Prokuroria e Posaçme, SPAK, duket se po jep shenjat e para të funksionimit të saj real. Me anë të një njoftimi zyrtar, SPAK informoi se dërgoi për gjykim në Gjykatën e Posaçme, një pjesë të dosjes “399” apo e njohur ndryshe si dosja “Avdylaj”. Sipas njoftimit të SPAK, në Gjykatën e Posaçme janë dërguar anëtarët e bandës së grupit të “Avdylajve” në Durrës, që akuzohen për disa vepra të rënda penale.
“Prokuroria e Posaçme Kundër Korrupsionit dhe Krimit të Organizuar, me datë 17.01.2020 paraqiti në Gjykatëne Posaçme të Shkallës së Parë për Korrupsionin dhe Krimin e Organizuar kërkesën për gjykimin e procedimit penal Nr.29/1, të vitit 2019 (akte të transferuara për kompetencë nga procedimi penal Nr.339/2016 i Prokurorisë pranë Gjykatës së Shkallës së Parë për Krime të Rënda Tiranë) në ngarkim të pandehurve Astrit Balliu (alis Avdyli,Sulejmani), Altin Avdyli, Jasin Kala (alias Avdyli), Gjevi (alias Xhevahir) Ndoka, Esat Mehmeti, Petrit Sulejmani, Saimir Sulejmani, Hajri Seferi, Orges Jahelezi, Shkëlqim Avdyli, Denis Llaftiu, Saimir Gjepali, Mario (alias Edinjo) Zeqiri, Elton Shehaj, Fatos Llaftiu, Ardit Gjyriqi, Admir Hoxha, Hekuran Hoxha, Iskënder Sale(alias Mehmet Gjini), Xhemal Shala, Xhevit Shuti, Flamur Çelaj, Vehbi Berushi, Mustaf Shuti, Anila Shuti, të akuzuar për veprat penale “Trafikimi i narkotikëve”, “Prodhimi dhe fabrikimi i lëndëve narkotike dhe psikotrope”, në bashkëpunim, në formën e posaçme të grupit të strukturuar kriminal, “Grupi i strukturuar kriminal’’, “Kryerja e veprave penale nga organizata kriminale dhe grupi i strukturuar kriminal”, “Pastrimi i produkteve të veprës penale’’, në bashkëpunim, “Prodhimi dhe shitja e narkotikëve”, në bashkëpunim, të parashikuara nga nenet 283/a/1, 284/c, 28/4, 287/1 gërma ‘’b’’, 25, 333/a/1, 334/1, 283/2 të Kodit Penal”, thuhet në njoftimin e SPAK.
Ndërkohë, SPAK thotë gjithashtu se në kuadër të këtij hetimi, janë dërguar për gjykim gjithsej 63 të pandehur, ndërsa janë sekuestruar pasuri të paluajtshme që kapin vlerën e 5 milionë eurove. “Gjatë hetimit të këtij procedimi penal janë ngritur akuza dhe dërguar për gjykim, edhe 38 të pandehur të tjerë, për të cilët vazhdon gjykimi. Deri tani në kuadër të këtij procedimi penal janë dërguar për gjykim gjithësej 63 të pandehur. Po kështu në kuadër të hetimeve të këtij procedimi janë sekuestruar deri tani me qëllim konfiskimin, pasuri të paluajtshme (truall në bregdet) me sipërfaqe 300.000 (treqind mijë) m2, e cila ka qënë pronë shtetërore e përfituar në mënyrë të paligjshme nga anëtarët e grupit kriminal. Gjithashtu janë sekuestruar hotele, apartamente, automjete, me një vlerë prej rreth 5.000.000 (pesëmilion) euro. Hetimet në lidhje me këtë procedim penal vazhdojnë”, thotë SPAK.
Kujtojmë se pjesë e dosjes “339”, janë dhe përgjigjmet që dolën rastësisht për blerjen e votave, ku ish-kryebashkiaku i Durrësit Vangjush Dako, doli në përgjime me anëtarët e bandës së “Avdylajve” në Shijak. Megjithatë, hetimet për blerjen e votës nuk u trajtuan në të njëjtën dosje, pasi hetimet për grupin “Avdylaj” ishin të fokusuara për akuza të tjera që lidhen me grupin e strukturar kriminal dhe vepra të tjera penale. /Realstory.al/