Vrau 28-vjeçarin në Astir, vetëdorëzohet në polici autori

Noel Dishi, autori i vrasjes së 28-vjeçarit Vilson Tafçiu në zonën e Astirit, është vetëdorëzuar në polici ditën e enjte. Policia konfirmon vetëdorëzimin e tij duke sqaruar se erdhi si rezultat i presionit të saj me kontrolle të pandërprera dhe bashkëpunimit me familjarët e autorit.

“Si rezultat i trysnisë së ushtruar nga ana e Policisë duke kryer kontrolleve të shtuara e të pandërprera në dhjetëra objekte, banesa, hotele, dhe godina të braktisura, informacioneve të grumbulluara dhe si rezultat i bashkëpunimit me familjarët para pak minutash u dorëzua në DVP Tiranë autori i dyshuar i ngjarjes, shtetasi Noel Dishi, alias N. K., alias M.P., 29 vjeç” njofton policia.

29-vjeçari Dishi akuzohet se vrau mikun e tij Vilson Tafçiun (Noka) pas një konflikti të çastit mbrëmjen e 20 janarit para lokalit Artisti në zonën e “Astirit” në Tiranë. Autori, i cili përdor 3 emra të ndryshëm, është nga Dibra e banues në Sukth, dhe ka qenë shok me viktimën, ku së bashku ishin në emigracion në Francë dhe në Zvicër.

Sipas grupit hetimor mes Vilson Tafçiut dhe Noel Dishit ka ndodhur një zënkë që ka prishur miqësinë, që më pas ka çuar në vrasjen e 28-vjeçarit. Viktima Vilson Tafçiu ishte duke konsumuar një kafe në lokal me dy vajza, kur është thërritur jashtë nga Noel Dishi dhe është qëlluar për vdekje me tre plumba.

“Astiri”, prishen të tjera objekte. Shuhet rezistenca e banorëve

Inspektorati Kombëtar i Mbrojtjes së Territorit prishi mëngjesin e të premtes dy objekte dy katëshe në zonën e “Astirit”. Aksioni nisi në orët e para të mëngjesit, ndërsa për të siguruar mbarëvajtjen e punës, Policia e Shtetit rrethoi zonën ku u shembën dy objektet. Megjithatë, duket se ndryshe nga disa ditë më parë, këtë herë nuk pati banorë që kontestuan shembjen e banesave.

Kështu, IKMT vijoi punën pa probleme duke rrafshuar dy objektet që i hapin rrugë zbatimit të projektit të Unazës së Re. Kujtojmë se në fillim të kësaj jave, IKMT prishi 33 objekte në zonën e “Astirit”. Por shembja e këtyre objekteve u shoqërua me përplasje të ashpra mes pronarëve të objekteve dhe policisë.

Banorët qëlluan me gurë, sende të forta dhe moltov punonjësit e policisë, ndërsa nga ana tjetër policia përdori gaz lotsjellës për shpërndarjen e tyre. Nga përplasja mbetën të lënduar disa efektivë policie dhe banorë, ndërsa janë proceduar disa persona. Mes tyre dhe ish-deputeti i Partisë Demokratike Klevis Balliu, i cili u thirr në prokurori të enjten.

IKMT ka prishur sot dy objekte dy kateshe ne zonen e “Astir”…
Gepostet von Inspektorati Kombëtar i Mbrojtjes së Territorit – IKMT am Donnerstag, 14. November 2019

“Vdiq një banor”, Pampuri: Duhet të isha më e kujdesshme

Pasi përhapi një Fake News në media dhe panik te banorët, ish deputetja demokrate Oriola Pampuri ka reaguar duke thënë se është e lumtur që gaboi me deklaratën e saj. Pampuri tha më herët se një nga banorët e Astirit u vra nga policia gjatë përplasjeve mes tyre për prishjen e ndërtesave. Pampuri shkruan se duhet të ishte treguar më e kujdesshme në lidhje me deklarata e saj, por është e lumtur që shtetasi Mahmut Himallari, që ajo e shpalli të vdekur, është gjallë dhe mirë me shëndet.

“Për herë të parë jam e lumtur, që më informuan gabim….Sot e pamë se si mundi, investimi, djersa dhe gjaku i banorëve të Unazës së Re, u hodh poshtë, u përçmua. Sot e pamë edhe ndjeshmërinë e qeverisë, edhe për objektet që ka bërë shpronësimet dhe vlerat qesharake, shumë larg vlerave të tregut. Njeriu nuk mund të rrijë pa reaguar, madje as pa u përfshirë emocionalisht, e sidomos kur ke 1 vit rresht që qëndron me ta, e në kulmin e përballjes me policinë dhe në një intervistë spontane, e rrethuar nga banorë të terrorizuar e dhunuar nga policia. Qan hallet dhe brengat. Sigurisht që të mbushen sytë me lot, kur të marrin në telefon disa nga banorët dhe të thonë që ka ndodhur gjëma, se Mahmuti ka ndërruar jetë. Fatmirësisht Mahmut Himallari është mirë me shëndet. Pastë jetën e gjatë që t’ju tregojë nipave, mbesave dhe shqiptarëve se njeriu ka forcë të përballojë gjithçka. Mahmuti është mire, po merr kurimin e duhur!

Për here të parë jam e lumtur që me informuan gabim. E pranoj që duhet të isha treguar më e kujdesshme, por si nënë, grua dhe një mikeshë e banorëve nuk mund të rrija e heshtur pas atyre telefonatave. Nuk po justifikoj gabimin tim, por po ndaj lajmin që Mahmut Himallari është mirë. I uroj shërim të shpejtë dhe durim për të përballuar gjëmën, që tashmë është e gjithë shqiptarëve” tha Pampuri.

Astiri, Basha “qetëson” banorët: Ne do t`ju kompesojmë pronën

Lulzim Basha shkoi në ambientet e Spitalit të Traumës në Tiranë, ku vizitoi disa nga banorët e Astirit, që u lënduan mëngjesin e të martës gjatë përplasjes me policinë dhe IKMT. Basha u shpreh se janë lënduar efektivë të policisë dhe banorë, të cilët kanë lënë spitalin. Sipas tij, skenari i të martës kishte synim të çonte në gjakosjen e qytetarëve për të fshehur vjedhjen e madhe.

“Një pjesë e banorëve nuk janë shtruar në spital. Janë lënduar edhe efektivët e policisë që kanë lënë spitalin. Ky është një bilanc nga një skenar që kishte për qëllim të çonte në gjakosjen e qytetarëve për të fshehur vjedhjen e madhe. Është e rëndësishme të kuptohet se nuk bëhet fjalë për një projekt zhvillimi. Është një projekt vjedhje i denoncuar nga PD. Është një projekt vjedhje. Rama nuk kursen qytetarët. Është një krim i rëndë kundër qytetarëve. Duke dënuar këtë sjellje kriminale paralajmëroj Edi Rama dhe Erion Veliaj se do të mbajnë përgjegjësi para ligjit”, tha Basha.

Më tej, ai shtoi se kur PD dhe ai të vijnë në pushtet, banorët e Astirit do të kompensohen me vlerën e tregut për pronat e tyre. “Kemi një zotim politik me shkrim, çdo cm katror i pronës së tyre do të kompensohet me vlerën e tregut me ardhjen e PD në pushtet. Të gjithë do të mbajnë përgjegjësi para ligjit. Nuk do të gëzojnë asnjë qindarkë. Opozita ka qenë dhe është në krah të qytetarëve të Astirit. Opozita ka qenë me ta dhe është me ta. Jemi njësh me ta për të mbrojtur interesin publik”, tha Basha.

“Astiri”, Avokati i Popullit kërkon qetësimin e situatës

Avokati i Populli reagoi të martën paradite për përplasjet e policisë dhe banorëve në zonën e Astirit, pas nisjes së aksionit të IKMT për prishjen e 33 objekteve. Në deklaratën e tij, Avokati i Popullit shprehet se po ndjek me shqetësim ngjarjet e ditës së martë. “Institucioni i Avokatit të Popullit po ndjek me shqetësim ngjarjet e ditës së sotme në segmentin e Unazës së Re ku janë shënuar përplasje midis banorëve që kundërshtojnë një projekt ende të kontestuar infrastrukturor dhe forcave të rendit. Ekipe të Avokatit të Popullit ndodhen në terren për të dëshmuar nga afër gjithçka që po ndodh e për ta referuar atë më pas me paanësi”, shprehet Avokati i Popullit.

Më tej, i tërhiqet vëmendja institucioneve shtetërore që të mënjanojnë konfliktin me qytetarët, për sa kohë çështja, sipas Avokatit të Popullit, nuk është sqaruar. “Gjithashtu, Avokati i Popullit tërheq vëmendjen e autoriteteve shtetërore që të mënjanojnë konfliktin me qytetarët, të mos zbatojnë politikën e faktit të kryer e të mos e tejkalojnë me anë të zellit të pajustifikuar detyrën e tyre, sidomos në kushtet kur çështja për të cilën ka lindur ky konflikt nuk është sqaruar”.

Duke u shprehur se respektimi i të drejtës së qytetarit duhet të jetë në bazamentin e një shteti demokratik, Avokati i Popullit u bën thirrje autoriteteve vendase dhe të huaja të ndërhyjnë për të qetësuar situatën. “Respektimi i të drejtës qoftë edhe të një qytetari të vetëm duhet të jetë në bazamentin e një shteti demokratik pasi nuk mund të ketë interes madhor e të mirë kolektive, të themeluar mbi dhunimin e dikujt tjetër. Gjithashtu, Institucioni i Avokatit të Popullit u bën thirrjen autoriteteve të tjera vendase dhe ndërkombëtare që të ndërhyjnë sa më parë për qetësimin e situatës”, shprhet ndër të tjera Avokati i Popullit.

“Sulm me molotov”, plagosen 5 efektivë të FNSH dhe 7 banorë tek Astiri

Policia e Tiranës dha informacion zyrtar për përplasjet me banorët në zonën e Astirit, ku IKMT nisi aksionin për prishjen e 33 objekteve, që i hapin rrugë zbatimit të projektit të “Unazës së Re”. Sipas policisë, një grup banorësh kundërshtuan me dhunë punonjësit e IKMT-së dhe punonjësit e policisë.

“Banorët kanë sulmuar me gurë, sende të forta dhe bomba moltov punonjësit e Policisë, të cilit ishin planizuar me shërbim. Si pasojë e sulmit mbi Policinë janë plagosur 5 punonjës të Policisë nga FNSH-ja, Shqiponjat dhe Patrullat e Përgjithshme, të cilët u dërguan për ndihmë mjekësore në spitalin ushtarak”, shkruhet në deklaratën e policisë.

Sipas policisë janë plagosur dhe 7 banorë, të cilët po marrin ndihmë mjekësore dhe janë jashtë rrezikut për jetën.

“Gjithashtu edhe 7 banorë janë lënduar e po marrin ndihmë mjekësore jashtë rrezikut për jetën. Policia e Shtetit u bën thirrje banorëve të distancohen nga dhuna dhe të mos bien pre e provokimeve, pasi do përballen me pasojat ligjore. Gjithashtu, Policia e Shtetit u bën thirrje qytetarëve që janë prezent tek Unaza e Re, të mos nxisin banorët për të sulmuar forcat e Policisë dhe të shmangin deklaratat disinformuese”, thuhet në njoftim.

Ndërkohë, policia e Tiranës nuk jep të dhëna nëse janë shoqëruar apo jo banorë të cilët kanë përdorur dhunë kundër punonjësve të policisë apo atyre të IKMT. Megjithatë, Policia Rrugore e Tiranës ka bllokuar përkohësisht lëvizjen në të dy krahët e Unazës së Re, deri në përfundim të aksionit të IKMT-së për shembjen e disa objekteve, që do t’i hapin rrugë projektit të ri.

“Ndaloni sabotimin e Tiranës”. Veliaj reagon për aksionin e IKMT në Astir

Kryetari i Bashkisë së Tiranës Erion Veliaj, reagoi mëngjesin e të martës pas nisjes së aksionit të IKMT për prishjen e banesave në Astir. Sipas Veliajt, banesat që po prishen i përkasin banorëve që kanë marrrë kompesim, apo përqindje në pallat. Ndaj sipas tij, këta njerëz nuk duhet të sabotojnë Tiranën.

“Nëse ke marrë paratë apo përqindje në pallat, është e arsyeshme ta ndalosh sabotimin e Tiranës. Partitë e ngritura mbi kulturën e zaptim-bllokimit në pikiatë. Prishen ndërtimet e kompesuara të Astirit, përfundon bllokimi 2 vjeçar i Unazës”, shkruan Veliaj në reagimin e tij.

Mëngjesin e të martës, tre fadroma të IKMT nisën prishjen e banesave dhe ndërtimeve të tjera që preken nga projekti i “Unazës së Re”. Ndërkohë, banorët janë përplasur me policinë, ku mbetën disa persona të plagosur dhe të paktën 5 efektivë policie. Megjithatë, IKMT vijon të shemb ndërtimet, pavarësisht rezistencës së banorëve.

Bllokuan rrugën, lirohen 3 protestuesit e ‘Astirit’

Gjykata e Tiranës ka lënë të lirë, 3 nga protestuesit e arrestuar gjatë protestave në zonën e ‘Astirit’, më 11 tetor pasi bllokuan të dyja anët e rrugës. Protestuesit Eduard Ferhati, Tomor Gjata dhe Ruzhdi Daci janë liruar nga burgu duke marrë masën “detyrim paraqitje”.

Prokuroi Bledar Maksuti kërkoi në pretencën e tij burg për 3 protestuesit, pasi ishin me precedentë të mëparshëm penal por për të njëjtën çështje, por gjyqtarja Rexhina Memlika vendosi lirimin e tyre.

Me ndryshimet e bëra në Kodin Penal, tashmë bllokimi i rrugëve është vepër penale dhe dënohet me burg deri në tre vjet burg. Mbrëmjen e të dielës, ish deputeti demokrat Klevis Balliu dhe 9 protestues të tjerë u arrestua pasi bllokuan të dyja anët e rrugës në zonën e Unazës së Re. Balliu së bashku me protestuesit pritet të dalin para gjykatës ditën e mërkurë.

“Astiri”, alibi e Bashës për negociatat

Lulzim Basha reagoi mbrëmjen e të dielës për ndalimin e Klevis Balliut dhe 7 protestuesve tek “Unaza e Re”, pasi bllokuan rrugën. Kreu i Partisë Demokratike e nis reagimin e tij, duke u shprehur se java e ardhshme do të jetë vendimtare për Shqipërinë, ku do të vendoset, sipas tij, nëse vendi do të shkojë përpara, apo do mbetet në vend. “Kjo është javë vendimtare për të ardhmen e Shqipërisë, kur do të vendoset nëse do të shkojmë përpara drejt Europës apo do të mbetemi ngecur në marshin indietro”.

Më tej, sipas Lulzim Bashës ngjarje si ajo e Unazës së Re, tregojnë përkushtimin e Edi Ramës për vlerat Europiane. “Regjimi i Ramës vendosi ta tregojë sa i përkushtuar është ndaj vlerave Europiane të lirisë së shprehjes dhe sundimit të ligjit, duke arrestuar dhunshëm protestues paqësorë”. Në fund, sipas Kryedemokratit, nëse nuk do të ketë lajme të mira nga Brukseli, ngjarje si kjo e së dielës do të jenë shkaku.

“Nëse lajmet nga Brukseli janë negative, askush mos ta vërë në dyshim, ngjarje si kjo e sotmja janë shkaku. Por ne nuk do ti lejojmë të na mbyllin gojën e të na mbajnë peng, beteja do të vazhdojë pareshtur drejt destinit tonë: Shqipërisë së zhvilluar, të lirë dhe Europiane”, shkruan Basha. Kreu i PD-së paralajmëron se opozita do ta ketë alibinë gati nëse BE nuk do t`i thotë “Po” Shqipërisë për negociatat.

Ndërkohë, reagimit të Lulzim Bashës, i është bashkuar dhe Petrit Vasili. Nënkryetari i LSI shpreh mbështetjen për protestuesit e banorëve të “Astirit” që sipas tij, janë “heronjtë” anti-diktaturë. “Mbështetje deri në fund, mbështetje politike dhe njerëzore për heronjtë anti-diktaturë të Unazës së Re. Bedeli i bablokut në Ministrinë e Brendshme, Lleshaj, zgjedh përfundimisht të jetë një armik i shqiptarëve të thjeshtë të Unazës së Re”.

“Asnjë harresë, asnjë tolerancë, asnjë keqardhje nuk do të ketë kurrë për ata si Lleshaj, që urrejtshëm vendosën kundër qytetarëve të thjeshtë. Këta të pacipë dhe të urryer arrijnë deri aty sa të lexojnë paturpësisht si komunikata të tyre idiotësirat e kriminalizuara që ju dikton fjalë për fjalë Babloku i fshehur. Ta kenë të qartë t`i shesë si një kg fiq këta budallenj dhe do tu lërë pas për gjithë jetën urrejtjen pa kthim të popullit”, shkruan Vasili.

Zhvendoset protesta e banorëve të “Astirit’, bllokojnë trotuaret

Ashpërsimi i Kodit Penal, ka bërë që për herë të parë banorët e zonës së “Astirit” të mos bllokojnë rrugën, gjë të cilën e bëjnë çdo pasdite prej thuajse një viti. Forca të shumta policie dhe të FNSH u ndodhën në vendngjarje për të parandaluar bllokimin e rrugës. Policia vendosi një kordon sigurie për të mos lejuar banorët të bllokojnë rrugën, ashtu siç kanë bërë përherë. Ky vendim vjen pas ashpërsimit të Kodit Penal, ku sipas tij, kush bllokon rrugën përballet me 3 vite burg.

Banorët u mblodhën si çdo pasdite, por këtë herë nuk bllokuan rrugën por qëndruan në trotuar, të vetëdijshëm që do të thyenin ligjin nëse do e bënim. Protesta e tyre këtë herë ka marrë një tjetër formë ku banorët janë shfaqur me gojë të mbyllur me ngjitëse dhe zinxhirë nëpër duar.

Më herët 6 protestues ranë në pranga pasi tentuan të bllokonin rrugën me protestat e tyre dy ditë më parë. Kjo solli revoltim të banorëve që të mbështetur nga PD, shkuan të protestonin para Drejtorisë së Policisë Tiranë, ku shkaktuan edhe disa dëme materiale.

Banorët kundërshtojnë projektin e transformimit të Unazës së Re, pasi kjo prek shembjen e disa banesave dhe bizneset e tyre anë rrugës, shumica prej të cilëve pa legalizuar, edhe pse qeveria ka deklaruar se do të dëmshpërblehen.

BLLOKUAN RRUGËN, 6 TË ARRESTUAR PËR UNAZËN E RE

PD PADIT POLICINË NË PROKURORI: DHUNUAN PROTESTUESIT