Ç’po ndodh në Kamëz? Flakë në godinën e bashkisë, dyshohet se…

Një zjarr ka përfshirë këtë pardite Bashkinë e Kamzës. Ish-kryebashkiaku Xhelal Mziu publikon videon nga bashkia, ku duket tymi dhe flaka në hyrje të institucionit. Sipas ekipeve zjarrfikëse, flakët kishin rënë në një prej kokave të kondicionerëve që ndodheshin në pjesën e strehës në hyrje të institucionit. Mësohet se një prej kondicionerëve ka pësuar shkëndijë elektrike duke shkaktuar kështu zjarrin.

Ndërkohë, punonjësja e kësaj bashkie, Nertila Koka tha se zjarri nuk ka dëmtuar asnjë pjesë të godinës, ndërsa të hënën do të nisë puna.

“Nuk ka asnjë lloj pasoje. Incidenti u kontrollua në kohë, ka qenë incident pa pasoja. Ditën e hënë do të jenë të hapura, pasi kemi shumë punë dhe do iu shërbejmë qytetarëve”, tha ajo.

Asnjë shenjë nga i rrëmbyeri në Kamëz

Një makinë “Range Rover” me ngjyrë të bardhë është gjetur i djegur në rrethinat e Durrësit, ku dyshohet se është përdorur nga autorët e rrëmbimit të Jan Prengës në Kamëz. Makina ishte denoncuar e vjedhur pak orë para rrëmbimit të Prengës, ndërsa policia ka dyshime të forta se ajo është përdorur nga autorët që dhunuan e më pas rrëmbyen 49-vjeçarin dy ditë më parë.

Policia nuk ka ende asnjë të dhënë mbi vendndodhjen e 49-vjeçarit, e ndërsa në polici familjarët e tij kanë pohuar se nuk kanë konflikte me njeri.

Sipas dëshmitarëve dy persona me maska rrëmbyen 49-vjeçarin Jan Prenga duke e futur me dhunë në makinën e tyre. Kamerat e sigurisë në zonë zbuluan se autorët u larguan me një mjet tip “Range Rover” me ngjyrë të bardhë.

Ngjarja ndodhi rreth orës 11:44 minuta në rrugën “London” në Kamëz, e ndërsa mjeti i dyshuar i përdorur nga autorët është fiksuar të largohet në drejtim të Fushë-Krujës. Por vetëm pak orë më vonë, burime pranë grupit hetimor sqaruan se pikërisht ky mjet u gjet i djegur në rrethinat e Durrësit. Për policisë rrëmbimi i 49-vjeçarit me origjinë nga Puka e banues në Bathore mbetet ende një mister, pasi Jan Prenga nuk rezulton të jetë person me precedent të mëparshëm penalë.

Identifikohet pengu në Kamëz, dyshohet se ka pasur konflikte me rrëmbyesit

Jak Prenga, 49 vjeç, është personi që është dhunuar dhe më pas marrë peng nga persona ende të paidentifikuar në Kamëz. Ngjarja ka ndodhur rreth orës 11:44, në rrugën “London”, ku sipas policisë dy persona të maskuar kanë dhunuar 49-vjeçarin dhe më pas e kanë marrë peng duke e futur me dhunë në një automjet tip “Range Rover” me ngjyrë të bardhë.

Makina më pas është larguar në drejtim të Fushë Krujës, ndërsa automjeti i dyshuar si i autorëve, për herë të fundit është lokalizuar në zonën e njohur si “Ura e Gjolës”.

Në vendin e ngjarjes ka pasur njolla gjaku, që tregojnë se dhuna e ushtruar ndaj pengut ka qenë e rëndë. Policia ka gjetur një këpucë dhe një makinë, që dyshohet të jetë e personit të rrëmbyer. Ngjarja e rëndë është parë fillimisht nga një vajzë e vogël, e cila më pas ka lajmëruar disa persona të rritur, të cilët ndodheshin në krahun tjetër të pallatit, para të cilin ndodhi ngjarja.

Nuk dihen ende personat që e kanë dhunuar dhe më pas rrëmbyet Prengën, por dyshohet se ngjarja ka lidhje me konflikte të mëparshme mes rrëmbyesve dhe pengut.

Lëvizte me armë në Kamëz, arrestohet 41-vjeçari

Një 41-vjeçar u arrestua pasi u kap duke lëvizur me armë zjarri pa leje. Policia gjatë operacionit të koduar “Ekol” arrestoi në flagrancë shtetasin me iniciale A.K., 41 vjeç, në zonën e quajtur “Frutikulturë” në Kamëz, ku iu gjet një pistoletë pa leje.

41-vjeçari nuk ishte një emër i panjohur për policisë, pasi ka qenë i dënuar edhe më parë. Gjatë kontrollit në banesë atij iu gjet edhe një armë zjarri kallashnikov, me një krehër me 30 fishekë luftarakë.

I arrestuari do të përballet me drejtësinë për akuzën e “armëmbajtjes pa leje”.

Përplaset për vdekje 35-vjeçarja në Kamëz

Një 35-vjeçare me inicialet P.A, humbi jetën tragjikisht pasditen e të shtunës, pasi u përplas nga një mjet në “Bulevardin Blu” në Kamëz.

Sipas informacionit zyrtar të Policisë, mësohet se 35-vjeçarja ishte duke ecur në këmbë, kur një mjet e përplasi për vdekje.

Makina që aksidentoi të renë drejtohej nga një femër me inicialet B.D. Drejtuesja e mjetit është shoqëruar në polici pas aksidentit.

Ndërkohë, në vendin e gjarjes shkoi grupi hetimor dhe po punon për të zbardhur shkaqet dhe rrethanat e aksidentit tragjik.

Plagosën 39-vjeçarin, në pranga dy vëllezër

Një sherr mes 4 personave ka çuar në plagosjen e njërit prej tyre me thikë. Ngjarja ka ndodhur në Kamëz, ku 3 vëllezër pas një sherri për motive të dobëta kanë plagosur një person tjetër dhe më pas janë larguar nga vendi i ngjarjes.

Policia ka bërë të mundur arrestimin e dy prej vëllezërve, përkatësisht G. M., 39 vjeç dhe L. M., 36 vjeç , dhe ka shpallur në kërkimi vëllain e tretë shtetasin A. M., 42 vjeç, të tre banues në Kamëz.

Të tre vëllezërit, në bashkëpunim me njëri-tjetrin, në rrugën “Teuta”, pas një konflikti për motive të dobëta, kanë goditur me mjet prerës shtetasin L. D., 39 vjeç, i cili ndodhet në spital nën kujdesin mjekësor. Gjatë kontrollit në banesën e autorëve, policia gjeti 4 armë gjahu.

Gjithashtu është proceduar në gjendje të lirë edhe i plagosuri, pasi gjatë kontrollit të banesës së tij iu gjetën një sasi lënde narkotike.

Shpërthim në Kamëz. Tritol banesës pas konfliktit familjar

Një shpërthim i fuqishëm ka ndodhur mbrëmjen e së hënës rreth orës 22.14 në Kamëz. Policia njofton se shpërthimi ka ardhur si pasojë e një eksplozivi të vendosur në banesën e shtetasit Gjergj Kola.

Fatmirësisht nga ky shpërthim nuk ka pasur të lënduar edhe pse në banesë kanë qenë disa persona.

Banesës që i është vënë eksplozivi është në pronësi të Gjergj Kolës dhe ndodhet në lagjen nr.4, rruga Kosova në Kamëz.

Sipas policisë nga hetimet paraprake, dyshohet se shkaku i këtij sulmi me eksploziv ka ardhur si pasojë e konflikteve të mundshme familjare që Gjergj Kola ka patur.

Madje policia bën të ditur se e ka zbuluar autorin e këtij krimi, por nuk jep detaje të mëtejshme për arsye hetimore dhe për të bërë të mundur kapjen sa më parë të tij.

Bashkia e Kamzës ndryshon sot kryetarin. A do të përsërisë PD skenarin e Devollit?

Të mërkurën (sot) pritet të bëhet betimi i kryetarit të ri të Bashkisë së Kamzës, Rakip Suli, i dalë nga procesi zgjedhor i 30 qershorit. Prefektja e Tiranës, Suzana Jahollari ka thirrur mbledhjen e parë të Këshillit Bashkiak të Kamzës që do të bëhet në ambientet e shkollës “Hillary Clinton” në qendër të Kamzës. Por, ky vendim i marrë nga prefektja e Tiranës solli edhe reagimin e Partisë Demokratike. PD akuzoi Jahollarin se ka abuzuar me detyrën dhe për këtë, PD ka bërë kallëzim penal ndaj saj.

Sipas selisë blu mbledhja e Këshillit Bashkiak të Kamzës është thirrur para kohe, pasi këshilli aktual ka mandat deri në datë 14 gusht.

“Padurimi i Edi Ramës për të kontrolluar çdo pushtet në vend dhe, nëpërmjet tij, të grabisë çdo pasuri të vendit, e ka shtyrë atë në thellimin e paligjshmërisë së 30 qershorit, duke urdhëruar prefekten e Tiranës të uzurpojë kompetencat e pushtetit lokal në Bashkinë e Kamzës. Këshilli Bashkiak i Kamzës ishte thirrur për konstituim në datën 14 gusht nga sekretari aktual i Këshillit, por, në shkelje flagrante të ligjit, prefektja e Tiranës ka vendosur që e njëjta mbledhje të bëhet nesër, sepse Edi Ramës nuk i pritet që të pushtojë Bashkinë e Kamzës. Ligji i pushtetit lokal ia jep këtë kompetencë sekretarit aktual, por, megjithëse ai e ka ushtruar atë rregullisht, duke thirrur konstituimin e Këshillit Bashkiak të Kamzës brenda afatit, përfaqësuesja e Edi Ramës ka vendosur të cenojë autonominë e pushtetit lokal dhe të uzurpojë kompetencën e sekretarit të Këshillit Bashkiak”, deklaroi Spaho.

Bashkia e Kamzës e drejtuar nga Xhelal Mziu shihet si një ndër bastionet më të forta të PD-së. Mziu njëlloj si Voltana e Shkodrës kanë deklaruar se nuk do e lëshojnë zyrën deri në zhvillimin e zgjedhjeve të lira e të ndershme. Nuk dihet ende se si do të veprojë Mziu sot kur të betohet kryebashkiaku i ri i Kamzës dhe nëse PD do të përsërisë skenarin për mbrojtjen e bashkisë njëlloj siç ndodhi në Devoll dhe Kavajë.

Në të dyja këto bashki të djathta militantët demokratë zhvilluan protesta për gati 8 orë dhe nuk lejuan kryebashkiakët e rinj që të merrnin zyrat, por pas këtij orari zyrtar ata u dorëzuan pavarësisht se në instruksionet në dokumentet e partisë Demokratike deklarohet që “populli” do të përgjigjet për zgjedhjet e paligjshme të 30 qershorit.

Sipas një dokumenti të publikuar nga Realstory.al, demokratët u urdhëruan nga lidershipi që të bëjnë qëndresë dhe të mbrojnë me çdo kusht dhe me çdo mjet bashkitë e djathta, pasi zgjedhjet e 30 qershorit janë të paligjshme. Këtë deklaratë kreu i PD-së Basha, përveç dokumentit të shpërndarë e bëri dhe vetë me zë e figurë gjatë një takimi në Devoll. Por ai u tradhtua nga të vetët, pasi militantët e PD-së nuk qëndruan në protestë me shumë se 8 orë dhe u shpërndanë duke dështuar skenarin e dhunës të përgatitur nga lidershipi. Vlen për t’u parë nëse Basha do ta provojë edhe njëherë në Kamëz këtë skenar, apo është tërhequr përfundimisht nga bllokimi i bashkive./Realstory.al

AKU mbyll restorantin dhe marketin në Kamëz, shkelje të rënda të sigurisë ushqimore

Autoriteti Kombëtar i Ushqimit ka mbyllur në mënyrë të menjëhershme një restorant dhe një market në Kamëz, duke i gjobitur gjithashtu me një gjobë me vlerë totale prej 5.3 milion lekësh. Sipas AKU, subjekti “Mexhit Hoxha”, i cili kishte një restorant në Kamëz, ka ushtruar aktivitetin në mënyrë të paligjshme pa pasur liçensën përkatëse, e njëkohësisht, gjatë kontrolleve në këtë subjekt janë gjetur shkelje të rënda të sigurisë ushqimore.

Gjatë kontrolleve, është gjetur se firgoriferët e këtij restoranti ishin të amortizuar dhe me prani ndryshku, mungonte analiza e ujit ndërsa lavamani ka qenë i dëmtuar. Në këto kushte, AKU ka gjobitur me 2.7 milion lekë këtë biznes, dhe njëkohësisht duke mbyllur aktivitetin.

Gjithashtu, subjekti “Tahir Buci” me aktivitet “Market” po në Kamëz, ushtronte veprimtarinë i papajisur me licencën përkatëse, pa manualin/sistemin e vetëkontrollit HACCP (nuk mbante regjistra për monitorimin e temperaturave në ambientet frigoriferike, nuk mbante regjistra pastrimi dhe dezinfektimi etj.), si dhe nuk posedonte sistemin e gjurmueshmërisë për produktet që tregtonte. Ndaj këtij biznesi, AKU ka vendosur një gjobë me vlerë prej 2.6 milion lekësh, njëkohësisht duke mbyllur edhe aktivitetin tregtar.

Dhunuan efektivët e policisë, arrestohen 3 të rinjtë në Kamëz

Tre persona të shpallur në kërkim pasi kundërshtuan me dhunë efektivët e policisë janë arrestuar. Ngjarja ka ndodhur 3 ditë më parë, në një lokal në Kamëz, ku policia vajti pas denoncimit për zhurmën dhe ndotje akustike deri në orët e vona të natës. 3 personat kanë kundërshtuar me dhunë policinë për të mos lejuar mbylljen e lokalit dhe më pas janë larguar.

Pas kërkimit nga policia , në pranga kanë rendë shtetasit Elson Koldashi, 24 vjeç, Festim Tanushi, 23 vjeç dhe Ardjan Hamzaj, 29 vjeç, të tre banues në Kamëz.

Tre të rinjtë do të përballen me akuzat për veprat penale “Plagosja e lehtë me dashje e kryer në bashkëpunim”, “Kundërshtimi i punonjësit të Policisë së Rendit Publik” dhe “Goditjet për shkak të detyrës”.