Shërbimet ruse të sigurisë (FSB) kanë deklaruar se të dyshuarit që fshihen pas sulmit terrorist me të paktën 93 viktima në bashkinë e qytetit Crocus po tentonin të kalonin në Ukrainë.
“Pas sulmit terrorist, kriminelët synonin të kalonin kufirin e Federatës Ruse dhe Ukrainës dhe kishin kontakte përkatëse në anën ukrainase”, ka deklaruar FSB, sipas medias shtetërore TASS.
Komiteti hetimor i Rusisë ka raportuar se katër persona u arrestuan pranë kufirit me Ukrainën në rajonin Bryansk.
Ndërkohë Ukraina ka mohuar çdo përfshirje në sulmin terrorist në periferi të Moskës.
Shërbimi rus i sigurisë ka arrestuar 11 të dyshuar, duke përfshirë 4 prej terroristëve që qëndronjnë drejtpërdrejt pas sulmit.
“Drejtori i FSB-së i raportoi Putinit për ndalimin e 11 personave, përfshirë katër terroristë që morën pjesë në sulmin terrorist”, raporton TASS.
Nuk u dhanë detaje se kush janë të dyshuarit, nga mund të jenë apo si u ndaluan.
Ndërkohë dy prej terroristëve u kapën teksa tentuan të largoheshin me makinë në rajonin e Bryansk.
“Renault në të cilin po drejtonin të dyshuarit u zbulua natën në zonën e rajonit të Bryansk”, tha politikani rus Alexander Khinshtein.
“Makina nuk u ndal pas kërkesës së oficerëve të zbatimit të ligjit dhe u përpoq të largohej por gjatë ndjekjes, efektivët qëlluan drejt mjetit, i cili u përmbys,” shtoi ai.
Një i dyshuar u ndalua në vendin e ngjarjes, ndërsa tjetri u largua dhe u arrestua rreth orës lokale 03:50.
Ai tha gjithashtu se një pistoletë, një karikator municioni për një pushkë sulmi dhe pasaporta që u përkisnin shtetasve të Taxhikistanit u gjetën në makinë.
Rajoni i Bryansk ndodhet në kufirin rus me Ukrainën dhe Bjellorusinë.
