Policia e Tiranës ka deklaruar sot se 60 persona janë proceduar për aktet e dhunës ndaj punonjësve të policisë dhe institucioneve shtetërore në protestën e djeshme të opozitës, ndër ta 42 të arrestuar. Po ashtu, policia ka bërë edhe një rezyme sesi ka precipituar dhuna e protestuesve të opozitës ndaj punonjësve të policisë.
“Në datë 2 Qershor 2019, duke nisur nga ora 19:00 subjektet politike Partia Demokratike dhe Lëvizja Socialiste për Integrim kanë zhvilluar tubim në Bulevardin” Dëshmorët e Kombit” para Kryeministrisë e vijuan në rrugën “George W. Bush”, përballë institucionit të Parlamentit të Shqipërisë. Gjatë protestës në rrugën “George W. Bush” pjesëmarrësit në tubim kanë kundërshtuar, goditur me mjete të forta, fishekzjarrë, tymuese dhe kapsolla me fuqi të lartë shpërthimi punonjësit e Policisë, të planizuar me shërbim para Kryeministrisë dhe selisë së Parlamentit të Shqipërisë. Nga goditjet, kundërshtimet dhe përdorimi i lëndëve piroteknike, sendeve të forta, kapsollave e fishekzjarrëve kanë mbetur të plagosur 10 punonjës të Policisë, të cilët morën ndihmën në spitalin e Traumës”, deklaroi policia e Tiranës.
Sipas të dhënave zyrtare, si pasojë e përdorimit të lëndëve piroteknike, fishekzjarrëve, kapsollave e sendeve të tjera, janë shkaktuar dëme të konsiderueshme edhe në godinën e Kryeministrisë dhe selisë së Parlamentit.
“Bazuar në prova, pamje filmike, raporte shërbimi u arrestuan në flagrancë 42 persona, si dhe janë proceduar në gjendje të lirë 17 persona të tjerë për kryerjen e veprave penale ‘Organizimi dhe pjesëmarrja në grumbullime e manifestime të paligjshme’, ‘Kundërshtimi i punonjësit të policisë së rendit publik’, ‘Goditje për shkak të detyrës’, ‘Prishja e qetësisë publike’, ‘Shkelja e rregullave mbi lëndët plasëse, djegëse dhe radioaktive’”, u shpreh policia.
Gjithashtu është proceduar në gjendje të lirë për veprën penale “Organizimi dhe pjesëmarrja në grumbullime e manifestime të paligjshme” shtetasi G. B. Policia tha se vijon puna për identifikimin e persona të tjerë të dyshuar për kryerjen e veprimeve të kundërligjshme në këtë protestë të dhunshme.