Kryeministri Edi Rama e ka nisur ditën me një video ku shihen pamjet e aksionit të Forcave tona Detare, që shpëtojnë 140 emigrantë sirianë, mes të cilëve 30 fëmijë. Aksioni i zhvilluar nga Forcat Detare Shqiptare, shpëtoi jetën e 140 personave në detin Egje, pasi mori alarmin SOS nga një mjet lundrues i huaj, që po transportonte emigrantë klandestinë.
“Mirmëngjëses, dhe me pamjet nga aksioni i Forcave tona Detare me mision në detin Egje ku falë ndërhyrjes së tyre në kohë, 140 emigrantë afganë e sirianë, 30 prej të cilëve fëmijë, kanë zbritur shëndoshë e mirë në tokë, ju uroj një ditë të mbarë. Që prej vitit 2016, kur Shqipëria u bë pjesë e misionit të NATO-s në detin Egje, janë mbi 2 mijë fëmijë, gra e burra të shpëtuar nga djemtë tanë të Forcës Detare”, shkruan Rama.
Ky është operacioni i tretë në pak ditë për shpëtimin e emigrantëve klandestinë që tentojnë të futen në vendet e Bashkimit Europian. Sipas Ministres së Mbrojtjes, Olta Xhaçka, anija “Oriku” dhe ekuipazhi i saj është përballur me një fluks të shtuar emigrantësh të paligjshëm gjatë patrullimit në detin Egje.