Tuneli panoramik në hyrje të qytetit të Pogradecit, bëhet të hënën (sot) i kalueshëm për automjetet.
Lajmin e ka bërë të ditur, kryeministri Rama përmes një postimi në “Facebook”, të cilin e ka shoqëruar edhe disa foto. “Me tunelin panoramik të Pogradecit, që nga sot hapet për automjetet, ju uroj një javë të mbarë”, shkruan kryeministri.
U deshën gati 10 vjet për ta ndërtuar këtë tunel dhe miliona dollarë. Ndërtimi i tij u projektua keq në vitin 2009, gjatë qeverisjes së PD dhe ndërtimi nisi në vitin 2011. Sipas projektit fillestar tuneli ishte parashikuar që futej në brendësi të liqenit të Pogradecit dhe parashikonte prishjen e 2 bunkerëve në hyrje të qytetit por nuk merrte parasysh ndikimet në ambient. Ndërkohë projekti i rishikuar merr parasysh gjithë këta faktorë që nuk janë përfshirë më parë dhe nuk prek asnjë pjesë e liqenit.
Ish ministri Damian Gjiknuri premtoi në 2017 gjatë një vizite në Pogradec se tuneli do të përfundonte brenda vjeshtës së vitit 2018. Premtim ky që nuk u mbajt prej tij, por u bë e mundur me qeverinë e re të PS.
Më në fund ndërtimi i këtij tuneli përfundoi dhe tani është i kalueshëm për automjetet, por u deshën 3 qeveri për të përfunduar një segment rrugor, vlera e të cilit ka kushtuar miliona dollarë.
