“Reforma Zgjedhore s’do sjellë asgjë”, Manjani: S’kuptoj pse opozita mbron sistemin

“Reforma Zgjedhore që do të miratojnë palët me konsensus nuk prodhon asgjë por është diçka formale e cila thjesht sa do të shtyjë edhe zgjedhjet e ardhshme”. Kjo ishte deklarata e ish ministrit të Drejtësisë, Ylli Manjani në emisionin “Real Story” në News 24, i cili shtoi se partitë kryesore politike me atë tryezë, po kërkojnë të fitojnë kohë dhe se ajo tryezë konsensusi nuk do të sjellë asnjë ndryshim.

Manjani shprehet se nuk pret që së shpejti të ndodhin zgjedhje të parakohshme, por shfaq habinë e tij se pse opozita kërkon të mbrojë sistemin zgjedhor aktual, që më shumë kjo gjë i vlen PS-së.

‘’Unë besoj që në këtë kontekst vendi kishte për një rikthim, tensioni nuk është gjë e mirë. Partitë kryesore politike në vend nuk kërkojnë të fitojnë kohë. Nuk besoj që do të bëjnë një Reformë Zgjedhore për të lënë mend, është gjë formale, nuk do të zgjidhin votën e emigrantëve apo shit- blerjen e votës. Asgjë s’do bëhet domethënë. E kam bindje që në tërësi sistemi zgjedhor është i vjedhur dhe do të vendoset një arne t’i shtyjmë këto zgjedhje dhe palët vijojnë të njëjtat lojëra. Shkohet edhe deri tek faktet që Basha ka paguar rusët, Rama ka shkuar tek rusët pra disa përralla. Flitet për zgjedhjet të parakohshme për të cilat jam skeptik nëse nuk ka disa kushte. E kam thënë që për arsye rastësore por jo thelbësore. Rama nuk e di çfarë do të ndodhë pas dy muajsh. Nuk janë kushtet e Bundestag gjëja më kryesore dhe presion i madh për qeverinë. Nuk përjashtohet mundësia për ndonjë lëvizje surprizë. PS do ta mirëpriste sistemin më shumë se opozitë”, tha Manjani.

Kthimi i opozitës, mërzitet Manjani

Ylli Manjani, ish-ministër i Drejtësisë nga LSI, doli kundër vendimit të opozitës, që pranoi dialogun për Reformën Zgjedhore. Manjani, në një reagim në rrjetet sociale, shkruan se “opozita e bashkuar do marrë pjesë tek Reforma Zgjedhore, që do diskutohet në një hotel në Tiranë, ndërsa “opozita parlamentare” do të “votojë këto vendime të marra në hotel”, sipas Manjanit.

“Ata që hynë në parlament, pasi u konsultuan me “familjet” dhe “aleatët”, i bie të ripranohen në partitë nga të cilat u përjashtuan. Ata do miratojnë vendimet e marra në hotel. Jua pafshin hajrin e tua ndjejnë lezetin”, shkruan Manjani. Me këtë, ish-ministri i LSI, shigjeton opozitën, atë në parlament me deputetët që do të votojnë në Kuvend Kodin e ri Zgjedhor dhe atë jashtë parlamentit, që në fakt, do të jetë bashkë hartuese e Reformës Zgjedhore.

Ish-ministri, ashpërson gjuhën në rreshtat që pason, duke e konsideruar vendin në “kaos dhe agoni”, pavarësisht se në të njëjtën kohë që Manjani ka shkruar këto rreshta, CDU/CSU konfirmon të kundërtën në Gjermani, Shqipëria gati të hap negociatat me BE.

“Ky në fakt ishte dhe karremi që u hodh për të shtyrë kohën e agonisë dhe të kaosit që ka vendi i sunduar i gjithi nga një njeri i vetëm. Ndërkohë, insistoj se zgjedhjet nuk i shkatërroi Kodi Zgjedhor as mungesa e reformës zgjedhore. Zgjedhjet i shkatërroi qeveria, policia, Kolegji, KQZ dhe llogjika politike e sundimit të Rilindjes. Nejse, si ta kenë! Sa më takon, vijoj të mbështes nevojën ulëritëse që ka vendi për parlament pluralist dhe për rotacion politik. Për të tjerat, kismet!”, përfundon Manjani.

Manjani e Gjoni debatojnë në rrjetet sociale, nuk kursejnë sharjet ish kolegët e LSI!

“S`më rruhet fare” apo “ik pirdhu”, janë këto fjalët e përdorura nga ish-ministri i LSI Ylli Manjani, në drejtim të deputetit Ralf Gjoni, që mori mandatin nga radhët e LSI, pasi kjo e fundit u largua nga parlamenti duke djegur mandatet. Debati ka nisur dhe është zhvilluar në rrjetet sociale, në profilin në Facebook të Ylli Manjanit, i zili ka shkruar një status ku përmendte Ralf Gjonin, duke e cilësuar atë si një nga deputetët që do të përdor votën e tij në parlament për të shkarkuar Ilir Metën, pas nismës së PS për largimin nga posti të kreut të shtetit, pasi ky i fundit vendosi anulimin e dekretit për zgjedhjet lokale të 30 qershorit. “Asnjë surprizë nuk arrin të bëjë i gjori Ralf. Që në fillim e parashikuam se do marrë mandatin të shkarkojë Metën”, ka shkruar Manjani në Facebook.

Ralf Gjoni i është kthyer ish-ministrit të LSI-së, duke u shprehur se “ti duhet të kalosh përmes një procesi tërësor dezinfektimi përpara e të lakosh emrin tim në publik. Unë s`kam qenë ndonjëherë ministër e as nuk kam firmosur ndonjëherë për tendera”, i shkruan ndër të tjera Gjoni, Manjanit. Më tej, deputeti Gjoni vijon duke u shprehur se veprimtaria e tij në Parlament po bëhet që “njerëz si tij (Ylli Manjani) të mos mbeten më në mëshirën e Monikës, nëse të bën apo jo deputet, por të mbeten në në dëshirën e njerëzve që meritojnë të votojnë të lirë, me lista të hapura”, shkruan Ralf Gjoni. Duke treguar aryset pse u bashkua me LSI dhe Metën, Ralf Gjoni i shkruan në fund Ylli Manjanit, se Monikës dhe atij vetë, nuk ia mban të ndryshojë sistemin.

Më pas, Ylli Manjani ka replikuar duke përdorur një gjuhë përtej normales, të paktën për një ish-ministër dhe personalitet të drejtësisë, duke u shprehur me fjalë të tilla si “nuk më rruhet”, apo “pirdhu”.

“Si fillim ti dhe lakejt ku po shërben i kërkuat me qiri ato tenderat po su doli asnjëri i imi. Ndaj mundohu të mos hash vetem gazeta se nuk të bëjnë mire. Se dyti, hallet e tua me LSI mund tja thuash atyre dhe jo mua, se nuk më rruhet! Së treti nuk kisha ndërmend të lakoja emrin tënd, por tani që ma shtive ndërmend po e lakoj dhe e di si më del? Lake… Lake që po na bëke çmos të rregullosh sistemin zgjedhor! O pika sistemit e zgjedhjeve që do u rregullokan nga ty. Po ku ke haber nga sistemi ti mor aman?! Së katërti, ndryshimin e mendimit përpiqu ta shohqësh tek vetja. Vetëm me pak ditë ndryshove nga nuk marr mandat tek e mora mandatin… Së fundi, pirdhu megjithë atë terrenin tat, se hyre e dole kastravec. Nuk kuptove asgje. Sa për kryetarë, do të të duhet pak kohë të vish në nivelin tim të kritikës. T`ja kalosh mirë aty ku ha pilaf”, shkruan Manjani.