Pa patentë dhe i alkoolizuar, pranga 18-vjeçarit. I mori jetën dy 17-vjeçareve

18-vjeçari Françesk Shaba u arrestua si shkaktar i aksidentit tragjik në Bërzhitë të ndodhur mbrëmjen e së shtunës. Ai ishte drejtuesi i mjetit, por nuk zotëronte leje drejtimi (patentë) dhe kishte konsumuar alkool, duke u bërë shkaktar i aksidentit në aksin rrugor Elbasan-Tiranë.

Nga kontrollet e policisë 18-vjeçari u verifikua me aparatin alkool testues, ku rezultoi se sasia e alkooli në frymëmarrje ishte 0.17 mg/l, ndërsa nuk zotëronte as patentë për drejtimin e makinës. Këto arsye, shoqëruar edhe me lagështinë në rrugë dhe shpejtësinë e lartë çuan në aksidentin tragjik.

Nga aksidenti humbën jetën dy 17-vjeçaret Denada Tarja dhe Suada Serani, ndërsa mbetën të plagosur drejtuesi Françesk Shaba dhe dy 14-vjeçarë me iniciale O.M dhe L.M. Të rinjtë ktheheshin nga festa e ditëlindjes të njërit prej 14-vjeçarëve, që ndodheshin në makinë. Makina doli nga rruga dhe u përplas me një pemë, që rezultoi fatale për dy 17-vjeçaret.

Bërzhitë, festuan ditëlindjen, gjetën vdekjen

Mungesa e lejes së drejtimit, moti i keq dhe shpejtësia, dyshohet se janë shkaqet kryesore që çuan në aksidentin tragjik me dy viktima dhe tre të plagosur rëndë të dielën. Sipas News 24, drejtuesi i mjetit 18-vjeçari me inicialet F.Sh., nuk dispononte patentë për drejtimin e mjetit.

Ai dyshohet se kishte marrë makinën e të atit, për të shkuar në një festë ditëlindje bashkë me dy vajzat që mbetën viktimë dhe dy të mitur të tjerë. Konkretisht, të rinjtë kishin dalë për të festuar ditëlindjen e 14-vjeçares me inicialet L.M., e cila ndodhet në spital pasi mbeti e plagosur në aksidentin e Bërzhitës.

Pak pas aksidentit, i riu ka dalë nga makina dhe pasi ka bërë disa hapa, ka rënë në tokë duke humbur ndjenjat. Ai ndodhet në gjendje shoku në spital. Aksidenti i rëndë, ku humbën jetën dy vajza të moshës 17 vjeç, ndodhi mëngjesin e të hënës në aksin e vjetër rrugor Tiranë-Elbasan. Ndërsa të plagosur mbetën tre persona, mes tyre dhe drejtuesi i mjetit.

Aksident tragjik, dy vajza humbin jetën

Një aksident tragjik ndodhi rreth orës 01:00 të mesnatës të dielën. Në aksin e vjetër rrugor Tiranë-Elbasan, në fshatin Bërzhitë, mbetën të vdekura dy vajza të moshës 17 vjeçe.

Shkak është bërë një aksident, ku makina e drejtuar nga 18-vjeçari me inicialet F.Sh., si pasojë e lagështirës në rrugë, ka dalë nga korsia dhe është përplasur me pemën.

Si pasojë, dy vajzat, shetaset D.T, dhe S.S, të dyja 17 vjeç, humbën jetën tragjikisht. Ndërkohë, si pasojë e aksidentit kanë mbetur të plagosur tre persona të tjerë që ndodheshin në mjet.

Konkretisht, ata janë drejtuesi i mjetit shtetasi F.Sh., si dhe dy pasagjerë të mitur, O.M., dhe L.M. të dy 14 vjeç.

Të tre personat e plagosur janë dërguar me urgjencë në spital ku ndodhen nën kujdesin e mjekëve.

Grupi hetimor dhe punonjësit e policisë vijojnë punën për zbardhjen e rrethanave dhe shkakut të aksidentit tragjik, që i mori jetën dy adoleshenteve këtë të diel.