëria duhet të përmbushë, të arrestojë “peshq” të mëdhenj.

“Kancelarja gjermane, Merkel, ka kërkuar që të hapen negociatat e Shqipërisë me Bashkimin Europian, por me një kusht dhe me afat kohor. Rama ishte në takim me të… Por ajo e drejtoi në Bundeshtag. Pse?

Hapja ose çelja e negociatave me BE, do të ndodhë me kusht. Cili është kushti? Rama nuk e thotë. Fakti që nuk e thotë, kuptohet se kushti është likuidimi ligjor i të korruptuarve të mëdhenj, madje, dhe me afat.

Shqipëria sot është në të njëjtën situatë me Kroacinë e disa viteve më parë, kur Berlini dhe Brukseli i vendosën si kusht anëtarësimi, arrestimin e kryeministrit kroat Ivo Sanader. Ky është kushti themelor edhe për Shqipërinë: arrestimi i të korruptuarve të mëdhenj. Por këtu, likuidimi i të korruptuarve do të vijë mes organeve të SPAK-ut, të cilin e drejtojnë ndërkombëtarët.

Politika shqiptare sot është nën shtypjen e dy trysnive të mëdha: njëra është presioni që i bëhet nga shqiptarët të cilët janë në ankthin e pranimit në Bashkimin Europian. Shqiptarët duan punë dhe një shtet që të jetë garant i jetës së tyre, sepse e dinë që sot nuk e kanë. Por e dinë dhe i njohin se shkaktarët e kësaj gjendjeje janë liderët e tyre, të gjithë të korruptuar. Prandaj e duan anëtarësimin në Bashkimin Europian, se e dinë që, struktura perëndimore e shtetit europian, do të likuidonte domosdoshmërisht të korruptuarit e mëdhenj”, shkruan Ngjela.

SPAK dhe BKH, dy strukturat që do të hetojnë dhe vënë para drejtësisë zyrtarët e lartë dhe politikanët e korruptuar janë drejt ngritjes dhe shumë shpejt është premtuar se do të kemi rezultate të dukshme. Madje Gent Ibrahimi kreu i KLP në një deklaratë për mediat pak javë më herët tha se SPAK mund ta nisë punën me dosjen e Adriatik Llallës, ish kryeprokurorit. Ndoshta mund të jetë ky peshku i madh në tavën që Shqipëria do t’i ofrojë BE-së./realstory.al

RAMA “KËRCËNON” SËRISH ME PRECEDENTIN SANADER: PROTESTA E PESHQVE TË MËDHENJ, KUNDËR REFORMËS.

RASTI “SANADER” DHE INTEGRIMI EUROPIAN

LLALLA “PESHKU” I PARË I SPAK, IBRAHIMI: DO HAPEN DOSJE TË VJETRA

Rama i vendosur për shkarkimin. “Meta çlirohet, të marrë drejtimin e opozitës”

Maxhoranca është e vendosur ta çojë deri në fund nismën për shkarkimin e Metës, nismë kjo që sipas Spiropalit do ta çlirojë Metën dhe do t’i japë atij mundësinë që të vendoset në krye të opozitës.

Megjithëse nuk ka qenë në seancën e së enjtes në Kuvend, kryeministri Rama ka reaguar në facebook në lidhje me dekretet e Metës që u rrëzuan në seancë nga maxhoranca. Rama shkruan se dekretet e Metës janë një katrahurë pa asnjë bazë ligjore që janë firmosur në kohë rekord nga Meta për të sulmuar qeverinë dhe që si qëllim kanë pasur vetëm vazhdimin e luftës së dështuar të opozitës.

“Koha rekord me të cilën Ilir Meta shqyrtoi, analizoi dhe vendosi për t’i kthyer ligjet në Kuvend flet për qëllimin e vërtetë të Ilir Metës. Të gjitha kthimet janë bërë pa asnjë bazë juridike dhe pa marrë parasysh interesin publik. Katrahurën me dekrete e zhdekrete e bën për të plotësuar dështimin e “miqve” të tij të luftës dhe që ngushëllimin e gjejnë tek Presidenca”, shkruan Rama teksa poston fjalimin e ministres së Shtetit për Marrëdhëniet me Parlamentin, Elisa Spiropali.

Ajo është treguar më e ashpër në fjalimin e saj, teksa hedh poshtë argumentet e Metës për kthimin mbrapsht të ligjeve në kuvend, duke thënë se Meta nuk është kujdesur në asnjë moment për interesin publik, as në rastin kur u hoqi shqiptarëve të drejtën të votojnë në 30 qershor duke anuluar datën e zgjedhjeve.

“Presidenti kthen në Kuvend çdo ligj. Sulmon nëpërmjet tastierës së tij dhe zëdhënësve qeverinë dhe parlamentin. Presidenca duhet ta dijë se kthimi i këtyre ligjeve është në kundërshtim me interesin publik. Rezervat materiale, janë vetëm të grupit A tek gruri dhe materialet e thjeshta, nuk e di pse Metës i shkon mendja menjëherë tek floriri, por këtë le ta shpjegojë Frojdi jo ne. Nevoja e ndryshimit të këtij ligji vjen nga eksperiencat e mëparshme. Gjatë kohës së emergjencave kemi pasur një vonesë të lëvrimit të mallrave.

Nuk ka rrezik për qamet financiar, se qamet fizik përmes tërmetit nuk ndodhi, por edhe për këtë presidenti të jetë sigurtë që nuk do të ndodhë. Si qingj u fsheh nga drejtësia pas cjapit legjendar të PD-së për një rrugë që i kishte e zeza me të bardhë abuzimet, por shpëtoi me një raport mjekësor. Që presidenti të kthejë në dekrete përvuajtjet hipokrite të opozitës së rrugës nuk i kishim menduar. Por ata nuk po ia dinë mundin që Presidenti po bën. Po presim të dëgjojmë kush do ta digjte parlamentin? Dështuan dhe vijojnë që të dështojnë, pasi nuk kanë asnjë alternativë. Komisioni Hetimor nuk do të shërbejë si mekanizëm ndëshkues për Presidentin, por si çlirues për Ilir Metën për t’u kthyer në krye të opozitës”, tha Spiropali.

Siç duket nuk ka asnjë ndryshim nga qëndrimi i PS-së. Maxhoranca është e vendosur ta çojë deri në fund nismën për shkarkimin e Metës nga posti i presidentit./realstory.al

ERTV Live😊:Koha rekord me të cilën Ilir Meta shqyrtoi, analizoi dhe vendosi për t’i kthyer ligjet në Kuvend flet për qëllimin e vërtetë të Ilir Metës. Katrahurën me dekrete e zhdekrete e bën për të plotësuar dështimin e miqve të tij të luftës dhe që ngushëllimin e gjejnë tek Presidenca. Flet ministrja e Shtetit për Marrëdhëniet me Parlamentin, Elisa Spiropali
Gepostet von Edi Rama am Donnerstag, 12. September 2019

Rama, “shuplakë” kryebashkiakëve: Të zgjidhin hallet e njerëzve

Në takimin me qytetarët që kanë gjetur zgjidhje përmes platformës “shqipëriaqëduam”, kryeministri Edi Rama, ka kritikuar deputetët dhe kryebashkiakët që të marrin si shembull këtë platformë për t’i zgjidhur hallet qytetarëve.

Sipas Ramës, kjo platformë duhet të shërbejë edhe për deputetët, kryetarët e bashkive dhe drejtorët në përgjithësi, të cilët sipas tij nuk kanë vepruar deri më tani për të ndihmuar qytetarët.

“E njëjta gjë ndodh edhe me zyrën time në Whatsapp, gjithkush që ka mundësi të veprojë për të ndihmuar duhet ta bëjë këtë gjë, deputetët kryetarët e bashkive drejtorët, shumica nuk e bëjnë. Por ajo që po ndodh edhe në rastin e deputetëve është që kanë filluar intensivisht të shfrytëzojnë platformën, duke e shfrytëzuar, dhe është platforma që lidh qytetarin me institucionin”, tha shefi i mazhorancës

Rama theksoi se platforma e bashkëqeverisjes nuk i lë qytetarët në baltë për shkak të procedurave burokratike, siç ndodhte më parë, por u jep zgjidhje atyre. “Mijëra letra në muaj nga qytetarët. Letrat mbeteshin rrugët dhe qytetarët nuk merrnin përgjigje. Kryeministria i delegonte tek ministritë. Ministritë i harronin në sirtarë dhe qytetari mbetej pa përgjigje. Sot nuk ka qytetar të shkruajë dhe të mos marrë përgjigje, jo natyrisht gjithmonë pozitive se ka raste kur kërkesa është e padrejtë”, tha Rama.

Ai gjithashtu tha se platforma për bashkëqeverisjen është një platformë që i mpin “buburrecat” dhe disa prej tyre i shtyp, duke nënkuptuar me “buburreca” të gjithë punonjësit e administratës, që nuk iu shërbejnë qytetarëve.

Nga platforma dixhitale për bashkëqeverisjen, janë me qindra qytetarë që kanë gjetur zgjidhje për problemet e tyre.

Kryemadhi del nga “ngujimi” i Bashës: Zgjedhje me Ramën…

Ndryshe nga Basha që vijon të thërrasë “Rama Ik”, Kryemadhi e LSI-së ka bërë lëvizjen e re duke dalë jashtë “ngujimit” demokrat dhe duke deklaruar se është e gatshme të futet në zgjedhje me ose pa Ramën Kryeministër.

Edhe më herët, siç ishte rasti i dekretit të Metës për zgjedhje në 13 tetor, LSI tregoi se mbante një qëndrim ndryshe nga PD, duke u treguar e gatshme të mbështesë presidentin dhe madje të dërgojë kërkesë në KQZ për t’u regjistruar në këto zgjedhje. Krejt ndryshe nga aleati i saj opozitar.

Ndërsa Basha vijon t’i shmanget garës dhe zgjedhjeve, Kryemadhi duket s’e e ka kuptuar gabimin e bojkotimit të 30 qershorit, dhe sheh se zgjidhja e krizës do të vijë nga përballja në zgjedhje me ose pa Ramën kryeministër.

“Ne si LSI nuk kushtëzojmë asnjëherë momentin e zgjedhjeve. Pse e themi nuk kushtëzojmë momentin e zgjedhjeve, sepse ne mendojmë që zgjedhjet janë i vetmi instrument që në një farë mënyre do të zhbëjë të gjithë këtë nyje të lidhur keqas, për shkak të mosfunksionimit të gjykatave, për shkak të mosfunksionimit të sistemit, të demokracisë. Ne duhet të përplasemi, ne duhet të luftojmë me bishën, sepse nëse nuk luftojmë me bishën nuk ka kush ta mundë bishën dhe në këtë rast, bisha është kapja e pushtetit nga kryeministri. Pavarësisht ligjëratës politike që ngre kryetari i PD-së dhe kryetari i opozitës që me një qeveri tranzitore dhe pa Ramën kryeministër, për ne si LSI mendojmë që është e domosdoshme përballja në zgjedhje e të gjithë opinionit publik. Në votimet e 30 qershorit, shqiptarët i dhanë një përgjigje jashtëzakonisht të madhe jo vetëm maxhorancës ku i thanë se e bojkotuan në 85% po i dhanë edhe një përgjegjësi shumë të madhe opozitës, ku i thanë që 85% e tyre iu përgjigjën aksionit politik të opozitës për të mos marrë pjesë në zgjedhjet moniste të Edi Ramës”, u shpreh Kryemadhi në një intervistë për News 24.

Për mungesën e dialogut të deritanishëm midis palëve, Kryemadhi bën fajtor kryeministrin Rama, i cili sipas saj, është kthyer në një kryeministër arrogant.

Nga ana tjetër Monika Kryemadhi ka folur edhe për reformën në drejtësi dhe sulmet e opozitës drejtuar saj ndërsa ka akuzuar Ramën për kapjen e kësaj reforme.

“SPAK nuk mund të përdoret kurrë si kamzhik për luftë politike, sepse sot luftën politike më të madhe e bëjnë qytetarët shqiptare. Çdo drejtësi politike do të bëjë hero çdo njeri që do të gjykohet për politikë. Dhe i vetmi gjykim sot janë qytetarët që të gjykojnë me votë. Kush do drejtësinë e vërtetë të shkojë në zgjedhje, të dalim të gjithë në mënyrë të barabartë t’iu japim shansin qytetarëve ai është gjyqi më i mirë për çdo politikan shqiptar. Gjyqi më i mirë sot për çdo politikan, janë zgjedhjet e lira dhe të ndershme, pastaj gjyq politik, gjyq mediatik, gjyq të pandershëm ka sa të duan. Në fund të fundit gjykimin tonë përfundimtar nuk na e bëjnë as politika, as ambasadat, as gjyqtarë, as prokurorë. E bën Zoti lart, për këtë të jeni të qetë”, vijoi më tej Kryemadhi.

Kryemadhi ka folur edhe për komisionin hetimor ndaj Metës ndërsa ka thënë se “Presidenti është një makineri politike që është shumë e vështirë për ta ndalur”.

LSI e Kryemadhit bojkotoi zgjedhjet e 30 qershorit, së bashku me aleatin e saj PD-në, të cilët vunë si kusht të panegociueshëm largimin e Ramës nga posti i kryeministrit. Por pasi zgjedhjet e 30 qershorit u zhvilluan dhe u njohën nga të gjithë, Kryemadhi ka ndryshuar qëndrim dhe mendon se tani e vetmja zgjidhje janë përballja në zgjedhje me ose pa Ramën kryeministër./realstory.al

Në prag të vizitës së Ramës, Gjermania jep sinjale pozitive për negociatat

Ministri i Jashtëm gjerman, Heiko Maas ka deklaruar se Shqipëria dhe Maqedonia kanë bërë progres në rrugën e reformave, ndaj dhe duhet të çelen negociatat me BE-në për këta dy shtete.

“Maqedonia e Veriut dhe Shqipëria kanë arritur progres. Ne duhet t’u ofrojmë perspektivë evropiane të besueshme këtyre vendeve dhe të fillojmë negociatat e anëtarësimit”, deklaroi Maas pas takimit me homologun kroat Gordan Grliç Radman në Berlin.

Maas shtoi se kjo çështje, jo vetëm që është diskutuar brenda qeverisë gjermane, por edhe po zhvillohen takime në Kuvendin Federal në lidhje me këtë çështje.

Maas rikujtoi se më 1 janar të vitit 2020 Kroacia merr presidencën e radhës së Bashkimit Europian, ndërsa Gjermania në gjysmën e dytë të vitit 2020, duke shtuar se është e rëndësishme që për këtë arsye, të dy vendet të koordinohen në lidhje me çështjet e BE-së.

Kjo deklaratë e ministrit të Jashtëm gjerman, vjen vetëm pak ditë para se kryeministri shqiptar, Edi Rama të zhvillojë një vizitë zyrtare në Gjermani ku në qendër të bisedimeve do të jetë pikërisht çelja e negociatave me BE-në.

Më herët, Deutsche Welle bazuar në burimet e saj në grupin parlamentar CDU/CSU, që i përket të djathtës gjermane, që drejtohet nga kancelarja Merkel, njoftoi se pritet të ketë një vendim pozitiv nga ana e Gjermanisë për çeljen e negociatave në tetor për Shqipërinë. Vendimi që Gjermania do të marrë për Shqipërinë është mjaft i rëndësishëm, dhe pritet të ndikojë edhe tek vendet e tjera skeptike, siç janë Franca dhe Holanda. Më 18 tetor Këshilli i Europës do të thotë fjalën e fundit në lidhje me çeljen ose jo të negociatave me Shqipërinë.

Reforma zgjedhore, të gjithë i tremben një marrëveshje Rama-Basha

Frika e një marrëveshje Basha-Rama për reformën zgjedhore, pa marrë parasysh kërkesat reale të partive të vogla për të ndryshuar sistemin ka rritur mosbesimin e LSI dhe aleatëve të tjerë të Partisë Demokratike. Pikërisht kjo frikë bën që LSI por edhe partitë e vogla aleate me PD, të këmbëngulin të jenë pjesë e mundshme e tryezës së dialogut. Disa ditë më parë Edmond Panariti i LSI por edhe kreu i PR, Fatmir Mediun e bën të qartë se nuk duhet të ketë më një pakt Rama-Basha, por në tryezën e dialogut për reformën zgjedhore duhet të ketë një përfaqësimin të gjerë të opozitës.

“Dialogu do të jetë si grup opozitar, përfaqësim të integruar të opozitës në bisedën me qeverinë për të gjetur një zgjidhje nga kjo krizë, në fakt jo me qeverinë, por me PS-në. Basha besoj se ka nxjerrë mësime nga një negociatë e ngushtë, që nuk i ngjante një kompromisi, por një pazari.”- ka thënë Panariti në një intervistë, ndërsa një qëndrim të tillë ka mbajtur edhe Kreu i Partisë Republikane, Fatmir Mediu, i cili kërkon që opozita të mos humbë kohë por të ulet me mazhorancën për të dhënë idetë e saj për reformën zgjedhore dhe atë në drejtësi. “Opozita nuk mund të hyjë në dialog, duke vendosur kushte. Unë e kam thënë me bindje se nuk ulemi me Edi Ramën, por do ulemi me Partinë Socialiste. Këtu duhet të marrë fund historia do ulet Basha me Ramën, këtu duhet të fillojë të ulet pozita dhe opozita, të cilët zgjedhin përfaqësuesit e tyre.” është shprehur Mediu.

Mirëpo kësaj frike përveç aleatëve të PD, e ka edhe opozita parlamentare, e cila disa herë është shprehur se nuk do të lejojë krijimin e një marrëveshje të re Rama-Basha për interesa të tyre personale. Më herët, ka qenë vetë Rudina Hajdari që iu tremb një marrëveshje të tillë duke deklaruar se, “ky marrëveshje e tretë do të ishte fundi i Bashës duke i dhënë pavdekshmërinë në pushtet Ramës”.

Mirëpo nga se lindi kjo frikë për një marrëveshje të re Rama-Basha? E gjitha nga një sinjal që dha Basha për shenja të mundshme dialogu kur foli për një platformë kombëtare mes palëve, ndonëse tentoi të thoshte se nuk ka marrëveshje me Ramën. Frika e arritjes së një marrëveshje mes dy partive të mëdha pa ndryshuar sistemin zgjedhor do të ishte fatale për partitë e vogla. Kërkesa themelore e të gjitha partive dhe grupeve politike për reformën zgjedhore është ndryshimi i sistemit zgjedhor, duke implementuar korrektimin kombëtar të votave. Ky propozim parashikon rritjen e përfaqësimin e partive të vogla në Parlament, duke dobësuar në të njëjtën kohë pozitat e dy partive të mëdha, PD-PS. Korrektimin kombëtar parashikon që votat e parive të vogla nuk shkojnë për të dy partitë e mëdha, por mblidhen në të gjitha zonat dhe prodhojnë mandat. Me sistemin aktual, nëse një parti ka vetëm një votë më pak se sa numri i domosdoshëm për të prodhuar një mandat, të gjitha votat shkojnë për partinë e madhe në koalicion ose për partinë që merr më shumë vota.

Megjithatë duket se partitë politike harrojnë rolin vendimtar të opozitës parlamente. Nëse ka sot një faktor real parlamentar që ka në dorë ndryshimet elektorale dhe kushtetuese, kjo është opozita parlamentare, votat e të cilës kanë vlerë në Kuvend. Opozita parlamentare është e vetmja që mund të ndalë një marrëveshje Rama-Basha dhe e përpjekja për ta injoruar atë mund të rezultojë një dështim.

Mbetet për tu parë se çfarë do të ndodh realisht me Reformën Zgjedhore dhe tryezën e mundshme të dialogut, ku Basha ende bën sikur nuk do të ulet në tryezë, ndërsa Rama është shprehur i gatshëm të pranojë çdo propozim që merr miratimin nga OSBE/ODIHR./ RealStory.al

Rama, komision me qytetarë për emërimin e 9 drejtorëve të rinj në Shkodër

Me vendosjen e 4 koordinatorëve të rinj të PS në qytetin verior të Shkodrës, grupi socialist ka vendosur të ngrejë edhe dy komisione, në të cilat do të bëhet përzgjedhja e drejtorëve të rinj, për të zëvendësuar të dorëhequrit disa ditë më herët.

Në përpjekje për të forcuar pozitat e veta në Shkodër por edhe për të përmirësuar imazhin e PS, pas dorëheqjes së kryebashkiakut të sapozgjedhur Valdrin Pjetri, njëherësh edhe koordinator politik në atë qytet, PS ka vendosur që njëri prej komisioneve të përbehet nga 13 qytetarë shkodranë, ndërsa komisioni tjetër do të përbehet nga 4 koordinatorët e rinj të qytetit, Senida Mesi, Luan Harusha, Arben Pellumbi dhe Musa Ulqini.

Komisionet do të merren me emërimin e drejtorëve të rinj të qarkut Shkodër, ndërsa një nga porositë e hershëm të kryeministrit Rama është zëvendësimi i tyre me gra, që mund do të japin kontributin dhe performancën e tyre më të mirë. Aktualisht janë dorëhequr 9 drejtorë të Drejtorive Rajonale, konkretisht:

Kadri Ymeri – Drejtor i DAR Shkodër

Mustaf Kraja – Drejtor i Bujqësisë Shkodër

Luan Heta – Drejtor i HEC Vau Dejës

Edmond Emini – Drejtor i Postës Shkodër ( Kryetar i PS Shkodër )

Agim Dardha – Drejtor Administrata e Zonave te Mbrojtura ne Shkodër

Astrit Beci – Drejtor i Shëndetit Publik Shkodër

Fuat Alibali – Drejtor i OST

Agim Shimaj -Drejtor i Hetimit Tatimor

Ardian Dajti – Drejtor i Spitalit të Shkodrës (e pakonfirmuar)

Futja e qytetarëve në vendimmarrje për emërimin e drejtorëve të rinj, emërimi i 4 koordinatorëve në qarkun e Shkodrës dhe vendosja e vetes si kryekoordinator i zonës së Veriut të Shqipërisë, duket se Rama ka qëllime edhe më të të mëdha për Shkodrën. Përveç përmirësimit të imazhit të PS në qytetin verior, ai kërkon ta kthejë Shkodrën majtas, një bastion i njohur historikisht si demokrat, por i braktisur prej tyre, pasi Basha pasi nuk u dha mundësi përfaqësimi në zgjedhjet e 30 qershorit.

PS FORCON POZITAT NË SHKODËR ME 4 KOORDINATORË

Rama jep 100 milionë lekë për zyrat e SPAK

Struktura që do të hetojë dhe luftojë korrupsionin në nivelet e larta të politikës, SPAK është në prag të ngritjes dhe për këtë arsye qeveria ka miratuar një fond prej 100 milionë lekësh të rinj që do të shërbejnë për akomodimin në zyra të anëtarëve të SPAK.

Mësohet se fondi shtesë është miratuar me propozimin e ministrit të Financave dhe Ekonomisë.

Bëhet fjalë për një fond prej 100 milion lekësh të rinj. Ky vendim ka hyrë në fuqi menjëherë dhe botohet në “Fletoren zyrtare”.

“Ministrisë së Brendshme, në buxhetin e miratuar për vitin 2019, në programin buxhetor “Planifikim, menaxhim dhe administrim”, në zërin “shpenzime kapitale”, i shtohet fondi prej 100 000 000 (njëqind milionë) lekësh, për përshtatjen e mjediseve të punës për Prokurorinë e Posaçme të Luftës kundër Korrupsionit dhe Krimit të Organizuar dhe Byronë Kombëtare të Hetimit si dhe për sigurimin e mjeteve e të pajisjeve të nevojshme për funksionimin e tyre”, shkruhet në vendimin e qeverisë.

Siç duket së shpejti SPAK do të nisë punën dhe para drejtësisë do të vihen zyrtarët dhe politikanët e korruptuar.

Takimi “100 minutësh” mes Ramës dhe zyrtarit të DASH

I dërguari i DASH në Tiranë ka mbyllur sagën e takimeve zyrtare në vendin tonë me kryeministrin e vendit, Edi Rama, me të cilin ka qëndruar për rreth 100 minuta, ndërsa tema e diskutimit, ashtu siç është përmendur edhe nga protagonistët e tjerë gjatë ditës mendohet se ka qenë forcimi i marrëdhënieve mes Shqipërisë dhe SHBA, reforma zgjedhore dhe reforma në drejtësi.

Takimi i kryeministrit Rama me drejtorin për Europën Qendrore e Jugore në Departamentin Amerikan të Shtetit, David Kostelancik u zhvillua në ambientet e Kryeministrisë, i cili nisi në orën 17:00, ku zyrtari amerikan ishte i shoqëruar me të ngarkuarën e SHBA në vendin tonë, Leyla Moses-Ones. Ata kanë biseduar me kryeministrin Rama për rreth 1 orë e 40 minuta.

Vizita e zyrtarit të lartë amerikan në vendin tonë vjen vetëm pak ditë pas delegimit të Palmer për Ballkanin Perëndimor, i cili u shpreh një ditë më herët se një nga çështjet e ngutshme për SHBA është hapja e negociatave për Shqipërinë dhe Maqedoninë e Veriut me BE.

Po ashtu, SHBA po investohet edhe kundër lobimit rus në Ballkanin Perëndimor, sidomos në Shqipëri, vend i njohur për përkrahjen amerikane, ndërsa një politikë e tillë kundër lobimit rus po ndiqet gjerësisht edhe nga vendet anëtare të BE. Gjithsesi zhvillimet akute për Shqipërinë mbeten reforma në drejtësi dhe hapja e negociatave, ndërsa kërkohet që në një kohë të shpejtë të realizohet edhe reforma zgjedhore.

ERDHI PËR INFLUENCËN RUSE, KOSTELANÇIK SHMANG METËN