Mauro Icardi mbeti përfundimisht tek Inter, por futbollisti argjentinas nuk është në planet e klubit. Pas dështimit të transferimit në merkato, tashmë futbollisti duhet të mendojë një plan për të bindur klubin për t`u aktivizuar. Dhe në fakt, situatën duket se e ka marrë në dorë avokati i Icardit, Giuseppe Di Carlo.
Në një prononcim për Rai Sport, Di Carlo është shprehur se po punohet për të gjetur një mënyrë që të mbrohet dinjiteti i lojtarit. “Ne jemi të interesuar të mbrojmë dinjitetin e lojtarit, duke bërë të mundur rikthimin në fushën e lojës. Mauro ka marrëdhënie të shkëlqyer me shokët e tij”, ka thënë avokati i sulmuesit argjentinas.
“Unë besoj se është mundësia për të arritur një zgjidhje të përbashkët, për të mbrojtur interesat e të dy palëve. Icardi gjithmonë e ka dashur Interin, ka respektuar fanellën, tifozët dhe gjithmonë ka qenë profesionist dhe shembullor. Ai dëshiron të ketë mundësi të stërvitet me trajnerin Conte”, ka thënë avokati i sulmuesit argjentinas.
