Amendamentet e PS për listat, Salianji: Çertifikimi i frikës deri në palcë që kanë drejtuesit e Rilindjes

Ish-deputeti demokrat, Ervin Salianji, reagon pas propozimit të amendatmente të propozuara një ditë më parë nga Partia Socialiste për listat, që ndonëse PS pretendon se janë 100% të hapura, opozita thotë krejt të kundërtën.

Salianji shkruan në “Facebook” se propozimi i Ramës për lista 100% të mbyllura është çertifikimi i frikës në palcë që kanë drejtuesit e Rilindjes.

Sipas ish-deputetit, “Votimi me renditje pa asnjë diferencë nga zgjedhjet e kaluara tenton të sjellë në parlament të korruptuarit e Rilindjes!”

Reagimi i Salianjit:

Propozimi i Ramës për lista 100% të mbyllura është çertifikimi i frikês në palcë që kanë drejtuesit e Rilindjes se pas humbjes së pushtetit do të humbin dhe ndikimin në PS!

Me lista të hapura është votuesi ai që përcakton se kush bēhet deputet, kandidatët renditen sipas grumbullimit të votave të marra nga qytetarët dhe jo nga renditja e partisë! Nëse renditja e partisë është përcaktuese nuk ka hapje listash! Ky propozim rrëzon dhe propogandën se ndryshimet kushtetuese u bënë për të hapur listat.

Ky palaçollëk i propozuar i rrëzoi mbulesën e fundit dhe i nxorri qartë frikën e përballjes me zgjedhjet dhe qytetarët! Votimi me renditje pa asnjë diferencë nga zgjedhjet e kaluara tenton të sjellë në parlament të korruptuarit e Rilindjes! Fytyrat më të urryera nga qytetarët kërkojnë të imponohen nga Rama me marifet elektoral!

Rindërtimi, Rama fton opozitën: Denonconi abuzuesit, do ndëshkohen rëndë

Kryeministri Edi Rama, i pranishëm në prezantimin e platformës online për aplikimin në programin e rindërtimit, u shpreh se në këtë program janë përfshirë edhe qytetarët të cilët nuk humbën shtëpinë. Rama tha se janë identifikuar në kohë rekord zonat për ndërtimin e banesave të reja në zonat e prekura nga tërmeti. “Sot 2 muaj nga tragjedia e tërmetit. Kërkojmë durim nga qytetarët, po punohet pa orar. Në këto 60 ditë kemi bërë një volum pune shembullor. Programi s’adreson vetëm ata humbën shtëpinë, por dhe të dëmtuarit. Pasi janë identifikuar në kohë rekord, zonat e rindërtimit, se duam të krijojmë një situatë të re, që në aspektin e familjes për të marrë një shtëpi më të mirë se ajo që kishte, në 95% të rasteve, se ka ca që i kanë pasur shumë të mira, dhe do ua bëjmë” , tha Rama.

Rama shtoi më tej, se qytetarët që do të zhvendosen në shtëpitë e reja, do të përfitojnë banesë në pronën e shtetit, ndërsa prona në shtëpitë që u prekën do t`u mbetet gjithashtu atyre. “Duam të krijojmë komunitete dhe për këtë ka pasur angazhim nga kryetarët e bashkive, që të komunikohet banorëve në zonat rurale dhe t’u bëhet e qartë se ka një avantazh të madh që të s’postojmë shtëpitë ekzistuese nga rrënojat e shtëpive ekzistuese në qendërza që krijojnë komunitet. Prona në shtëpitë e tyre që janë prekur mbetet e tyre. Ata do të marrin shtëpitë e tyre, në një pronë që s’është e tyre. Do të përfitojnë pronë. Nuk do të humbasin pronë. Do të përfitojnë në çdo aspekt, sepse nëse sot i kanë shtëpitë me distancë nga shërbimet dhe duhet që e gjithë famija të angazhohet që për të shkuar në shkollë fëmijët, deri tek të moshuarit që duan të shkojnë në spital, duke u afruar kanë mundësi të tyre. Toka e tyre në zonat rurale do të vazhdojnë ta punojnë. S’ka pse të zhvendoset e gjithë familja”, u shpreh Kryeministri.

Gjithashtu, kryeministri u shpreh se banesat e reja do të jenë më të sigurta. Ai tha se do të ndërtohen duke zbatuar të gjitha parametrat e rindërtimit, për të siguruar cilësi jete. “Duhet identifikuar zonat, për të parë me nikoqirllëk, për të mos shkuar në zona private për të mos bërë shpronësime, por në zona publike, por nuk është e thjeshtë se ç’po heqim. Përtej aspektit të bazës ligjore dhe të planifikimit, qëndron aspekti i garantimit të të gjithë parametrave të rindërtimit. Parametrat e ndërtimit do të jenë të padiskutueshme. Që të jenë anti sizmike, që nëse ndodh në të ardhmen një lëkundje e fortë, shtëpitë të jenë shumë herë rezistente dhe të garantojnë cilësi jete. Dhe në zonat urbane ku do ndërtojmë blloqe banimi, të jenë shembullore të të gjithë parametrave”, tha Rama.

Në përfundim të fjalës së tij, kryeministri Edi Rama u bëri thirrje personave përgjegjës që do të merren me aplikimin e qytetarëve për programin e rindërtimit, që të shmangin abuzimet. Rama tha se do të ndëshkohet çdokush që aplikon për banesë në programin e rindërtimit, por që nuk është prekur nga tërmeti. Gjithashtu, kryeministri u drejtoi një apel edhe zyrtarëve, të cilët i paralajmëroi se duhet të bëjnë kujdes në këtë aspekt, pasi sipas tij, një grup i posaçëm do të merret me verifikimin në terren të abuzimeve. Në këtë pikë, Rama ftoi dhe opozitën për të bërë denoncime. “Kemi ndërtuar një grup që nuk e njeh asnjë njeri, që do të vëzhgojë procesin e rindërtimit dhe abuzimet. Këtu e ftoj opozitën të vëri ulërimën për çdo rast abuzimi”, tha ndër të tjera Rama.

“Nuk premtoj mrekulli”, Rama në Ukrainë: Do punojmë për të arritur paqen

Kryeministri Edi Rama, në cilësinë e Kryetarit të OSBE, nisi të hënën vizitën dy ditore në Ukrainë. Pas takimeve që pati me disa zyrtarë të lartë të këtij vendi, Rama mbajti një konferencë për shtyp me ministrin e Jashtëm të Ukrainës, Vadym Prystaiko. Gjatë fjalës së tij, Rama u shpreh se nuk do të bëjë mrekulli në krye të OSBE, por theksoi se synim mbetet “zgjidhja e konfliktit dhe ndihma ndaj njerëzve në zonat e prekura nga konflikti midis Ukrainës dhe Rusisë”.

“Dua t’ju falenderoj për diskutimet e sinqerta dhe produktive. Pres me padurim të takohem me kryeministrin dhe presidentin dhe autoritete të tjera të larta gjatë ditës. Nuk është rastësi që Ukraina është vizita ime e parë si kryetar i Presidencës së OSBE-së, ajo reflekton rëndësinë e përpjekjeve për të zgjidhur krizën. Do të bëjmë maksimumin dhe do të inkurajojmë fort zbatimin e marrëveshjeve të Minskut.

Ndërkohë që marrëveshjet, formatet po diskutohen dhe duke qenë se shumë kohë e ndoshta do të kërkohet, ajo çka mbetet thelbësore mbetet jeta e njerëzve dhe vështirësitë që të gjithë ata përballin duke jetuar në zonat e prekura nga konflikti. Aty është ku ne do të punojmë pa reshtur duke bërë gjithçka, pasi garantimi i ndalimit të të shtënave dhe një armëpushim i qëndrueshëm është jetik për jetën e njerëzve atje”, tha Rama.

Rama tha se rruga drejt paqes është e gjatë, ndërsa u shpreh se misioni i OSBE do të punojë për të arritur finalizimin e këtij procesi. “Konflikti vijon të prodhojë viktima civile dhe kjo është e papranueshme. Kjo duhet të ndalet. Synimi ynë është ë sigurojmë armëpushim të plotë. Rruga është e gjatë drejt një paqeje të qëndrueshme dhe unë jam këtu për t’iu thënë se përfaqësuesi im i posaçëm në Ukrainë do të të eksplorojë mënyrën si të ecë sa më mirë ky proces.

Ne ndajmë bindjen që kontributi që është dhënë nga misioni i monitorimit është unik dhe thelbësor për të ulur tensionet dhe rivendosur paqen. Unë ndava me ministrin për të mbështetur më shumë me një buxhet më solid për tu siguruar që ta luajë më mirë rolin e vet. Në Ukrainën Lindore dua të shoh personalisht situatën dhe ndikimin praktik në terren të misionit të monitorimit.

Jemi të vendosur për të ndihmuar që të sjellin një zgjidhje paqësore të konfliktit dhe të përmirësojmë jetët e atyre që janë prekur në mënyrë brutale nga konflikti. Nuk jemi këtu për të premtuar ndonjë mrekulli, por e dimë se ka diçka që ne mund ta bëjmë më mirë se të tjerët, për të ndihmuar që të lehtësojmë sa shumë të jetë e mundur jetët e atyre që janë të pafajshëm” tha ai. Gjatë vizitës në Ukrainë, si kryetar i OSBE, Rama do të ketë takime me drjetuesit e këtij shteti, ndërsa të martën do të vizitojë zonat e prekura nga konflikti në Ukrainën Lindore.

Kryesimi i OSBE, Rama prezanton nesër në Vjenë prioritetet

Kryeministri dhe Ministri i Shqipërisë për Evropën dhe Punët e Jashtme Edi Rama do të jetë të enjten në Vjenë për të paraqitur programin me përparësitë e kryesimit të OSBE për vitin 2020. Sipas një njoftimi zyrtar të bërë nga OSBE, Shqipëria do të përqëndrohet në zbatimin e angazhimeve politike të OSBE-së, bërjen e ndryshimit në terren dhe vazhdimin e forcimit të dialogut të frymëzuar nga 30 vjetori i Kartës së Parisit.

Kryeministri Edi Rama dhe Sekretari i Përgjithshëm Thomas Greminger do të mbajnë një konferencë të përbashkët për mediat, pasi Rama të marrë zyrtarisht detyrën e Kryetarit të OSBE. Shqipëria mori kryesimin e Organizatës për Siguri dhe Bashkëpunim në Europë nga Sllovakia në datën 1 janar të këtij viti.

Këshilli i Përhershëm i OSBE-së është një organ vendimarrës që mbledh përfaqësues të 57 shteteve pjesëmarrëse të Organizatës dhe 11 Partnerë për Bashkëpunim. Ajo mblidhet çdo javë në Vjenë për diskutuar mbi zhvillimet në zonën e OSBE-së dhe për të marrë vendimet. Gjatë vitit 2020 kjo organizatë do të drejtohet nga Shqipëria, si një nga vendet anëtare të saj.

Rama viziton në shtëpinë e re Marjana Rexhepin që i mbijetoi tërmetit

Marjan Rexhepi humbi nënën e saj dhe shtëpinë nga tërmeti i 26 nëntorit. Por fatmirësisht ajo i mbijetoi fatkeqësisë duke dalë nga rrënojat pas 13 orësh. Të hënën, Marjan Rexhepi është vizituar në shtëpinë e re nga Kryeministri Edi Rama. Ajo shprehu mirënjohjen ndaj forcave të kërkim shpëtimit dhe kryeministrit, që jo vetëm e nxorën të gjallë nga rrënojat, por tashmë ka dhe shtëpi të re.

“Mendove për një jetime, faleminderit shumë. Respekte shumë për ju. Jeta kështu e ka. Tërmeti ishte një gjë e papritshme. Kam qëndruar 13 orë nën gërmadha, Luani është heroi dhe Rama që solli ndihmësat shumë shpejt”, tha Marjana.

Ndërkohë, pasi pa ambientet e shtëpisë së Marjanës, Kryeministri Edi Rama u shpreh se procesi i rindërtimit do të jetë transparent. Ai tha se ndërtimet e reja do të bëhen me cilësi.

“Çfarë mund të bëjmë, do ta bëjmë me shumë përkushtim, deri në fund. Duhet të jemi maksimalisht transparente dhe të garantojmë procesin e rindërtimit me cilësi, sepse sfida është që të sjellim situatën më mirë seç ishte më parë. Ndërkohë po bëjmë dhe projektet e shkollave dhe spitaleve dhe besoj që do t’i kemi në funksion në fillim shtatorit kur fillon shkolla, ky është qëllimi im”, tha kreu i qeverisë, në një bisedë me familjarët.

QUDS do të kryente sulme në Shqipëri, Rama e PD mbështesin SHBA për vrasjen e Solejmanit

Shqipëria është rreshtuar krah Shteteve të Bashkuara të Amerikës, pas aksionit për vrasjen e liderit të Forcave Elitare QUDS të Iranit, Kasem Solejmanit. Kryeministri Edi Rama reagoi në mbrëmje duke u shprehur se “si një vend që njohu pak kohë më parë veprimtarinë e padrejtë të Iranit kundër botës së lirë dhe mori distancë të qartë nga ajo, Shqipëria aprovon me forcë qëndrimin e Donald Trump ndaj një aktivisti keqdashës të regjimit të Teheranit! Ne jemi të vendosur me SH.B.A. dhe shpresojmë se të gjithë ta bëjnë këtë”, shkruan kryeministri Rama në Twitter.

Të njëjtin qëndrim mbajti edhe Partia Demokratike, e cila u shpreh se “mbështet angazhimin e SHBA në luftë kundër terrorit. Vendimi i presidentit Trump për goditjen e njërit prej arkitektëve dhe drejtuesve të aktiviteteve terroriste është nje akt i fortë lidershipi dhe mbrojtje e vlerave demokratike e të paqes”, shkruan Partia Demokratike.

Po çfarë e lidh Kasem Solejmanin me Shqipërin? Gjatë muajit tetor të vitit të kaluar, Policia e Shtetit doli në një deklaratë për mediat ku njoftoi se kishte parandaluar një akt terrorist. Disa shtetas iranianë do të kryenin sulme terroriste në vendin tonë ndaj përfaqësuesve të opozitës iraniane “MEK”, që strehohet prej vitesh në Shqipëri. Sipas Policisë së Shtetit personat që do të kryenin këto sulme ishin pikërisht anëtar të QUDS, Forcës së Gardës Revolucionare të Iranit, të drejtuar nga Kasem Solejmani.

“Tërmeti do të bjerë ndaj KÇK”, Rama: 2020 do të jetë viti i investimeve të mëdha

Kryeministri Edi Rama mbajti një mesazh për fundvit drejtuar shqiptarëve. Pasi foli për rindërtimin nga tërmeti, Rama u fokusua gjatë te prioritetet e qeverisë për vitin 2020. Kreu i ekzekutivit ushpreh se gjatë vitit të ardhshëm “do të bjerë tërmet mbi botën e krimit”. “Viti 2020 duhet të shënohet si viti kundër forcës së krimit. Me të nisur Viti i ri tërmeti i shtetit do të bjerë fuqishëm mbi të fortët, që i bëjnë karshillëk komunitetit dhe këtij vendi, që nuk meriton njollën e pisllëkut. Kush është akuzuar nga Prokuroria dhe i ka shpëtuar drejtësisë, duhet të provojë pastërtinë e burimit të pasurisë. Kush i ka shpëtuar drejtësisë me anë të KÇK, do të përgjigjet”, tha Rama.

Më tej, Kryeministri Edi Rama foli gjatë edhe për prioritetet e qeverisë për vitin 2020. Ai përmendi disa investime strategjike, duke filluar nga nisja e kërkimeve për naftë në Dumre dhe Shpirag. Për këto, Rama tha se “kontrat do të jenë me interes për shtetin shqiptar”. Një tjetër premtim i kryeministrit ishin investimet në infrastrukturën universitare që përfshihen në “Paktin për Universitetin”. “Pakti për universitetin është për ne një prioritet, pa asnjë lidhje me strukturat akademike”, tha Kryeministri. Gjithashtu, Rama u ndal te investimet e huaja, që ai i quajti “serioze”.

Sipas Kryeministrit në “vitin 2020 duhet të shënohet si viti i nisjes së investimeve të huaja serioze në vijën bregdetare dhe i investimeve vendase të cilësisë së parë, duke krijuar kapacitete pritëse për turizmin e shtrenjtë; që sjell më shumë të ardhura dhe krijon më shumë vende të reja pune të paguara më mirë”. Sipas tij, të gjitha këto do të shërbejnë për “rilindjen ekonomike dhe sociale të vendit”, që la pas fundviti i 2019. “Nuk duhet ta humbim këtë momentum të ri për të kapitalizuar rilindjen ekonomike e sociale që ka prodhuar ky fundvit dramatik, nuk kemi kohë për të humbur, duhet të shtyjmë me forcë përpara dhe të bëjmë pa humbur kohë çdo punë që nuk dihet lënë më për nesër”, tha Rama.

Një tjetër premtim i kreut të qeverisë, ishte ai për dhënien e dokumenteve online duke shmangur sportelet. Rama tha se “brenda vitit 2020, duhet të marrë fund historia e aplikimeve me dosjen sa një mal, që sot e tridhjetë vjet i kërkohet qytetarit për një shërbim, duke e detyruar të bredhë në dhjetëra zyra për të siguruar dokumentet e nevojshme për një aplikim”, tha Kryeministri. Ndërkohë, ai bëri një premtim tjetër të rëndësishëm, duke u zotuar se do të zgjidhen problemet me pronën për dhjetëra familje.

“Viti 2020 duhet të shënohet si viti i zgjidhjes përfundimtare të problemit të pronës për dhjetëra mijëra familje në fshat nga veriu në jug që janë kthyer në kufijtë e vjetër pa asnjë konflikt me fqinjët rreth tyre. Kanë 30 vjet që presin në tokën e stërgjyshërve dhe as e shesin dot, as aplikojnë dot për financime nga shteti, ose nga institucionet financiare për zhvillimin rural, sepse nuk e gëzojnë dot ligjërisht, pasi e kanë të pamundur ta regjistrojnë”, tha Rama.

Gëzuar Vitin e Ri 2020!Ardhtë i lehtë, me shëndet e mbarësi në familjet tuaja🙏Zoti e bekoftë Shqipërinë!🇦🇱
Gepostet von Edi Rama am Montag, 30. Dezember 2019

Rama në familjen e prekur nga tërmeti në Kamëz

Kryeministri Edi Rama vizitoi pasditen e të premtes një tjetër familje që mbeti e pastrehë nga tërmeti, ndërsa tashmë përfitoi bonusin e qirasë. Rama ishte në familjen e Esat Lleshit në Kamëz. Tetë anëtarët e kësaj familje mbetën pa shtëpi pasi ajo u dëmtua nga tërmeti i 26 nëntorit.

Rama, shprehet se “në familjen prej tetë antarësh të Esat Lleshi, e cila u godit nga tërmeti e humbi strehën dhe sot, njësoj si mijëra familje të tjera të prekura është sistemuar në një shtëpi me qera. Deri në ndërtimin e shtëpisë së re apo meremetimin e shtëpisë së dëmtuar, familja e Esatit dhe të gjitha familjet që kanë humbur shtëpinë në qytetet e prekura, plot 4127 të regjistruara aktualisht, do qëndrojnë me qera të paguara nga shteti”, shkruan Rama.

Ndërkohë, gjatë bisedës me kryefamiljarin e kësaj familje, Rama shprehet se tërmeti ishte një sprovë e madhe. Megjithatë, kryeministri mbetet optimist se do e kalojmë këtë moment të vështirë. “Janë pjesë e punës edhe të sharat, edhe shpifja, rrenat, duhet me i duru s`ke çfarë bën. Na ka sprovu shumë. Na ka sprovu shumë. Por unë besoj se do t`ia dalim”, tha Rama.

Ndërsa i dhuroi dy fëmijëve të kësaj familje dhurata për festat, Rama nuk kurseu batatut me djalin e familjes Lleshi. Fëmija kishte pasion pikturën, pasion të cilin e ka dhe kryeministri. Rama i dhuroi djalit të vogël një set me bojëra për të pikturuar, ndërsa i këshilloi atij të mos heq dorë nga piktura. “Mos e ndaj pikturën. Do bëhesh bojaxhi si puna ime. E ke një zanat në xhep, sido që të vijë puna gjithmon ka nevojë për bojaxhi. Se gjithmonë duhet bojaxhiu”, tha Rama.

Ndërkohë, kreu i Bashkisë së Kamzës njoftoi kryeministrin se në këtë qytet nuk ka asnjë banorë që jeton në çadër. Ata janë sistemuar të gjithë në banesa ndërsa trajtohen me bonusin e qirasë.

Shpërblim për pensionistët? Rama: Vendosim nesër

I pyetur nga gazetarët nëse ekzitojnë mundësitë për shpërblimin e pensionistëve, Rama deklaroi, pas mbledhjes së qeverisë në Golem, se të martën do të merret një vendim për këtë. Kryeministri u shpreh se pas asaj që ndodhi me tërmetin, qeveria është bërë më e kujdesshme, me qëllim që të jemi të sigurt tha ai, që do e përballojmë rindërtimin.

“Nesër kemi mbledhje e qeverisë dhe do të flasim dhe për këtë. Çfarë na ka ndodhur na ka bërë më të kujdesshëm, jo të frenuar se ideja ka qenë të mos cenojmë prioritete dhe pensionistët nuk janë kurrë një kategori që mund ta neglizhojmë, por jemi të kujdesshëm sepse duam të jemi të sigurt 100% që do ta përballojmë qoftë edhe vetë rindërtimin dhe për këtë duhet të presim konferencë, që të kemi një qartësi sa do të jetë barra e Përgjithshme”, tha Rama.

Mbledhja e qeverisë në Durrës u mbajt për të bër një bilanc të punës në këto gjashtë muaj. Kryeministri nuk adresoi kritika në publik për ministrat, por tha se për një pjesë të punëve do duhet të ketë më shumë informim në publik, pasi sipas tij atyre nuk u kushtohet rëndësi në media. “Kur sheh punën e bërë dhe më orë të tërë shumë gjëra që janë bërë apo në proces vërtetë mendoj se është një punë goxha e madhe dhe një nga ato që do të shohim si mund të përmirësohet është komunikimi dhe informimi për këto punë, pasi në një pjesë ju nuk keni vëmendje, çdo ditë ka ngjarje dhe lajme” tha ai.

“Ndryshim politik s`ka”. Rama citon Konicën para Metës

Të mërkurën u mbajt në Tiranë tryeza e Këshillit Koordinues të Diasporës. Në këtë tyrezë, ishin të pranishëm dhe dy drejtuesit kryesorë të shtetit, Kryeministri Edi Rama dhe Presidenti Ilir Meta. Gjatë fjalës së tij, Kryeministri Rama foli për disa çështje që lidhen me diasporën. Ai u shpreh së pari se në Komisionin e Reformës Zgjedhore janë dorëzuar proceset për ti dhënë të drejtën e votës emigrantëve.

“Në komisionin e Reformës Zgjedhore janë dorëzuar proceset për ti dhënë të drejtën e votës atyre që janë jashtë vendit. Ky vit ishte viti i parë që mësuesit e Diasporës i kanë marrë librat para vitit shkollor. Inventari që në raport me këto dy vjet është si dita me natën. Zoti e dërgon tërmetin si një mundësi për tu penduar dhe për tu pastruar. Të gjitha rastet e tërmeteve kanë një të përbashkët. Diferencën e ka bërë ndërveprimi i atij populli brenda dhe jashtë. Pra Diasporat e vendeve të goditura kanë qenë faktor i madh në rindërtim”, tha Rama.

Në prani të Ilir Metës, Rama dha dhe disa mesazhe politike drejtuar presidentit dhe opozitës. Duke cituar një shprehje të Faik Konicës, Rama la të kuptohet se pavarësisht sitautës që po kalon Shqipëria, ndryshime politike nuk do të ketë.

“Po e Mbyll me Faik Konicën: Historia na mëson se gjithë ndryshimet politike kanë pasur përherë këta dy faktorë: emigrantët dhe një elitë të vogël, e lindur apo intelektuale, brenda vendit. Ndryshim politik nuk ka. Por është një ndryshim më i madh që ta kapërcejë politikën ta ridimensionojë brenda perimetrit të arsyeshëm. Shpresoj që mesazhin e tërmeti të mos e harrojnë. Duke zgjeruar perimetrin e mirëkuptimit dhe bashkëpunimit me njerëzit. Shpresoj që produktet e këtyre të pranishmëve të kenë lartësinë e personave këtu”, tha Rama.

Nga tryeza e parë e Këshillit Koordinues të Diasporës në Tiranë, Kryeministri Edi Rama shprehu falënderimin dhe mirënjohjen për mërgimtarët shqiptarë, për kontributin që kanë dhënë për mbledhjen e fondeve për rindërtimin nga tërmeti. Ai dha garanci se të gjitha fondet e mbledhura në diasporë do të shkojnë në destinacion, duke u shprehur se procesi i rindërtimit do të jetë tërësisht transparent dhe nuk do të ketë abuzim.

“Më vjen mirë që 13 mijë banorët u sistemuan nëpër hotele dhe të tjerë në shtëpi me qira, ndërkohë pakujdesja ndaj tyre ka rezultuar e suksesshme. Sot që flasim vijon inspektimi i inxhinierëve për të ndihmuar dhe ne urojmë që brenda janarit të kemi një raport të post-katastrofës, por edhe një faturë finaciare paraprake. Fill pas saj do të filloj pjesa e rindërtimit. Në duam të dalim më të fortë nga kjo situatë dhe falë procesit të rindërtimit të krijojmë një cilësi të re në marrëdhëniet e njerëzve, por edhe marrëdhëniet e njerëzve me vetë vendin”.

“Qysh në sekondën e parë ne patëm komfortin e mbështetjes së Diasporës, që për hir të së vërtetës në 30 vite e Shqipërisë ka qenë investitori më i madh në Shqipëri. Askush nuk ka investuar më shumë se Diaspora shqiptare. Ne jemi besimplotë që fondet, përtej vlerës së tyre të konsiderueshme financiare, kanë një vlerë të konsiderueshme morale dhe sociale, do të shkojnë aty ku janë destinuar sipas një transparence të plotë. Mekanizmi i transparencës do të jetë i besueshëm dhe i aksesueshëm nga të gjithë.”-tha Rama.