Koordinatori i Lëvizjes Vetëvendosje në Kosovë, Arbër Zaimi u shpreh në “Real Story” të gazetarit Sokol Balla, se Albin Kurti i bëri thirrje për bashkëpunim LDK-së para zgjedhjeve, për të siguruara fitoren. “Prej një viti VV është duke i bërë ftesë LDK për qeverisje. Zgjedhjet priteshin. Ftesa ndaj LDK nuk do të thotë ndryshim qëndrimi, por një moderim. Asnjë politikan nuk i shtyn para idetë e veta në mënyrë të madhe. Ne kemi bërë thirrje për një bashkëpunim para elektoral me LDK. Kurti bëri dhe një letër, ku bëmë dhe një ofertë, që kandidatja e tyre të merrte numrin 1 në listë. Për të siguruar rezultatin e zgjedhjeve. Mendoj se kjo strategji i ka dhënë frytet e veta VV”, tha Zaimi.
Sipas Zaimit, suksesi i Vetëvendojses erdhi pasi Albin Kurti vendosi të hapte partinë, duke futur në listat e kandidatëve, emra që përfaqsojnë shtresa të ndryshme të shoqërisë. “Ne i kishim disa plane për të mbrritur te qeverisja. Është ajo që Kurti e tha, nuk mendoj se asnjë prej synimeve madhore mund të realizohen me mjete afatshkurtra. Albini, gjatë fushatës është shprehur se do të jetë kryeministër i gjithë qytetarëve të Kosovës. Baza elektorale e VV ka ardhur duke u rritur. Mendimet e veta ai nuk do i tregtojë, por do i negociojë. Hapja e VV për të krijuar një listë heterogjene, ka prodhuar këtë rritje në numër që i dha vendin e parë. Pra hapja për përfaqësim të shtresave të ndryshme të shoqërisë ishte çelësi i suksesit”, tha Zaimi.
Sipas tij, në programin e VV, bashkimi i Kosovës me Shqipërinë qëndron, por zbatimi i tij nuk i përket një plani afatshkurtër. “Bashkimi me Shqipërinë qëndron në programin e VV. Por nuk do të zbatohet direkt. Nuk besoj se kjo zgjidhet me referendum. Nëse ndodh, nuk ndodh duke cënuar paqen në rajon, duke thyer marrëdhëniet me partnerët strategjikë. Është një aspirat që nuk mund të harrohet. Duhet të thellohen marrëdhëniet Shqipëri-Kosovë”, tha Zaimi. /Realstory.al/
