Tag: Champions League

Transferta në Rusi, Juventus pa De Ligt

Juventus do të përballet të mërkurën me Lokomotiv Moscow në ndeshjen e raundit të katërt të fazës në grupe. Por në këtë transfertë, skuadra italiane do të ketë një mungesë të rëndësishme në repartin mbrojtës.

Mbrojtësi Mattijs de Ligt do të mungojë për shkak të një problemi në kyçin e këmbës.

Mbrojtësi i dha fitoren Juventus në derbin e të shtunës kundër Torino në Serie A, ndërsa pas ndeshjes u konstatua se kishte pësuar një problem në këmbën e majtë.

Në këto kushte, trajneri Sarri e la pushim futbollistin 20-vjeçar për takimin e radhës në Champions League.

Megjithatë, pritet që De Ligt të jetë gati për Juven në fundjavë në sfidën kundër Milan që do të luhet në “Allianz Stadium” të dielën. Ndërkohë, trajneri Maurizio Sarri do të ketë në dispozicion mesfushorin Adrien Rabiot për sfidën e Champions League.

Ajax thyen Valencian. Chelsea fiton, por vuan në Lille

Ajax fitoi në transfertë ndaj Valencias 3-0 në ndeshjen e dytë të fazës në grupe të Chamipons League, në grupin H. Holandezët kaluan në avantazh në minutën e 8` të sfidës me Ziyech. Spanjollët shpërdoruan një mundësi në të 25`, pasi Parejo humbi penllati. Ndërkohë, 10-të minuta më vonë, Ajax dyfishoi shifrat me Promes.

Pas pushimit të pjesës së parë, skuadra holandeze gjeti dhe golin e tretë me Van de Beek. Ndërkohë, Valencia u përpoq të ndryshonte diçka në sistemin e lojës, por pa mundur të finalizojë rastet e krijuara. Ajax kryeson grupin H me 6 pikë të plota dhe po kaq gola të shënuar në dy ndeshjet e para të fazës në grupe të Champion League.

Dy skuadrat e tjera të këtij grupi, Chelsea dhe Lille u përballën mes tyre me takimin që përfundoi me fitoren  e Bluve të Londrës me rezultatin 1-2. Talenti i Chelsea, Abraham shënoi golin e avantazhit në të 22`, ndërsa Osimhen barazoi në të 33` për vendasit.

Por William gjeti rrjetën në të 78`, duke i dhënë fitoren skuadrës së Chelsea. Kështu, anglezët marin tre pikë po aq sa Valencia dhe ndajnë vendin e dytë dhe të tretë në grupin H, ndërsa Ajax është me 6 pikë dhe kryeson grupin. Lille është në vend të fundit pa pikë.

Liverpool, rikthehet “Champion-s” mes drithërimave

Liverpool mori tre pikët e para në Champions League, pasi mundi Redbull Salzburg me rezultatin 4-3. Sadio Mane realizoi golin e parë në minutën e 9-të të pjesës së parë, pas një asisti të shkëlqyer nga Firmino. Braziliani finalizoi topin e fundit nga brenda zonës për Mane, pas një aksioni nga krahët të Liverpool. Mane mposhti portierin mik, duke i kaluar topin poshtë këmbëve. Goli i dytë pati autor mbrojtësin Andy Robertson.

Në të 25`, Alexander –Arnold niset në aksion me shpejtësi nga e djathta dhe gjen Robertson në qendër të zonës kundërshtare. Mbrojtësi mjaftohet vetëm duke shtyrë topin drejt rrjetës, duke dyfishuar shifrat për Liverpool. Në të 32`, Salah përfiton një top të kontrolluar keq nga portieri i Salzburg, dhe e dërgon në rrjetë, duke trefishuar shifrat për skuadrën e tij. Megjithatë, në të 39`, miqtë zgjohen me Hwang Hee-Chan që ngushton shifrat në 3-1, pasi kaloi mbrojtësit e Liverpool dhe I vetëm përballë portierit gjeti rrjetën.

Ndërkohë, me nisjen e pjesës së dytë, Salzburg ngushton dhe më shumë shifrat, pasi Minamino realizon një gol të shkëlqyer pas një asisti perfekt të Hee-Chan. Por austriakët nuk ndalen me kaq, pasi Haland barazoi shifrat në të 61` duke befasuar skuadrën e Jurgen Klopp. Megjithatë, për fitoren e Liverpool mendoi Mohamed Salah. Egjiptiani gjeti rrjetën në të 69`, pas një asisti të Firmino. Fitorja i jep tre  pikë Liverpool, që gjithsesi mbetet në vendin e tretë në grupin E, pas Salsburg në vendin e dytë dhe Napolit në vendin e parë me 4 pikë.  

Në grupin G, Zenit fitoi 3-1 ndaj Benfikës duke marrë fitoren e parë në fazën në grupe. Skuadra ruse shënoi në të 22` me Dzyuba, në të 70` Dias bëri autogol, ndërsa Amzoun në të 78 shënoi golin e tretë për skuadrën ruse. Ndërsa për Benfica shënoi De Tomas në të 85`. Ndërkohë, Lyon fitoi, po në këtë grup, mundi 2-0 Leipzig, duke marrë gjithashtu tre pikë nga takimi. Situata në këtë grup komplikohet, pasi Zenit dhe Lyon kryesojnë me 4 pikë, ndërsa Leipzig me 3 pikë gjendet në vendin e tretë. Benfica e vendit të fundit është pa pikë.

Suarez mposht Interin, Barcelonës i rikthehet “Messi-a”

Interit i mjaftuan 3 minuta lojë për të shënuar ndaj Barcelonës në Camp Nou, në takimin e dytë të fazës në grupe të Champions League, por në fund doli pa pikë, pasi Barcelona fitoi 2-1. Një aksion i shpejt i skuadrës italiane, bëri që Lautaro Martinez të kapte në befasi mbrojtjen e Barçës në të 3`.

Sulmuesi gjeti rrjetën duke mposhtur portierin e Barcelonës. Nga krahu tjetër, ndonëse u rikthye Messi, pas dëmtimit, Barcelona pati vështirësi të mëdha në gjetjen  e golit të barazimit. Pjesa e parë u mbyll me avantazhin e Interit, ndërsa në të dytën Bareclona rigjen ritmin dhe golin.

Në të 58`, Arturo Vidal i dërgon një kros nga e djathta Suarezit, që në kufijtë e zonës shënon një gol spkektalor. Urugaiani kthehet bukur në zonë dhe me të djathtën dërgon në rrjetë një top fluturimthi. Por sulmuesi i Barçës nuk u ndal me aq, pasi gjeti përsëri rrjetën në të 84`.

I sapokthyer nga dëmtimi, Leo Messi afrohet drejt zonës dhe pason te Suares, që pasi kalon mbrojtësit e Inter shënon golin e fitores për skuadrën e tij. Barcelona ngjitet në vendin e dytë me 4 pikë, po aq sa Dortmund që mban vendin e parë, ndërkohë Inter dhe Slavia Prague janë me nga 1 pikë në grupin F.

Champions/ Real Madrid shpërfytyrohet nga PSG

Paris Saint-Germain ka mundur 3-0 Real Madrid, duke fituar ndeshjen e parë të fazës në grupe të Champions League. Skuadra franceze ka bërë një ndeshje të madhe, duke fituar takimin me një dygolësh të di Marias në (14` dhe 33`) dhe golin e Meunier në të (90+1`), duke i dhënë një goditje të fortë skuadrës Los Blanco në nisje të këtij kompeticioni.

Skuadra e Zinedine Zidane konfirmoi dhe njëherë krizën, që ka nisur prej fundit të sezonit të shkuar, dhe vijon ende. Pas fitores të së mërkurës, PSG mban vendin e parë me 3 pikë në Grupin A, ndërsa Club Brugge dhe Galatasaray kanë nga një pikë pas barazimit 0-0 mes tyre.

Manchester City ka lënë pas humbjen e fundjavës në kampionat, duke fituar 3-0 në transfertë ndaj Shakhtar Donetsk në ndeshjen e parë të Champions League për këtë sezon.

Skuadra e Guardiolas shënoi golat e fitores me  Mahrez në të (24`), Gundogan në të (38`) dhe Garbiel Jesus në të (76`), duke marrë tre pikë të rëndësishme, që e mbajnë në vend të dytë me pikë të barabarta me Dinamo Zagreb. Skuadra kroate shkatërroi me rezultatin 4-0 Ataltantën e Berat Gjimshitit.

Champions/ Bayern e nis mbarë. Juve ngec në Madrid

Janë luajtur mbrëmjen e të mërkurës ndeshjet e radhës të fazës në grupe të Champions League. Në Grupin B, Bayern Mynich ka kaluar pa probleme Crvena Zvedzdën, duke e mundur me rezultatin 3-0 në “Allianz Arena”. Coman në të (34`), Lewandowski në  të (80`) dhe Muller në të (90+1`) ishin autorët e tre golave të fitores për skaudrën e Bayern, që gjithashtu merr dhe kryesimin e këtij grupi.

 Ndërkohë, në ndeshjen tjetër të grupit, atë mes Olympiacos dhe Tottenham, ndeshja është mbyllur me rezultatin 2-2. Kane në të (26`) dhe Lucas në të (39`), ishin autorët e golave për skuadrën angleze, ndërkohë që për grekët kanë shënuar Podence në të (44`) dhe Valbuena në të (54`). Pas këtij barazimi, të dyja skuadra ndajnë nga një pikë, duke qëndruar pas Bayernit në renditje, që ka tre pikë të plota.

Ndërkohë në takimin tjetër të mbrëmjes, mes Atletico Madrid dhe Juventus, sfida është mbyllur në barazim 2-2. Cuardado kaloi Juven në avantazh në minutën e 48-të, ndërsa Matuidi dyfishoi në të 65`, por skuadra vendase ngushtoi shifrat në minutën e 70-të me gol të Savic.

 Në minutën e fundit të takimit, Herrera realizoi golin e barazimit, duke i dhënë një pikë Atleticos. Në ndeshjen tjetër të Grupit D, Lokomotiva e Moskës fitoi kundër Bayern Leverkusen me rezultatin 2-1, duke marrë tre pikë të plota që e mbajnë në krye të grupit.

Olayinka ndal Interin në “San Siro”

Ka nisur brëmjen e së martës rrugëtimi i fazës në grupe për kompeticionin më të rëndësishëm të klubeve në Europë, UEFA Champions League. Interi ka luajtur kundër çekëve të Slavia Prague, duke e nisur me brazim në ndeshjen e parë. Një ndeshje e bukur dhe shumë e luftuar nga të dyja ekipet, por me çekët që befasuan Interin, pasi shënuan të parët në këtë takim.

Ishte ish-sulmuesi i Bylisit dhe Skënderbeut, Peter Olayinka që kaloi Slavia Prague në avantazh në minutën e 63` të takimit, kur përfitoi nga një grushtim i topit me dorë nga portieri i Interit. Sulmuesi ka gjetur rrjetën duke bërë që në stadium të bjerë heshtja.

Conte mundohet të ndryshojë diçka duke kryer dy zëvendësime pas golit. Në fushë futet Barella dhe Politano dhe shpërblimi vjen në kohën shtetsë, kur Sensi asiston Barellën që gjen golin e barazimit. Ndërkohë, në sfidën e grupit G, Lyon dhe Zenit gjithashtu kanë ndarë nga një pikë, pasi janë ndalur në barazim 1-1.

Miqtë shënuan të parët me Azmoun në minutën e 41`, ndërsa Lyon ka shënuar në pjesën e dytë, kur Depay shndërroi në gol një penallti në minutën e 50-të. Pas ndeshjes të së martës, Zenit dhe Lyon mbajnë përkohësisht vendin e parë në grupin G, ashtu si Inter dhe Slavia Prague në Grupin F.

Benzema, 13 vjet pa shënuar kundër PSG

Sulmuesi i Real Madridit ka luajtur kundër PSG 10 herë, por vetëm një herë gjeti rrjetën. Karim Benzema do të luajë në takimin e së mërkurës kundër Paris Saint-Germain, i prirur për të vazhduar formën e tij të mirë të shënimit të golave, gjithashtu duke tentuar të përmirësojë statistikat e tij kundër skuadrës nga atdheu i tij. 9-ta e Real Madridit shënoi dy herë të shtunën kundër Levante, teksa kishte mundësi të shënonte një ‘hat-trick’. Por nuk është e njëjta histori kur vjen puna te PSG.

Në 10 ndeshje zyrtare që Benzema ka luajtur kundër Parisienve, ai ka shënuar vetëm një herë në takimin e parë me PSG në Trofe des Champions, kur sulmuesi aktual i Real Madridit, luante për Olympique Lyon në korrik të vitit 2006, tre vjet para se të bashkohej me Los Blancos. Trembëdhjetë vjet më pas, Benzema po synon ti japë fund ‘thatësirës’ së golave ndaj PSG.

Të mrëkurën në mbrëmje, Karim Benzema do të jetë kundër një portieri që ai e njeh shumë mirë, Keylor Navas. Ai i ka shënuar portierit nga Kosta Rica shumë herë në fushën e stërvitjes, kur e kishte shok ekipi për pesë vite, por kurrë nuk i ka shënuar në një ndeshje zyrtare. Ndaj, të mërkurën, Benzema do të ketë mundësi ti shënojë një miku të vjetër dhe PSG.

Mitrovica si Vllaznia, kualifikohet në grupet e Champions Leage për femra

Shqiptarët do të përfaqësohen me dy ekipe në kompeticionin e Champions League për femra. Pas Vllaznisë, që arriti të kualifikohet si vendi i parë në grupin 10, ka qenë skuadra e femrave të Mitrovicës në Kosovë, që është kualifikuar si ekipi i parë në grupin 2.

Skuadra e Mitrovicës i ka mbyllur garat e këtij grupi me tri fitore në po aq ndeshje të zhvilluara. Në ndeshjen e fundit dhe përcaktuese për vendin e parë, mitrovicaset kanë shënuar fitore në duel me kampionet e Malit të Zi, Breznica Pljevlje, me rezultat 1:0.

Ndonëse për kampionet kosovare në këtë ndeshje mjaftonte edhe barazimi, ato, megjithatë arritën që t’i gëzohen fitores me golin e shënuar nga Kaltrina Biqkaj, në minutën e 90-të nga pika e penalltisë.

Më herët, Mitrovica kishte mposhtur edhe Olimpia Cluj dhe NSA Sofia. Kësisoj, për herë të parë në historinë e re të futbollit kosovar, një klub do të marrë pjesë në rrethin e grupet e Champions League për femra, ku janë të përfshira 32 ekipe. Shorti për rrethin e dytë do të tërhiqet më 16 gusht në Nion.

Feronikeli reziston 67`, New Saint e largon nga Championsi (mbetet vetëm Partizani)

Feronikeli i është bashkuar Shkëndijës së Tetovës në rrugën e kthimit në turin e parë kualifikues të Champios League. Skuadra kosovare është eleminuar nga uellsianët e New Saint, të cilët fituan me rezultatin 1-0 ndeshjen e kthimit në Prishtinë, pas barazimit 2-2 në Uells. Do të mjaftonte një barazim pa gola për Feronikelin për të vijuar më tej në aventurën e Champions League, por ekipi kosovar ka rezituar vetëm 67 minuta, pasi Ebbe i ka ndëshkuar “Dardanët”, duke mjaftuar për të kualifikuar ekipin e tij.

Ka qenë një gol i ardhur nga pakujdesia e mbrojtjes së Feronikelit, që i la hapësira të mëdha Ebbes në minutën e 67`, duke realizuar me kokë një gol me shumë vlerë për New Saint. Megjithatë, pjesa tjetër e ndeshjes ka folur për skuadrën kosovare, që pavarësisht balancimit në mbajtjen e topit, ka tentuar shumë herë portën, por mbrojtja dhe portieri mik, nuk lejuan që topi të shkonte në rrjetë.

Partizani është i vetmi ekip shqiptar, që mbetet të luajë pas 24 orësh në Champions League kundër Qarabag, nga ku do të mësojë nëse do të vijojë aventurën në turin e dytë kualifikues të Champions League, apo do të kthehet në shtëpi si Shëkndija e Tetovës dhe Feronikeli në Kosovë. Ndeshja e parë  në Tiranë mes Partizanit dhe Qarbagut, përfundoi në barazim 0-0, një rezultat ku “Demave”, do t`u mjaftonte një fitore minimale 1-0 të mërkurën, për të vijuar më tej aventurën.

Skip to toolbar