Kryetari i PD-së, Lulzim Basha është tërhequr nga mbështetja e dekretit të presidentit Meta për zhvillimin e zgjedhjeve në 13 tetor (dekret ky antikushtetues dhe i rrëzuar nga Kolegji Zgjedhor). Aleatët e PD-së, si Mediu, Duka e Kryemadhi janë shprehur në mbështetje të propozimit të presidentit për 3 procese zgjedhore në 13 tetor, ndërsa Basha jo. Nga Korça ku ka zhvilluar një takim me strukturat e PD-së, në vazhdën e fushatës brenda partisë, (për të cilën realstory ka shkruar disa herë) Basha ka kërkuar zgjedhje të parakohshme parlamentare në të njejtën ditë me zgjedhjet vendore, pa përmendur zgjedhjet presidenciale dhe pa përmendur datën 13 tetor, të cilën Meta e kërkon me ngulm.
“30 qershori provoi se me Edi Ramën nuk ka dhe nuk mund të ketë një proces të lirë e të ndershëm zgjedhor. Kërkesat tona janë zgjedhjet e parakohshme parlamentare në një ditë me zgjedhje legjitime vendore të mbikqyrura nga një qeveri tranzitore dhe çuarja para drejtësisë e gjithë atyre që kanë vjedhur votat e shqiptarëve”- tha zoti Basha.
Kreu i opozitës u shpreh i sigurt e vendi do të shkojë drejt zgjedhjeve të parakohshme. “Largimi i Edi Ramës si kryeministër është i padiskutueshëm. Hetimi dhe gjykimi i politikanëve të kapur duke vjedhur votat është i padiskutueshëm. Prandaj ne i qëndrojmë deri në fund zgjidhjes politike përmes parimeve dhe jo Pazarit. Edi Rama kërkon Pazar. Gjithë jeta e tij politike është Pazar. Kur nuk ka Pazar, shpërfytyrohet, çmendet. Kur nuk ka Pazar, përpiqet me lojën e vjetër “përça e sundo”. Nuk ka Pazar me Edi Ramën. Mercenarët dhe të shiturit tek ai dhe oligarkët e tij nuk e përçajnë dot as PD, as Opozitën. Fuqia jonë është bashkimi më i madh popullor në 3 dekada pluralizëm, është shumica 85% “Rama ik”.- tha zoti Basha në Korçë.
Një ditë më herët, kryeministri Rama u shpreh qartë se është i hapur për dialog me opozitën, por pa diskutuar vullnetin e popullit të shprehur me votë. Ai madje tha qartë se nuk do harxhojë asnjë sekondë kohë duke pritur Bashën apo Kryemadhin por do përqendrohet tek pushteti i fituar më 30 qershor, ndërsa Bashës i bëri thirrje të përgatitet për zgjedhjet e 2021se të tjera s’ka për të patur. Pa Rama përjashtoi çdo hapsirë për marrëveshje apo Pazar, siç e quan Basha për zgjedhje të parakohshme./Realstory.al
