Pas përplasjes së efektivëve blu me disa banorë tek Unaza e Re, kanë mbetur të plagosur 4 policë.
Në një deklaratë për mediat policia ka thënë se efektivët janë plagosur pas goditjes me objekte të forta.
“Gjatë tubimit të paligjshëm zhvilluar sot në mesditë në aksin kryesor rrugor në zonën e Unazës së Re, një grup protestuesish kanë goditur me sende të forta duke plagosur 4 punonjës policie, 3 nga forcat “Shqiponja” dhe 1 nga FNSH. Efektivët e Policisë po marrin ndihmë mjekësore në Spitalin e Traumës në Tiranë dhe janë jashtë rrezikut për jetën. Në orët e pasdites policët e lënduar i vizitoi në spital Drejtori i Përgjithshëm i Policisë së Shtetit Ardi Veliu dhe drejtues të larte të PSH.
Policia e Shtetit nën drejtimin e Prokurorisë po vijon veprimet procedurale dhe hetimore për të përballur me drejtësinë, autorët e sulmit mbi forcat e rendit.” – thuhet në njoftimin e policisë
Ish-deputeti i Partisë Demokratike, Klevis Balliu është arrestuar paradite e sotme bashkë me 5 banorë të Astirit, të cilët u përplasën me policinë tek Unaza e Re.
Protestuesit po tentonin t’i bllokonin rrugën kryeministrit Rama, që po inspektonte një fabrikë në atë zonë.
Përplasjet me policinë kanë çuar në arrestimin e Balliut dhe 5 persona të tjerë. Balliut i është komunikuar masa e sigurisë “arrest me burg” për 3 akuza “kundërshtim me dhunë ndaj punonjësve të policisë”, “prishje e qetësisë publike” dhe “pengim i qarkullimit të mjeteve të transportit”.
Bashkë me Balliun është arrestuar dhe një banor tjetër i identifikuar si Elton Skënderi, ndërsa 4 personat e tjerë janë lënë të lirë.
Kreu i Grupit Parlamentar të LSI-së, Petrit Vasili është bërë pjesë e replikave me ministren e Arsimit lidhur me kërkesën për shkarkimin e Mynyr Konit.
Në një postim në “Facebook”, Vasili e ka akuzuar ministren se flet një shqipe të çalë dhe se reforma në arsimin e lartë ka futur në krizë të gjithë arsimin e lartë anë e mbanë vendit dhe jo një universitet të vetëm. Vasili e ka cilësuar Paktin për Universitetin një dështim të qeverisë dhe jo zgjidhje për krizën e arsimit të lartë në Shqipëri.
“Ministresha e Arsimit me shqipen e çale si logjika e saj, shpjegon pikëllimin e saj se presidenti nuk paska pranuar propozimin e saj për heqjen e nje rektori. Kujtesa e çale e Ministreshes ashtu si shqipja e saj nuk ndricon gjekundi, ndaj hajt ta ndihmojmë me sa mundemi: Manifestimet e studenteve u shtrine ane e mbane vendit ne te gjitha universitetet dhe jo ne nje universitet te vetem. Reforma ne arsimin e larte e refuzua dhe kundërshtua shume fort dhe pa asnje kompromis nga studentet ane e mbane vendit. Manifestimet e studenteve filluan perpara Ministrise se Arsimimit per dite e jave te tera dhe protestuesit vinin nga te gjithe universitetet ane e mbane vendit. Shkollepaku, qe ka mbi vete Ministresha perzuri edhe ministreshen e meparshme te arsimit nga detyra si pergjegjese per reformen e deshtuar kryq e themel dhe per nje thes me budalleqe qe tha per te mbrojtur deshtimin. Reforma ne arsimin e larte si nje turp i vertete ka futur ne krize te gjithe arsimin e larte ane e mbane vendit dhe jo nje universitet te vetem.” – shkruan Vasili
Një ditë pas vdekjes së efektives Zarife Hasanaj në Letoni, Ministrja e Mbrojtjes, Olta Xhaçka ka vizituar dy efektivët e kontingjentit EOD, që u plagosën nga shpërthimi i minës.
Sipas ministres Xhaçka major Klodian Tanushin ndodhet në gjendje të rënduar shëndetësore dhe është nën mbikëqyrjen intensive të mjekëve. Ndërsa gjendja shëndetësore e reshter Juliaj Kapajn është më e stabilizuar.
Nga shpërthimi i minës humbi jetën efektivja Zarife Hasanaj dhe ceremonia shtetërore e lamtumirës do të zhvillohet më 10 maj.
Policia zvicerane ka bërë të mundur shkatërrimin e një grupi kriminal shqiptarësh, të cilët merreshin me trafikimin e heroinës në disa pjesë të ndryshme të vendit. Policia arrestoi 14 persona pas një vit që mbaheshin nën hetim.
Grupi kriminal ishte aktiv në zonat e Fribourgut, Bernës, Vaudit dhe Gjenevës. Gjatë aksionit autoritetet sekuestruan 8.5 kg heroinë dhe rreth 10.5 kilogramë materiale prerëse (paracetamol dhe kafeinë), si dhe 50 000 franga (50.000 dollarë).
Droga po të dilte në treg kapte vlerën rreth 1 milion franga (1 milion dollarë).
Pas vendimit të Metës për të lënë në detyrë Mynyr Konin, ka pasur retorika edhe nga ministrja e Arsimit, Besa Shahini. Mirëpo Presidenca ka pasur një tjetër reagim duke sqaruar se ka bërë një arsyetim të gjatë ligjor se pse nuk mund të pranonte shkarkimin e Konit. Gjithashtu në reagim thuhet se MAS duhet të mbajë përgjegjësi për zbatimin e reformës në arsimin e lartë.
“Presidenti i Republikës, Sh.T.Z Ilir Meta në dekretin e tij për rrëzimin e propozimit për shkarkimin e rektorit të Universitetit të Tiranës, z.Mynyr Koni ka folur me argumenta ligjorë më gjatë se kurdoherë tjetër. Ministria e Arsimit duhet të mbajë përgjegjësinë e saj të plotë për zbatimin e Reformës në Arsimin e Lartë dhe nëse nuk është dakord me argumentat ligjorë të bëra publike nga Presidenti, të ndjekë procedurën që dikton ligji, përtej retorikave boshe.” -thuhet në reagimin e presidencës
Është zhvilluar sot mbledhja e parë e Komisionit Parlamentar të Reformës Zgjedhore, nën drejtimin e Damian Gjiknurit dhe Rudina Hajdari, pas arritjes së marrëveshjes në parlament.
Gjiknuri tha se bashkëpunimi do të sjlell një produkt më të mirë dhe zgjedhje më cilësore.
“Uroj të krijojmë një klimë të mirë bashkëpunimi. Bashkë kemi mundur, kur ishim në opozitë, të bisedojmë, të gjejmë marrëveshjet e duhura dhe të kalojmë reforma konsensuale. Zgjedhjet këtë vit kanë përmirësime. Me kimën e mirë të bashkëpunimin do kemi mundësi të kemi produktin më të mirë. Kërkoj mbështetjen e institucioneve ndërkombëtare dhe atyre që janë këtu për të na mbështetur qoftë me një kontribut modest. OSBE e ka deklaruar se është e gatshme të ofrojë asistencë, ne e mirëpresim. Presim dhe donatorët e tjerë për bashkëpunim dhe mbështetje”, tha Gjiknuri.
“Ndaj opinion të ndryshëm nga Gjiknuri, por kjo nuk do të thotë që nuk do bashkëpunojmë, pasi jemi këtu për një arsye të vetme, ndryshimi i sistemit politik.” tha Hajdari gjatë fjalës së saj. Ajo tha se zgjedhjet janë kthyer në shit-bjerje të votës dhe se opozita dhe pozita duhet të sigurohen që të krijojnë një sistem që nuk është i kapur nga partitë politike.
“Sistemi aktual është i dominuar nga anti-kushtetueshmëria, klasa politike nuk është e përfaqësuar nga njerëzit, por përfaqësohet në mënyrë të padrejtë në Kuvend. Shqiptarët janë të interesuar për këtë reformë. Kjo reformë kërkon vullnet të gjerë politik. Në këto tri dekada komisionet nuk kanë prodhuar reforma të mira. Duke marrë parasysh sfidën e madhe që kemi përpara, fakti që jemi ulur këtu tregon se ka një konsensus të gjerë për diskutim për ndryshimin aktual të sistemit. Zgjedhjet kanë qenë problematike dhe janë përdorur shumë nga partitë e mëdha, dhe sistemi aktual ka qenë gracka e kësaj, duke mos i dhënë prioritet popullit. Kemi arritur në një pikë ku një mandat kushton gati te 1 milion euro. Sot nuk mund të futesh në Kuvend pa pasur fond të caktuar. Tregu i zgjedhjeve është kthyer në treg të zi të shit-blerjes së votës. Ne do të bazohemi në tri pika kryesore. Ne duhet të gjejmë një sistem që nuk është i kapur nga partitë politike, që ua zvogëlon atyre mundësinë për të qenë pronarët e tyre dhe ju jep mundësi përfaqësuesve të jenë të zgjedhur nga populli. Zgjedhja e opozitës jashtë për të mos qenë pjesë e këtij komisioni nuk na pengon të garantojmë votën e lirë e të ndershme për të gjithë shqiptarët.” – deklaroi Hajdari
Gjatë 3 ditëve të fundit janë të shumtë personat që janë shtruar në spitalin e Bulqizës me simptomat e helmimit. Mjekët dyshuan se kjo gjendje ka ardhur si rezultat i ujit të pijshëm, duke detyruar edhe Institutin e Shëndetit Publik të kryente disa analiza të tij.
Nga përgjigja paraprake duket se uji nuk ka pasur ngarkesë mikrobiologjike apo ndotje mikrobiale.
Megjithatë ISHP është në pritje të rezultateve të plota edhe të gjendjes fiziko-kimike dhe toksikologjike të ujit.
“Përgjigja e analizave të para për ujin në Bulqizë. Në laboratorin e Institutit të Shëndetit Publik ka dalë rezultati i një prej analizave mikrobiologjike të ujit të pijshëm marrë në rrjetin ujësjellës, që dyshohet të ketë shkaktuar disa simptoma në banorët e ‘Lagjes së Vjetër’ në Bulqizë.
Përgjigja e mostrës së sjellë nga Shërbimi i Sëmundjeve Infektive, Njësina Vendore e Kujdesit Shëndetësor Bulqizë, në laboratorin e ISHP, ka dalë negative për ngarkesë mikrobiologjike, pra nuk ka ndotje mikrobiale. Për një përgjigje më të plotë për shkaktarin e simptomave tek qytetarët e Bulqizës duhet të presim rezultatet e tjera të analizave nga mostrat e marra nga grupi i ISHP në Bulqizë.
Nga ana e specialistëve të ISHP në zonën ku janë paraqitur më shumë raste, janë marrë mostra uji në rrjetin ujësjellës, këto mostra janë në proces analizimi për parametrat mikrobiologjik, fiziko-kimike dhe toksikologjike (metalet e rënda dhe pesticidet), këto analiza pritet të dalin në ditët në vijim.” – thuhet në deklaratën e ISHP
Në datë 6 maj 2019, në funksion të hetimit të procedimit penal Nr.173, të vitit 2018, Policia e Shtetit, nën drejtimin e Prokurorisë për Krimet e Rënda Tiranë, dhe në bashkëpunim me Agjenci të tjera ligjzbatuese në vend, në bashkëpunim të ngushtë mes Njësisë për Hetimin e Narkotikëve dhe Trafiqeve, në DHQ dhe Autoriteteve Policore Greke, Sektorin Antidrogë, Athinë, si dhe falë koordinimit nga Qendra për Zbatimin e Ligjit në Evropën Juglindore SELEC, Rumani, pas një hetimi pro-aktiv përgjatë një harku kohor 10 mujor, duke aplikuar metodat speciale të hetimit, dhe këmbim informacioni e korrespodence me agjenci ligjzbatuese brenda e jashtë vendit, u finalizua operacioni i koduar “Brezi i gjelbër”.
Në operacion u përshinë qindra Forcat e Njësive Operacionale, forcat policore FNSH si dhe ato të Drejtorive Vendore të Policive Vlorë, Gjirokastër, Fier, Tiranë, Elbasan, Korçë dhe Sarandë. Gjatë operacionit u goditën anëtarë të grupeve të strukturuara kriminale.
Gjatë fazës së hetimeve 10 mujore në bashkëpunim me autoritetet policore greke janë zhvilluar operacione në Shqipëri dhe në Greqi, konkretisht:
Rastet në Greqi:
Në datë 06.10.2018, në Igumenicë, u sekuestruan 76 kg lëndë narkotike të llojit Cannabis sativa, të trafikuara nga Shqipëria nëpërmjet kufirit të gjelbër dhe u arrestuan në flagrancë katër shtetas shqiptarë:
K. L., banues në Berat., A.K., banues në Sarandë, A. Z., banues në Berat dhe D.B., banues në Sarandë;
Më datë 06.12.2018 në rrugën Filiatis – Tamastas në Igumenicë, Greqi, u sekuestruan 76.7 kg lëndë narkotike të llojit Cannabis sativa, të trafikuara nga Shqipëria nëpërmjet kufirit të gjelbër;
Më datë 13.12.2018 në rrugën Tamastas në Igumenicë, Greqi, u sekuestruan 44.5 kg lëndë narkotike të llojit Cannabis sativa, të trafikuara nga Shqipëria nëpërmjet kufirit të gjelbër;
Më datë 23.12.2018 në Athinë, është sekuestruar sasi prej 34 kg lëndë narkotike të llojit Cannabis sativa, të trafikuara nga Shqipëria nëpërmjet kufirit të gjelbër dhe u arrestuan shtetasit grek S. P., banues në Greqi dhe D. P., lindur në Rumani dhe banues në Greqi;
Më datë 15.01.2019, në Smerto, Igumenicë, Greqi u sekuestrua sasia prej 35.1 kg lëndë narkotike të llojit Cannabis Sativa të eksportuara nga Shqipëria nëpërmjet kufirit të gjelbër dhe u arrestua shtetasja shqiptare K. M., banuese në Sarandë;
Më datë 21.01.2019 në Sajadhe, Igumenicë, Greqi u sekuestrua sasia prej 22.5 kg lëndë narkotike të llojit Cannabis Sativa, të trafikuara nga Shqipëria nëpërmjet kufirit të gjelbër dhe u arrestua shtetasia shqiptare L. R., banuese në Sarandë;
Më datë 05.02.2019 në Igumenicë, Greqi u sekuestrua sasia prej 21.1 kg lëndë narkotike të llojit Cannabis sativa, të trafikuara nga Shqipëria nëpërmjet kufirit të gjelbër dhe janë arrestuar shtetasit shqiptarë Xh. H., banues në Korçë dhe Xh. B., banues në Korçë.
Më datë 07.02.2019 në Athinë janë arrestuar shtetasit shqiptar dhe dy shtetas grekë: T. H., banues në Tiranë, A.B., banues në Tiranë, S. T., banues në Delvinë, D. Zh., banues në Delvinë dhe u sekuestruan 249 gr. kokainë, 59,5 gr. Cannabis Sativa, 31 gr. pluhur i bardhë i panjohur, 8 780 Euro, etj;
Në datë 05.02.2019 në Igumenicë, Greqi është arrestuar një shtetas shqiptar dhe një grek: A. T., lindur në Shkodër dhe banues në Greqi dhe S. K., banues në Greqi, si dhe u sekuestruan 32,4 kg Cannabis sativa;
Më datë 12.02.2019 në Athinë u arrestua shtetasja ruse, I. K., lindur në Rusi dhe banuese në Greqi, u sekuestruan 36 kg Cannabis Sativa;
Më datë 23.03.2019 në Igumenicë, Greqi u arrestua shtetasi grek P. D, banues në Greqi si dhe u sekuestruan 66 kg Cannabis sativa;
Rastet në Shqipëri:
Më datë 24.11.2018 në Sarandë u arrestuan 3 shtetas shqiptarë E. K., banues në Tepelenë, S. Ç., banues në Tepelenë, A. P., banues në Tepelenë, si dhe u sekuestrua sasia prej 32.3 kg Cannabis sativa;
Më datë 16.12.2018 në Durrës, u arrestuan 3 shtetasit A. C., banues në Tepelenë, E. K, banues në Tepelenë, M. A., banues në Durrës, si dhe u sekuestrua sasia prej 202 kg Cannabis Sativa;
Më datë 19.12.2018 në Fier u arrestua shtetasi K. Z., banues në Zall Herr, Tiranë, si dhe u sekuestrua sasia prej 20 kg Cannabis Sativa;
Më datë 26.03.2019 në Gostim, Cërrik u arrestuan 3 shtetas shqiptarë Xh. S., banues në Mallakastër, A. T., banues në Fier, J. S., banues në Mallakastër, si dhe u sekuestrua sasia prej 28,6 kg Cannabis Sativa.
Në kuadër të këtij hetimi u evidentua një rast i dyshuar korrupsioni në sistemin e drejtësisë. Në datë 24 janar 2019 u ndaluan shtetasit E. H., banues në Tiranë dhe E. D., banues në Përmet, si dhe u procedua masa e sigurimit personal “Detyrim për tu paraqitur në policinë gjyqësore” dhe “Pezullim i ushtrimit të detyrës publike” i shtetasit S. Ç., banues në Gjirokastër (Prokuror pranë Gjykatës së Shkallës së Parë Gjirokastër). Këta shtetas janë akuzuar për veprat penale “Korrupsion aktiv i gjyqtarit, prokurorit dhe i funksionarëve të tjerë të drejtësisë”, “Deklaratë e rreme përpara oficerit të policisë gjyqësore”.
Në kuadër të këtij hetimi u bashkëpunua me Prokurorinë e Rrethit Gjirokastër, dhe më datë 22 dhe 23 janar 2019 u goditën 6 anëtarë të grupeve të skeduara kriminale, shtetasit:
• I. K., banues në Tiranë;
• D. N., banues në Memaliaj;
• A. C., banues në Memaliaj;
• D. N., banues në Memaliaj;
• A. I., banues në Memaliaj;
• E.H., banues në Tiranë.
Këta shtetas janë akuzuar për veprat penale “Vjedhje me dhunë”, “Vjedhje me armë” në bashkëpunim.
Në vijim të këtij procedimi, në datë 6 maj 2019, në zbatim të vendimeve të Gjykatës së Shkallës së Parë të Krimeve të Rënda, janë ekzekutuar vendimet penale për caktim masash sigurimi “Arrest në burg” për 26 shtetas si dhe masat e sigurimit “Ndalimi i daljes jashtë shteti” dhe “Detyrimi për t`u paraqitur në policinë gjyqësore” për 2 shtetase.
Gjatë operacionit ku angazhuan qindra forca policie u kapën dhe u ndaluan 14 shtetas si dhe janë ushtruar rreth 30 kontrolle banesash dhe ambientesh të tjera.
Ekzekutimet e vendimeve janë bërë për të arrestuarit e mëposhtëm, të cilët akuzohen për veprat penale ”Prodhimi dhe shitja e narkotikëve”, ”Trafikim i narkotikëve”, “Grupi i strukturuar kriminal”, “Kryerja e veprave penale nga Organizata kriminale dhe grupi i strukturuar kriminal”, konkretisht:
• P. N., banues në Sarandë;
• M. J., banues në Sarandë;
• O. Y., banues në Sarandë;
• B.Y., banues në Vlorë;
• A. H., banues në Gjirokastër;
• E. Ll., banues në Fier;
• T. L., banues në Gjirokastër;
• E. Xh., banues në Sarandë;
• M. M., banues ne Tiranë;
• K. S., banues në Korçë;
• F. Ll., banues në Sarandë;
• A. Xh., banues në Sarandë;
• A. Zh., banues në Sarandë;
• D. Xh. banues në Gramsh.
U ekzekutuan 2 masa të sigurimit personal “Ndalimi i daljes jashtë shtetit” dhe “Detyrimi për tu paraqitur në policinë gjyqësore”, për shtetaset:
• J. J, banuese në Sarandë;
• S. H, banues në Kuçovë.
U ekzekutuan 4 masa të sigurimit personal “Arrest në burg”, për shtetasit e mëposhtëm, pasi në momentin e daljes së masave të sigurisë këta shtetas ndodhen të arrestuar në burg:
• K. Z., banues në Tiranë.
• E. H., banues në Tepelenë.
• D. N., banues Tepelenë.
• A. C., banues në Tepelenë.
Gjithashtu u shpallën në kërkim dhe 6 shtetas të tjerë.
Në tërësinë e këtij operacioni në mënyrë të përmbledhur janë arrestuar, ndaluar 61 shtetas shqiptar dhe të huaj.
Gjatë kontrolleve në operacionet e zhvilluara janë sekuestruar:
• mbi 1 ton lëndë narkotike Cannabis sativa;
• 1 kg 23 gr. lëndë narkotike heroinë e kokainë;
• sasi lëndë narkotike çokollatë;
• 10 peshore elektronike;
• sasi fishekësh luftarak;
• 78 telefona celularë;
• 25 automjete të ndryshme;
• sasi të konsiderueshme vlerash monetare si euro, dollarë dhe lekë.
Policia e Shtetit, nën drejtimin e Prokurorisë po vijon veprimet për të zbardhur rolin dhe aktivitetin e tyre apo personave të tjerë të lidhur me ta.
Ne i sigurojmë qytetarët se do të vazhdojmë të jemi të angazhuar për të garantuar qetësi, rend e siguri, duke goditur me ashpërsinë e forcës së ligjit çdo individ të përfshirë në aktivitet kriminal. Operacioni “Forca e Ligjit” vazhdon.
