Që në fillim të fjalës së tij Meta u sigurua që t’i çonte një mesazh kryeministrit Rama duke theksuar disa herë se vetëm presidenti ka të drejtë të caktojë datën e zgjedhjeve dhe se pa një datë të caktuar prej tij, nuk mund të ketë zgjedhje. Kjo bazuar edhe në deklaratat e kryeministrit, i cili ka thënë se zgjedhjet do të zhvillohen më 30 qershor. Ja çfarë thotë presidenti Meta.
“Në zbatim të nenit 92 të Kushtetutës presidenti i republikës është organi i vetëm kushtetues që ka për kompetence caktimin e datës së zgjedhjeve në Shqipëri. Konkretisht në këtë dispozitë, Kushtetuta përcakton se presidenti cakton datën e zgjedhjeve për kuvendin, për zhvillimin e referendumeve dhe zgjedhjet lokale. Sipas Kushtetutës pa patur një datë të caktuar nga presidenti i republikës zgjedhjet nuk mund të zhvillohen. Zgjedhja e kushtetutëbërësit thotë se presidenti është autoriteti i vetëm për të caktuar datën e zgjedhjeve. Kjo është e lidhur drejtëpërdrejtë me rolin e tij si përfaqësues i unitetit të popullit.
Dita e zgjedhjeve duhet të jetë një moment bashkimi i shqiptarëve ku ata zgjedhin midis alternativave dhe kurrsesi s’mund të jetë një ditë përçarje mes tyre”, tha Meta.
