Policia e Durrësit ka marrë një denoncim nga një shtetas, i cili deklaron se një sasi e madhe parash i janë vjedhur nga kasaforta e shtëpisë.
Avokati Edmond Saliu ka deklaruar në polici se 350 milionë lekë i janë vjedhur nga kasaforta, që mbahej me çelës.
Policia ka nisur hetime, por dyshimet e para mendohet se vjedhja mund të jetë kryer nga anëtarë brenda familjes, pasi në banesë nuk ka asnjë thyerje të dyerve dhe dritareve apo hapje me forcë të tyre.
Mendohet se personat që kanë kryer vjedhjen kanë pasur edhe kopjen e çelësit të shtëpisë. Megjithatë policia vijon hetimet për zbardhjen e plotë të ngjarjes.
