Kuvendi, 1 minutë heshtje për viktimat. Ruçi: Vetting lejeve të ndërtimit

Parlamenti ka nisur seancën e sotme me një minutë heshtje për 51 viktimat nga tërmeti i 26 nëntorit. “Në kujtim dhe nderim të 51 viktimave të tërmetit të 26 nëntorit iu ftoj të mbani një minutë heshtje. U prehshin në paqe” tha Ruçi.

Kryetari i Kuvendit Gramoz Ruçi falënderoi opozitën që dha shenja mirëkuptimi dhe vendosi jetën e qytetarëve mbi interesat politike. Ai bëri thirrje se tashmë ka ardhur koha për një vetting të thellë për të vlerësuar aftësitë dhe lejet për të ndërtuar dhe se tërmeti i 26 nëntorit ishte një thirrje zgjidhmi për të gjithë ligjvënësit për të kuptuar pa përsosmërinë që kemi me ligjet.

“Refleksioni i parë është mësimi prej humanizmit, solidaritetit dhe sakrificave të shqiptarëve kudo ku ndodhen, në Shqipëri, Kosovë, trevat e tjera shqiptare dhe në diasporë. Falenderoj të gjithë deputetët që në këto ditë u gjenden dhe janë pranë qytetarëve. Falenderoj të gjitha palët politike, përfshirë opozitën, që dhanë shenja mirëkuptimi e vëniet e jetës së qytetarëve mbi interesat politike dhe elektorale. Unë do t’i ndaja ligjet që janë miratuar në dy grupe të mëdha: ligje që rregullojnë punët e shoqërisë dhe ligje që rregullojnë marrëdhëniet e bashkëjetesën tonë me natyrën. Është e pamundur që në pak ditë të formosh një gjykim mbi pa përsosmërinë e ligjeve tona. Por në këtë grup të dytë, mendoj se ka diçka që nuk shkon. Prandaj mendoj se legjislacioni mbi tokën, mjedisin, ndërtimet, ujërat, parandalimin e fatkeqësive natyrore e çështje të tjera që lidhen me natyrën, burimet, pasuritë, por edhe kapriçiot e saj, nuk është thjesht i papërsosur. Dyshoj se në mjaft çështje nevralgjike të kompetencave tona mbi natyrën dhe menaxhimin e marrëdhënieve me mjedisin, kemi probleme. Tërmeti i 26 nëntorit na kujtoi se kemi nevojë për një vetting të thellë, për të verifikuar kualifikimet, aftësitë, agjencitë, procedurat, rregulloret, licencimet dhe lejet për të ndërtuar”, u shpreh Ruçi.

Ruçi tha se u ka kërkuar të gjithë homologëve të tij europiane, por edhe nga SHBA deri në Japoni mbështetje financiare për të rindërtuar zonat e prekura nga tërmeti.

“U kam shkruajtur të gjithë Kryetarëve të Parlamenteve të vendeve të BE-së, Presidentes së Dhomës së Përfaqësuesve dhe Presidentit të Senatit të Shteteve të Bashkuara, kryeparlamentarëve të vendeve fqinje, si edhe të gjitha vendeve tona partnere e mike, nga Kanadaja në Japoni, për t’i falenderuar për ndihmën bujare emergjente ndaj vendit tonë si edhe për të kërkuar mbështetje financiare për zgjidhjen e qëndrueshme e afatgjatë të problemit të strehimit dhe nevojave të tjera të banorëve të zonave të prekura nga tërmeti. Jam i bindur se mbështetja e vendeve mike e partnere nuk do të na mungojë”, ka mbyllur fjalën e tij Ruçi

Negociatat, Ruçi, letër kryeparlamentarëve të BE

Kryetari i Kuvendit, Gramoz Ruçi, u është drejtuar me letër kryeparlamentarëve të vendeve anëtare të BE-së, në lidhje me procesin e hapjes së negociatave. Duke i shprehur falënderim Presidentit të Bundestagut, Volfgang Schäuble, Ruçi shprehet se vota pro e Bundestagut për negociatat u prit me entuziazëm në Shqipëri. “Mbështetjen Tuaj ne e konstatuam qysh gjatë vizitës sonë në Bundestag, në muajin shkurt të këtij viti. Vota Pro e Bundestagut në 27 shtator u përjetua nga populli shqiptar si një votë e të gjithë Bashimit Europian dhe u prit me një entusiazëm të pashoq.”, shkruan Kryetari i Kuvendit në letrën e tij drejtuar Presidentit të Bundestagut.

Kryetari i Kuvendit falënderon gjithashtu, kryeparlamentarët me të cilët ka zhvilluar takime dypalëshe dhe ka kërkuar lobime për hapjen e negociatave në tetor, ndërsa u kërkon kolegëve të tij të vendeve të BE-së, që të rrisin presionin në Këshillin Europian për hapjen e negociatave. Gramoz Ruçi u drejtohet në mënyrë të veçantë kryeparlamentarëve të Francës, Holandës dhe Danimarkës, duke u shprehur keqardhjen për mungesën e mbështetjes për çeljen nga Bashkimi Europian të negociatave të pranimit me Shqipërinë.

“Kuvendi, qeveria, institucionet dhe qytetarët shqiptarë kanë bërë më të mirën për të përmbushur me sukses rekomandimet e Komisionit dhe të Këshillit Europian për pesë prioritetet kyçe të reformave integruese: reformës kurajoze e unike në drejtësi, luftën kundër korrupsionit dhe krimit të organizuar, reformës së administratës publike dhe garantimit e mbrojtjes së të drejtave të njeriut, përfshirë të drejtat e pronësisë. Vendimi i Këshillit Europian, edhe pse i pamerituar dhe që nuk i përgjigjet të vërtetës për rezultatet e Shqipërisë, nuk na dekurajoi, por, përkundrazi, na nxit për të ecur më shpejt e me performancë më të mirë drejt përmbushjes së kritereve për çeljen sa më shpejt të negociatave”.

“Ne e kemi të qartë se reformat integruese nuk janë qëllim në vetvete, por i shërbejnë zhvillimit të Shqipërisë, mirëqenies së qytetarëve si edhe stabilitetit, sigurisë dhe prosperitetit të rajon. Thellimi i reformave dhe konsolidimi i demokracisë në Shqipëri dhe vendet e tjera të rajonit i shërben gjithashtu shndërrimit të Ballkanit Perëndimor në një vlerë të shtuar të familjes europiane.”, shkruan në letrat e tij Kryetari i Kuvendit, Gramoz Ruçi, duke i ftuar kryeparlamentarët e Francës, Holandës dhe Danimarkës për një vizitë zyrtare në Shqipëri, në mënyrë që të verifikojnë nga afër arritjet e Shqipërisë në plotësimin e standarteve të integrimit.

PE, t`i hapen negociatat Shqipërisë

Presidenti i Parlamenti Europian, David Sassoli do t`i drejtohet Këshillit Europian me qëndrimin se “Parlamenti Europian është pro çeljes së negociatave me Shqipërinë dhe Maqedoninë e Veriut”. Ky qëndrim është i Sassolit është mbajtur gjatë takimit që zhvilloi me kryetarin e Kuvendit të Shqipërisë Gramoz Ruçi dhe kryetarin e Grupit Parlamentar socialist, Taulant Balla.

Gjatë takimit të zhvilluar në Bruksel, David Sassoli është shprehur se: “Parlamenti Europian është i qartë në qëndrimet e tij sepse jemi shumë të kënaqur nga përparimi i Shqipërisë. Unë do t’i drejtohem mbledhjes së Këshillit Europian me prezantimin e qëndrimit të Parlamentit Europian pro çeljes së negociatave me Shqipërinë dhe Maqedoninë e Veriut. Destinacioni i Shqipërisë është i qartë dhe i shkruar: Bashkimi Europian. Çelja e negociatave me Shqipërinë dhe Maqedoninë e Veriut është me rëndësi strategjike dhe një stimul për gjithë Ballkanin Perëndimor”, thuhet në deklaratë.

Kryetari i Kuvendit Gramoz Ruçi është shprehur gjatë takimit me David Sassolin, se Shqipëria është duke zbatuar reformën në drejtësi, ndërsa krimi dhe korrupsioni do luftohet me ligje të ashpra. “Reforma në drejtësi po ecën me sukses dhe në muajt e ardhshëm do të bëhen funksionale edhe organet e reja të sistemit të drejtësisë. Korrupsionin dhe krimin e organizuar e luftojmë me ligje më të ashpra dhe jo me retorika. Ne kemi vetëm një plan A për destinacionin tonë dhe ai është BE. Shqipëria kërkon çeljen e negociatave sepse i meriton ato dhe do të jetë një vlerë e shtuar për BE-në”, është shprehur Ruçi.

Ruçi, Metës: Të vendosur të mbrojmë Kushtetutën

Kreu i Kuvendit Gramoz Ruçi, i ka kthyer përgjigje Ilir Metës, duke i kujtuar se Parlamenti është i vendosur deri në fund që të mbrojë Kushtetutën dhe demokracinë. Këtë deklaratë kryeparlamentari Ruçi e bëri gjatë ditës ndërkombëtare të demokracisë, ku cilësoi se Kushtetuta është garanti i vetëm i demokracisë dhe Kuvendi do ta mbrojë atë pa asnjë kompromis.

“Kjo ditë na kujton se demokracia liberale është forma kryesore e demokracisë në kohën e sotme. Dhe demokracia liberale është në radhë të parë e mbi të gjitha demokraci kushtetuese. Kushtetuta është garanti i demokracisë dhe Kuvendi i Shqipërisë është i vendosur deri në fund dhe pa asnjë kompromis për mbrojtjen e Kushtetutës. Kuvendi është një institucion kyç i demokracisë dhe mbështetet në veprimtarinë e tij parlamentare ligjbërëse e kontrolluese në parimin universal të Magna Carta se demokracia mund të realizohet si demokraci nën ligj.” shkruan Ruçi.

Kjo duket si një përgjigje që Ruçi i jep presidentit Meta, i cili më herët në “mbrojtje” të demokracisë foli si opozitar për “ngritje të popullit” dhe sulme e akuza ndaj qeverisë duke e cilësuar si “qeverisje të pakicës.” Pavarësisht statuseve të kreut të Shtetit në Facebook se ai gëzon një miqësi me Ruçin, duket se ky i fundit nuk ka hezituar t’i tregojë se përtej miqësisë nuk do të rrezikohet Kushtetuta e demokracia e Shqipërisë.

Presidenti Meta është në një proces hetimi nga Kuvendi për shkelje të rëndë të Kushtetutës dhe pritet që të marrë një vendim në muajin tetor për shkarkimin ose jo të tij.

Pavarësia e Maqedonisë së Veriut, Ruçi uron Xhaferin

Kryetari i Kuvendit, Gramoz Ruçi, i ka dërguar një letër urimi Kryetarit të Kuvendit të Maqedonisë së Veriut, Talat Xhaferi, me rastin e 28-vjetorit të pavarësisë. Ruçi vlerëson kontributin e pazëvendësueshëm të shqiptarëve në stabilitetin e vendit si edhe përshpejtimin e proceseve të integrimit europian dhe atlantatik në Maqedoninë e Veriut, ndërsa thekson se të dy vendet kanë një rol vendimtar në paqen dhe stabilitetin në rajon.

“Nëpërmjet Jush i dërgoj urimet më të mira Kuvendit të Republikës së Maqedonisë së Veriut, qytetarëve të vendit tuaj dhe një urim vëllazëror shqiptarëve që jetojnë në Maqedoninë e Veriut.

Shqipëria dhe Maqedonia e Veriut janë dy vende fqinje, e mike, në një partneritet të ngushtë në kontributin e tyre për zhvillimin, paqen dhe sigurinë në rajon. Janë dy vende me një rol vendimtar në zhvillimin, paqen dhe stabilitetin në rajon. Të dy vendet tona janë aktualisht drejt kurorëzimit të përpjekjeve të tyre për çeljen e negociatave të pranimit me Bashkimin Europian. Jam i lumtur të konstatoj se shqiptarët që jetojnë në Maqedoninë e Veriut kanë dhënë një kontribut të pazëvendësueshëm në zhvillimin, përparimin e stabilitetin e vendit si edhe përshpejtimin e proceseve të integrimit europian dhe atlantatik.”, shkruhet në letrën e urimit të Kryetarit të Kuvendit, Gramoz Ruçi

Ruçi, ambasadores Schutz: Reforma, vija e kuqe që nuk preket

Tre vite nga miratimi i Reformës në Drejtësi, qeveria vijon të mbështesë fort përparimin e saj, pacënueshmërinë dhe pakthyershmërinë për asnjë arsye, duke e cilësuar si vijën e kuqe që nuk do të shkelet. Rëndësia e reformës në drejtësi, u theksua nga kreu i Kuvendit Gramoz Ruçi gjatë takimit që pati me ambasadoren gjermane në Shqipëri, Susane Schutz.

“Zgjidhja mund të vijë vetëm nëpërmjet dialogut, por pa shkelur vijat e kuqe të këtij dialogu, të cilat janë Kushtetuta e ligji dhe pakthyeshmëria e reformës në drejtësi. Kuvendi ka krijuar të gjitha mundësitë që opozita parlamentare dhe joparlamentare të bashkëpunojnë për vazhdimin e reformave, përfshirë edhe reformën në drejtësi” tha kryeparlamentari Ruçi gjatë takimi, duke shtuar se ky bashkëpunim duhet të nis përmes dialogut, por pa shkelur vijat e kuqe.

Ruçi vlerësoi gjithashtu dhe mbështetjen që Gjermania i ka dhënë Shqipërisë në procesin e integrimit dhe hapjen e negociatave, duke kërkuar që kjo të vijojë edhe në muajin tetor ku pritet rezultati vendimtar.

“Shqipëria i është mirënjohëse Gjermanisë për mbështetjen gjatë gjithë tranzicionit, por në mënyrë të veçantë për mbështetjen e fuqishme të proceseve integruese. Jemi të bindur se rekomandimi i Komisionit Europian për hapjen pa kushte të negociatave nuk do të ishin të mundura pa mbështetjen e Gjermanisë, të Qeverisë dhe Bundestagut.” deklaroi Ruçi në takimin përshëndetës me ambasadoren gjermane, Schutz, e cila përfundon misionin e saj në Shqipëri. Mbështetja e rrugës evropiane të Shqipërisë u konfirmuar edhe nga ambasadorja Schutz. “Gjermania do të vazhdojë të mbështesë rrugëtimin europian të Shqipërisë dhe Maqedonisë së Veriut dhe Kancelarja Merkel është shumë e angazhuar për këtë proces.”

Rëndësinë e Reformës në Drejtësi, Ruçi e konfirmoi edhe të hënë paradite, duke e cilësuar si të “e pakthyeshme dhe e panegociueshme, pasi nuk mund të negociohet me të ardhmen e Shqipërisë .’ Këto deklarata Ruçi i bëri gjatë një aktiviteti për përkujtimin e 3-vjetorit të miratimit në unanimitet të plotë nga Kuvendi të Reformës në Drejtësi.

RUÇI FALËNDERON SOROSIN, MESAZH METËS: ASNJË NEGOCIATË PËR REFORMËN NË DREJTËSI

Festa e SHBA bashkon Metën dhe Ruçin, mungon Rama. Basha e Kryemadhi të ndarë në takim!

Presidenti Ilir Meta dhe kreu i Kuvendit Gramoz Ruçi janë shfaqur bashkë në festën e organizuar nga Ambasada e Shteteve të Bashkuara në Tiranë, me rastin e festës së pavarësisë. Realstory.al ka siguruar një foto, ku kreu i shtetit bashkë me kreun e Kuvendit, rrinë bashkë duke dëgjuar fjalimin e të ngarkuarës me punë të SHBA-së në Tiranë, Leyla Moses-Ones. Kjo është shfaqja e parë publike e Ilir Metës dhe Gramoz Ruçit, të dy bashkë, që pas vendimit të mazhorancës për shkarkimin e Presidentit. Të dy plitikanët kanë ndjekur fjalimin e Leyla Moses-Ones, e cila ka folur për bazën e funksionimit të shtetit në SHBA, Kushtetutën.

Në Shqipëri, mazhoranca e akuzon Ilir Metën si shkelës të Kushtetutës, me vendimin e datës 10 qershor, ku nxorri dekretin e anulimit të zgjedhjeve të 30 qershorit. Ky ishte një vendim i pabazuar në Kushtetutë, që solli më pas ashpërsimin e marrëdhënieve mes Presidentit dhe Qeverisë, deri në vendimin për shkarkimin e kreut të shtetit. Gjithashtu, Shtetet e Bashkuara të Amerikës, morën rol parësor në mbrojtjen e Kushtetutës së Shqipërisë, duke i dhënë të drejtë dekretit të fundvitit të kaluar, për zhvillimin e zgjedhjeve të 30 qershorit, si të vetmes datë legjitime kushtuese. Reagimi i SHBA-së për njohjen e 30 qershorit, u pasua nga sulme të paprecedenta të Presidentit ndaj partnerëve tanë strategjik.

Ndërkohë, në festën e organizuar nga ambasada e SHBA, kanë marrë pjesë edhe Lulzim Basha dhe Monika Kryemadhi, të cilët janë shfaqur të ndarë në këtë aktivitet. Në sy ka rënë mungesa e Kryeministrit Edi Rama. Mbetet e pakonfirmuar nëse kreu i Qeverisë ka pasur diçka tjetër në axhendë gjatë ditës së enjte, duke mos pasur mundësi për të marrë pjesë në këtë festë, apo kjo ka qenë një zgjedhje e vetë Ramës.

Kriza politike, Bundestagu: Në ndeshje bëhen gabime, por loja s’ndërpritet

“Gjatë një ndeshjeje mund të bëhen gabime, por loja nuk ndërpritet dhe ndeshja nuk braktiset”. Kështu ka deklaruar kreu i delegacionit të Bundestagut gjerman, Josip Juratovic, që zhvilloi një takim me kryetarin e Kuvendit, Gramoz Ruçi, teksa i është referuar krizës politike në Shqipëri. Juratovic tha se për arsye kohe, rekomandimi i KE do të shqyrtohet në vjeshtë, ndërsa e cilësoi të papranueshme braktisjen e parlamentit.

“E ardhmja europiane e Shqipërisë dhe e Ballkanit Perëndimor është një prioritet i vazhdueshëm i Bundestagut. Bundestagu është njohur me vlerësimin e Komisionit Europian, i cili rekomandon hapjen pa kushte të negociatave. Por për arsye kohe, do ta shqyrtojmë këtë rekomandim në vjeshtë. Unë kam disa mesazhe për politikanët shqiptarë. Të gjithë ju duhet ta kinit të qartë se bojkotimi i parlamentit është i papranueshëm, për standardet tona demokratike. Ne jemi të gatshëm t’ju ndihmojmë dhe kërkojmë vetëm të na bëni të qartë cilat janë nevojat tuaja prioritare. Gjatë një ndeshjeje mund të bëhen gabime, por loja nuk ndërpritet dhe ndeshja nuk braktiset.” – tha Juratovic

Shkarkimi i presidentit, PS dorëzon kërkesën për debat në Kuvend

Kreu i grupit parlamentar të Partisë Socialiste, Taulant Balla i ka nisur një letër kryetarit të Kuvendit, Gramoz Ruçi ku kërkon që në seancën parlamentare të ditës së enjte të zhvillohet një mocion debati në lidhje me vendimin e presidenti Meta për të çdekretuar zgjedhjet e 30 qershorit.

Në kërkesën drejtuar Kuvendit, Balla e cilëson vendimin e presidentit Meta të pavlefshëm dhe përtej kompetencave të tij në kundërshtim me parimet Kushtetuese.

Gjatë ditës së hënë, edhe ministrja e Shtetit për Marrëdhëniet me Parlamentin, Elisa Spiropali deklaroi se në seancën e së enjtes në Parlament do të kërkohet shkarkimi i presidentit Meta.

Ruçi merr votën e Polonisë për hapjen e negociatave mes Shqipërisë dhe BE

Kryetari i Kuvendit, Gramoz Ruçi priti të enjten në një takim Nënkryetarin e Parlamentit të Polonisë Terlecki.

Në këtë takim nënkryetari i parlamentit të Polonisë i tha Ruçit se 27 eurodeputetët polakë do të shprehen pro çeljes së negociatave mes Shqipërisë dhe BE-së, që në mbledhjen e parë që do të zhvillojë parlamenti evropian.

Terlecki tha se Polonia nxit Komisionin Europian të hapë menjëherë negociatat me Shqipërinë. Ai gjithashtu theksoi se “Zgjerimi i Europës është prioritet para forcimit të BE-së”.