Mero Baze: Prioritetet e ndryshme të “fitimtarëve” dhe SHBA, për Kosovën

Nga Mero Baze

Albin Kurti dhe Isa Mustafa janë në javën e fundit të dështimit të mundshëm të formimit të qeverisë, së dal nga zgjedhjet e 6 tetorit, por kjo duket se nuk është fare shqetësim i SHBA .

I dërguari i Posaçëm i Presidentit Trump për Negociatat e Paqes ndërmjet Kosovës dhe Serbisë, Ambasadori Richard Grenell, ka shpallur prioritet jo aq shumë arritjen e Marrëveshjes Kurti-Mustafa, por arritjen e Marrëveshjes Kosovë-Serbi.

Pas takimeve në Kosovë dhe Beograd, Ambasadori Grenell, ka kërkuar që Serbia të ndal betejën kundër njohjes së Kosovës, kurse Kosova të heq taksën për Serbinë, si hapa që çojnë drejt krijimit të klimës për mbylljen e Marrëveshjes.

Injorimi i negociatve të lodhshme të “fitimtarëve” të Kosovës në zgjedhjet e fundit, dhe imponimi për tu angazhuar në Marrëveshjes Kosovë-Serbi si një kusht për zhvillimin ekonomik të Kosovës, nga ana e të dërguarit të Presidentit Trump, tregon prioritetet e ndryshme të klasës politike në Kosovë me ato të SHBA për Kosovën.

Qysh në fushatën e zgjedhjeve të 6 Tetorit, ajo që binte në sy, ishte se asnjë nga politikanët e Kosovës, nuk e bëri temë të debatit politik në zgjedhje, Marrveshjen Kosovë-Serbi. Përkundër kësaj pati një fushatë populiste kundër saj, që pasoi taksën e qeverisë Haradinaj, që paraqitej si “shpëtim” i Kosovës në emër të patriotizimit.

Në fakt taksa 100 për qind, u vendos si mekanizëm politik për të ndërprerë bisedimet Kosovë-Serbi që po udhëhiqeshin nga SHBA dhe për tu përdorur për luftë të brendëshme politike, duke rikthyer retorikën e tradhtarëve dhe heronjve. Për ta bërë dhe më të lehtë betejën për një armik kombëtar, u erdhi në ndihmë Edi Rama, i cili i plotësonte të gjitha kushtet formale si i tillë , pasi është i gjatë sa Vuçiç, është në luftë me “patriotët” Meta-Berisha dhe kish zëvendësuar Ditmirin me Gentin.

Kjo ishte dëshmia e parë e një fushate frikacakësh, që duke tentuar ti shmangen problemit kryesor të Kosovës, shpikën realitete të tjera për opinionin publik, për të mos u përballur me të vërtetën që i priste si sfidë.

Edhe më e papërgjegjshme u bë kjo situatë pas zgjedhjeve. Në negociatat thuajse të neveritshme prej 6 tetorit deri më sot, në asnjë rresht dhe në asnjë paragraf të kushtëzimeve ndaj njeri tjetrit, Isa Mustafa dhe Albin Kurti nuk kanë përmendur prioritetin kryesor të Kosovës, që janë bisedimet me Serbinë, të cilat kushtëzojnë të ardhmen perëndimore të Kosovës. Është folur për numra ministrash, për karrigen e ardhshme të Pesidentit, për votim dhe dorëheqje kryetarësh Kuvendi, janë ndarë agjensi, e janë rindarë ministri, por askush nuk ka folur çfarë do të bëjnë me temën e pare, me të cilën do të ndeshet qeveria e re, nëse a arrin të bëhet.

Dhe kjo është shumë e papërgjegjshme, pasi praktikisht nëse dy partnerët kryesore nuk kanë një qëndrim të përbashëkt për bisedimet, atëhere qeveria lind e vdekur dhe nuk i duhet askujt. Nga mënyra se si i dërguari i Presidentit Trump u soll në selitë respektive të LDK dhe VV sot, kuptohet se e ka konstatuar këtë problem dhe i ka injoruar tërësisht negociatat e tyre për qeverinë, duke shpallur prioritet normalizimin e të ardhmes perëndimore dhe ekonomike të Kosovës.

“Njerëzit e dinë që një gjë e tillë duhet të ndodhë, por disa politikanë janë bllokuar në mënyrën e tyre të vjetër të menduarit dhe duan të debatojnë për gjithçka”, tha Grenell pas vizitës në Prishtinë.

Dhe kjo do të thotë se vizita e të dërguarit të Presidentit Trump në Prishtinë, praktikisht ka injoruar negociatat për një qeveri që nuk i hyn në punë. Ai ka diktuar prioritetet, përse duhet të formohet një qeveri e re, dhe ato prioritete, janë zhvillimi ekonomik i Kosovës që vjen nga tejkalimi i ngërçit të izolimit prej mungesës së një marrëveshje për paqen me Serbinë.

Kosovën do ta shpëtojë ajo qeveri që ka guximin e mjaftueshëm të ketë axhendën e SHBA si axhendë të vet. Çdo qeveri tjetër, vetëm sa e degradon jo vetëm të ardhmen perëndimore të Kosovës, por dhe vet mbijetesën e saj. Fatekqësisht në emër të “patriotizmit”.

Vetëvendosja propozon Albin Kurtin për Kryeministër

Lëvizja Vetëvendosje në Kosovë i kërkoi zyrtarisht Presidentit Hashim Thaçi të mandatojë Albin Kurtin për Kryeministër. Lajmin e raportojnë mediat kosovare, të cilat citojnë burime zyrtare nga Vetëvendosja. Sipas KosovaPress, Thaçit i është dërguar kërkesa me shkrim nga Sekretarja e Përgjithshme e Vetëvendosjes, Vlora Haxhimehmedi.

Lajmi konfirmohet vetëm një ditë pasi Presidenti i Kosovës bëri një apel të fortë për Albin Kurtin, ku i kërkoi të merrte mandatin e Kryeministrit ose të hapte rrugë për dikë tjetër. Ndërkohë, në momentin që Thaçi pranon propozimin dhe e dekreton atë, gjë që pritet të ndodhë brenda ditës së hënë, Albin Kurti duhet të krijojë qeverinë e re brenda një afati prej 15 ditësh sipas Kushtetutës së Kosovës.

Ndërkohë, negociatat mes Vetevendosjes dhe Lidhjes Demokratike të Kosovës nuk kanë dhënë rezultat. Ndonëse palët publikisht deklarojnë se janë afër formimit të koalicionit, asnjë lëvizje konkrete (të paktën publikisht) nuk ka deri më tani lidhur me ata që do të jenë ministrat e ardhshëm të qeverisë.

Megjithatë, duket se Vetëvendosja po shfrytëzon të gjitha hapësirat që i ofron Kushtetuta për krijimin e koalicionit qeverisës. Kështu është dhe rasti konkret, që pas mandatimit si Kryeministër, Kurti do të ketë dhe 15 ditë kohë për të propozuar emrat e ministrave të qeverisë së tij.

“Jo më takime koti”, LDK jep ofertën e fundit për LVV

Krijimi i qeverisë së re në Kosovë është ende në ujëra të turbullta, ku dy partitë, Vetëvendosja dhe LDK, takohen, paraqesin ofertat e tyre, por nuk po gjejnë gjuhën e përbashkët për të krijuar koalicionin qeverisës. Kreu i LDK-së, Isa Mustafa tha se partia e tij nuk heq dorë nga posti i kryeparlamentarit, 5 ministrive dhe presidentit dhe se Vetëvendosja duhet të shqyrtojë ofertën e tyre të fundit për të arritur një marrëveshje ku dhe do të përcaktohet nëse do të ketë një koalicion qeverisës mes tyre apo jo.

“Ne nuk kemi hyrë ta vlerësojmë atë që na ka shkruar Vetëvendosje, sepse nëse e trajtojmë në organet tona trajtohen vetëm parimet mbi të cilat ne vazhdojmë të bëjmë biseda, në asnjë rast nuk kemi kërkuar shtim të ministrive, ndryshim, këmbim të ministrive, por kemi kërkuar marrëveshje të partneritetit, prandaj si të tillë nuk e shqyrtojmë një pozicionim të tillë, por i trajtojmë qëndrimet tona. Se a mbetet LDK edhe më tutje pranë qëndrimin se të ketë kryeparlamentarin, të ketë zotimin për presidentin e vendin dhe të ketë 5 ministri. Ose nuk mbetet, qëndrimi ka qenë ky se ne duhet të kemi këto pozita. Çdo ndryshim nuk mund të bëhet pa marrjen e verifikimit të organeve tona”, tha ai.

Mustafa tha se nuk do të takohen më me Vetëvendosjen vetëm për të mbajtur takime 3 orëshe dhe në fund të mos kenë asgjë për t’u ofruar qytetarëve, por takimi i radhës do të jetë vetëm për të arritur marrëveshjen përfundimtare. Kreu i LKD-së, Mustafa tha se nuk do të bëjë asnjë marrëveshje për bashkëqeverisje, nëse nuk është marrëveshje partneriteti, ku të dy palët do të ndiheshin të fuqishme.

“Nuk shoh arsye që të ulemi dhe të flasim për tre orë dhe të dalim si memecë pranë jush, mos kemi çka t’iu themi juve dhe qytetarëve. Shoh arsye që takimi i ardhshëm të bëhet vetëm për të arritur deri te marrëveshja. Së pari të sqaroj që ne nuk duam të bëjmë asnjë marrëveshje për bashkëqeverisje nëse nuk është marrëveshje partneriteti, në të cilën dy palët do të ndiheshin të fuqishëm për aq sa kanë marrë besimin e qytetareve të Kosovës. Në këto biseda ne e kemi dhënë pozicionin e saj për mënyrën se si të përafrohemi dhe gjejmë zgjidhje, pa marrë parasysh si e cilësojmë në si zgjidhje politike, si ofertë ose si bazë për arritje të marrëveshjes, ato kanë qenë qëllime të tona dhe kemi pritur se LVV do t’i mirëpret në mënyrë që vendi të ketë zgjidhje nga zgjedhjet”, tha Mustafa.

Krijimi i qeverisë në Kosovë, nesër pritet të takohet Thaçi me Kurtin

Të hënën pritet të takohen Albin Kurti dhe Hashim Thaçi. Pas tre refuzimeve, duket se kreu i Lëvizjes Vetëvendosje, Albin Kurti do të shkojë në zyrën e Presidentit Thaçi për të marrë mandatin e Kryeministrit për krijimin e qeverisë së re të Kosovës.

Ndonëse ende nuk është krijuar kabineti qeveritar, Thaçi ka njoftuar se e pret Albin Kurtin të hënën në orën 15:00 në zyrën e tij. Po në këtë ditë pritet që të mblidhet dhe Kryesia e Lidhjes Demokratike të Kosovës për të vendosur rreth situatës së krijuar pas konsituimit të Parlamentit të ri të Kosovës.

LDK dhe Vetëvendosje ende nuk kanë rënë dakord për krijimin e qeverisë së re. Nënkryetarja e Lidhjes Demokratike të Kosovës, Vjosa Osmani deklaroi pak ditë më parë se do të ishte “dështim historik” mosarritja e marrëveshjes me Lëvizjen Vetëvendosje për krijimin e qeverisë. Megjithatë, të hënën pritet të ketë zhvillime të reja në lidhje me krijimin e qeverisë së re në Kosovë.

“Marrëveshja për qeverinë në janar”, Kurti: Datën e cakton Mustafa, jo Thaçi

Albin Kurti konfirmoi të dielën se qeveria e re e Kosovës do të formohet në janar. Gjatë punimeve të Këshillit të Përgjithshëm të Vetëvendosjes, Kurti tha se marrëveshja me LDK-në pritet të arrihet në janar. “Në janar kemi përpara arritjen e marrëveshjes me LDK-në. 80 ditë nuk mjaftuan për ta arritur marrëveshjen që kërkohej sepse kishte kërkesa përtej mandatit. Ne kemi marrë mesazh të qartë në zgjedhje, që opozita e djeshme të jetë pozita e ardhshme. Ne si lëvizje jemi munduar të reflektojmë në këtë mesazh. Ne kemi ofruar njërin nga dy postet që qytetarët na ofruan neve. E ofruam pozitën e kryeparlamentarit por ajo u refuzua”, tha Kurti.

Kurti u shpreh se nuk ka kohë për të humbur, duke i drejtuar një apel edhe drejtuesve të LDK. “Unë pres që pas konstituimit të Kuvendit të fokusohemi në bërjen e koalicionit qeverisës sepse pengesat e panevojshme nuk i duam. Ne nuk do të ishim VV nëse nuk punojmë e kërkojmë ashtu siç duan qytetarët. Kohë për të humbur nuk kemi sepse s’kemi ekonomi të zhvilluar, nuk kemi shërbime të mira shëndetësore dhe pothuajse të gjithë sektorëve iu duhet ndërhyrje”, ka thënë ai.

Më tej, Albin Kurti, duke ulur tonet me ata që pritet të bashkëqeverisë Kosovën, reagoi ndaj Presidentit Hashim Thaçi, duke u shprehur se datën për caktimin e qeverisë e përcakton LDK dhe jo Presidenti. “Pra, Presidenti i Republikës përcakton datën e konsitutimit të Kuvendit e jo të formimit të Qeverisë. Formimin e Qeverisë e përcakton tjertërkush. Mua datën për formimin e Qeverisë ma përcakton Lidhja Demokratike e Kosovës jo Presidenti i Republikës”, tha Kurti.

Vetëvendosja kallëzon penalisht kërcënuesin e Albin Kurtit

Lëvizja Vetëvendosje bëri kallëzim penal ndaj anëtarit dhe kandidatit për deputet të partisë “Nisma”, Haxhi Hoti, i cili kërcënoi Albin Kurtin. Në një reagim të orëve të vona të së shtunës, Vetëvendosja shkrun se kallëzimi penal u bë në Policinë e Prishtinës. “Pasi u sinjalizuam nga mediat për një kërcënim brutal drejtuar kryetarit të Lëvizjes, Albin Kurtit, përfaqësuesi i zyrës ligjore të Lëvizjes, Berat Ganiqi, dorëzoi një kallëzim penal në stacionin policor “Qendër”, në Prishtinë”, thuhet në reagimin e Vetëvendosjes.

Më tej, VV shprehet se policia duhet të sqarojë nëse kërcënimi ishte i porositur apo i nxituar. Gjithashtu, Lëvizja Vetëvendosje thotë se Haxhi Hoti, kërcënuesi i Albin Kurtit, është pjesë e koalicionit PAN, i “njohur për keqqeverisjen e Kosovës”.

“Ne nuk e dimë nëse ai kërcënim ka qenë i porositur, gjakftohtë, apo i nxitur nga kultura e urrejtjes ndaj Lëvizjes, e cila është kultivuar për vite me radhë nga subjektet e pushtetit, që janë pasuruar paligjshëm duke varfëruar Kosovën. Këto gjëra duhet t’i zbulojë policia e prokuroria.

Megjithatë, rasti ka rrethana rënduese, për shkak se kërcënuesi është pjesë e listës së kandidatëve për Kuvendin e Republikës, nga një parti e koalicionit PAN, të shquar për keqqeverisje e kapje të shtetit. Përveç subjektit të vet partiak, nga postimet e tij publike në rrjete sociale kuptohet se kërcënuesi është edhe adhurues i madh i presidentit të Republikës.

Shpesh e shohim fenomenin e përzierjes së elementëve me prirje të dhunshme e kriminale me elitat politike, ligjvënëse e ekzekutive. Pikërisht këtë fenomen synon ta luftojë Lëvizja VETËVENDOSJE! Populli i Kosovës nuk dëshiron që kriminelët të jenë në pozita pushteti.

I vlerësojmë faktorët publikë e politikë, si edhe qytetarët që distancohen dhe dënojnë pa ekuivok dhe pa relativizim këtë sjellje të papranueshme. Presim nga policia e prokuroria të veprojnë sipas ligjit. Kosova e ka vetëm një rrugë përpara, atë të ligjit e të zhvillimit, në luftë pa kompromis kundër krimit, pabarazisë dhe injorancës”, thuhet në deklaratën e Vetëvendosjes.

Kërcënoi Albin Kurtin, arrestohet anëtari i Nismës

Policia e Kosovës arrestoi mëngjesin e të dielës anëtarin e “Nismës”, Haxhi hoti, pasi në një postim në rrejtet sociale, ai kërcënoi Albin Kurtin.

Sipas gazetës Insajderi, arrestimi i Hotit është bërë mëngjesin e të dielës rreth orës 3:00 në banesën e tij.

Hoti ka thënë se “Albin Kurti duhet ta lëshojë Kosovë, ose do të vritet”, raportim, ky që fillimisht u bë nga Gazeta Insajderi.

Më pas kandidati për deputet i Nismës e ka fshirë shkrimin, duke thënë se gjithçka ka qenë një gabim teknik. I njëjti ka kërkuar edhe publikisht falje.

Mustafa reagon pas Kurtit: Dështoi strategjia jote, ne jemi gati për negociata

Kryetari i LDK-së, Isa Mustafa reagoi mbrëmjen e të mërkurës pas deklaratës së liderit të Vetëvendosjes Albin Kurti, se negociatat për koalicion qeverisës dështuan. Sipas Isa Mustafës, negociatat nuk kanë dështuar, por ka dështuar strategjia e Vetëvendosjes.

“Negociatat nuk kanë qenë të lehta dhe partneri në tavolinë, Lëvizja Vetëvendosje, në disa raste, i ka shpërfillur rregullat për të cilat kishim rënë dakord. Të tillë e kam parë VV-në edhe sonte me video-mesazhin e Kryetarit të Vetëvendosjes, z.Albin Kurti. Për LDK-në dhe për mua, negociatat nuk kanë dështuar. Ka dështuar strategjia e Vetëvendosjes për ta siguruar para publikut epitetin e palës parimore dhe gjeneroze në negociata dhe për t’ia hedhur fajin LDK-së”, thotë Mustafa.

Isa Mustafa këmbëngul se LDK-ja ka fituar pothuajse të njëjat vota me VV, ndaj sipas tij, pushteti duhet të jetë i balancuar. “Asnjë prej kërkesave tona nuk mund dhe nuk duhet të trajtohet si kërkesë ndaj Vetëvendosjes, për shkak se Vetëvendosja nuk i ka fituar të gjitha përgjegjësitë, ajo ka fituar rreth 1/4 e votave dhe jo më shumë, dhe pothuajse aq ka fituar dhe LDK-ja. Prandaj, kërkesat tona kanë konsistuar dhe do të konsistojnë në ndarjen e balancuar të përgjegjësive, konform rezultatit të zgjedhjeve të 6 tetorit”, shprehet Mustafa.

Mustafa shprehet se mesazhi i Kurtit drejtuar qytetarëve, në fakt ishte për LDK-në. Ai shprehet se këtë mesazh e ka të qartë. Isa Mustafa thotë se Albin Kurti tregoi të mërkurën se është fati të mbështesë kandidatin e LDK për President të Kosovës, vetëm për të marrë më shumë përfitime në qeveri.

“Gjithsesi, mesazhin e kemi të qartë edhe ne në LDK, por besoj edhe qytetarët e Kosovës. Ndryshe nga deklarimet e tyre publike, Vetëvendosja tregoi sonte se është gati të zotohet për ta mbështetur kandidatin e propozuar nga LDK-ja për President të Kosovës, vetëm se kërkon më shumë hise në qeveri. Ky nuk është parim, por tentim për të përfituar më shumë”.

“Ne mendojmë se ndarja e balancuar e përgjegjësive, konform rezulatit të zgjedhjeve, rezulton në këtë formulë, Kryetari i Kuvendit, Presidenti, kur të mbetet pozita e lirë, dhe gjysma e qeverisë duhet t’i takojnë LDK-së, nëse Vetëvendosje dëshiron mbështetjen e LDK-së për t’ia besuar asaj drejtimin e ekzekutivit dhe gjysmën e Qeverisë. Ndryshe, marrëveshja do të ishte e pabalancuar dhe nuk do të siguronte stabilitet qeverisës, as funksionim demokratik të institucioneve kryesore”.

“Vetëvendosja ka filluar ta kuptoj këtë dhe shpresoj që në ditët në vazhdim, do të ulemi dhe do t’i definojmë të gjitha aspektet. E drejta dhe detyrimi kushtetues i takojnë të parit, ashtu si dhe përgjegjësi për të gjetur zgjidhje dhe për t’i ndërtuar institucionet e reja. Ne jemi gati për negociata”, mbyllet mesazhi i Isa Mustafës.

Mini-Shengeni, Albin Kurti: Rruga nga Beogradi në Tiranë, kalon nëpër Prishtinë

Albin Kurti reagoi të hënën në lidhje me punimet e Samitit të Tiranës, ku liderët e vendeve të Ballkanit Perëndimor u takuan për të tretën herë për të diskutuar për “Mini-Shengenin Ballkanik”. Kurti lë të kuptohet se mbetet i hapur për bashkëpunimin rajonal, por duke zbatuar parimet e “reciprocitetit”, që sipas tij, “duhet të udhëheqin iniciativat rajonale”. Ai i dërgon një mesazh edhe qeverisë shqiptare, duke u shprehur se “rruga nga Beogradi për në Tiranë kalon nëpër Prishtinë”.

“Parimet e gjithëpërfshirjes dhe reciprocitetit duhet të udhëheqin iniciativat rajonale. Rruga nga Beogradi për në Tiranë kalon nëpër Prishtinë. Ne jemi dhe gjithmonë do të jemi një popull dhe askush nuk mund të qëndrojë mes nesh. Ne kemi nevojë për më shumë bashkëpunim jo konfrontim!”, shkruan Albin Kurti.

Reagimi i kreut të Vetëvendosjes vjen pak ditë pas mbajtjes së Samitit të Tiranës, ku Kryeministri Edi Rama, ai i Maqedonisë së Veriut Zoran Zaev, Presidenti Serbisë Aleksandër Vuçiç dhe ai malazez, Milo Gjukanoviç diskutuan për krijimin e një zone të përbashkët ekonomike, që mundëson lëvizjen e lirë të njerëzve, mallrave dhe kapitaleve.

Kryeministri Edi Rama gjatë deklaratës drejtuar liderëve kosovarë, duke u bërë thirrje të heqin dorë nga rruga ku janë futur dhe të pranojnë të bëhen pjesë e kësaj nisme. “Uroj që Kosova të dalë nga një rreth vicioz që nuk i bën mirë. Kosova nuk ka nevojë për një garë të brendshme se kush refuzon më shumë dialogun. Kosova duhet të qëndrojë fort afër Shqipërisë dhe miqve të vet SHBA dhe BE dhe të mos kthejë vizionin e të ardhmes në një luftë politike të ditës”, tha Rama të shtunën për gazetarët”, shprehej Kryeministri Edi Rama, pasi Presidenti i Kosovës Hashim Thaçi refuzoi të merrte pjesë në këtë samit.

Haradinaj “vjedh” Kurtin, 28 Nëntori do festohet në Kosovë

Kryeministri në ikje i Kosovës, Ramush Haradinaj vendosi të shpallte ditën e 28 Nëntorit, festën e shpalljes së pavarësisë kombëtare, ditë pushimi në Kosovë. Lajmin e dha vetë kreu i ekzekutivit në Kosovë. Ai e arsyeton këtë vendim si të motivuar politikisht, nga aspekti historik dhe ai tradicional.

“Me rastin e Ditës së Flamurit, mbështetur në Ligjin për Festat Zyrtare, kam marrë vendim që 28 Nëntori, të shpallet ditë pushimi në territorin e Republikës së Kosovës, për t’i respektuar vlerat e traditës kombëtare shqiptare. Vendimi, që 28 Nëntori të jetë ditë pushimi, është i motivuar nga aspekti historik, tradicional dhe politik”, shkruan Haradinaj.

Me rastin e Ditës së Flamurit, mbështetur në Ligjin për Festat Zyrtare, kam marrë vendim që 28 Nëntori, të shpallet ditë…
Gepostet von Ramush Haradinaj am Mittwoch, 20. November 2019

Në fakt, ky vendim i papritur i Ramush Haradinaj duket i sinkronizuar me qasjen që ka Lëvizja Vetëvendosje për këtë datë. Dega e Vetëvendosjes në Tiranë, ka paralajmëruar një marshim për “Bashkim Kombëtar” në këtë datë, që do të fillojë nga monumenti i Skënderbeut në qendër të Tiranës në drejtim të bustit të Adem Jasharit te “Rruga e Durrësit”.

Ky duket se do të jetë nga vendimet e fundit të Haradinajt si Kryeministër i Kosovës, pasi së shpejti karrigen e tij do t`ia lërë Albin Kurtit. Ndërkohë, Ramush Haradinaj nuk pranoi të jetë deputet i legjislaturës së ardhshme të Kuvendit të Kosovës, pas humbjes në zgjedhjet e 6 tetorit.