Liderët e shteteve të Ballkanit Perëndimor kanë marrë pjesë mbrëmjen e martës në darkën e lamtumirës me përfaqësuesen e lartë të BE-së, Federica Mogherini, ku ka munguar vetëm kryeministri i Shqipërisë, Edi Rama i cili ndodhej në një vizitë zyrtare në Greqi.
Në një video të publikuar nga mediat kosovare shihet se darka ka shkuar mes humorit dhe batutave. Liderët shihen që takojnë njëri-tjetrin duke u përshëndetur me shtrëngime duarsh.
Por ajo që bie në sy është takimi mes Mogherinit dhe Thaçit për të cilin bën batuta edhe Presidenti i Serbisë, Aleksandar Vuçiç. Ai i thotë në serbisht Thaçit: “Hashim, Federica më së shumti ka dëshirë të puthet me ty”, kurse Thaçi nuk dëgjohet ta komentojë atë.
Por Vuçiç vazhdon me batutat: “Shikoni se si bëhet sikur nuk merr vesh serbisht, por di shumë mirë”.
Pas kësaj deklarate të Vuçiç, Thaçi dëgjohet tek qesh. Ky takim mes përfaqësueses së lartë të BE-së për politikën e jashtme u cilësua si i fundit për shkak të përfundimit të mandatit të saj më 1 dhjetor.
Gjatë takimit u shpreh keqardhje për vendimin e Këshillit Evropian, për të mos hapur negociatat e pranimit me Maqedoninë e Veriut dhe Shqipërinë. Palët ranë dakord që integrimi i Ballkanit Perëndimor në BE mbetet një objektiv kryesor strategjik, në interes të përbashkët të BE-së dhe rajonit.