Shkarkimi, Mema mesazh Halilit: Më duhet qetësi

Ardian Mema foli në konferencë për shtyp të premten në prag të ndeshjes me Laçin. Ai foli fillimisht për veten, duke u shprehur se ndeshjet e fundit është vënë nën presion. “Ndeshjet e fundit kanë sjellë disi presione në skuadër aq më tepër te unë, nuk flas në emër të skuadrës por në emrin tim. Kjo më vë mua disi në presion sepse pretendohet që ndeshjet e Tiranës të fitohen, duke qenë se këtë vit është ekip elitar. E rëndësishme është që të fitohen ndeshjet. Ekipi ka luajtur shumë mirë, nuk ka pasur probleme tekniko fizike dhe tekniko taktike”, tha Mema.

Sipas tij, në ndeshjet e fundit skuadra nuk është ndihmuar nga fati. Për këtë arsye, trajneri Mema i shkoi shumë pranë shkarkimit nga detyra, por u ribesua nga presidenti Refik Halili. Në konferencën për shtyp, Ardi Mema i dërgoi një mesazh presidentit, duke i kërkuar qetësi. “Fakti që është edhe 100-vjetori i klubit, na vë pak në presion. Unë nuk jam magjistari apo profeti i futbollit, që të them se nesër do fitojmë, dhe do largohem kur të dua unë. Drejtuesit duhet të kuptojnë, se klubit i duhet qetësia. Duhet të shikojmë nga e ardhmja. Nëse gjërat na dalin nga kontrolli, do kemi edhe probleme. Kemi qenë pushim këto kohë, tani do e shohim nesër në fushë”, tha Mema.

Ndonëse luan mirë, rezultatet e tre ndeshjeve të fundit nuk ishin në të njëjtin raport me lojën. Po çfarë nuk shkon te Tirana, që lojën e bën të mirë, por rezultatet mungojnë? Ardian Mema shprehet se shkaku janë gabimet. “Për këtë flas më shumë me lojtarët. Duke qenë se kemi pasur fatin e keq, duhet të kemi akoma më shumë përqendrim. Nuk kemi një kundërshtar që na ka mbajtur në fushën tonë. Fati është pjesë e lojës. Nuk duhet t’ia lëmë gjërat në dorë të fatit. Ca punë duhet t’i bëjmë akoma më mirë. Kjo nuk është për të justifikuar lojtarët, por për t’i vënë me këmbë në tokë që të jemi më të përqendruar”, tha Mema.

Në fund ai foli dhe për përballjen me Laçin. Objektivi janë tre pikët, por së pari kërkon që skuadra të jetë e përqëndruar dhe të mos pësojë gola. “Mendoj se ndeshjet me Laçin kanë qenë të forta. Është ekip me ekuilibër. Të godet në momente të caktuara, me lojtarë të mirë. Ky ekip, vjet e kemi pasur problem. Nuk është se na pritën miqësisht. U treguan të egër me ne. Ne nuk kemi armiq, por kemi kundërshtar. Çdo ndeshje e konsiderojmë kundërshtarin sipas radhës, por nuk i ndajmë, i mirë apo i fortë, në kuptimin e egërsisë. Laçi ka ekip të mirë dhe nuk duhet të kishte aq pikë sa ka. Nesër në ndeshje, do jetë e luajtur fort, shpresoj të kemi fat, e të mos pësojmë gola që nuk duhej t’i pësonim”, tha ndër të tjera Mema.

Mema konfirmohet, por me kusht…

Ardian Mema do të vijojë të jetë trajneri që do të drejtojë Tiranën. Pas zërave se ai do të shkarkohej për shkak të rezultateve të dobëta të skuadrës, duket se Mema ka arritur në marrëveshje me presidentin e klubit Refik Halili.

Marrëdhënia mes Memës dhe Hallit pësoi krisje fill pas humbjes në derbi kundër Partizanit, ku Halili në mënyrë indirekte bëri përgjegjës trajnerin dhe stafin, një humbje e cila u pasua me një tjetër rezultat zhgënjyes, barazimi 2-2 kundër Flamurtarit. Sipas Balkanweb palët kanë negociuar gjatë këto ditë, ku kërkohej një ndërprerje e kontratës me mirëkuptim dhe të bëhej jë largim i butë i tij. Detajet e kontratës, ana financiare dhe emri i madh që përfaqëson Mema për klubin bardheblu kanë bërë që palët t’i japin më shumë kohë njëri-tjetrit me shpresën që situata do të përmirësohet pas pauzës që vjen nga angazhimi i Kombëtares. Por eshte konfirmim me kushte. Nuk eshte hera e parë që kjo ndodh me Tiranën. Trainerë të mëparshem janë rikonfirmuar ne situata të ngjashme, por janë shkarkuar pas pak javësh. A do të ndodhë kështu edhe me Memën?

Tirana shkarkon trajnerin Ardian Mema?

Një lajm i shpërndarë në rrjetet sociale nga faqja Superliga Shqiptare 81, tregon se Ardian Mema nuk është më trajner i Tiranës. “Ardian Mema nuk është më trajneri i Tiranës. Presidenti Refik Halili ka marr vendimin përfundimtarë për trajnerin Ardian Mema, 1 pikë në 3 ndeshje nuk i kanë pëlqyer numrit 1 të bardhebluve. Superliga Shqiptare 81 ka mësuar ekskluzivisht se Ardian Mema nuk do të jetë më teknikun i bardhebluve. Zyrtarizimi ka munguar deri ns këto momente për arsyjen e mbylljes me konsensus të kontratës që Mema ka me bardheblutë. Në listë për të zëvëndësuar teknikun Mema janë Bledar Devolli Julian Ahmataj por ende nuk ka asnje marrveshje për pasuesin e Memës”, shkruan faqja në rrjetet sociale.

Megjithatë, ndonëse ditët e fundit është folur shumë për një divorc të trajnerit Mema me klubin e tij të “zemrës”, nga klubi i Tiranës nuk është konfirmuar asgjë zyrtare. Një burim i rëndësishëm i tha Realstory.al, se “nuk ka asgjë zyrtare për shkarkimin e trajnerit. Ekipi ishte dy ditë pushim, ndoshta të nesër del në stërvitje”. Tirana pati një nisje të mirë të sezonit, por në tre ndeshjet e fundit të kampionatit, skuadra bardheblu pati një ndalim të rezultateve pozitive, që nisën me humbjen në ndeshjen ndaj Kukësit dhe në derbi ndaj Partizanit.

Derbi me Partizanin, Mema: Mezi po pres

Tirana ka dy sfida të rëndësishme në pak ditë. Së pari është Kukësi dhe më pas vjen derbi ndaj Partizanit. Katër ndeshje, asnjë humbje, 10 pikë të grumbulluara dhe kryesim i kampionatit. Ardian Mema ka dalë në konferencë për shtyp, duke folur për të gjitha këto. Së pari e ka nisur me rivalin e të shtunës, Kukësin, duke u shprehur se është një ekip cilësor, ndërsa objektivi është rezultati pozitiv. “Kukësi është një ekip shumë i fortë, ka elementë mjaft cilësore brenda vetes, duhet menaxhuar shumë mirë ndeshja nesër. Na duhet ta përgatisim mirë ndeshjen. Shpresojmë të bëjmë më të mirën nesër dhe të kemi një rezultat pozitiv. Për ekipet e elitës, ndeshja e nesërme, dashje pa dashje është test. Ka të bëjë shumë edhe me vazhdimësinë e ekipit. Ideja është që këtë ekipe duhet të mirë menaxhohen dhe nuk duhet të humbasësh”, ka thënë Mema.

Tirana do të ketë disa lojtarë që rikthehen dhe do të jenë të gatshëm për takimin ndaj Kukësit. Agostin Torasa është prej tyre, ndërkohë që Andi Lila ende nuk është gati për të luajtur. “Torasa është pjesë e grupit nesër. Nuk do ta fillojë nga fillimi por do të jetë pjesë e grupit. Ndryshe nga viti i kaluar, Kukësi ka kontingjent të ri lojtarësh, por i kanë ikur lojtarë të rëndësishëm si Shameti dhe Rama, por edhe i kanë ardhur disa lojtarë. Andi Lila do kohën e vetë, akoma nuk është gati. Stërvitet intesivisht, shpresojmë që të kthehet shumë shpejt. Secila skuadër ka specifikat e vete. Mendoj që nesër duhet të jemi të përqëndruar. Të jemi ne fitimtarë dhe të jemi ne që ta diktojmë ndeshjen dhe të arrijmë ato çfarë shpresojmë ne si skuadër”, ka thënë Mema.

Ndonëse në aspektin e rëndësisë, ndeshja me Kukësin është po aq e rëndësishme, për trajnerin Ardian Mema, derbi me Partizanin pritet me padurim. Sipas tij, ky i këtij viti, nuk është si Partizani i sezonit të kaluar. “Partizani ka pasur një ecuri jo të mirë këto ndeshje. Elementët brenda ekipit i ka. Çdo gjë varet nga periudha, lojtarët, trajneri i ri. Shpresojmë fillimisht të kalojmë Kukësin dhe pastaj të shohim për Partizanin. Tifozët e Tiranës mezi e presin atë ndeshjen për ta fituar. Unë padashje e kam parë Partizanin me Kukësin dhe në finalen e Superkupës, kam parë edhe ndeshjet e tjera. Nuk ka qenë primare të shikoj Partizanin se kam parë ekipet kundërshtaret. Nuk mund ta mendoj që javën e parë si mund të luaj me Partizanin. Nuk është Partizani i vjetshëm, kjo është e vërtetë”, ka thënë Ardi Mema.

Tirana ka 100 vjetorin, Mema: Të bëjmë më të mirën për festuar me titullin kampion

Tre ditë pasi mundi Luftëtarin 3-0 në ndeshjen hapëse të kampionatit, Tirana rikthehet përsëri në “Selman Stërmasi”, për të luajtur ndeshjen e radhës në Superligë. Të martën në orën 19:00 ekipi bardheblu do të përballet me Teutën, që gjithashtu e nisi me fitoren kampionatin këtë sezon. Trajneri Ardian Mema ka dalë në konferencë për shtyp një ditë para ndeshjes, ku është shprehur se ndeshja ndaj ekipit durrsak, do të jetë nga më të vështirat e sezonit.

“Nesër është një nga ndeshjet më të vështira, por unë besoj te ekipi. Kemi lojtar me kualitete, do të jetë ndeshje e fortë. Duhet ta menaxhojmë mirë, pasi nesër kemi testin real. E njëjta situatë është edhe për kundërshtarët. Ne do t’i përgjigjemi kalendarit, por është edhe periudhe e nxehtë”, ka thënë Mema.

Më tej ai ka folur për pritshmëritë që ka nga skuadra, duke u shprehur se Tirana do të fitojë një trofe këtë sezon, pse jo dhe titullin, duke pasur parasysh faktin që feston 100 vjetorin e krijimit si klub. “Tirana është mësuar me titullin edhe pse ka 10 vite pa titull. Tirana ka 100 vjetorin dhe për këtë duhet të bëjmë më të mirën, por nuk fitohet vetëm duke thënë se është 100-vjetori. Ndeshjet duhet të merren hap pas hapi”, ka thënë Mema.

Në fund ai ka folur dhe për formacionin dhe përzgjedhjen që ka bërë midis dy sulmuesve, Michael Nggo dhe Ismael Dunga. Sipas Memës, nuk do të ketë kurrë një formacion fiks, por do të shihet në varësi të ndeshjeve. “Formacioni nuk do të jetë gjithmonë i njëjti. Ndoshta Ngo dhe Dunga do t’i shohim gjatë sezonit, por Hasani është numri 10 dhe nga sezoni i kaluar, e vështirë ta ndërroj. Unë shpresoj që nesër të ketë edhe më shumë tifozë”, u shpreh trajneri bardheblu.

Tirana kërkon 3 pikë në nisje, Mema: Presim ende përforcime

Ardian Mema u rikonfirmua në krye të Tiranës në fund të sezonit të kaluar, dhe pati mbështetjen e presidentit Refik Halili për të blerë çdo lojtar që donte. Tashmë klubi bardheblu nis një sezon të ri, pasi la pas një histori të vështirë me luftën për mbijetesë dhe problemet e liçensimit. Në konferencë për shtyp, një ditë para nisjes së kampionatit, Ardian Mema është dukur me këmbë në tokë, duke treguar se ndeshjet do t`i mari një e nga një.

“Duhet të fillojmë një kampionat agresiv, në pjesën e parë të kampionatit. Po ta shohësh, ekipet që kanë qenë agresive që në fillim, kanë shkuar edhe drejt titullit. Do i marrim ndeshjet hap pas hapi, dhe do shohim ecurinë e ekipit. E rëndësishme është që të kemi një fillim të mbarë, dhe jo si ka ndodhur në vitet e kaluara. Duke bërë një analizë të viteve kaluara, duhet të shohësh edhe ecurinë tënde, pritshmëritë që i kanë të gjithë. Shpresojmë dhe besojmë te ekipi, që do bëjmë hapa pozitivë”.

Ndaj Luftëtarit, trajneri i bardhebluve kërkon 3 pikë, ndërsa ka treguar se merkato për Tiranën ende nuk është mbyllur. “Për mua, rëndësi kanë 3 pikët. Me çdo skuadër, 3 pikët janë të vlefshme, si me Partizanin, Kukësin, Durrësin apo ndonjë tjetër. Janë 3 pikë në fund. Kjo na intereson, jo se si janë përgatitur ekipet e tjeram apo se çfarë problemesh kanë pasur. Nesër vjen Kristi Vangjeli. Jo më larg se dje, kam biseduar edhe me presidentin, për një lojtar tjetër me të cilin po negociohet në dijeninë time. Mund të mbyllet gjithçka që sot. Shpresoj që në ekip të vijnë lojtarë me cilësi, ato do bëjnë edhe diferencën si dhe për konkurrencën e ndershme. Do jetë pjesa ime, për të vendosur se kush do jetë i gatshëm për të luajtur në formacion”, ka thënë Mema.

Në ndeshjen e fundit miqësore atë ndaj Bylisit, edhe pse ndeshja u fitua me rezultatin 5-1, Ardian Mema beson se këto shifra nuk ishin reale. Sipas tij, Tirana u ‘shkun’ pas ndeshjes me Bylisin. “Ndaj Bylisit në miqësore ishte një ndeshje jo e mirë për ne, që na shkundi disi, për sa i përket lojës. Kemi bërë edhe lojëra të mira, por edhe pas miqësores së fituar 5-1 ndaj Bylisit, e thashë që rezultati nuk ishte real. Kjo na bën, që edhe kur luajmë keq, t’i thërrasim mendjes se si luajmë dhe përqendrimit. Ngelet për t’u parë në vazhdimësi, vera ka ato oshilacionet e veta. Stërvitjet jaën disi ndryshe nga kampionati. Aty përgatitet një cikël javor. Megjithatë, jo çdo miqësore duhet marrë parasysh, për të mirë apo për të keq. Duhen parë ku i ke ato pikat e dobëta. Duhet punuar dhe për t’i parë gjërat më ndryshe, që ta rrisësh ekipin”.

Tirana një hap para rivalëve, prezanton dy lojtarë të rëndësishëm për sezonin e ri

Tirana ka nisur punën për sezonin e ri, duke firmosur me dy lojtarë, nga më të mirët në kampionatin tonë. Bëhet fjalë për argjentinasin Agustin Torasa dhe brazilianin Elton Cale, të dy futbollistë që sezonin e shkuar luajtën me Flamurtarin.

Me argjentinasin, skuadra bardheblu ka nënshkruar një kontratë një vjeçare me opsion rinovimi edhe për një tjetër vit. Ai do të bashkohet me ekipin bardheblu në fillim të muajit tjetër, kohë kur skuadra do të nis përgatitjet për sezonin e ri.

Ndërkohë, mesfushori Elton Cale ka nënshkruar një kontratë dy vjeçare me ekipin bardheblu, duke u bërë një nga afrimet më të rëndësishme për skuadrën, që edhe sezonin e ri do të drejtohet nga Ardian Mema.

Elton Cale është ish-futbollist i Flamurtarit sezonin e shkuar, ekip me të cilin u aktivizua shumë pak për shkak të problemeve gjyqësore që pati mes Flamurtarit dhe Kukësit, ndërsa tani pritet që braziliani të japë kontributin e tij për përmbushjen e objektivave të Tiranës.

Më herët, Tirana njoftoi zyrtarisht edhe nënshkrimin e kontratës së re me trajnerin Ardian Mema, i cili do të vijojë të drejtojë për një vit skuadrën bardheblu.

Tashmë pritet që në skaudër të ketë afrime të tjera, teksa ende nuk janë bërë të ditur lojtarët që do të largohen nga klubi, të cilët nuk janë në planet e trajnerit për sezonin e ardhshëm.

Të dielën finalja, Ardi Mema: Nëse fitojmë Kupën e Shqipërisë, harrojmë disa gjëra!

Tirana do të përballet të dielën me Kukësin në finalen e Kupës së Shqipërisë, me ndeshjen që është vendosur të zhvillohet në stadiumin “Elbasan Arena”. Trajneri i skuadrës bardheblu, Ardian Mema, ka folur në konferencë për shtyp një ditë para kësaj ndeshje. Mema u shprehur se ekipi ka bërë ndeshje të mira gjatë sezonit, por, shton ai, Tiranës nuk i pranohet kjo gjendje, ndaj duhet të ulet për të analizuar gjithçka me drejtuesit.

“Tirana ka bërë shumë ndeshje të mira, të paktën shumica. Mund të bëjmë gjëra më të mira, por kjo i takon të ardhmes. Klubi dhe unë duhet të ulemi të bëjmë analiza të thella, pasi bëhet fjalë për tre sezone dhe nuk janë pak, që Tirana nuk del në origjinën e saj. Më kanë thënë urime pas ndeshjes, por ajo që them unë që është e turpshme kjo gjendje e Tiranës”, ka thënë Mema.

Lidhur me takimin ndaj Kukësit, trajneri i bardhebluve është shprehur se skuadra nuk duhet të humb ritmin. “Nuk do ta ulim ritmin asnjë moment. Është ndeshje e fundit dhe i vendos kapakun të gjithave. Për mua sezoni nuk është i suksesshëm, pasi Tirana ka diskutuar mbijetesën deri në javën e fundit. Nëse fitohet kupa ndoshta kjo nuk është gjë e mirë që ta them, por do të harrohen disa gjëra. Nuk mund të harrohen kurrësesi, pasi në futboll duhet të kujtohen gabimet dhe jo rezultatet e mira”, është shprehur Ardi Mema.

Ai ka folur dhe për liçensimin e klubit për kupat e europës, pasi Tirana nëse fiton Kupën e Shqipërisë, do të luajë në Europa League. “Kjo është një pyetje që duhet t’i bëhet zyrtarëve të Tiranës. Detyra ime është të punoj dhe të luftoj për të fituar Kupën. Pjesa tjetër janë raportet e Tiranës dhe federatës. Është një pyetje që mund të drejtohet te shefi i klubit. Të them të drejtën di diçka, por jam trajner dhe duhet të fitoj çdo gjë. Nuk më intereson kjo pjesë. Hapi i radhës është Kupa dhe më duhet ta fitoj”, ka përfunduar trajneri.

Derbi me Partizanin, Mema: Do bëjmë gjithçka për të fituar!

Tirana do të përballet me Partizanin në ndeshjen e katërt derbi dhe të fundit për këtë sezon. Një ditë para kësaj sfide, trajneri i ekipit bardheblu, Ardian Mdma ka folur në konfernecë pêr shtyp duke analizuar situatën në ekipin e tij.

NDESHJA ME PARTIZANIN – “E kemi përgatitur ndeshjen dhe do luajmë për tre pikë. Na nevojiten pikët dhe kjo është më e rëndësishmja për ne. Gjithsesi, gjithçka do të tregojë fusha dhe loja e nesërme. Do bëjmë maksimumin për të marrë pikët dhe të shohim përpara.”

ANA PSIKOLOGJIKE DHE PRESIONI I DERBIT – “Si anë psikologjike është e mirë, pasi vijmë nga dy fitore radhazi. Presioni në derbi është gjithmonë. Sido që të ishte renditja do të kishte presion. Është ndeshje historike dhe janë dy ekipe të mëdha.”

LUMTURIA E PRISHJES SË FESTËS SË PARTIZANIT – “Ne lumturohemi nga rezultati jonë. Nuk më shqetëson pjesa e kundërshtarit. I bëj yzmet punës dhe ekipit tim. Nuk luajmë për të prishur festën e Partizanit, por për veten tonë. Kemi problemet tona dhe janë evidente.”

FITORJA NË DERBI – “Tirana ka kohë që nuk fiton ndaj Partizanit dhe do të ishte një dhuratë për këtë fund sezoni për tifozët.”

EKIPI – “Kam qenë duke bërë analizën me skuadrën. Problemet kanë qenë evidente, siç i kam parë në fushë. Duhet të bëjmë riparimet e duhura, pa parë kundërshtarin. Nëse skuadra jonë do luante me përqendrim, nuk do flisnim fare për mbijetesën tani. Duhet një analizë edhe për vetë lojtarët, që të përmirësohen dhe të bëjnë përpara, ashtu si duhet të bëj unë analizë për veten dhe klubin.”

ALBAN HOXHA NUK DO RËNIEN E TIRANËS – “Po të ishim në role të kundërta, edhe unë ashtu do thosha. Tirana e Partizani, përtej rivalitetit në derbi, kanë bërë historinë e njëra-tjetrës. Historia shkruhet nëpërmjet fakteve dhe dueleve ndër vite, Partizani-Tirana ka qenë ndër më të mëdhenjtë.”

PËRZGJEDHJET E LOJTARËVE DHE MERKATOJA E TIRANËS – “Në fund të sezonit do të bëhet një analizë e thellë, për të kuptuar gabimet që kemi bërë dhe për të mos i bërë në të ardhmen.”

MUNGESAT E PARTIZANIT – “Ka goxha elemente të mirë, përtej mungesave, që janë shumë të rëndësishme. Mensah e doja në janar, por nuk u arrit marrëveshja. Po ashtu, Asani është lojtar që më pëlqen shumë, ashtu si Telushi. Është favor për Tiranën që Partizani ka këto mungesa dhe duhet ta shfrytëzojmë këtë moment.”

TIRANA SHPESH FAVORITE NË DERBI, POR ASNJË FITORE PREJ VITESH – “Nuk e di këtë, është subjektive. Këtë vit kemi humbur një derbi që nuk duhej ta humbnim, kemi barazuar në një ndeshje që mund ta fitonim. Fjala favorit në derbi nuk ka shumë vlerë, mendoj se përqendrimi maksimal jep rezultat në derbi. Nuk ka favoritë, është presion artificial kur flitet për favoritë ose jo. Karikimi është i detyruar, por favoritin e vendos fusha. Jemi duke luajtur mirë prej disa ndeshjesh, duke përfshirë ndeshjet ndaj Luftëtarit, që e ka mundur bindshëm Partizanin. Kemi gabuar në disa momente në mbrojtje, si shpesh këtë sezon, por nesër ekipi do jetë i karikuar mirë, vetëvetiu, pa qenë nevoja të flas unë.

PARTIZANI THUAJSE KAMPION, FAVOR PËR TIRANËN? – “Nuk e mendoj kështu, Partizani ka kalendar shumë të vështirë dhe nuk pres asnjë dhuratë. Tiranës nuk i ka falur askush asgjë, nuk pres të ndryshojë gjë. Kemi Partizanin dhe Kastriotin përpara, këto janë finalet tona. Nëse dalim mirë në këto dy ndeshje, gjithçka merr për mbarë dhe do të mendojmë më pas për finalen e kupës, që është mundësia e madhe për të shkuar në kupat e Eur

Kupa, Mema: Luftëtari ekip i vështirë, nuk duhet të gabojmë më!

Tirana do të përballet me Luftëtarin nesër në ndeshjen e parë gjysmëfinale të Kupës së Shqipërisë. Ky trofe mbetet i vetmi objektiv i Tiranës, megjithëse, deri në fund të kampionatit skuadra bardheblu do të luftojë për mbijetesën.

Gjirokastritët janë një ekip që kanë bërë mirë në javët e fundit, duke fituar disa takime në kampionat, të cilat e kanë larguar nga rreziku i rënies nga kategoria.

Ardian Mema e ka vlerësuar këtë fakt, duke folur për mediat një ditë para ndeshjes nga kompleksi stërvitor “Skënder Halili”.

Trajneri i ekipit bardheblu është shprehur se e ka studiuar Luftëtarin si ekip, ndërsa ka treguar se rivali i ditës së nesërme është ekip që të vë në vështirësi.

Luftëtari në formë të mirë?- “Më pëlqen shumë mënyra si luan Luftëtari, kam parë videot e tyre këto ditët e fundit dhe është kundërshtar shumë i fortë. Natyrisht, kemi marrë masat tona, tani duhet të mendojmë për dy ndeshje, jo për një. Kërkojmë rezultate pozitive, duke synuar një rezultat të mirë që në vajtjen e kupës, por realisht Luftëtari është kundërshtar i fortë, që të vë në vështirësi.

Kampionat e kupë, dy përballje në pak ditë me Luftëtarin?- “Po mendojmë për të dyja ndeshjet, kanë shumë vlerë, e para është për të tentuar afrimin me finalen, e dyta për mbijetesën. A i përballojmë dot të dy kompeticionet? Nuk kemi pasur diferenca në lojë me kundërshtarët, nuk kemi marrë pikë për probleme që i kemi evidentuar më herët. Është bërë punë, ekipi ka luajtur mirë, por ndonjëherë episodet dhe fati kanë qenë kundër nesh.

Presioni pas humbjes së fundit?- “Po, na e ka shtuar shumë presionin, por kundër Kukësit nuk e patëm përqendrimin e duhur, edhe pse ekipi nuk luajti keq, pavarësisht se renditja krijon presion. Ndoshta kam gabuar edhe unë, filozofia ime është që një ekip që sulmon e tremb kundërshtarin, por natyrisht duhet shumë kujdes edhe në aspektin mbrojtës.

Rënia, a mendohet te Tirana?- “Nuk mendoj se është e njëjta situatë me 2 vite më parë. Tirana nuk është se ka bërë atë që ka bërë vitet e shkuara, si për shembull të mos fitojë për 13 ndeshje rresht. Ne kemi fituar, ashtu si kemi lënë pikë, si në ndeshjen me Laçin për shembull, apo në Vlorë ku humbëm penallti. Me ato 3 pikë do ishte ndryshe renditja, por rëndësi ka që në vazhdim të mos bëjmë gabime të tilla.

Përballja me Ahmataj?- “E kam mik, po bën një punë shumë të mirë në Gjirokastër, është pjesë e brezit të ri të trajnerëve dhe e vlerësoj shumë për atë që ka bërë. Nesër përballemi, do t’i tregojë fusha të gjitha”.

Mema dhe deklarata që Tirana ka lojtarë mediokër?- “Nuk kam ndonjë koment, futbolli është paksa subjektiv dhe secili ka mendimin e tij. Varet për cilin e ka dhe në ç’kushte e ka thënë, por secili ka të drejtë të thotë atë që mendon, sipas këndvështrimit të vet, unë mund të kem këndvështrim ndryshe. I respektoj të gjitha llojet e komenteve, nuk mund të merrem me këto gjëra, sepse rëndësi ka realiteti”.

Ikonat e klubit po kritikojnë pa fund?- “E vërtetë, nuk është momenti për të replikuar me njëri-tjetrin, përtej problemeve personale. Tirana, familja jonë, është mbi gjithçka”.

Golat e pësuar me Kukësin?- “Ajo është pjesa që më ka ngacmuar dhe më mërzit ende, kemi dhuruar dy gola dhe duhet të tregohemi më të përgjegjshëm. Nuk mund të falim gola të tillë gjithë sezonin. Një futbollisti i kam thënë që një gabim në 30 ndeshje lejohet, por ne na ka ndodhur shpesh. Ndoshta jam unë fajtori, secili duhet të marrë përgjegjësitë e veta dhe në 99% të rasteve unë marr përgjegjësinë për gabimet që bëjmë”.