Alfred Lela: Paqja ashtu si lufta, kërkon b…ë. Basha po i kërkon te ne, pa i pasur vetë

Nga Alfred Lela

Në një shkrim në gazetën Panorama analisti Agron Gjekmarkaj e cilësonte fitore marrëveshjen e arritur mes opozitës dhe mazhorancës për Reformën Zgjedhore. Sepse, arsyetonte Gjekmarkaj, parlamenti delegjitimohej dhe bojkoti i PD jepte më në fund frute. Kryetari i PD, që ka qenë në zor për të gjetur teknika komunikimi që do të shisnin te publiku një marrëveshje të re me Ramën, e ka rimarrë tezën e Gjekmarkajt dhe e ka përsëritur në Kolegjin e Kryetarëve (krerëve të degëve të partisë) të thirrur pasditen e së mërkurës. Analistët që kanë b…ë, ka thënë Basha sipas burimeve të Politiko.al duhet ta trajtojnë marrëveshjen si fitore të opozitës dhe si delegjitimim të Parlamentit.

Thënë më qartë: parlamenti duke dalë nga institucioni dhe duke u ulur me përfaqësuesit e opozitës në një mjedis neutral si Pallati i Kongreseve është ‘dorëzuar’. Basha me anë të këtij lejtmotitvi ka dashur, jo vetëm të qetësojë të vetët, duke u dhënë një fitore në tavolinë, por edhe të kompleksojë analistët duke u thënë se, nëse mbroni një tezë tjetër veç kësaj ‘jeni të shitur te Rama’. Agron Gjekmarkaj, i ftuar mbrëmë në Real Story në News 24, ka ngulmuar se nuk ia ka marrë ai Bashës tezën, por është e kundërta, Basha po përdor tezën e tij.

Pavarësisht e kujt është teza dhe pavarësisht se ajo përdoret për qëllime të ndryshme nga analisti dhe politikani, ajo që i intereson diskutimit është vërtetësia e saj. A qëndron ideja se opozita duke i marrë këtë marrëveshje shumicës delegjitimoi atë institucion që u nis të nxirrte nga shinat më 17 shkurt të vitit të shkuar kur braktisi parlamentin? Kjo e vërtetë ka dy gjysma të cilat komplotojnë kundër njëra-tjetrës. Sa ç’është e vërtetë se opozita e tërhoqi shumicën në fushë asnjanëse për të diskutuar dhe miratura së bashku Reformën Zgjedhore po aq qëndron edhe e kundërta.

Shumica ‘e futi opozitën në Parlament’ sepse aty do të jetë vula e fundit që do të certifikojë vullnetin politik për marrëveshje të palëve. Madje ‘futja në Parlament’ dhe në sistem duket se është qëllimi i marrëveshjes. Marrëveshja nuk ka pse të jetë fitore sa kohë që mjafton të jetë armëpushim. Basha e futi partinë e vet dhe opozitën në një përballje të cilën nuk mundi ta çonte deri në fund, as si luftë dhe as si paqe. Duke iu trembur gëzimit të kësaj të fundit, nisur nga precedenti i ‘muajve të mjaltit’ të verës 2017, Basha bërtet ‘fitore’ dhe kërkon b…ë te të tjerët. Nga droja se mos të tjerët i vërejnë pikërisht këtë mungesë.

Marrëveshja politike, Lela: Armëpushim i një lufte koti, fituesit janë Rama e Basha

Analisti Alfred Lela e cilësoi marrëveshjen politike të arritur për reformën zgjedhore nga të gjitha palët politike, PS-PD-LSI dhe opozita parlamentare, një armëpushim të një lufte të kotë dhe një vazhdim të marrëveshjes së 2017, ku të vetmit që dolën të fituar ishin Rama e Basha. Lela tha në emisionin “Real Story” në “News 24” se kjo marrëveshje është e “gatuar” prej muajsh në prapaskenë, ku fituesit janë të njëjtën e marrëveshjes së 2017.

“Ngjarja që ka ndodhur është e mirë sepse krijon së paku një shtensionim. Unë do thosha se është armëpushim i një lufte idiote dhe të kotë. Kjo luftë është vazhdim i pas-marrëveshjes së 2017. Marrëveshjen e 2017 unë e kam duartrokitur dhe na solli këtu. Kronik që ndodhi dje ishte armëpushim. Të fituarit në këtë rast duket se janë dy personazhe dhe janë Rama e Basha. Ishte marrëveshje si rrufe në qiell të hapur, që patjetër është gatuar prej muajsh në prapaskenë. Duket armëpushim i mirë për të qenë i vërtetë. Jam skeptik, nëse do kemi një luftë tjetër. Fituesit janë të njëjtët, si në 2017 dhe sot, Rama dhe Basha” tha Lela.

Lela dhe Rada debat në “Real Story” për paketën anti-shpifje

Paketa anti-shpifje, që është duke u përgatitur nga qeveria për miratim, shkaktoi debat në studion e “Real Story”. Analisti Alfred Lela debatoi me gazetarin Ardit Rada në lidhje me përdorimin e ligjit nga politika. Sipas analistit Lela, ligji është instrument censure, dhe nëse ai do të miratohet do të përdoret nga të gjitha pushtet që do të vijnë më pas. “Ky ligj për antishpifje është më tepër si formë censure. Me këtë ligj i bie që kushdo që të jetë në pushtet ushtron censurë. Sot anëtarë të parlamentit nuk dinë variantin final. Është censurë. Nuk më duhen as debati, asgjë tjetër, përpos censurës. Ky është një ligj për censurë. Kthen ligjin për censurë si koha e monizmit. Nesër o Ardit do jetë Berisha ose Basha në pushtet e do e përdorë”, tha Lela.

Kurse gazetari Ardit Rada doli kundër këtij këndvështrimi. Ai tha së pari se gazetarët s`mund ta gjykojnë ligjin nga ana juridike. “Ne si gazetarë e kemi shumë të vështirë ta diskutojmë ligjin nga ana juridike ose ta kritikojmë”, tha Rada, ndërsa shtoi se “politika nuk e përdorë dot ligjin”. Por, Alfred Lela shtoi gjithashtu se ligji i jep fuqi AMA-s që të heq licensat për mediat, ndërkohë që licensa është marrë me vendim gjykate. “Ligji i jep të drejtë AMA të më heqin licenën. Unë e kam regjistruar me vendim gjykate. Këtë bën ligji, i jep fuqi AMA-s të dalë mbi gjykatat. Mos fol si anëtar partie”, tha Lela duke iu drejtuar gazetarit Rada.

Lidhur me përdorimin e politikës të ligjit për shpifjen, por edhe sulmet ndaj medias, gazetari Ardit Rada u shpreh se të gjitha palët e sulmojnë median. Duke pasur parasysh, kryeministrin Edi Rama, Rada tha se ai i quan mediat “kazan”, ndërsa kreu i opozitës i quan mediat “oligark”. “Politika e gjitha është një zë kundër medias. Kemi një person që e quan median “kazan” dhe një tjetër e quan median ‘oligark”, tha Rada.

Ndërkohë, gazetari Frrok Çupi u shpreh se gazetarët nuk preken nga ligji. Sipas tij, mbrojtja e “fake neës” është i dëmshëm dhe po shkatërron fjalën e lirë. “Gazetari nuk ka punë me ligjin. Ne po bëhemi zëdhënsa të medias. Nëse e mbrojmë lajmin “fake” kemi shkatërruar fjalën e lirë. Bota e përparuar ka arritur në përfundimin se lajmi “fake” po shkatërron demokracinë. Sot presidenti i SHBA është përpara sitautës më të vështirë. Por ndërkohë, janë shpenzuar miliarda për ta deformuar figurën e Donald Trump. Sot Trump është më lartë me pikë se sa ishte një vit më parë. Nëse gazetari thotë të vërtetën nuk ka punë me ligjin kurrë”, tha Çupi.

Ndërkohë, nënkryetari i AMA-s, pavarësisht se është kundër ligjit të përgatitur nga qeveria, u shpreh se nëse ai do të miratohet, AMA do ta zbatojë. “Me këtë ligj nuk preket fare “FAke Neës”, por kërkohet shqyrtimi i kontenteve nga një trupë. Lidhja e këtij ligji me AMA-n nuk më duket shumë e drejtë. AMA si e keqe si e mirë, nëse i vjen ky ligji, është i detyruar ta zbatojë këtë ligj. Nesër maxhoranca mund të ndërtojë një AMA siç e duan shoqatat e gazetarëve”, tha Nezaj. /Realstory.al/

Paralajmërimi i Metës, Lela: Ka histori me videot

Analisti Alfred Lela u shpreh në “Real Story” se fakti që Meta sulmon ambasadorin e OSBE, lidhet me faktin se Borchardt është hallka më e dobët e zinxhirit të ambasadorëve në Tiranë. Në “Real Story”, Lela u shpreh se mesazhet e Metës janë të qarta, duke paralajmëruar se mund të luftojë me këdo.

“Borchardt përfaqëson disa gjëra, por unë po them dy. Është hallka më e dobët e zinxhirit të ambasadorëve në Shqipëri. E dyta është anëshmëria e perceptuar e tij. Ai shihet si i njëanshëm. Meta është lojtar shumë i mirë politik. Duhet të ndajmë se javët e fundit është lojtar i fort politik nga halli, apo është si i tillë. Shefat e tij e njohin si “nongrata”. Mesazhet janë të qarta, thotë Meta, ‘unë jam gati ta bëjë këtë luftë me këdo’”, tha Lela.

A duhet ndërruar Kushtetuta për të kufizuar Presidentin?

Më tej, Alfred Lela komentoi edhe deklratat e presidentit se në ditët në vijim do të nxjerrë video me fakte, që sipas tij do të vërtetojë kapjen e sistemit të drejtësisë nga mazhoranca. Lela u shpreh që Meta bën mirë të mos e nxjerri një video të tillë, sepse do të rikujtojë videon e vetë.

“Uroj të mos jetë video, se do jetë banale. Presidenti ka një historik me videot, edhe sikur ta ketë një video, mua nuk do më pëlqente që presidenti ta nxirrte, sepse edhe me subkoshiencë do nxjerrë kujtimin e videos së vetë. Do doja të ishte diçka substanciale, jo video. Meta është faktori numër 1 i opozitës politike”, tha Alfred Lela ndër të tjera. /Realstory.al/

Astiri, Lela: Mos mbani shpresa te premtimi i opozitës

Analisti Alfred Lela tha se çdo opozitë para se të vijë në pushtet premton botën, por më pas harron çdo gjë. Ai tha se këtë premtim e bëri Rama në 2013 dhe tani Basha. Në studion e emisionit “Real Story”, Lela tha se kjo është një ‘festival teatror” që bëhet vazhdimisht nga politika dhe se banorët nuk duhet t’i besojnë asnjë premtimi të opozitës.

“Banorët mos t’i besojnë premtimit të marrë sot nga opozita. Në 2013 ua premtoi edhe Rama. E bëjmë premtimin, pastaj e harrojnë, e pastaj dalin me popullin se po të ishin në pushtet, ndoshta do e kishin bërë dhe vetë. Opozitat kanë një huq. Kur janë në opozitë të premtojnë botën. I them të gjithë banorëve që të mos besojnë asnjë premtim që i bëhet. Është një festival teatror që bëhet nga politika” tha Lela.

Lela shtoi se përplasja tek Astiri për prishjen e banesave ishte një strategji e qeverisë për të parandaluar precedentin e Kukësit, e vetmja protestë që ka trembur bazamentet e qeverisë.

“Ka qenë strategjia për të parandaluar precedentin e Kukësit. E vetmja herë kur janë tronditur bazamentet e qeverisë përballë një proteste ka qenë ajo e Kukësit, duhet ta pranojmë. Unaza e Re është e spërkatur me një korrupsion të njohur, të pranuar, të anuluar dhe kjo ka qenë një nivel i tretë që i shtohet përpjekjes për ta menaxhuar, neutralizuar pa zhurmë”, tha Lela. /Real Story

“Mungesa e drejtësisë sjell akte mafioze”

Mungesa e drejtësisë dhe lidhjet e krimit me politikën janë arsyet se pse ndodhin atentate tipike mafioze në vend si ai ndaj prokurorit Arjan Ndoja. Pikërisht ky ka qenë diskutimi në emisionin “Real Story” , ku analistët thanë se mungesa e drejtësisë dhe e dënimeve për përgjegjësit, ka bërë që krimi të shtrijë dorë thellë në çdo drejtim. Analisti Skënder Minxhozi e cilësoi atentatin ndaj prokurorit si ngjarje që erdhi nga një drejtësi e munguar. Minxhozi tha se njerëzit e drejtësisë janë të përlyer dhe se për shkak të kësaj askush nuk shkon në burg apo dënohet. Në emisionin “Real Story” Mnixhozi tha se vendi është bërë më keq se jugu i Italisë në vitet 1970 dhe shoqëria është e kriminalizuar në një shkallë shumë të lartë. Sipas Minxhozit shpëtim mund të shihet vetëm te drejtësia e re, por që shprehu rezerva për procesin e Vetingut

“Duket sikur jetojmë në jug të Italisë në vitet ’70, sepse kemi të vrarë. Këtu tek ne është më pak e lavdishme, sepse njerëzit e drejtësisë janë të përlyer. Kjo është një ngjarje e mbartur nga një drejtësia e munguar. Kjo tregon se sa thellë ka hyrë në indin njerëzor krimi dhe kriminalizimi. Kjo shoqëria është e kriminalizaur në një shkallë shumë ta lartë. Këtu nuk hyn askush në burg, por dalin të gjithë të pafajshëm. Nuk hyn njeri në burg që vjedh vota. Drejtësia e re duhet të bëjë drejtësi. Tek kjo kemi të vetmen shpresë, përndryshe do të shkojmë të gjithë në Gjermani te Merkel. Vettingu nuk po sitë mirë dhe imët ata që kalojnë matanë. Unë kam dyshimin se nuk është një sitë kaq e imtë dhe e kujdesshme. Nuk e shoh çështjen politikisht, por teknikisht. Edhe ata që po kalojnë vettingun kam përshtypjen se nuk janë të gjithë të virgjër”-tha Minxhozi.

Mungesa e drejtësisë që sjell akte të tilla u mbështet edhe nga analisti Alfred Lela, i cili tha se ngjarje të tilla i kemi parë më herët edhe në Shkodër, Vlorë e Durrës. “Kjo ngjarje bëri bashkë 3 pika kryesore që janë çështja e pronave, drejtësia e munguar dhe infektimi i zgjedhjeve. Më pëlqeu metafora e Vasjarit, që në fund populli e ha. Këtu te ne është populli që e ha në këtë film që është vënë në skenë nga politika dhe drejtësia.” tha Lela

Analisti Robert Rakipllari tha se kjo çështje vjen si pasojë e “tranzicionit’ që po kalon drejtësia nga e vjetra drejt të resë. “Këto ngjarje janë efekt i reformës në drejtësi ku krimi, prokurorët dhe politika po mundohen t’i zgjidhin sa më shpejtë çështjet që të mos mbeten në dorë të drejtësisë së re që po vjen. Kjo drejtësi “tranzitore” që kemi aktualisht është më qesharake se ajo që kishim. Krimi është i lidhur me drejtësinë e politikën, të paktën në nivel qendror. “Rrumi” e tregoi këtë.” tha Rakipllari / Real Story

Lela ironizon Bashën: “E bëri me vilë” tërmeti i Metës, imagjino të kishte rënë ai i Pekës…

Gazetar Alfred Lela ka ironizuar kryedemokratin Lulzim Basha i cili së fundmi ka lënë apartamentin e tij për t’u zhvendosur në kompleksin e vilave “Long Hill”.

Duke u nisur nga justifikimi i kryeopozitarit i cili tha se e kishte braktisur apartamentin për shkak se ishte e shumë dëmtuar nga tërmeti, Lela thotë se “Kryetarin ‘e beri me vile’ termeti i Metes; Imagjino te kish’ rene ai i Pekes…”,

Duke e lidhur edhe Çlirim Pekën me lajmin që terrorizoi opinionin publik mbi parashikimin e tërmetit. (TemA)

Lela për Real Story: Prisja vendim ‘amerikan’, doli i ‘OSBE/ODIHR-it’

Vendimi i gjykatës së Krimeve të Rënda për dënimin e ish ministrit Saimir Tahiri me shërbim prove për akuzën ‘shpërdorim detyre’ ka qenë pjesë e diskutimit mes analistëve në emisionin ‘Real Story’ të gazetarit Sokol Balla. Analisti Alfred Lela e quajti këtë vendim sikur ta kishte marrë “OSBE/ODIHR-i” që ngatërronte ca gjëra dhe në fund nuk thoshte asgjë, ndërkohë që ishte përgatitur për të marrë një vendim të prerë si të ishte një vendim “amerikan”.

“Tahiri u shfaq i tronditur nga lumturia pas vendimit dhe jo i frikësuar siç e kemi parë më herët. Megjithatë prisja një vendim amerikan, por në fund doli një vendim i OSBE/ODIHR-it që ngatërronte ca gjëra dhe në fund nuk thoshte asgjë.’ u shpreh Lela për Real Story.

Ndërsa për Skënder Minxhozin, Saimir Tahiri ishte bërë hasha nga PS dhe që ai do të dënohej në një farë mënyre as që diskutohej. Minxhozi tha se vendimi i gjykatës për Tahirin bëri një gjetje të mes, ku e shpalli fajtor, por nuk e bëri kriminel.

‘Sajmir Tahiri është bërë hasha nga PS, është përjashtuar, prej kohësh ishte një murg politik brenda saj. Tahiri është një i dënuar brenda grupit të tij politik ku askush nuk i flet me gojë. Ai ka vlerë zero për Ramën. Ky vendim për mua është një gjetje e mesme për t’i thënë Tahirit se që do dënohesh nuk diskutohet, por kriminel nuk po të bëjmë.” – është shprehur Minxhozi / Real Story

Sulmove Real Story? Ia fute kot prapë Lul (thotë Alfred Lela)

Nga Alfred Lela

Realstory është përmendur me emër e mbiemër ashtu, si dhe Skënder Minxhozi, analist i emisionit Real Story, por edhe ‘armiku’ tashmë i përbetuar i PD, Mero Baze. Edhe pse nuk është cituar me emër aty është edhe Politiko.al, portali që unë drejtoj. Nga dokumenti në fjalë: “Kjo strategji antiopozitare përfshin portalet e njohur në publik për qëndrimet kritike ndaj Qeverisë dhe që, deri para pak muajsh, në linjën e tyre editoriale ishin në përkrahje të plotë të vendimeve të Partisë Demokratike dhe lidershipit të saj. Strategjia e financimit të këtyre portaleve nga Edi Rama bëhet me kushtin që ato të ruajnë dukjen kritike të Qeverisë- për të krijuar perceptimin e gabuar të një portal opozitar- dhe të shtojnë akuzat, lajmet e rreme, gjysëm të vërtetat dhe mashtrimet kundër Partisë Demokratike dhe lidershipit të saj, duke sajuar “probleme” apo duke bërë pseudo-analiza me fakte të shtrembëruara. Qëllimi është për të goditur dhe ulur besueshmërinë e Partisë Demokratike, në mënyrë që të krijojnë perceptimin e gabuar se “të gjithë janë njësoj”.

Unë e kuptoj këtë strategji të Bashës dhe e ka të marrë borxh nga Berisha, se ai nuk mendon dot në kokë të vet: ata që nuk janë plotësisht ushtarë dhe në rresht, nuk janë tanët se nuk janë shërbëtorë të plotë, kështuqë është më mirë t’i shpallim kundërshtarë dhe t’i fusim në rradhët e armiqve politikë. Të djathtët që guxojnë të mos mendojnë si ata, janë më pak shqetësues nëse nuk pranohen si të djathtë dhe futen te mercenarët dhe armiqtë.

Mirë bëjnë. Një media që është kritike me të dy palët politike vetëm i shton pikët vetes. Sa i takon mjerimit afilozofik se ata që nuk mendojnë si Basha i shërbejnë Ramës dhe e bëjnë për të luajtur lojën të gjithë janë njësoj, ‘sorry Lul’ por Basha me këtë anatemë ndaj medias dhe gazetarëve dëshmon se ti je njëlloj me Ramën, veç ke më pak ngjyra se ai.

Edhe një gjë tjetër: e kam lënë njëherë një punë dhe detyrë të mirëpaguar për të mbrojtur ty dhe kuazat e tua humbëse, para dy vitesh nëse të kujtohet. (Ironia është se ti tani je bërë mik me Çilin dhe më shpall mua armik). Nuk mund të vazhdojmë të humbasim për ty, ndërsa ti bën sikur ke humbur për të gjithë dhe në emër të të gjithëve, por një dorë e mban gjithmonë ngrohtë në xhepin e fitimeve.

Opozita bën gabimin më të madh nëse pajtohet me këtë linjë të lidershipit apo liderit pa ship (anije) dhe vendos të braktisë Realstory, një prej formateve kryesore të debatit politik në vend. Unë e di se synohet që të çmontohet emisioni duke hequr debatin, megjithatë një emision televiziv ka shumë mënyra për ta mbushur minutazhin. Nëse opozita dhe përfaqësuesit e saj i shpallin luftë, nuk kanë pse të presin përunjësi prej Ballës dhe RS.

Është bërë një gjë e ngjashme nga një prej njerëzve të komunikimit të PD edhe me Muç Nanon dhe emisionin e tij dhe kanë qenë gabim atëherë sic është gabim edhe ky ‘dokument’ i tanishëm’. Ky dokument vërteton atë që Basha kërkon të heqë nga b… e vet: të gjithë janë njësoj. Ky dokument e bën atë të barabartë me Ramën.

Le të ndërrojnë vendet në KM kur të duan, nuk ka pse të ketë gëzim as hidhërim për njërin dhe as tjetrin. Duhet parë përtej tyre tashmë. Përfundimisht./Realstory.al/

Sqarim: Editoriali i kushtohet qarkores së PD-së që sulmon mediat!

MERO: TURPI I LULIT. BALLA: NE VAZHDOJMË, ATA GABOJNË

BASHA SHPALL ARMIK REALSTORY: PËRGJIGJJA JONË, HESHTJA

KULLURI DËRRMON BASHËN PËR DOKUMENTIN KUNDËR MEDIAVE

Alfred Lela: Mos gjykoni amerikanët, gjykoni Bashën

Nga Alfred Lela

Partia Demokratike, nëpërmjet një zyrtari të lartë, e përgënjeshtroi një lajm që qarkulloi në fillimjavë në disa media, përfshirë edhe Politiko, megjithëse ne e kishim të konfirmuar me burime të sigurta. Lajmi gjeneronte frikë për shpresat opozitare, duke qenë se Amerika, miku dhe partneri më i madh i Shqipërisë, një fuqi që në qarqet e djathta shihet me nderim dhe simpati, edhe kur agjendat e të dy palëve nuk përputhen, po shfaqej hapur në krah të qeverisë dhe të Ramës.

Në këtë kontekst qarkullimi i një lajmi të pakonfirmuar zyrtarisht nga Ambasada (kur ata nuk e mohojnë janë duke i pranuar vërtetësisë), sipas të cilit Daniel Koski, zv/ shefi i Misionit, gjatë një vizite blic në zyrat e Bashës dhe Kryemadhit i kishte paralajmëruar se, nëse opozita dhe mbështetësit e saj ushtrojnë dhunë më 30 qershori dhe në pararendje të tij, Departamenti i Shtetit do t’i klasifikonte partitë e tyre si ‘organizata të dhunshme’.

EUReporter e përsëriste të mërkurën këtë ‘variant amerikan’ duke iu referuar edhe Koskit, ‘amerikanit misterioz’, por edhe një burimi diplomatik në Tiranë. Të enjten pasdite, pak orë pas daljes së presidentit Meta me një datë të re zgjedhjesh, Mathew Palmer, krejt ndryshe nga mbiemri, nuk sillte një palmë, por një thikë në brinjët e përpjekjes opozitare, duke njohur jo 13 tetorin e Metës, por 30 qershorin e Presidentit si datë zgjedhjesh.

Të djathtët i has ngado duke pyetur të hutuar ‘pse po na e bëjnë këtë amerikanët?”. E shohin si ‘tradhti’ këtë kalim të amerikanëve në krahun e ‘të kuqve’, megjithatë e kafshojnë gjuhën.

Po pse Washington-I, si përmes zyrtarëve të Departamentit të Shtetit, ashtu edhe atyre në Ambasadë, nuk ka lëshuar asnjë fije pe sa i takon zgjedhjeve dhe mbajtjes së tyre më datë 30 qershor? Edhe vetë socialistët nuk besojnë aspak se amerikanët e duan kaq shumë Ramën, sa nuk duan të shohin t’i hyjë gjemb në këmbë.

Nuk ka sekret te fakti se amerikanët i bëjnë punët me qeveritë, jo me opozitat. Këto të fundit janë gjithmonë partnerë-në-pritje të cilëve u duhet që të kalojnë gjithashtu ‘provën amerikane’. Përtej pragmatizmit ritual Washington-i ka edhe shtysa të tjera: së pari, rreziku i përhapjes së precedentit në vendet e tjera ballkanike, nëse i jepet vistoja një date zgjedhjesh alternative. Së dyti të mos harrohet një prani gjeopolitike shtesë dhe e rëndësishme, kampi i muxhahedinëve iranianë. Një trazirë politike dhe sociale do të ekspozonte rreziqe të paparashikuara për praninë e aleatëve anti-ajatollahë, që kanë bërë strehë në Manzë të Durrësit. Të mos harrojmë se kryeministri e pat akumuluar një bonus me amerikanët kur përzuri dy diplomatë të lartë të Ambasadës së Iranit.

Me të drejtë, dikush mund të mendojë se Rama ka humbur po aq pikë në ëashington, kur e shpalli, asokohe kandidatin Republikan për president, Donald Trump si ‘turp të qytetërimit’. Kush mund të thotë se, shumë në Washington dhe sidomos në Departamentin e Shtetit, nuk mendojnë ashtu si Rama, edhe sot e kësaj dite?

Pa dyshim, kali më i madh ku amerikanët e kanë vendosur bastin e tyre është reforma në drejtësi. Paradoksalisht, kryeministri e ka mbështetur këtë sponsorizim amerikan, edhe pse shumë ngulmojnë se ai do duhej të ishte koka e parë e rënë nën ndëshkimin e drejtësisë së re. Sido që të jetë, amerikanët kanë gjetur te Rama një partner (gjasat janë me be në rrenë, por ky është problem i tyre) më të sigurt se te counterpart-i i tij, Lulzim Basha. Shefi i opozitës në terminologjinë politike amerikane do të quhej flip-flopper, pra një njeri që ‘ndërron mendje’ apo, ne një kuptim më shqiptar, nuk e mban fjalën.

Basha e pat marrë një bonus para dy vitesh, kur ai e radikalizoi skenën politike, u fut në çadër, kërkoi me ngulm rrëzimin e qeverisë, ia arriti të marrë gjysmën e saj, e me radhë. Dora amerikane u shtri drejt Bashës duke prodhuar për të një pakt që e bëri të dukej fitues liderin e ri të opozitës.

Tani që Basha është vënë në rolin e vjetër të boy who cried wolf (ujku, ujku…), amerikanët nuk duan të dëgjojnë më. Ata ia kanë dhënë pass-in Bashës njëherë, një ekzigjencë që e kanë përdorur për të gjithë liderët politikë shqiptarë.

Ne duhet t’i gjykojmë për të gjithë njëlloj.