Ikën nga Partizani, Skënder Gega: Largohem për arsye personale

Pak minuta, pasi klubi shpërndau deklaratën ku njoftonte largimin e trajnerit, Skënder Gega ka bërë një deklaratë personale, por të publikuar në faqen zyrtare të Partizanit. Ish-trajneri i të kuqve, që riktheu titullin kampion pas 26 vjetësh te Partizani, shprehet se motivet e largimit janë personale.

“Prej një viti pata nderin dhe privilegjin të drejtoj Partizanin, ekipin ku unë fillova dhe e mbylla karrierën si futbollist. Këtë sezon në krye të pankinës të ekipit Partizani ka qenë periudha më e bukur që unë kam përjetuar si trajner, e mbushur me plot emocione dhe kënaqësi. Mbas 26 vitesh ja arritëm të rikthejmë trofeun kaq të munguar. Për arsye personale kam vendosur të mos të jem më në krye të bankinës”, shprehet Gega.

Më pas, në mesazhin e tij, Skënder Gega shpreh falënderimin për drejtuesit e klubit, tifozët, lojtarët, median dhe gazetarët sportiv.

“Dua të falenderoj: Klubin Partizani, Presidentin Demi për besimin dhe mbështetjen e tij gjatë gjithë kohës. Drejtorin Olsi Rama për bashkëpunimin.Të gjithë stafin, ekipin për punën dhe mbështetjen, për kënaqësin që më dhuruan. Tifozët e mrekullueshem të Partizanit për mbështetjen. Gjithashtu dua të falënderoj mediat dhe gazetarët sportiv. Ju uroj të gjithë kolegëve të mi trainer suksese! Me shume respekt Skënder Gega”, e mbyll mesazhin e tij ish-trajneri, që riktheu në Partizanin te titulli.

DEKLARATË E SKËNDER GEGËS PËR MEDIAT DHE OPINIONIN SPORTIVPrej një viti pata nderin dhe privilegjin të drejtoj…

Gepostet von FK Partizani Albania am Samstag, 1. Juni 2019

Fitoi titullin pas 26 vjetësh, Skënder Gega largohet nga Partizani

Skënder Gega nuk do të jetë më trajner i Partizanit. Lajmi i shpërndarë pasditen e së shtunës në media, është konfirmuar zyrtarisht nga klubi i Kuq, që në mbrëmje ka shpërndarë një komunikatë zyrtare.

“Klubi saktëson se për arsyet e tij personale, trajneri Gega ka vendosur të ndërpresë me mirkuptim kontratën mes dy palëve, për të mos vijuar të jetë në drejtimin e ekipit edhe në sezonin e ardhshëm. Presidenti Gazment Demi dhe Drejtori Olsi Rama dëshirojnë të falënderojnë trajnerin Skënder Gega, i cili pas suksesit si lojtar, arriti ti dhuroj klubit një tjetër trofe kampioni edhe si trajner i Partizanit. Klubi falënderon trajnerin Skënder Gega për emocionet dhe performancën e shkëlqyer që ekipi rregjistroi në drejtim e tij”, shkruan Partizani.

Në komunikatën e shpërndarë nga zyra e medias, klubi i Partizanit shpreh mirënjohjen për trajnerin Skënder Gega, pasi ky i fundit ka meritë të padiskutueshme për fitoren e titullit Kampion pas 26 vjetësh.

Klubi i Futbollit Partizani falenderon trajnerin Skënder Gega për arritjen e fitimit të titullit të 16 Kampion të Shqipërisë, i cili u rikthye në shtëpi pas 26 vitesh. Trajneri Gega ka një meritë të padiskutueshme në arritjen e këtij suksesi fantastik. Falë kontributit, punës, sakrificës, përkushtimit dhe disiplinës, Gega arriti të krijonte një grup triumfues, duke fituar respektin e lojtarëve, stafit drejtuesve dhe tifozëve të shumtë të Partizanit”, përfundon komunikata.

NJOFTIM PËR MEDIATKlubi i Futbollit Partizani falenderon trajnerin Skënder Gega për arritjen e fitimit të titullit të…

Gepostet von FK Partizani Albania am Samstag, 1. Juni 2019

Skënder Gega rrëfen të ardhmen!

Partizani është zyrtarisht Kampion i Shqipërisë për këtë sezon në Superligë, duke e marrë titullin në dorëzim sot pas ndeshjes me Kukësin, me takimin e luajtur në Selman Stërmasi. Pas ndeshjes, trajneri i kampionëve ka folur për mediat duke shprehur emocionet e triumfit, por njëkohësisht ka folur edhe për të ardhmen e tij te klubi i kuq.

E ardhmja…

Do përpiqem ti përmbahem kontratës. Çdo gjë që mund të ndodhi. Në klub gjithçka ka funksionuar siç duhet. Sot duhet të festoj. Është ditë e lumtur për mua. Vetëm klubi është ai që unë mund të merrem vesh. Nuk ka pasur deri tani oferta dhe nuk ka.

Kush ju ve më shumë në siklet, lojtarët që do largoni apo ata që do afroni?

Në një familje jo gjithmonë mund të përfundohet një projekt. Duhet të jemi të kujdesshëm që ai që vjen të bëjë diferencën. Jam i dashuruar mbas këtij grupi. Klubi ka projektet e veta dhe interesat e veta. Uroj që dikush të largohet për mirë dhe të bëj progres. Asgjë s’është konkrete. Do ulem me klubin me drejtorin dhe presidentin. Do bëjmë më të mirën për klubin. Vitin tjetër është dyfish më e vështirë për ne, sepse do luajmë si kampionë.

Kush të ka shijuar më shumë medalja sot apo ajo e fituar në 1987…

Ndeshja e fundit në derbi ka qenë gëzimi më i madh. 1987 ka shumë kohë, e mbaj mend si sot. Por si trajner jam lodhur më shumë. I jam mirënjohës çdo njeriu që ka bashkëpunuar me mua, tifozët, etj. Ka qenë emocion i jashtëzakonshëm. Sot doja të fitoja. Doja ta mbyllja me fitore. Për fat të mirë, gjithçka shkoi “fair-play”. I uroj Kukësit dhe çdo ekipi të Superiores një vit të mbarë dhe suksese. Sfida të gjata na presin. Duhet të sillemi më mirë, për të çuar mesazh të qartë që ky sport na lumturon. Të shohim diccka që është investim për brezat tonë.

A keni pasur ndonjëherë ndërhyrje gjatë këtij sezoni?

Jo për asnjë moment, në asnjë rast nuk kam pasur ndërhyrje. Për fat të mirë, kemi mbajtur pozicionin, kemi respektuar pozicionet tona. Në raste të veçanta është diskutuar si mund të bëhet më mirë. Ka pasur biseda, por jo për të krijuar presion. Në Shqipëri i kalojnë kompetencat, unë kam qenë me fat, nga hierarkia që kemi ka funksionuar gjithçka. Qëllimi është i mirë, dëshira është e mirë. Gjërat kanë shkuar ashtu siç tashmë e dimë.

Kush ka qenë periudha që keni vuajtur më shumë?

Humbja 1-3 ndaj Luftëtarit ishte një goditje e rëndë. Këto momente të bësh të dyshosh te puna dhe ajo që ke bërë. I gjetëm forcat, ky është sekreti .Kemi qenë konsant, kemi gabuar më pak se ekipet e tjera. Besoj se e meritojmë. Ka shkuar çdo gjë mirë.

Tirana e Kuqe për një ditë. Partizani superfestë për titullin Kampion

Titulli rikthehet zyrtarisht në kryeqytet, është i Partizanit, “Mbretit” të Superligës për këtë sezon. Një pritje e gjatë prej 26 vjetësh ka marrë fund sot pasdite, kur Presidenti i Federatës Shqiptare të Futbollit Armand Duka i ka dorëzuar trofeun e titullit kampion kapitenit të Partizanit.

Atmosferë elektrizuese në “Selman Stërmasi”, aty ku mijëra tifozë kanë derdhur lot gëzimi, ashtu sikundër edhe drejtuesit e klubit të kuq. Gjithçka ndodhi pas përfundimit të ndeshjes me Kukësin, me ndeshjen që u mbyll në barazim 1-1.

Në fakt u duke se Partizani do festonte me humbje në ndeshjen e parafundit të kampionatit, por arriti ta shmang disfatën, duke barazuar me Çinarin, pas golit të shënuar më herët nga Reginaldo.

Më pas është zhvilluar dhe ceremonia zyrtare e dorëzimit të titullit, ku kampionët kanë shpërthyer në lot gëzimi, të merituar pas një sezoni spektakolar, të dominuar nga fillimi deri në fund. Skënder Gega pas ndeshjes ka treguar edhe sekretin e suksesit të ekipit të tij.

“Humbja 1-3 ndaj Luftëtarit ishte një goditje e rëndë. Këto momente të bësh të dyshosh te puna dhe ajo që ke bërë. I gjetëm forcat, ky është sekreti .Kemi qenë konsant, kemi gabuar më pak se ekipet e tjera. Besoj se e meritojmë. Ka shkuar çdo gjë mirë”.

“Ndeshja e fundit në derbi ka qenë gëzimi më i madh. 1987 ka shumë kohë, e mbaj mend si sot. Por si trajner jam lodhur më shumë. I jam mirënjohës çdo njeriu që ka bashkëpunuar me mua, tifozët, etj. Ka qenë emocion i jashtëzakonshëm”.

Sot doja të fitoja. Doja ta mbyllja me fitore. Për fat të mirë, gjithçka shkoi “fair-play”. I uroj Kukësit dhe çdo ekipi të Superiores një vit të mbarë dhe suksese. Sfida të gjata na presin. Duhet të sillemi më mirë, për të çuar mesazh të qartë që ky sport na lumturon. Të shohim diccka që është investim për brezat tonë”.

I emocionuar dhe i lumtur njëkohësisht ka qenë dhe drejtori sportiv Olsi Rama, që ka dorën e tij në këtë sukses të Partizanit. “E kam ngritur një trofe në basketboll dhe ky është trofeu i dytë. Kënaqësi e veçantë, pasi kam kontribuuar me përulësi në shtëpinë e një mikut tim, për të ndihmuar në rikthimin e titullit te Partizani, pas shumë viteve”.

Partizani merr titullin nesër, Gega: Dua të dhurojmë spektakël ndaj Kukësit

Trajneri i Partizanit Skënder Gega ka folur një ditë para ndeshjes me Kukësin, duke prekur disa tema. Të dielën në “Sleman Stërmasi”, Partizani do të përballet me verilindorët në ndeshjen e parafundit të kampionatit, ku pas takimit do të zhvillohet dhe ceremonia e dhënies së titullit kampion nga FSHF-ja.

Skënder Gega ka folur fillimisht për Kukësin, duke u shprehur se nesër kërkon fitore, për ta mbyllur ndeshjen me emocione: “Kukësi ka qenë ndjekësi jonë konstant, asnjëherë para nesh, por ka qenë ndjekësi jonë. Ta mbyllim me një ndeshje që të krijon emocione dhe spektakël. Jemi përgatitur dhe e kemi vlerësuar, edhe pse ne e kemi siguruar trofeun. Do mundohemi të bëjmë më të mirën, me grupin më të fortë dhe t’i kënaqim tifozat ta mbyllim ashtu siç duhet”.

Gega tha se nesër do të ketë ndryshime në formacion, megjithëse la të kuptohet se titullar mund të jenë lojtarët që kanë luajtur gjithë sezonin dhe i kanë dhënë titullin kampion Partizanit.

Janë 11 veta, është 90 minutëshi i fundit, minimumi 3 do të jenë. Nuk e kemi vendos akoma se kush do të jetë, do të mundohemi të respektojmë atë grup që e kanë çuar Partizanin deri në fund, dhe në fund e meritojnë të luajnë ata që kanë bërë pjesëmarrjen më të madhe”.

Tre lojtarë të Partizanit janë grumbulluara paraprakisht në ekipin kombëtar, çka për Skënder Gegën kjo ka qenë një kënaqsi për të dhë vetë lojtarët. Ai shprehet se Telushi, Trashi dhe Mala do të bashkohen sot pasdite me Partizanin.

“Lojtarët bashkohen sot me ekipin, ikja e tyre në Kombëtare ka qenë një kënaqësi dhe një motivim për vetë ata, kështu kur kthehen i bashkohen grupit atëherë grupi është më i fortë dhe motivimi është vetvetiu. Nuk jemi me presionin e rezultati por me presionin e kënaqësisë dhe ta shijojmë ndeshjen 90 minuta. Jemi stërvitur me të njëjtin ritëm, jemi profesionistë dhe paguhemi për t’u stërvitur dhe për të treguar vlerat. Aq më tepër kundër Kukësit, ndeshjen e nesërme do e vlerësojmë në maksimum, sikur nuk e kemi marrë kupën”.

“Jam i kënaqur, besoj e kanë merituar. Janë shpërblyer. Është pozitive që trajneri i ka marrë, e rëndësishme është që të katërt kanë marrë frutat e punës, por edhe ne jemi të kënaqur ashtu si shokët e tyre. Është e drejta e çdo trajneri për të përzgjedhur, nuk e di listën përfundimtare. Duket që do t’i japë hakun secilit, shpresoj në të ardhmen jo vetëm Partizanit, njerëzit e meritojnë një shans”.

“Është përgjegjësi e trajnerit. Ne kemi lojtarë dhe shihet në fushë. E respektojmë trajnerin e Kombëtares, do të bëjmë përzgjedhjen më të mirë. Është e vështirë të futet çdo njeri. Uroj jo vetëm nga Partizani, por të ketë lojtarë të tjerë nga kampionati. Asani, Bardhi dhe Hebaj kanë të drejtën morale dhe dëshirën për t’u bashkuar, pastaj është zgjedhja e trajnerit të Kombëtares”.

Skënder Gega: Tani do provoj lojtarët me pak minuta!

Partizani është mundur nga Teuta këtë të shtunë në ndeshjen e javës së 34-ër të kampionatit. Mirëpo kjo gjë nuk e ka shqetësuar shumë trajnerin Skënder Gega, i cili pas ndeshjes ka folur për mikrofonin e “Supersport”, ku ka deklaruar se në këtë takim aktivizoi lojtarët në moshë të re. Fillimisht, Gega ka shprehur falenderimin për përshëndetjen që i bënë rivalët e Teutës për fitoren e kampionatit.

Për herë të parë një skuadër kampione përshëndetet nga kundërshtarët…

Gega: Surprizë e bukur, i falënderoj çunat e Teutës. Është risi në Shqipëri, dhe ndihem mirë dhe i respektuar.

Lojtarët pa minuta…

Gega: Kemi punuar që grupi që luajti pjesën e parë, t’i jepej mundësia e duhur. Aktivizuam edhe lojtarë me moshë të re. Jam i kënaqur me pjesën e parë. Patëm raste për të kaluar në avantazh. U goditëm te një vend ku ishte dikush me moshë të re. Ishte një ndeshje pa presion për të marrë maksimumin. Kjo nuk është për nënvlerësim të kampionatit, por qëllim kishim t’i jepnim minuta lojtarëve që s’kanë luajtur, edhe pa dalë nga formati ynë.

Partizani i ardhshëm…

Gega: Kjo është arsyeja, që këto ndeshje të jemi të kujdesshëm, kur të bëhet grupi final për në Champions dhe për të ardhmen. Nuk kemi krijuar presion te ta, për t’i ngarkuar me përgjegjësinë e rezultatit. Çdo ditë në stërvitje do jemi të saktë në përzgjedhje të largimeve, dhe afrimeve. Do doja që të respektoja sa më shumë këtë grup, por na del punë për të ardhmen.

Juvja dhe PSG janë kryqëzuar sepse nuk kanë respektuar garën, pasi janë shpallur kampion. Mund të kritikoheni ju sot?

Gega: Është e drejta e çdokujt për të më kritikuar, por unë jam i pari i kësaj shtëpie. Jam munduar t’i trajtoj të gjithë njësoj. Është pyetur pothuajse çdo javë, për lojtarë që nuk kanë marrë minuta. Por, unë tani do i provoj. Ne luajtëm kundër Teutës, deri pak më parë ka qenë pretendent. Është folur edhe si kandidate për titullin. Në Durrës këtu, kemi bërë një ndeshje jo brilante, por janë situata të ndryshme. Ne i vlerësojmë, por arsyeja pse luajti ky grup sot, është disniveli. Prandaj edhe nuk kanë pasur hapësira më parë.

Skënder Gega analizon Partizanin pas fitores së titullit!

Partizani është zyrtarisht Kampion i Shqipërisë për këtë sezon, me titullin që u sigurua matematikisht në ndeshjen derbi ndaj Tiranës. Trajneri Skënder Gega ka folur në konferencë për shtyp në prag të ndeshjes së radhës në kampionat, duke komentuar fillimisht çështjen e festës së titullit kampion.

“Çdo ditë po bëhet edhe më e vërtetë ajo që kemi arritur. Kishim emocione pas ndeshjes. Ndoshta dukej e pabesueshme. Sot jemi më të qetë dhe kemi punuar gjatë javës. Nuk ka mbaruar asgjë. Të shohim përpara. Kemi plane, kemi një ide që këtë javë të luajnë ata që nuk kanë pasur hapësira të luajnë. Kanë dhënë kontributin e tyre edhe ata. Impenjimi ka qenë maksimal, veç Alban Hoxhës që e kemi lënë pushim për shkak të probleme shëndetësore”.

Pavarësisht se titulli tashmë është çështje e kryer, Gega tregon se Partizani do të vijojë të luajë futboll njësoj edhe në ndeshjet e mbetura. Ndërsa gjatë fjalës së tij ka komentuar edhe të ardhmen personale te Partizani.

“Shkojmë në Durrës për të luajtur futboll, nuk kemi presionin e dështimit. Përfaqësojmë Partizanin dhe do luajmë me dinjitet. Fusha do tregojë kush e meriton fitoren”.

“Do ulem me presidentin dhe drejtorin dhe do flasim. Pa zbehur vlerat e askujt, do shikojmë të jemi të kujdesshëm që ata që nuk kanë pasur hapësira të luajnë. Nuk varet e ardhmja e tyre, duam t’u japim kënaqësinë e asaj qe kemi arritur. Nëse nuk kanë luajtur, do të thotë që ka pasur diferenca. Kualiteti është i pari. Ata që kanë luajtur më shumë kanë treguar se kanë qenë më të denjë”.

Gega mundohet të jetë i përmbajtur kur flet lër merkaton, duke shtuar se grupi aktual duhet të respektohet.

“Kur e kam nisur, baza ka qenë. Nuk ishte brilante, pasi kemi pasur probleme. Edhe Ibrahimi që u tha se ishte ne limite, u rrit dhe korrigjoi veten. Ndërhyrjet nuk do jenë drastike. Nuk është vetëm Championsi sezoni ynë, punojmë për të ardhmen. Nuk do tentojmë të bëjmë spektakël. Kemi nevojë për afrime, sikurse Reali dhe Barcelona”.

“Kam dëshirë që ky grup të respektohet. Po të ishte për mua, do i mbajmë të gjithë. Sezoni i ardhshëm do jetë ndryshe, do na presin si kampionë. Kam lexuar emra, por asnjë nuk është në lupën time apo të kemi bërë biseda. Nëse bashkohet dëshira dhe mundësitë, pse jo. Shitjet? Nëse një lojtar fiton titullin pas 26 vitesh dhe merr një ofertë shumë të mirë, do e mbështesja. Gjithsesi ka marrëveshje mes tij dhe klubit, janë të tjerë që drejtojnë”.

Në fund trajneri i Partizanit ka folur edhe për heroin e derbit dhe të titullit, Erald Çinari: “Nuk ka pasur asnjë problem. Është një garë që luajnë 11 deri në 14 lojtarë. Lojtarët kanë marrë pjesët e veta. Nëse te Vllaznia ka pasur hapësirë, është ndryshe këtu. Partizani nuk është Shkodra, që është në Kategorinë e Parë. Ka qenë 19 vjeç kur ka luajtur atje. Ka ardhur i mirëpritur”.

“Jemi të kënaqur për atë që ka bërë. I duruari i fituari. Gjërat nuk merren të shkëputura. Nuk ka as marrëveshje për minuta. Nëse bën më mirë se shoku, do luash nga fillimi. Për fat të mirë kushdo që ka luajtur ka bërë mirë”.

Gega: Ishte ëndrra që më solli këtu!

Skëder Gega do të futet në historinë e klubit të Partizanit, pasi është trajneri që e rikthen klubin e kuq te titulli pas 26 vjetësh. Pas ndeshjes derbi me Tiranën, ku Partizani fitoi jo vetëm takimin, por matematikisht u shpall kampion i Shqipërisë për këtë sezon, trajneri Gega u shpreh i kënaqur me rrugëtimin që ka bërë ekipi i tij këtë sezon.

“Ishte ëndrra që më solli këtu. Nuk kam qenë kurrë më krenar dhe i lumtur. Këtë sukses ja dedikoj çdo njeriu që më ka mbështetur, familjes, Demit dhe Ramës, djemve. Janë mijëra emra që mund t’i falënderoj. Jam i lumtur që ia dolëm”, u shpreh mes entuziazmit Gega.

 “Çelësi i suksesit? Është festë dhe nuk dua të flas për probleme. I jap meritë ekipit, klubit, mbështetësve, kolegëve e gazetarëve. Kur erdha ka pasur paragjykime pa dashje. Ndjej keqardhje. Sot jam i lumtur dhe i falënderoj të gjithë ata që më kanë besuar”.

“Nuk më besohet që jemi kampionë. Çdo minutë që kalon do më pëlqejë më tepër për lodhjen e sakrificën, për familjen që ka qëndruar larg meje. Kam shumë miq që kanë jetuar me shqetësimin pranë meje. Janë edhe miqtë. Kam merita bashkë me çunat, por Gaz Demi është njeriu që më dha kurajo në momentet më të vështira. Kur të jem më i qetë do ndaj gjërat e mira, jo të këqijat”,

Derbi me Tiranën, Gega: Ndeshje radhe, duam të festojmë nesër!

Skëndet Gega, i shoqëruar nga portieri Alban Hoxha, kanë folur në konfernecë për shtyp një ditë para ndeshjes derbi me Tiranën. Trajneri i të kuqve ka analizuar situatën në ekipin e tij, duke u shprehur se nesër do fitoren, për të festuar titullin kampion bashkë me tifozët që do të vijnë nga i gjithë vendi.

NDESHJA NESËR – Është ndeshje radhe, por tashmë ka ardhur fundi dhe shpresojmë t’ia dalim në derbi, për të mbyllur me sukses gjithë këtë rrugëtim të gjatë. Kemi luajtur 3 derbi, kemi marrë 7 pikë, ndaj nuk është ndonjë ndeshje që do ndonjë përgatitje të veçantë, skuadra e di vetë sa vlerë ka.

SITUATA TE TIRANA – Tirana e di vetë punën e vet, nuk është detyra jonë të analizojmë Tiranën. Është gjë e madhe që tifozët nuk kanë humbur shpresa, uroj t’i gëzojmë, sepse nuk na janë ndarë kurrë. Është një 90-minutësh ku nuk i dihet asgjëje, por kemi shpresën se do të mbushet stadiumi dhe do të festojmë të gjithë bashkë.

MUNGESAT – E vërtetë, na mungojnë 3 lojtarë me kontribut të jashtëzakonshëm, por për fat pjesa tjetër e ekipit ka treguar gjithnjë se di t’i zëvendësojë mungesat. Nesër është diçka tjetër, natyrisht, por e kemi përgatitur ashtu si dimë ne, me filozofi të njëjtë. Asani, Mensah e Telushi janë lojtarë të rëndësishëm, por do të mundohemi t’i zëvendësojmë.

FESTA E TITULLIT NË DERBI – Do doja të ishte ashtu, sepse jam i sigurt që do vijnë tifozë nga e gjithë Shqipëria. Jemi munduar të bëjmë maksimumin në çdo ndeshje, nesër është ndeshja jonë, jemi pritës dhe do ndizet stadiumi. Gjithsesi, ekipi është me këmbë në tokë, e di që kampionati nuk ka mbaruar, por do të bëjmë gjithçka për të festuar që nesër.

PARAGJYKIMET NËSE PARTIZANI MUNDET NË DERBI – Nuk i kemi ne në dorë. Vetëm Zoti nuk paragjykohet, njerëzit paragjykohen gjithmonë. E rëndësishme është ta kemi ndërgjegjen të pastër. Edhe në Champions League shohim surpriza të mëdha, uroj që të mos na ndodhë ne. Derbi është gjithnjë ndeshje e veçantë, ku renditja nuk ka rëndësi. Duam të jemi të qetë dhe të pastër në mendjen tonë, kaq.

MUNGESA E SHËNUESVE MË TË MIRË – Mungojnë shënuesit më të mirë, por pak rëndësi ka kush shënon, mund të shënojë edhe Alban Hoxha nesër, varet nga situata. Shpresoj të mbarojmë punë, nuk ka rëndësi, me penallti, me goditje këndi a ç’të dalë. Jam krenar për këtë ekip, për këtë klub, kemi luajtur Fair-play dhe kemi qenë seriozë gjithë sezonin.

TIRANA NËN PRESION – Nuk e di, unë uroj që presioni të jetë sa më i vogël te skuadra ime.

MERITA PËR TITULLIN Nëse e mbyllim sezonin me sukses, uroj të takohemi dhe të bëjmë një konferencë shumë të gjatë. Duhet të jemi modestë dhe me këmbë në tokë, duke respektuar të gjithë ata që kanë dhënë kontribut për Partizanin Gaz Demi e ka shpirtin e madh, një xhentëlmen, dhe jam i sigurt që nëse do vijë titulli nesër, torta do jetë e madhe dhe çdokush mund të marrë një fetë.

MEMA I FTUAR NË FESTË – Nuk kemi bërë ftesë për askënd, të mbarojmë ndeshjen një herë, pastaj festa do jetë e hapur për të gjithë ata që kanë dhënë kontribut te Partizani.

PEZULLIMI – Nuk ka qenë një problem, unë jam me ekipin deri në momentin që futen në fushë për ndeshjen. Skuadra e di mirë çfarë duhet të bëjë, e di çfarë jep në fushë dhe stafi im është i shkëlqyer, nuk kemi probleme.

E ARDHMJA E BELICËS – Kam lexuar për atë dhe Asanin, për sot janë të Partizanit, më pas nuk e di çfarë do të ndodhë. Të mbyllim kampionatin me sukses, kjo ka rëndësi, pastaj të shohim. Nuk kam propozuar asnjë futbollist deri tani, sinqerisht, sepse duam të fitojmë titullin, pastaj ka kohë për merkaton dhe janë normale të gjitha zërat. Të mbyllim sezonin dhe pastaj urgjentisht do merremi me merkaton.

Disiplina masakron Partizanin, Gega e Telushi humbin derbin!

Komisioni i Disiplinës ka qenë i ashpër në vendimarrjen e tij gjatë kësaj jave, në lidhje me ekipet e Superligës. Klubi më i ndëshkuar nga KDS është Partizani, pasi mesfushori Bruno Telushi është dënuar me katër ndeshje pezullim për sjellje të gabuar ndaj arbitrit. 2 ndeshje pezullim është dënimi disiplinor për trajnerin Skënder Gega, për të njëtën arsye.

“Lojtari i KF “Partizani”, Bruno Telushi, për sjellje jo sportive ndaj zyrtarit të ndeshjes, në bazë të Nenit 49/1/a të KDS, dënohet me 4 (katër) ndeshje pezullim nga aktivitetet.
“Zyrtari i KF “Partizani”, Skënder Gega, për protesta ndaj zyrtarit të ndeshjes, në bazë të Nenit 56/1/a të KDS, dënohet me 2 (dy) ndeshje pezullim nga aktivitetet”.

Dy klubet e tjera të Superligës, që kanë qenë objekt i Komisionit të Disiplinës, janë Tirana dhe Skënderbeu, që janë gjobitur përkatësisht me nga 100 mijë lekë, për sjelljen e gabuar të tifozëve.

“KF “Tirana”, për sjellje të gabuar të tifozëve, në bazë të Nenit 66/2 të KDS, dënohet gjobë në masën 100.000 (njëqindmijë) lek.
KF “Skënderbeu”, për sjellje të gabuar të tifozëve, në bazë të Nenit 66/1 të KDS, dënohet gjobë në masën 100.000 (njëqindmijë) lek”, thuhet në vendimet e Komisionit të Disiplinës për këto dy klube.

Në fund të vendimeve të tij, Komisioni i Disiplinës njofton dhe çeljen e një hetimi disiplinor për incidentin mes futbollistit të Flamurtarit, Idriz Batha dhe atij të Skënderbeut, Marko Radas: “Çeljen e hetimit disiplinor për incidentin midis lojtarit të FC “Flamurtari”, Idriz Batha dhe lojtarit të KF “Skënderbeu”, Marko Radas”.

Skip to toolbar