Kreu i opozitës ka marrë në mbrojtje, Ervin Salianjin e dënuar nga Gjykata e Shkallës së Parë me një vit burg, gjatë takimit me grupin dhe kryesinë e Partisë Demokratike. Neës 24 raporton se në temat e nxehta janë kriza ekonomike, dënimi i deputeti Ervin Salianji, PPP-të dhe mbështetja e qeverisë ndaj oligarkëve. Po ashtu, Lulzim Basha ka folur edhe për paketën anti-shpifje, paketë kjo që përkundër kundërshtive të medias dhe gazetarëve kaloi dje në Kuvend, ndërsa zbatimi i saj pritet të nisë në janar të 2020.
“Gjendja ekonomike dhe kriza politike është rënduar pas dështimit të qeverisë për të menaxhuar pasojat e tërmetit dhe përpjekja kriminale për t’i mbyllur gojën mediave. Rama kërkon t’u mbyllë gojën mediave, duke i bërë presion kujtdo që hedh dritë mbi abuzimin dhe korrupsionin. Ervin Salianji mori dënim politik, sepse denoncoi përfshirjen në trafik droge të Ministrit të Brendshëm. Dënimi i Salianjit tregon se si po e përdor Rama drejtësinë. Edi Rama zgjati gjendjen e emergjencës, jo për t’u ardhur në ndihmë të qytetarëve, por për të justifikuar mungesën e vullnetit të tij për të plotësuar kushtet e vendosura nga Bundestagu, pa të cilat Shqipëria nuk avancon dot në rrugën”, ka deklaruar Basha.
Lideri i opozitës tha se PD-ja pas festave të fundvitit do të prezantojë propozimet e veta për reformën zgjedhore, ndërsa më pas do të kërkohet, që brenda muajit janar të miratohet reforma për t’i hapur rrugë mbajtjes së zgjedhjeve të lira dhe të ndershme.