Vapa ndryshon orën dhe stadiumin. Kukësi-Tirana në Elbasan

Kryendeshja e javës së pestë të Superligës, që luhet një javë përpara derbit, ajo mes Kukësit dhe Tiranës, është vendosur të zhvillohet në stadiumin “Elbasan Arena”. Njoftimin e ka dhënë klubi i Kukësit me anë të një deklarate për shtyp, ku shkruan: “Ndeshja e Javës së Pestë për Kategorinë Superiore, FK Kukësi – KF Tirana, do të zhvillohet në stadiumin “Elbasan Arena”.

“Drejtuesit e Klubit tonë, në bashkëpunim me Federatën Shqiptare të Futbollit, kanë vendosur që këtë ndeshje mjaft të rëndësishme ta zhvendosin në Elbasan, pasi në stadiumin e Kamzës po punohet për të arritur standardet optimale. Ndryshe nga sa ishte planifikuar, përballja mes skuadrës nënkampione dhe asaj kryeqytetase do të zhvillohet në orën 19:00, pasi temperaturat parashikohen të jenë mjaft të larta”, thuhet në deklaratën e klubit verilindor.

Në fakt, ndeshja ishte parashikuar të luhej në orën 16:00 të pasdites, por për shkak të temperaturave të larta është vendosur të shtyhet orari. Tirana është aktualisht e vetme në krye të renditjes në Superligë me 10 pikë pas katër javësh kampionat, duke fituar tre nga katër takimet e luajtura dhe barazuar në vetëm një takim.

Gjithashtu, ekipi kryeqytetas ka shënuar 8 gola në katër ndeshje, ndërsa ka pësuar vetëm një. Ndaj, edhe në takimin e kësaj jave, bardheblutë do të synojnë një tjetër rezultat pozitiv përballë Kukësit që aktualisht ka 7 pikë dhe ndodhet në vendin e 3 të renditjes. Pas katër javësh kampionat, Kukësi ka dy fitore, një barazim dhe një humbje. Një javë pas Kukësit, Tirana pret në shtëpi Partizanin në ndeshjen e parë derbi për këtë sezon.

O’Tiron je “kampion”! Tre gola “ujqërve”

Tirana ka marrë fitoren e tretë në kampionat këtë sezon, duke mundur në shtëpi Skënderbeun me rezultatin 3-1. Ashtu siç pritej, 24 herë kampionët e vendit kanë tentuar që në fillim portën, por mbrojtja korçare është treguar e kujdesshme. Presionit të vendasve, skuadra e Skënderbeut i ka rezistuar deri në minutën e 45+2. Michael Ngoo ka kaluar Tiranën në avantazh. Kobina tenton rrjetën, por ndalet nga Koliçi i cili nuk kontrollon si duhet, dhe përfiton Ngoo që tund rrjetën. Ky gol bën që të shpërthejë festa në tribunat e “Selman Stërmasit”. Me nisjen e pjesës së dytë, Tirana mbetet në sulm, por Skënderbeu barazon në të 66`.

Një krosim i bukur i Gripshit shfrytëzohet në mënyrën e duhur nga Pollozhani, i cili realizon dhe vendos barazimin në fushë. Barazimi nuk e kënaq Ardi Memën, i cili i kërkon skuadrës të bëjë më shumë presion. Kështu, Skënderbeu dorëzohet në pesë minutat e fundit të ndeshjes. Në të 85` minutë, Grent Halili gjen rrjetën duke shënuar me kokë pas një asisti të Hoxhallarit. Pesë minuta më vonë, në të 90`, Hoxhallari përfiton nga një rrëmujë në zonë duke devijuar topin në rrjetë pas një goditje këndi.

Me fitoren e të shtunës, Tirana ngjitet në krye të renditjes me 10 pikë, ndërsa pas saj është Teuta me 8 pikë që parazoi me Vllazninë, me rezultatin 0-0. Në ndeshjen tjetër të kësaj jave, Luftëtari ka mundur Flramurtarin në “derbin” e jugut, pas një dygolëshi të Realdo Filit, që shënoi në minutën e 53 dhe 90`. Kështu, gjirokastritët ngjiten në vendin e tetë me 3 pikë, ndërsa Flamurtari në vendin e fundit pa asnjë pikë. Të dielën do të luhen dy sfidat e mbetura të javës së katërt të Superligës, Kukësi-Bylis dhe Laçi-Partizani.

Foto/ Shkodër, sulmohet autobusi i Tiranës, s`ka lojtarë të lënduar

Një ngjarje e rëndë ka ndodhur pas ndeshjes Vllaznia-Tirana, e vlefshme për javën e tretë të Superligës. Sipas asaj që raporton klubi bardheblu, pas përfundimit të ndeshjes, persona ende të paidentifikuar kanë sulmuar autobusin e lojtarëve të Tiranës.

“Pas ndeshjes është goditur autobusi i skuadrës me gur, dëme në xham, por për fat të mirë pa probleme për lojtrët dhe stafin”, ka shkruar shkurt në një komunikatë për mediat klubi i Tiranës.

Ngjarja e rëndë ka ardhur fill pas fitores së skuadrës bardheblu, që mundi në “Loro Boriçi” ekipin e Vllaznisë me rezultatin 2-0.

Ndërkohë, gjatë lojës ndeshja është ndërprerë dy herë, pasi tifozët e skuadrës shkodrane kanë hedhur shishe uji dhe sende të forta në fushë, pasi kanë pasur pakënaqësi me arbitrin e ndeshjes.

Gjithashtu, në përfundim të takimit disa tifozë kanë tentuar të futen në fushën e lojës, por nuk janë lejuar nga forcat e sigurisë. Mësohet se forcat e policisë kanë shkuar në vendin e ngjarjes, dhe kanë nisur hetimet për zbardhjen e këtij incidenti, që fatmirësisht nuk ka pasur pasoja në njerëz.

Tirana fiton ‘klasiken’ e Shqipërisë, tifozët e Vllaznisë kontestojnë gjykimin

Tirana ka fituar ‘klasiken’ e Shqipërisë, duke mundur 0-2 në Shkodër, Vllazninë. Një ndeshje plot emocione dhe episode, ku nuk mungoi spektakli, golat dhe padyshim tensioni në tribuna. Pjesa e parë e takimit është mbyllur në barazim 0-0, ku Tirana ka pasur më shumë raste për të shënuar, por pa arritur finalizimin e sakt. Megjithatë, me nisjen e pjesës së dytë lojtarët bardheblu janë më kërkues. Në minutën e 51- të lojës ka pasur një ndërprerje të ndeshjes për shkak të protestave të tifozëve shkodranë. Ata kanë hedhur shishe dhe sende të tjera në fushë, pasi nuk kanë qenë dakord me arbitrimin.

Megjithatë, situata u normalizua, ndërsa loja rinis. Pak minuta më vonë, në të 58`, Grent Halili gjen golin e parë duke shënuar nga breda zonës. Tifozët bardheblu shpërthejnë në festë së bashku me lojtarët, ndërsa ata të Vllaznisë, që kishin mbushur si rrallë herë “Loro Boriçin”, kanë heshtu. Dy minuta më vonë, sulmuesi shtatlart i bardhebluve, Michael Ngoo ka gjetur përsëri rrjetën për Tiranën duke vulosur shifrat e takimit në 0-2. Megjithatë, minutat e mbetura të lojës nuk kanë qenë aspak të qeta.

Ndeshja është ndërprerë përsëri afër fundit të lojës, pasi tifozët kanë hedhur drejt fushës shishe uji dhe sende të tjera, ndërsa është dashur ndërhyrja e lojtarëve të Vllaznisë të cilët u kanë kërkuar tifozëve të qetësohen. Deri në përfundim të takimit rezultati mbeti i pandryshuar, ndërsa Tirana e sheh veten në vendin e parë me 7 pikë pas 3 ndeshjesh, ndërsa lajmi pozitiv është dhe fakti që deri më tani nuk ka pësuar asnjë gol. Ndërkohë, në krahun tjetër edhe Teuta ka fituar me rezultatin e thellë 3-1 ndaj Luftëtarit, duke u ngjitur përkohëssisht në vendin e parë së bashku me Tiranën.

Traversa ndal Tiranën, shpëton Teutën, vendos paqe në “Selman Stërmasi”

Vrullin e javës së parë të kampionatit, ku fituan duke marrë tre pikë, Tirana dhe Teuta e kanë ndaluar në ndeshjen e javës së dytë. Takimi hapës i kësaj jave ka përfunduar në barazim pa gola në “Selman Stërmasi”, por rastet nuk munguan. Ndeshja nisi me ritëm të lartë. Bardheblutë janë më këmbngulës në aksionet e tyre, duke rrezikuar më shumë portën e kundërshtarëve.

Por përpjekjet e Halilit, Hasanit dhe Ngoo, do ndaleshin nga mbrojtja, portieri dhe traversat kundërshtare. Në pjesën parë episodi më i rëndësishëm ishte ai i ‘prozhektorëve’, të cilët u fikën pas një defekti në minutën e 20-të lojës, riparimi i të cilit zgjati të paktën 40 minuta, duke bërë që ndeshja të ndërpritet.

Pas këtij momenti, Tirana rikthet përsëri agresive duke tentuar portën, dhe rasti ideal është në minutën e 23 të takimit. Një gjuajtje dënimi e ekzekutuara nga Hoxhallari, bën që topi të shkojë në kufijtë e zonës fatale, por sfera nuk kalon brena rrjetës pasi largon Frashëri. Megjithatë, pas këtij rasti është Teuta që kërkon golin, por tentativat e saj gjejnë përgjigjen e mbrojtjes vendase.

Në pjesën e dytë të lojës, Tirana mund të kishte shënuar dy herë, nëse gjuajtjet e Ngoo dhe Hasanit nuk do të kishin përfunduar në tranversë. Megjithë përpjekjet e mëdha, deri në fund të takimit rrjetat e të dy ekipeve mbetën të paprekura. Pas ndeshjes së dytë, Tirana vijon të mbajë vendin e parë në renditje, në pritje të takimeve të radhës të Superligës që do të luhen të mërkurën.

Tirana ka 100 vjetorin, Mema: Të bëjmë më të mirën për festuar me titullin kampion

Tre ditë pasi mundi Luftëtarin 3-0 në ndeshjen hapëse të kampionatit, Tirana rikthehet përsëri në “Selman Stërmasi”, për të luajtur ndeshjen e radhës në Superligë. Të martën në orën 19:00 ekipi bardheblu do të përballet me Teutën, që gjithashtu e nisi me fitoren kampionatin këtë sezon. Trajneri Ardian Mema ka dalë në konferencë për shtyp një ditë para ndeshjes, ku është shprehur se ndeshja ndaj ekipit durrsak, do të jetë nga më të vështirat e sezonit.

“Nesër është një nga ndeshjet më të vështira, por unë besoj te ekipi. Kemi lojtar me kualitete, do të jetë ndeshje e fortë. Duhet ta menaxhojmë mirë, pasi nesër kemi testin real. E njëjta situatë është edhe për kundërshtarët. Ne do t’i përgjigjemi kalendarit, por është edhe periudhe e nxehtë”, ka thënë Mema.

Më tej ai ka folur për pritshmëritë që ka nga skuadra, duke u shprehur se Tirana do të fitojë një trofe këtë sezon, pse jo dhe titullin, duke pasur parasysh faktin që feston 100 vjetorin e krijimit si klub. “Tirana është mësuar me titullin edhe pse ka 10 vite pa titull. Tirana ka 100 vjetorin dhe për këtë duhet të bëjmë më të mirën, por nuk fitohet vetëm duke thënë se është 100-vjetori. Ndeshjet duhet të merren hap pas hapi”, ka thënë Mema.

Në fund ai ka folur dhe për formacionin dhe përzgjedhjen që ka bërë midis dy sulmuesve, Michael Nggo dhe Ismael Dunga. Sipas Memës, nuk do të ketë kurrë një formacion fiks, por do të shihet në varësi të ndeshjeve. “Formacioni nuk do të jetë gjithmonë i njëjti. Ndoshta Ngo dhe Dunga do t’i shohim gjatë sezonit, por Hasani është numri 10 dhe nga sezoni i kaluar, e vështirë ta ndërroj. Unë shpresoj që nesër të ketë edhe më shumë tifozë”, u shpreh trajneri bardheblu.

Andi Lila kthehet në Shqipëri pas 8 sezonesh, i bashkohet Tiranës

Andi Lila i jep fund pritjes. Mesfushori 33-vjeçar i ekipit tonë kombëtar, ka vendosur t`i bashkohet Tiranës. Pas disa javësh aludimesh dhe zërash merkato, me shumë klube të superiores që shfaqën interes, mesfushori ka vendosur të vijojë pjesën e mbetur të karrierës me ish-klubin e tij të mërpashëm, Tiranën. Marrëveshja mes Andi Lilës dhe Tiranës është gjetur këtë të hënë, teksa futbollisti ka takuar presidentin Refik Halili dhe ka shpërndarë lajmin në rrjetet sociale, por pa dhënë detaje për kontratën e re. Andi Lila rikthehet në kampionatin shqiptar pas 8 vitesh mungesë. Lila e ka nisur karrierën me të rinjtë e Besës në Kavajë, dhe më pas ka luajtur me ekipin e parë të Besës.

Në vitin 2006 ai luan për një sezon te Iraklis në Greqi dhe rikthehet përsëri te Besa, ku luan gjithashtu sezonin pasardhës. Në vitin 2008, andi Lila u bë pjesë e Tiranës, kua luajti deri në vitin 2011. Me ekipin bardheblu, Lila arriti formë të shkëlqyer, duke bërë hapin e madh të karrierës, pasi u transferua te PAS Giannina në Greqi. Te skuadra greke luajti deri në vitin 2015, ndërsa për gjysmë sezoni u huazua te Parma në Itali. Pas përfundimit të huazimit, Andi Lila u rikthye përsri të Giannina, ekip me të cilin luajti deri në maj të këtij viti, kohë kur i përfundoi dhe kontrata. Në garë për Andi Lilën ishin disa klube, por mes tyre, rivalitetin më të madh e shfaqën Kukësi dhe Tirana. Ekipi bardheblu tashmë ka zyrtarisht një tjetër përforcim, që do të jetë një garanci për mesfushën. Së fundi, Andi Lila ka krijuar dhe Sindikatën e Futbollistëve të Shqipërisë, duke u bërë kryetar i saj. Andi Lila është gjithashtu një nga lojtarët me më shumë ndeshje në ekipin tonë kombëtar, pasi numëron të paktën 70 prezenca me fanellën kuqezi

Për britanikët, Tirana në listën e qyteteve më të preferuara për pushime

As Parisi as Amsterdami, dy qytetet më të preferuara të turistëve janë Tirana dhe Lviv. Gazeta britanike “Standard” ka publikuar një artikull mbi qytetet më të lira për të pushuar në Europë, mes të cilave renditet edhe Tirana.

Bazuar në të dhënat e raportit të “Post Office Travel Money” dhe “Airbnb”, artikulli identifikon 10 qytete europiane, që sipas tyre, po shënojnë rritje të shpejtë të kërkesës nga turistët për akomodim. Raporti përfshin të dhënat për 12 muajt e fundit, dhe rendit në krye të listës qytetin Lviv në Ukrainë. Tirana pason vendin e dytë në këtë renditje, si një nga qytetet më të mira dhe më të lira për të pushuar në Europë.

Lista vijon me Katovicën në Poloni, Kosice në Sllokavi, Kaunas në Lituani, Antalja në Turqi, dhe Bari në Itali. Ndërsa, tre vendet e tjera që përmbyllin listën, janë: Moska në Rusi, Lisbona në Portugali, dhe Alkmaar në Holandë.

Sipas të dhënave të këtij raporti, Tirana është një destinacion i preferuar për turistët, pasi një fundjavë për dy persona në kryeqytetin shqiptar llogaritet të kushtojë në rreth 153.43 paund. Më poshtë lista me 10 qytetet më të preferuara dhe çmimet për dy persona për një fundjavë:

1. Lviv, Ukrainë – £137.42

2. Tiranë, Shqipëri – £153.43

3. Katovicë, Poloni – £191.72

4. Kosice, Sllovaki – £195.52

5. Kaunas, Lituani – £236.79

6. Antalja, Turqi – £245.57

7. Bari, Itali – £294.38

8. Moskë, Rusi – £336.26

9. Lisbonë, Portugali – £378.12

10. Alkmaar, Holandë – £409.69

Tirana kërkon 3 pikë në nisje, Mema: Presim ende përforcime

Ardian Mema u rikonfirmua në krye të Tiranës në fund të sezonit të kaluar, dhe pati mbështetjen e presidentit Refik Halili për të blerë çdo lojtar që donte. Tashmë klubi bardheblu nis një sezon të ri, pasi la pas një histori të vështirë me luftën për mbijetesë dhe problemet e liçensimit. Në konferencë për shtyp, një ditë para nisjes së kampionatit, Ardian Mema është dukur me këmbë në tokë, duke treguar se ndeshjet do t`i mari një e nga një.

“Duhet të fillojmë një kampionat agresiv, në pjesën e parë të kampionatit. Po ta shohësh, ekipet që kanë qenë agresive që në fillim, kanë shkuar edhe drejt titullit. Do i marrim ndeshjet hap pas hapi, dhe do shohim ecurinë e ekipit. E rëndësishme është që të kemi një fillim të mbarë, dhe jo si ka ndodhur në vitet e kaluara. Duke bërë një analizë të viteve kaluara, duhet të shohësh edhe ecurinë tënde, pritshmëritë që i kanë të gjithë. Shpresojmë dhe besojmë te ekipi, që do bëjmë hapa pozitivë”.

Ndaj Luftëtarit, trajneri i bardhebluve kërkon 3 pikë, ndërsa ka treguar se merkato për Tiranën ende nuk është mbyllur. “Për mua, rëndësi kanë 3 pikët. Me çdo skuadër, 3 pikët janë të vlefshme, si me Partizanin, Kukësin, Durrësin apo ndonjë tjetër. Janë 3 pikë në fund. Kjo na intereson, jo se si janë përgatitur ekipet e tjeram apo se çfarë problemesh kanë pasur. Nesër vjen Kristi Vangjeli. Jo më larg se dje, kam biseduar edhe me presidentin, për një lojtar tjetër me të cilin po negociohet në dijeninë time. Mund të mbyllet gjithçka që sot. Shpresoj që në ekip të vijnë lojtarë me cilësi, ato do bëjnë edhe diferencën si dhe për konkurrencën e ndershme. Do jetë pjesa ime, për të vendosur se kush do jetë i gatshëm për të luajtur në formacion”, ka thënë Mema.

Në ndeshjen e fundit miqësore atë ndaj Bylisit, edhe pse ndeshja u fitua me rezultatin 5-1, Ardian Mema beson se këto shifra nuk ishin reale. Sipas tij, Tirana u ‘shkun’ pas ndeshjes me Bylisin. “Ndaj Bylisit në miqësore ishte një ndeshje jo e mirë për ne, që na shkundi disi, për sa i përket lojës. Kemi bërë edhe lojëra të mira, por edhe pas miqësores së fituar 5-1 ndaj Bylisit, e thashë që rezultati nuk ishte real. Kjo na bën, që edhe kur luajmë keq, t’i thërrasim mendjes se si luajmë dhe përqendrimit. Ngelet për t’u parë në vazhdimësi, vera ka ato oshilacionet e veta. Stërvitjet jaën disi ndryshe nga kampionati. Aty përgatitet një cikël javor. Megjithatë, jo çdo miqësore duhet marrë parasysh, për të mirë apo për të keq. Duhen parë ku i ke ato pikat e dobëta. Duhet punuar dhe për t’i parë gjërat më ndryshe, që ta rrisësh ekipin”.

INSTAT: Tirana rekord lindjesh, në Berat rriten vdekjet

Instituti i Statistikave në vend ka publikuar këtë të mërkurë raportin demografik të lindjeve, vdekjeve dhe shtimit të popullësisë për tremujorin e dytë të vitit 2019. Sipas INSTAT, numri i lindjeve, për tremujorin e dytë 2019 rezulton 6.362, duke shënuar një rënie prej 5,7 %, krahasuar me tremujorin e dytë 2018. Numri i vdekjeve, për tremujorin e dytë 2019 rezulton 4.777, duke shënuar një rënie prej 5,7 %, krahasuar me tremujorin e dytë 2018. Gjatë tremujorit të dytë të 2019, numri i lindjeve tejkaloi me 1.585 numrin e vdekjeve. Shtesa natyrore e popullsisë, për tremujorin e dytë 2019 pasqyron një rënie prej 5,5 %, në krahasim me tremujorin e dytë 2018.

Në tremujorin e dytë të 2019, shtesa natyrore e popullsisë shënon vlerën më të lartë në qarkun e Tiranës, ku numri i lindjeve tejkalon me 969 numrin e vdekjeve. Në tremujorin e dytë 2019, shtesa natyrore regjistron vlerë negative në katër qarqe. Vlera më e ulët shënohet në qarkun e Korçës, ku numri i vdekjeve tejkalon me 93 numrin e lindjeve.

Lindjet

Numri më i madh i lindjeve, për tremujorin e dytë 2019 regjistrohet në qarkun e Tiranës, me 2.157 lindje, të cilat shënojnë rënie me 4,2 %, në krahasim me tremujorin e dytë 2018. Numri më i ulët i lindjeve, për tremujorin e dytë 2019 regjistrohet në qarkun e Gjirokastrës, me 111 lindje, duke patur një rënie prej 10,5 %, në krahasim me tremujorin e dytë 2018. Nëntë nga 12 qarqet e vendit pësuan rënie të numrit të lindjeve në tremujorin e dytë 2019, krahasuar me tremujorin e dytë 2018. Rëniet më të mëdha të lindjeve, gjatë kësaj periudhe e shënojnë qarqet Shkodër me 17,7 % dhe Fier me 15,0 %. Qarqet, të cilët kanë pësuar rritje të numrit të lindjeve janë Kukësi me 6,3 %, Elbasani me 5,7 % dhe Korça me 4,8 %.

Vdekjet

Gjatë tremujorit të dytë 2019, numri më i ulët i vdekjeve regjistrohet në qarkun e Kukësit, me 104 vdekje, me një rënie prej 23,0 %, në krahasim me tremujorin e dytë 2018. Nëntë nga 12 qarqet e vendit pësuan rënie të numrit të vdekjeve në tremujorit të dytë 2019, krahasuar me tremujorin e dytë 2018. Rënien më të madhe të vdekjeve, gjatë kësaj periudhe e shënon qarku i Kukësit me 23,0 % dhe Shkodrës me 16,3 %. Qarku i Korçës nuk ka patur ndryshime krahasuar me të njëjtin tremujor të vitit të mëparshëm, ndërsa qarqet të cilat kanë pësuar rritje të numrit të vdekjeve janë Berati me 16,5% dhe Tirana me 3,9 %.