Flamurtari udhëton drejt Korçës këtë fundjavë, ku do të luajë kundër Skënderbeut në sfidën e radhës në kampionat. Ashtu siç ka ndodhur në takimet e fundit, Ilir Daja nuk ka dalë përsëri në konferencë për shtyp një ditë para ndeshjes, por dy futbollistë i janë përgjigjur gazetarëve vlonjatë rreth takimit të nesërm. Mbrojtësi Franc Veliu ka folur së bashku me mesfushorin Argjend Mustafa.
I pari që u është përgjigjur pyetjeve të gazetarëve ka qenë mbrojtësi veteran i vlonjatëve, i cili është shprehur se ndaj Skënderbeut synon të përsëritet historia e nëntë viteve më parë, ku Franc Veliu shënote golin e fitores për Flamurtarin ndaj korçarëve.
“Me sa mbaj mend për ndeshje kampionati kemi kohë pa fituar, 9 vite. Shpresoj shumë që historia të përsëritet dhe të marrim një rezultat pozitiv. Skënderbeu është ekip cilësor, përtej luhatjeve, ndaj është ndeshje shumë e vështirë. Nuk është se shohim nga rivalët, shohim ecurinë tonë dhe rëndësi ka që po ecim mirë”.
“Për ne është një rival si gjithë të tjerët, besoj se do jetë një ndeshje e bukur. Frikë nuk e kemi pasur ndonjëherë Skënderbeun, pasi ndër vite kemi pasur bilanc pozitiv me ta. Nuk është Skënderbeu i viteve të fundit, por nuk e nënvlerësojmë në asnjë mënyrë. Shkojmë për gjithçka në Korçë, si në çdo ndeshje tjetër. Duam të luajmë mirë dhe të kënaqim tifozët, duke vijuar me ecurinë pozitive që kemi pasur deri tani”, u shpreh Veliu.
