Rudina Hajdari: Raporti i fajëson të gjithë, duhet Reforma Zgjedhore

POLITIKË


Kryetarja e grupit demokrat në Kuvendin e Shqipërisë Rudina Hajdari thotë se raporti i OSBE-së i fajëson të gjitha palët, ndërsa shprehet se zgjidhja e vetme është reforma zgjedhore që u heq nga dora listat kryetarëve të partive.

Sipas saj, arsyeja kryesore që qytetarët shqiptarë në 30 Qershor nuk patën mundësi zgjedhje dhe nuk ishin të përfaqësuar ishte sepse opozita joparlamentare mori vendimin e paprecedentë të digjte mandatet dhe të mos hynte në zgjedhjet lokale, vendim ky që thelloi krizën politike në Shqipëri dhe i dhuroi Partisë Socialiste plot 61 Bashki.


“Raporti fajëson të gjitha krahët politike njësoj për papërgjegjshmërinë e tyre ndaj elektoratit shqiptar, duke mos lënë vend për interpretim. Prandaj, gënjeshtrat në mënyrën se si lexojnë dhe interpretojnë kryetarët e partive Raportin e OSBE ODIHR-it tregon edhe njëherë se sa i kalbur është sistemi ynë politik dhe zgjedhor”, shkruan ajo në rrjetet sociale.

Më tej, deputetja Hajdari vë në dukje se është pikërisht ky sistem zgjedhor, ku kryetarëve të partisë u jepet pushtet pa limit, duke cenuar demokracinë e brendshme në çdo qelizë të partisë, që e ka sjellë vendin tonë në këtë pikë ku jemi sot, ku njerëzit ndihen të papërfaqësuar vetëm prej tekave personalë të kryetarëve të partive.

“Duke parë situatën ku ka degraduar sjellja politike, është e qartë që Reforma Zgjedhore do të jetë i vetmi mjet i drejtë për të adresuar problemet e zgjedhjeve dhe për të hapur debatin publik, për një sistem zgjedhor më të denjë e më përfaqësues për shqiptarët, dhe që konsideron rekomandimet kryesore të OSBE ODIHR-it si: njohja e zgjedhjeve, depolitizimi i komisioneve zgjedhore dhe financimi transparent i partive politike gjatë fushatave”, shkruan ajo.




Skip to toolbar