Kryeministri Rama ka postuar të enjten në rrjetet sociale mesazhin e një emigranti, i cili ishte ankuar se pavarësisht se ishte ligjërisht i rregullt, fëmija i tij dy vjeç ishte pa drita në shtëpi për shkak se vëllai i tij kishte borxhe në OSHEE.
Duke i qarë hallin, edhe pse skeptik se mund të merrte një zgjidhje, emigranti i ka treguar kryeministrit se ndodhet jashtë vendit dhe se familjen e kishte në errësirë. Në datën 20 gusht, qytetari i ka dërguar një mesazh Ramës, duke i kërkuar ndihmë për gjendjen që ishte, pasi kishte tre muaj në errësirë dhe nuk i bënin lidhjen e dritave ngaqë vëllai i tij kishte borxh dhe kishin të njëjtin mbiemër. Qytetari gjithashtu i kishte shkruar që kishte nënën invalide dhe vajzën dy vjeçe.
Kurse të enjten në të njëjtin numër qytetari i ka kthyer përgjigje kryeministrit duke e falënderuar në një mënyrë të veçantë. “Nuk e di si të falënderoj, por ndihem i turpëruar që më bëre se realisht nuk votova kurrë për ty, por sinqerisht të kërkoj të falur. Je i vetmi njeri që u more në jetë me hallet e mia. Unë e kuptoj se votat e familjes sime as nuk iu ulin popullaritetin dhe as nuk ua shtojnë, por përveç teje nuk do të votoj asnjë tjetër. Shumë faleminderit që u kujdese për familjen time”, shkruan emigranti, duke dërguar edhe një foto të vajzës së tij të vogël me fjalët “Faleminderit xhaxhi”.
Kryeministri i është përgjigjur vetëm pas mesazhit të dytë, i shoqëruar bashkë me foton e vajzës së vogël. “Më vjen shumë mirë që problemi u zgjidh. As nuk të pyeta për kë ke votuar, as nuk e ndoqa hallin që të më votosh mua, po se e bëj këtë me të gjithë edhe pse do të doja të bëja shumë më tepër për të gjithë. Të jeni mirë familjarisht”, përfundon mesazhi i kryeministrit.