Kryeministri Edi Rama, gjatë dorëzimit të mbi 400 titujve të pronësisë në Himarë, u tha banorëve të zonës se ua dinte të gjithëve problemet e pronave.
Kreu i qeverisë theksoi se asnjëherë nuk i ka kërkuar pronat që i takojnë nga nëna e tij, duke iu drejtuar himariotëve me fjalët: “Jeni njësha në politikë, madje në politikë globale”.
“Pronat e Himarës janë prona të mbështetura në letra, të lidhura me banorë këtu, jo në Hënë. Ka probleme të regjistrimit dhe konflikte mes banorëve dhe anëtarëve të një familjeje dhe kjo e shkakton këtë gjë.
Ndaj, shpeshherë këtu shiten pronat nga dy ose më shumë herë. Flas me fakte, jo me fantazi. E njoh kaq mirë këtë çështje. Secili nga ju njeh pjesën e tij, unë pjesën e të gjithëve. Po e përsëris, pretendimet e brendshme janë pa fund këtu, “e ke ti apo e kam unë”. Kjo për shkak të mungesës së regjistrimit. Në mënyrë të përsëritur e kemi bërë thirrje për regjistrime për aplikim. Edhe këto 437 dokumente, certifikata që kemi këtu sot, plus dhe disa të tjera që janë gati, por nuk janë këtu, janë 4 000 për t’u bërë. Janë bërë me shtytje, me hosten, falë mbështetjes së prefektit që ia kam kërkuar që ditën e parë.
I kam thënë: Do të jesh prefekt i Vlorës, por do të kesh si detyrë që të japësh certifikatat e pronësisë banorëve të Himarës. Duhen bërë letrat siç duhet, që nesër mos t’i kontestojë dikush. E njoh mirë unë këtë zonë, e njoh, e kam në gjak, ia di të tëra historitë. Mund të flisni ça të doni me ndonjë që vjen nga Durrësi dhe nuk di se çfarë bëhet. I di dhe konfliktet brenda për brenda familjeve. Unë vetë dhe e ndjera ime më, nuk kemi kërkuar kurrë asgjë. Ju e dini mirë se ku e kemi rrënjën këtu, por nuk kemi kërkuar asgjë. Asnjë metër katror. Por, nuk është se nuk e di historinë dhe të pronës sonë atje”, tha Rama.
“T’i ndajmë gjërat. Çfarë është e jotja, është e jotja, dhe çfarë është e krushkut, i takon atij. Do të më shihni pas disa javësh, do të jem në Theth, edhe atje të njëjtën gjë, shtëpitë e të parëve që nuk kanë marrë certifikatat akoma sot, jo për faj apo ndonjë plan të ndonjërit për t’u marrë shtëpitë. Se dhe atje shkojnë vizitorë dhe hotelet janë plot.
Himariotët janë himariotë dhe pikë. Secili e di vetë se ku i ka rrënjët. Ne nuk i ndajmë shqiptarët dhe jo të ndajmë himariotët. Kush ju thotë diçka tjetër, shiheni mirë se pse e thotë. Shqiptarëve nuk ua ha qeni shkopin, se nuk ua fut njeri në politikë. Kanë pasur të bëjnë me lloj lloj marifetesh. Mes shqiptarëve, himariotët janë njësha, për politikë jo lokale, por globale”, shtoi kryeministri.