BE për drogërat: Trafiku në rritje, treg rekord 30 mld €. Ballkani rruga kryesore

Këtë vit trafiku i drogërave të forta ka pësuar rritje. Kjo ishtje gjetja e raportit të bashkimit europian për vitin 2020. Sipas të dhënave të përpiluara problemi i kokainës në Evropë po përkeqësohet. Komisionerja e BE për Çështjet e Brendshme, Ylva Johansson, tha droga në Europë është bërë mjaft shqetësuese, dhe kap një një treg prej 30 miliardë eurosh. Fitimet qarkullojnë në banka dhe grupet e krimit të organizuar po fuqizohen duke blerë njerëz, fuqi, e duke bërë që krimi i organizuar të minojë shoqërinë dhe demokracinë. Sipas komisioneres rruga e Ballkanit është furnizuesja kryesore e heroinës në BE, dhe përdorimi i drogërave po rritet eksponencialisht, vit pas viti.

“Aty ku ka drogë, shpesh ka edhe armë, krim dhe vrasje. Aty ku ka trafikantë droge, ka edhe krim të organizuar. 5 mijë grupe të krimit të organizuar janë aktive në Evropë. Më shumë se 1/3 merren me drogë. Tregtia e drogës mbështet krimin e organizuar me 30 miliardë euro në vit. Tregtia e jashtëligjshme e drogës është tregu më i madh kriminal në Bashkimin Evropian.

Në raport thuhet se në vitin 2018 sasia e kokainës së sekuestruar në Bashkimin Evropian arriti nivelet më të larta të regjistruara ndonjëherë, me më shumë se 110 000 konfiskime të raportuara, që arrinin në 181 ton. Sasia e kokainës së kapur tejkaloi rekordin e mëparshëm, nga 2017, me më shumë se 42 tonë.

Drejtori i Qendrës Evropiane të Monitorimit për Drogat dhe Varësinë nga Droga Alexis Goosdeel i druhet rënies ekonomike pasi sipas tij do të sjellë përfshirjen e shumë njërëzve në aktivitetin e drogës.

Duhet të jemi të kujdesshëm me çfarë ndodh në muajt në vijim. Të gjithë presin një rënie të thellë ekonomike që mund të rrisë cenueshmërinë e disa grupeve të popullatës që janë vulnerabël. Gjithashtu ka rrezik për shkak të situatës. Mund të kemi përfshirjen e më shumë njerëzve në aktivitete të lidhura drejtpërdrejt ose jo me drogën”,

Raporti vëren gjithashtu se pandemia e koronavirusit ka ndikuar edhe në aspektin e trafikut dhe marrjes se drogës. Raporti tregon se izolimi i ka bërë më krijues trafikantët me mënyrën si ata furnizojnë përdoruesit, ndërsa të varurit kanë pasur vështirësi në marrjen e trajtimeve për lënien e drogës.

“Vendimmarrja varet nga dinamikat e brendshme të BE”, Rama flet për DW: Pikëpamjet e ndryshme legjitime, nuk përbëjnë arsye për rezerva

Kryeministri Edi Rama flet në një intervistë për DW për dyzimet gjermane ndaj konferencës së parë për negociatat me BE, zgjedhjet në Shqipëri dhe rolin si kryetar i radhës i OSBE-së.

Deutsche Welle: Zoti Rama, cili është qëllimi i vizitës suaj në Gjermani?

Edi Rama: Jam i ftuar në një forum të rëndësishëm të politik-bërjes në Bavari, me një qëndresë të shkurtër në Berlin, ku u takova me një grup përfaqësuesish të Bundestagut dhe të sektorit privat për të biseduar për perspektivën ekonomike dhe politike të vendit, si edhe perspektivën në këto dy drejtime.

Ju nuk patët rastin të takoheshit me Kancelaren Angela Merkel. Cila qe arsyeja?

Nuk kam ardhur në këtë udhëtim për të takuar Kancelaren Merkel. Kam ardhur për të shkuar në forumin e politik-bërjes dhe ndalesa e mbrëmshme (17.09.shën red.) në Berlin ka qenë thjesht dhe vetëm për të nderuar ftesën e një përfaqësie të gjerë politikanësh dhe sipërmarrësish që dëshironin të ndanin me mua opinione dhe që kanë një interes të veçantë për Shqipërinë. Me Kancelaren jemi në kontakt të vazhdueshëm dhe s’ka asnjë problem.

Shqipëria është në pritje të datës së negociatave. Kur mendoni se do të fillojë konferenca e parë ndërqeveritare?

Këtë do ta shohim në varësi të vendimit që do të marrë Këshilli Europian. Por ajo që është e padyshimtë, është që ne po ecim në mënyrë intensive në hedhjen e hapave të mëtejshëm dhe, pavarësisht se çfarë do të vendosë Këshilli Europian, që ne e dimë që është një vendimmarrje që varet shumë më tepër nga dinamikat e brendshme, se sa nga çfarë bëjmë ne, ne do të vazhdojmë me vullnet dhe me durim. Dhe shpresoj që Konferenca do të ndodhë në fund të këtij viti, dhe nëse nuk ndodh në fund të këtij viti, ajo do të ndodhë vitin e ardhshëm dhe kjo është thjesht një çështje, që e përsëris ka të bëjë me dinamikat e brendshme në Bashkimin Europian.

Megjithatë, qarqe nga grupi CDU/CSU në Parlamentin Gjerman ngurrojnë të fillojnë negociatat me Shqipërinë, pasi janë të zhgënjyer nga ndryshimi i Kushtetutës që u bë menjëherë pas arritjes së marrëveshjes zgjedhore me ndërhyrje të fortë nga pala ndërkombëtare.

Gjermania është një vend demokratik. Ka vend për të gjithë zërat. Ajo që unë besoj është që, në konkluzion, ne kemi bërë gjënë e duhur për vendin tonë, kemi bërë gjënë e duhur për sistemin zgjedhor, dhe kemi bërë gjënë e duhur në funksion të ambicies sonë për të konsoliduar më tutje procesin zgjedhor dhe procesin demokratik. Dhe jam i bindur që, pavarësisht pikëpamjeve të ndryshme që janë absolutisht legjitime, kjo nuk do të përbëjë asnjë arsye për të pasur ndonjë rezervë mbi Shqipërinë.

Një temë tjetër që shikohet sërish me rezerva në të njëjtat qarqe është ligji anti-shpifje. A keni ndër mend ta ndryshoni në përputhje me rekomandimet e Komisionit të Venecies?

Gjermania ka një nga ligjet më të fortë kundër shpifjes dhe faktikisht ne dëshironim që të kishim një ligj që të bazohej në modelin gjerman, por duke qenë se ne jemi një vend shumë më i vogël se Gjermania dhe me shumë më pak zë se Gjermania nga miqtë tanë në Këshillin e Europës apo në OSBE na u tha që ne nuk mund të aplikojmë ligjin gjerman, sepse do të ishte një ligj i rrezikshëm për Shqipërinë. Kjo është bota ku jetojmë. Ne kemi bërë një ligj, i cili është absolutisht i domosdoshëm, do të marrim në konsideratë rekomandimet e Komisionit të Venecias, por Shqipërinë, si vatrën më të nxehtë të shpifjeve në Europë, ne nuk do ta lëmë.

Shqipëria është para zgjedhjeve. Çfarë do të bëni ju për të garantuar që pas zgjedhjeve Shqipëria të ketë një sistem të fortë pluralist partiak që përfaqësohet edhe në parlament?

Nuk ka qenë ndonjëherë në diskutim sistemi pluralist që nga viti 1990. Sistemi pluralist vihet në diskutim, nëse një qeveri apo një shumicë pengon pjesëmarrjen në zgjedhje. Nuk vihet në diskutim, nëse një parti vendos të ikë nga zgjedhjet. Është një vendim katastrofik për ata që e marrin. Sigurisht, nuk është një vendim që i bën nder vendit apo që ndihmon në shkëlqimin e demokracisë. Por nuk është absolutisht një vendim që cenon pluralizmin.

Shqipëria është aktualisht kryetare e radhë së OSBE-së. Ju keni dalë me një propozim për të ndërmjetësuar në konfliktin me Bjellorusinë., i cili është mbështetur dhe nga Gjermania. Çfarë mund të bëjë Shqipëria në këtë konflikt?

Ne kemi drejtimin e OSBE-së dhe unë jam shumë krenar, që drejtimi i OSBE-së ka pasur dhe ka admirim nga të gjithë partnerët. Oferta jonë për Bjellorusinë në funksion dhe në emër të OSBE-së, jo në emër të Shqipërisë, është një ofertë që është mbështetur tërësisht nga të gjithë partnerët, nga Shtetet e Bashkuara dhe Gjermania dhe vendet e tjera të Bashkimit Europian. Ka rënë në vesh të shurdhët në Minsk deri tani që flasim, ndërkohë që situata e të drejtave të njeriut aty përkeqësohet dhe padyshim, unë e konsideroj këtë një gabim strategjik të autoriteteve në Bjellorusi, pasi OSBE-ja nuk ka qëllim të imponojë asgjë pasi të lehtësojë rrugën për të hapur një kanal dialogu me opozitën.

Ju erdhët në Gjermani, pasi më parë kishit qenë në Turqi dhe Greqi. Kjo e fundit aktualisht po përballet me një krizë të fortë refugjatësh. Gjermania po i vjen në ndihmë dhe ka vendosur të marrë 1500 refugjatë. Jo të gjithë e përshëndesin këtë vendim, si e shikoni ju dhe si mendoni se mund të zgjidhet kriza e refugjatëve aktualisht?

Gjermania është një model i admirueshëm edhe falë kancelares Merkel është një shembull absolutisht domethënës, kuptimplotë, frymëzues për mënyrën se si bota e civilizuar dhe sesi demokracitë e kësaj bote duhet t’i qasen çështjes së të drejtave të njerëzve që ikin nga situata shumë të rënda dhe kërcënuese për jetën e tyre. Ndërkohë që besoj që në këtë aspekt, Turqia dhe Greqia kanë një rol të dorës së parë dhe patjetër që ky është një nga aspektet ku mund të shihet fare qartë se sa e rëndësishme është Turqia për Evropën.

Ju ishit më parë në Turqi dhe Greqi, ku u takuat me presidentin turk Erdogan dhe kryeministrin Mitsotakis. A mund të ndërhyjë Shqipëria për zbutjen e konfliktit Greqi-Turqi?

Ne jemi shumë të vegjël për të bërë të tilla punë të mëdha për botën. Por patjetër, besoj që mundësia për të thënë fjalën tonë, për të thënë fjalën time, është një nga rrugët për të nxitur komunikimin, dialogun, dhe kam bindjen, që, duke njohur të dy liderët që ju përmendët, që nëse ata ulen së bashku, patjetër që do të gjejnë zgjidhjen. Nuk ka nevojë për interferenca dhe ndërhyrje të tjera, sepse bëhet fjalë për dy liderë me një staturë dhe një talent politik të padiskutueshëm. Sigurisht që presidenti Erdogan është një figurë e fortë dhe një figurë që ka një peshë të madhe. Por edhe kryeministri Mitsotakis është përfaqësuesi i një vendi që ka një rëndësi të madhe për Europën. Turqia është strategjike për sigurinë e Europës, Greqia është strategjike për kufijtë e Europës dhe Greqia dhe Turqia besoj që do ta gjejnë rrugën që të mirëkuptohen, dhe kjo do të jetë një e mirë e madhe për të gjithë Europën.

Presidenti Thaçi i ka akorduar presidentit amerikan, Donald Trump, një çmim. Një deputet norvegjez e ka propozuar Trumpin për Çmimin Nobel. A mendoni se e meriton ai këtë çmim?

Këtë e di komisioni i Çmimit Nobel, unë mendoj që nuk më takon mua të përcaktoj rezultatin e gjithë analizës që do të bëjë komisioni i Çmimit Nobel. /DW

“Në SHBA mbyllen portalet”, Rama: Në vendet e BE shpifja është vepër penale

Kryeministri Edi Rama u ndal gjatë te paketa “Anti-shpifje”, që pritet të miratohet në Kuvend. Rama lexoi emrat e 20 shteteve europiane që sipas tij e dënojnë dhe e cilësojnë “shpifjen” vepër penale. Rama tha, gjithashtu, se shtete të tjerë në Europë vendosin gjoba të mëdha për shpifjen dhe fyerjen.

“Këtu jemi përballë një turme që nuk denjon të lexojë dhe thotë hapur nuk na intereson çfarë shkruhet në ligj, ne nuk duam ligj. Raporti i OSBE 2017 në 3/4, pra në 42 shtete nga 57 anëtare të OSBE, fyerja dhe shpifja është vepër penale. Nga analiza e thellë për ligjin, rezulton se ka tre qasje ndaj fyerjes dhe shpifjes. Së pari, 20 shtete, Austria, Belgjika, Çekia, Danimarka, Finlanda, Gjermania, Polonia. Portugalia, Sllovenia, Spanja, Greqia, Italia, Suedia, Luksemburgu. Malta, Holanda, etj,. parashikojnë fyerjen vepër penale që dënohet me burg”.

“5 shtete, Qipro, Irlanda, etj, e rregullojnë me pasojat e tyre në legjislacionin civil. Dhe Anglia zbaton gjobën më të lartë 200 mijë stërlina. Bullgaria dhe Franca e parashikojnë vepër penale dhe dënim me gjobë dhe jo me burgim. Legjislacioni më i ashpër ndaj fyerjes dhe shpifjes, është ai i Gjermanisë. Kodi Penal parashikon 11 vepra penale për fyerjen dhe shpifjen, dhe rastësisht është vendi ku ka më pak shpifje, më pak fyerje”, tha Rama.

Kryeminstri shtoi gjithashtu se në Shtetet e Bashkuara të Amerikës Byroja e Hetimit ndërhyn pa vendim gjykate për të mbyllur website dhe përmbajtje që quhen cënuese në shumë aspekte.

“Në SHBA Byroja e Hetimit ndërhyn pa asnjë vendim gjykate dhe mbyll me urdhër çdo lloj website dhe çdo lloj përmbajtje që konsiderohet cënuese në shumë aspekte. Në Gjermani është miratuar ligji për përmirësimin e zbatimit të ligjit ekzistues në rrjetet sociale, dhe është sot përpjekja më e suksesshme për të shuar përmbajtjen potencialisht të dëmshme në interneti”, tha Rama.

Kryeministri Rama tha se institucionet ndërkombëtare dolën kundër paketës, duke u shprehur “mos ju refernoi këtyre shteteve, se ato i kanë ligjet shumë të ashpra”. “Thanë, mos ju referoni këtyre shteteve se këto i kanë ligjet shumë të ashpra, nuk janë këto shembulli që duhet të ndiqni”, tha Rama.

BE konfirmon konferencën e donatorëve për Shqipërinë

Pak orë pasi kryeministri Rama tha se mori mbështetjen e Trump, Merkel dhe Macron për organizimin e një konference donatorësh në ndihmë të Shqipërisë për pasojat e tërmetit, këtë e konfirmoi edhe presidentja e Komisionit Evropian Ursula Von der Leyen. Ajo shkroi në twitter se BE përveç donacionit prej 15 milionë euro, do të organizojë edhe një konferencë donacionesh për të ndihmuar Shqipërinë në këtë situatë të vështirë.

“Sapo fola me kryeministrin Rama, i cili më tregoi për situatën e vështirë pas tërmetit. Kam shumë respekt për popullin shqiptar që ka qëndruar i qetë pavarësisht rrethanave. Dua që ata të dinë që BE është përkrah tyre me dhembshuri dhe me veprim. Në i konfirmuam kryeministrit Rama se BE premton 15 milionë euro për mbështetje të menjëhershme për popullin shqiptar si dhe do të organizojë një konferencë donatorësh për të ndihmuar Shqipërinë në rindërtimin e saj”, shkruan Von der Leyen.

Tërmeti i 26 nëntorit la pas 51 viktima dhe me dëme të konsiderueshme materiale.

Eksperti i BE: Jemi këtu deri në vlerësimin e dëmeve

Veç grupeve të kërkim-shpëtimit, që ndihmuan në nxjerrjen e trupave nga rrënojat pas tërmetit, në vendin tonë kanë ardhur dhe një grup ekspertësh nga BE, që do të vlerësojnë dëmet e tërmetit. Drejtuesi i ekipit të Mekanizmit të Mbrojtjes Civile të BE-së, Peter Gelergum, foli të hënën në një konferencë për mediat, duke u shprehur se në terren po vijon puna për vlerësimin e dëmeve. Ai tha se ekspertët e BE dhe OKB nuk do të ikin nga Shqipëria pa vlerësuar çdo banesë që shqiptarët të jentë sigurt.

“Jam krenar që drejtoj një ekip ekspertësh të BE-së dhe OKB-së në vendin tuaj për një reagim të kombinuar. Ne filluam me operacionin e kërkim-shpëtimit. Etapa e kërkimit të njerëzve nën rrënoja ka përfunduar. Disa operacione ishin të suksesshme, por me keqardhje u shënuan edhe viktima. Po shikojmë për vlerësimin e dëmeve. Në fillim ishte situatë kaotike, por tani një strukturë e themeluar mirë me ministrin Çuçi për të koordinuar të gjitha aktivitetet dhe ne e mbështesim atë në vlerësimin e dëmeve”.

“Ne vlerësojmë të gjitha ndërtesat për siguri për të siguruar të gjithë shqiptarët. Dje ishin 38 inxhinierë në terren, sot 50 dhe operacioni do të vijojë në ditët e ardhshme. Po mendojmë për njerëzit që duhen strehuar, po ofrojmë mbështetje për njerëzit që kanë humbur gjithçka. Për momentin një vlerësim i nevojave po vijon. Ne do të jemi këtu deri në vlerësimin e plotë të dëmeve dhe deri në momentin që ndihma ndërkombëtare të shkojë në destiancion. Shqipëria ka nevojë për mbështetjen tonë”, tha ai.

Ursula von der Leyen: Në Tiranë, Komisioneri Europian i krizave

Bashkimi Europian është përkrah Shqipërisë në këto momente të vështira që po kalon nga tërmeti. Mesazhi vjen nga Kryetarja e Komisionit Evropian, Ursula von der Leyen, e cila në një postim në twitter shkruan.

“Sapo fola me kryeministrin shqiptar Edi Rama, i cili më tregoi për situatën e vështirë pas tërmetit. Kam shumë respekt për qytetarët shqiptarë që kanë qëndruar të qetë pavarësisht rrethanave. Dua që ata të dinë që BE është përkrah tyre me dhembshuri dhe me veprim. Janez Lenarčič do të udhëtojë për në Shqipëri të mërkurën. Unë i kam kërkuar atij që të më mbajë të informuar nga afër për situatën”, shkruan ajo në Twitter.

Janez Lenarčič është pjesë e kabinetit të ri të Komisionit Europian. Ai është një diplomat me 30 vite eksperiencë në marrëdhëniet ndërkombëtare dhe menaxhimin e krizave. Tërmeti shkatërrimtar që goditi Shqipërinë me 26 nëntor la pas 51 të vdekur dhe më shumë se 900 të tjerë të plagosur. Ndërkohë, dëmet materiale janë të pallogaritshme.

Zyrtari i lartë i BE, Avramopulos: Mos vononi integrimin e Shqipërisë

Përfaqësuesi i lartë europian për emigrimin, Dimitris Avramopulos theksoi rëndësinë e integrimit sa më shpejtë të Shqipërisë dhe Maqedonisë së Veriut. Avramopulos shpreson që liderët e BE-së të rishikojnë vendimin për hapjen e negociatave sa më shpejt më këto dy vende, ndërsa theksoi se Ballkani Perëndimor ka qenë historikisht me qasje ndaj Europës. Avramopulos tha se kushdo që e shikon me frikë apo skepticizëm integrimin e Ballkanit në BE, në fakt duhet t’i trembet të kundërtës.

“E ardhmja e vetme e vërtetë dhe e ndjeshme për të gjithë rajonin e Ballkanit Perëndimor është Europa – sepse ato janë pjesë e Europës. Për kolegët në BE që janë në mëdyshje ose kanë frikë për këtë proces, unë i paralajmëroj ata se ata duhet të kenë më shumë frikë nga e kundërta dhe të largojnë partnerët tanë më të afërt. Për interesin e të gjithë Europës që ky rajon historikisht i ndjeshëm bëhet në një të ardhme të afërt një model i bashkëpunimit, paqes, stabilitetit dhe zhvillimit. Dhe kjo duhet të mbetet një përparësi politike strategjike e BE-së. Shpresoj që liderët e BE-së do të rishqyrtojnë vendimin e tyre në mënyrë që të fillojnë bisedimet e pranimit me Shqipërinë dhe Maqedoninë e Veriut. Por mbi të gjitha, unë shpresoj dhe uroj që dita kur ky rajon të jetë pjesë e Bashkimit Europian të vijë sa më shpejtë” tha Avramopulos gjatë një takimi me Ministrat e Drejtësisë dhe ato të Brendshëm të Ballkanit Perëndimor dhe BE që u zhvillua në Maqedoninë e Veriut.

BE ‘zgjat’ Brexit deri më 31 janar 2020

BE ra dakord t’i ofrojë Britanisë së Madhe një “shtyrje” të Brexit deri më 31 Janar 2020. Lajmi u dha nga Presidenti i Këshillit Evropian Donald Tusk, i cili theksoi se kjo shtyrje mund të ndihmojë kryeministrin Boris Johnson në përpjekjen e tij për mbajtjen e zgjedhje të reja më 12 dhjetor.

Pra Britani nuk del më 31 tetor, pasi kundërshtarët e Johnson nuk pranuan marrëveshjen e tij në parlament. Kjo bëri që ai të kërkonte një shtyrje nga BE, të cilët vendosën të japin një tjetër tolerancë për Britaninë.

“BE ka rënë dakord që do të pranojë kërkesën e Mbretërisë së Bashkuar për një zgjatje Brexit deri më 31 janar 2020. Kjo është një zgjatje fleksibël që do të thotë se Britania mund të ikë më herët nëse parlamenti i saj mund të ratifikojë projekt-ligjin për divorc.” tha Tusk.

Parlamenti do votojë të hënën në mbrëmje nëse do t’i lejojë Johnson të mbajë zgjedhjet për të cilat ai thotë se është i domosdoshëm për të zgjidhur bllokimin e Brexitit. Pa një shumicë në parlament, Johnson ka nevojë për mbështetjen e partive opozitare.

Partia e Laburistëve në Britani ka vendosur të mbështesë Johnson derisa Bashkimi Evropian të pranojë të zgjasë afatin e Brexit në Mbretërinë e Bashkuar deri më 31 janar 2020.

A ia imponon dot Evropës Macron përfytyrimet e tij?

Emmanuel Macron e përjetoi si fyerje prestigji faktin që macronistja e fortë, Sylvie Goulard, të cilën ai e propozoi për Komisionin Evropian, u refuzua nga Parlamenti Evropian. Pasi shprehu habinë në publik (“dua të marr vesh, çfarë ndodhi?!”), Presidenti francez bëri përgjegjëse në të njëjtën frymë Ursula von der Leyen-in, kryetaren gjermane të Komisionit të ri Evropian. Ai tha se ajo nuk e mbajti fjalën. Por sipas investigimeve të medieve gjermane dhe evropiane, e vërteta nuk është kaq e thjeshtë.

Shkaqe për refuzimin e francezes

Shkaqet kanë të bëjnë, së pari, me kandidaten franceze vetë: para dy vjetësh Sylvie Goulard u detyrua të japë dorëheqjen si ministre e Mbrojtjes e Francës, për shkak të kritikës se kishte marrë pagesa për një punë fiktive. Nuk përjashtohet në parim mundësia që këtë çështje ta hetojë drejtësia franceze. E pyetur në njërin nga dëgjimit në Parlamentin Evropian se a do të jepte dorëheqje si Komisionere, po ta padisë për punën fiktive drejtësia franceze, Goulard kundërshtoi. Ky ishte njëri nga shkaqet që solli refuzim të gjerë për kandidaten e Macronit, citohen në mediat gjermane europarlamentarë të pranishëm në votim.

Së dyti, refuzimi ushqehet te bllokimi që i bëri Macroni kandidimit të gjermanit Manfred Weber, për kryetar të Komisionit Evropian. Weberi, që në Parlamentin Evropian kryeson grupin më të madh parlamentar, atë të Partive Popullore Evropiane bëri fushatë në zgjedhet evropiane dhe u propozua nga parlamentarët për këtë post.

Por Macroni nguli këmbë që Weberi nuk e paraqet dot si duhet Evropën në parketet diplomatike. Revista gjermane “Der Spiegel” shkruan se Weberi kishte kështu arsye të mos e ndihmonte, kandidaten me probleme të Macronit.

Veç Weberit, kritik ndaj kandidates së Macronit qenë eurodeputetë lindorë, një pjesë e të cilëve janë bërë skeptikë ndaj Macronit, që kur ai do të afrohet me Rusinë. Mediat gjermane shkruajnë edhe se aleatja e ngushtë e Manfred Weberit, Monika Hohlmeier (e bija e ish-kryeministrit bavarez Franc Jozef Shtraus), gjithashtu e kundërshtoi francezen. Kur refuzuam hungarezin dhe rumunen për konflikt të mundshëm interesash, pse duhet të lejojmë francezen? citohet Hohlmeier.

Pse nuk e bindi Gjermania Weberin?

Sipas medieve duket se von der Leyen-i nuk e ka plotësisht nën ndikim Manfred Weber-in. Ka politikanë që edhe e kuptojnë hidhërimin e tij për refuzimin nga Franca. Refuzimi i Weberit nga Macroni qe një sfidë publike franceze edhe për Gjermaninë. (Këtë Berlini atëherë e gëlltiti edhe duke kujtuar miratimin e ardhshëm të buxhetit të BE: Gjermania duhet të paguajë pas Brexitit miliarda euro më shumë në këtë buxhet dhe kërkon rabat, kurse Franca është kundërshtarja kryesore për këtë).

Megjithë këtë: sipas Spiegel-it, von der Leyen-i u interesua për gjendjen para votimit te Manfred Weberi. Dhe ai e siguroi që francezja do të trajtohet me korrektësi. Fakt është që francezja Goulard u kundërshtua nga gati të gjitha grupet parlamentare në Parlamentin Evropian. Mori 82 vota kundër dhe vetëm 29 vota pro, me një abstenim.

A vazhdon revoltimi i Macronit me Gjermaninë?

Pas daljes së Britanisë së Madhe nga BE, në BE ka vetëm një shtet të fuqishëm mjaft, sa të bëhet kundërpeshë ndaj Gjermanisë: Franca. Është me interes të shihet, ku do ta verë në të ardhmen pikërëndesën Macroni: te kundërpesha ndaj Gjermanisë apo te aleanca me fqinjin e fuqishëm.

Si politikan realist, Emmanuel Macroni nuk duhet të jetë vërtet i zemëruar me Gjermaninë. Pasi e di se pa Gjermaninë nuk e miraton dot në Parlamentin Evropian as Komisionerin e ri francez.

Për çdo eventualitet, Macroni merr masa: kështu ai bllokoi në samitin e fundit të BE projektin e mbrojtur qartësisht nga Gjermania dhe shumica e shteteve të BE: nisjen e negociatave me Maqedoninë e Veriut dhe Shqipërinë.

Natyrisht, tek shtetet ballkanike, problemet nuk duhet t’i kërkosh me lupë. Por Macronit i duhet Gjermania (e aleatë të tjerë), për miratimin në Parlamentin Evropian të kandidaturës së re franceze për Komisionin: i duhet megjithatë me një angazhim më efektiv pro tij.

Kjo pasi Macroni nuk ka bazë të gjerë mbështetje në Parlamentin Evropian. Lëvizja e tij është pjesë e grupimit liberal, që nuk është njëri ndër dy grupet e mëdha.

Parlamenti Evropian tregon pak simpati për Macronin. Parlamentarët i dhanë atij një shuplakë një herë, me refuzimin e kandidates së tij Goulard. Ndoshta edhe për t’i treguar se nuk e pranojnë një lloj mospërfilljeje, që duket se ai ka ndaj tyre. Por refuzimin ata mund ta përsërisin, edhe me kandidatin e ri të tij për Komisioner.

A pritet mosrespektim nga Parlamenti Evropian edhe i vullneteve të Gjermanisë e të Francës si shtete?

Eurodeputetët gjermanë janë në numër shumë të madh në Parlamentin Evropian. Megjithatë kjo nuk përjashtohet. Pas zgjedhjeve evropiane, Parlamenti Evropian është fragmentarizuar politikisht. Konservatorët në partitë popullore dhe socialistët janë ende grupet më të mëdha, por miratimet nuk janë më thjesht punë teknike. Shumicat e votave duhen siguruar me shumë punë bindëse. Këtë punë zakonisht e bëjnë kryetarët e grupeve më të mëdha parlamentare.

Macroni e quajti të natyrshme të refuzojë në samitin e BE nisjen e negociatave me dy shtete të vogla ballkanike – edhe nga droja prej emocioneve të populistëve në Francë. Parlamenti Evropian e quajti të natyrshme të refuzojë pas dy dëgjimeve kandidaten e tij – që Macroni t’i marrë seriozisht emocionet e të gjithë parlamentarëve./ DW

Rama: Përgjegjësia e BE. Shqipërinë europiane e kemi testament

Mungesën e një vendimi pozitiv të Këshillit Europian për hapjen e negociatave ndaj Shqipërisë, Kryeministri Edi Rama e cilëson si përgjegjësi të Bashkimit Europian. Në konferencën për shtyp, që mbajti pasditen e të premtes, kreu i qeverisë u shpreh se Shqipëria bëri përpjekje maksimale për të marrë atë që i takonte, jo njëherë, por dy herë rresht, duke pasur parasysh vendimin e Këshillit Europian në qershor. “Janë bërë përpjekjet maksimale për të marrë atë që na takon, asgjë më shumë. Por atë që kemi merituar. Këtë nuk e them unë, por tanimë e ka thënë jo vetëm Komisioni Europian, por e thanë pjesa më e madhe e kryeminsitrave të BE. Dua ta vë theksin shumë qartë, se ndërkohë që ata të cilët janë jashtë nesh, ata që përfaqësojnë BE, e thonë pa ekuivok se me mosarritjen e vendimit të djeshëm, përgjegjësia është e brendshme e BE, është e papranueshme dhe e pajustifikueshme se këtu fillon dhe shtrohet diskutimi se mosvendimi i djeshëm vjen si pasojë e mospërmbushjes së detyrave. Ne i kemi përmbushur, jo njëherë por dy herë rresht. Prej kohësh, sa herë kanë folur, kanë vendosur një ?. Kryeministri Italian e quajti gabim historik”, tha Rama.

Duke treguar se kishte pasur mesazhe nga shumë kryeministra të vendeve të BE, por dhe nga Presidenti i Francës Emanuel Macron, Edi Rama u shpreh se procesi i vendimmarrjes shkoi drejt përplasjes midis Gjermanisë dhe Francës, për shkak të qasjes që kanë dy vendet për zgjerimin. “Nga ana tjetër dua t`ju them se kam marrë një numër të konsiderueshëm mesazhesh nga një pjesë e kryeministrave në takim, me disa prej tyre. Kam komunikuar edhe me Macron. Nëse duam të shohim në sy të vërtetën është ajo që kam thënë prej disa kohësh, duke e parë nga të gjitha kontaktet, se procesi po shkonte drejt një përplasje qasjesh mes Francës dhe Gjermanisë dhe një pjese të konsiderueshme që ishin për “Po”. Ndërkohë që Gjermania bëri një lëvizje me shpresën e kompromisit. Franca nuk pranon të vazhdohet me të njëjtin proces. Franca kërkon një reformim të brendshëm të BE dhe transformim të procesit të integrimit, deri në pikë që të arrihet deri në një tjetër objektiv për integrimin”, tha Kryeministri.

Europa, i kujt është faji?

Sipas Kryeministrit Edi Rama, në situatën aktuale të BE-së, asnjë nga vendet që aktualisht janë anëtare të unionit, nëse do të ishin aktualisht në statusin e Shqipërisë dhe Maqedonisë së Veriut, nuk do kishin marrë hapjen e negociatave. Ndërkohë, Kryeministri Edi Rama vijoi duke u shprehur se mospasja e vendimit nga Këshilli i Europës, ishte një refuzim, por asgjë më shumë. Ndaj sipas tij, Shqipëria do të vijojë të përmbushë kushtet e kërkuara nga Bundestagu. “Kemi marrë një refuzim për hapjen e negociatave mbrëmë, por nuk kemi asgjë më shumë se kaq. Ne ato që kemi bërë do vazhdojmë ti bëjmë, për vendin tonë. Nëse kemi bërë reformën në drejtësi, që nuk u është kërkuar fare disa prej vendeve që kanë hyrë në BE, jo para se të çeleshin negociatat por as kur kanë qenë në përfundim të tyre. Ashtu sikundër, do të vazhdojmë me plotësimin e parakushteve të vendosura nga Bundestagu për reformën zgjedhore dhe natyrisht në pritje të plotësimit të Gjykatës Kushtetetuese. Do të vazhdojmë më pas me pjesën tjetër që ka të bëjë, me kërkesa të lidhura me funksionimin më të mirë të shtetit dhe institucioneve tona. Jo se e ka kërkuar Gjermania, ne do ti bëjmë këto dhe të gjitha të tjerat pa ndryshuar asgjë”, tha Rama.

Kryeministri Edi Rama u shpreh se qeveria punoi maksimalisht për të ndryshuar mendimin e disa vendeve. Ai mori si shembull Gjermaninë, që sipas Kryeministrit në qershor nuk kishte të njëjtin qëndrim si tani. Rama tha se Gjermania ndryshoi për shkak të fakteve, duke bërë që vetë Kancelaria Angela Merkel të punonte maksimalisht për të arritur një kompromis. “Ne do vazhdojmë të ndërtojmë Shqipërinë europiane këtu në vendin tonë. Me përpjekjen tonë kemi kthyer Gjermaninë. Në qershor nuk e kishim në pozicionin që kemi pasur gjatë gjithë kësaj kohe, dhe vecanërisht mbrëmë. Kancelarja bëri gjithçka për të arritur në një kompromis. Këshilli nuk ka asgjë të shkuar, është zero. Sepse nuk ka asnjë pikëtakimi. Është një përplasje e madhe për të nesërmen e BE-së. CDU/CSU i kemi kapërcyer me diplomaci dhe me gjuhën e fakteve dhe kemi marrë mbështetje prej shumicës prej tyre. Tani na mbetet të vazhdojmë dhe s`ka asnjë alternativë tjetër. Shqipëria europiane nuk është njëri nga planet, është testament dhe detyrimi i madh që ne i kemi gjeneratave të tjera”, tha Rama.

I pyetur nga gazetarët nëse do të kërkonte një mocion besimi në Kuvend, Kryeministri Edi Rama u shpreh se këtë, nëse do t`ia kërkonte, do të ishte vetëm parlamenti i Francës, pasi parlamentit të Shqipërisë nuk kishte pse t`ia kërkonte. “Mund t`ia kërkoj parlamentit francez, por parlamentit shqiptar nuk kam për çfarë t`ia kërkoj. Maqedonia ka 14 vjet që pret të çel negociatat. Ka 14 vjet që merr sinjale pozitive, dhe nuk merr asnjëherë “Po”. E detyruan të ndryshonte emrin, identitetin. Dhe thanë që po u bë kjo, u zgjidh”, tha Rama.